Baptisimi Kɛ Huɛ Bɔmi Nɛ Maa Hi O Kɛ Mawu Nyɛ Kpɛti

1. Mɛni he je nɛ Etiopia sɔmɔlɔ nɔkɔtɔma ko bi kaa a baptisi lɛ ɔ?

‘O NƐ nyu; mɛni maa tsi ye baptisimi nya?’ Etiopia sɔmɔlɔ nɔkɔtɔma ko lɛ bi sane nɛ ɔ ngɛ kekle Kristofo ɔmɛ a be ɔ mi. Kristofo no ko nɛ a tsɛɛ lɛ Filipo tsɔɔ lɛ níhi a nya, nɛ e na kaa Yesu ji Mesia nɛ a wo e he si ɔ nɛ. Nɔ́ nɛ Etiopia nyumu ɔ kase kɛ je Ngmami ɔ mi ɔ sɛ e tsui mi, nɛ lɔ ɔ ha e pee he nɔ́ ko amlɔ. E de kaa e suɔ nɛ a baptisi lɛ!​—Bɔfo Ɔmɛ A Ní Tsumi 8:26-36.

2. Mɛni he je nɛ e sa kaa o kɛ hɛdɔ nɛ susu baptisimi he?

² Ke Yehowa Odasefo ɔmɛ a ti nɔ kake kɛ mo kase womi nɛ ɔ kekle yi ɔ kɛ ba su yi nɛ ɔ nɔ ɔ, eko ɔ, mo hu e maa pee mo kaa o bi ke, ‘Mɛni maa tsi ye baptisimi nya?’ Kɛ ba si amlɔ nɛ ɔ, o kase Baiblo ɔ siwo nɛ kɔɔ neneene wami ngɛ Paradeiso mi ɔ he. (Luka 23:43; Kpojemi 21:3, 4) O kase si fɔfɔɛ tutuutu mi nɛ gbogboe ɔmɛ ngɛ, kɛ gbogboehi a si temi hɛ nɔ kami ɔ he ní. (Fiɛlɔ 9:5; Yohane 5:28, 29) Eko ɔ, o yaa asafo mi kpehi nɛ Yehowa Odasefohi peeɔ ɔ, nɛ mo nitsɛ o na bɔ nɛ a ngɔ anɔkuale jami ɔ kɛ ngɛ a je mi bae ha. (Yohane 13:35) Nɔ́ nɛ pe kulaa ji kaa eko ɔ, o kɛ Yehowa Mawu bɔni huɛ bɔmi momo.

3. (a) Mɛni fami Yesu kɛ ha e se nyɛɛli ɔmɛ? (b) Kɛ a peeɔ nyu mi baptisimi kɛɛ?

³ Mɛni o maa pee kɛ tsɔɔ kaa o suɔ nɛ o sɔmɔ Mawu? Yesu de e se nyɛɛli ɔmɛ ke: ‘Nyɛɛ ya nɛ nyɛ ya pee je ma amɛ tsuo ye kaseli, nyɛɛ baptisi mɛ.’ (Mateo 28:19) Yesu nitsɛ ha a baptisi lɛ ngɛ nyu mi kɛ pee nɔ hyɛmi nɔ́ ha wɔ. A fĩa we nyu kɛ pue we e nɔ, nɛ a plɛ we nyu bɔɔ kɛ pue we e yi mi hulɔ. (Mateo 3:16) A je munyungu “baptisi” ɔ kɛ je Hela munyungu nɛ e sisi ji “a mu ngɛ nyu mi” ɔ mi. Enɛ ɔ he ɔ, Kristofohi a baptisimi ɔ tsɔɔ kaa e sa kaa a ngɔ nɔ kɛ wo nyu sisi, nɛ a wo e nɔ.

4. Mɛni nyu mi nɛ a baptisii nɔ ngɛ ɔ tsɔɔ?

⁴ Nɔ tsuaa nɔ nɛ suɔ kaa e kɛ Yehowa Mawu maa pee huɛ ɔ, e sa kaa a baptisi lɛ. O baptisimi ji nɔ́ nɛ ma ha nihi maa na kaa o suɔ nɛ o sɔmɔ Mawu. E tsɔɔ kaa o suɔ nɛ o pee Yehowa suɔmi nya ní. (La 40:7, 8) Se loko o maa sa kɛ ha baptisimi ɔ, e biɔ nɛ o pee ní komɛ.

NILE KƐ HEMI KƐ YEMI HE HIA

5. (a) Mɛni ji kekleekle nɔ́ nɛ e sa kaa o pee konɛ o sa kɛ ha baptisimi? (b) Mɛni he je Kristofohi a kpehi a he hia wawɛɛ ɔ?

⁵ O je nɔ́ kekleekle nɛ e sa kaa o pee ɔ sisi momo. Ngɛ mɛni blɔ nɔ? Kɛ gu Baiblo ɔ nɛ o kase bɔɔbɔɔbɔɔ ɔ nɔ ɔ, o ba le Yehowa Mawu kɛ Yesu Kristo. (Kane Yohane 17:3.) Se níhi fuu ngɛ nɛ e sa kaa o kase kɛ piɛɛ he. Kristofohi suɔ kaa a ‘le Mawu suɔmi nya ní.’ (Kolose Bi 1:9) Yehowa Odasefohi a kpehi nɛ o maa ya a maa ye bua mo wawɛɛ. E he hia nɛ o ya kpe nɛ ɔmɛ. (Hebri Bi 10:24, 25) Kpe nɛ o maa ya daa a maa ye bua mo nɛ o maa le Mawu.

6. Baiblo ɔ mi ní enyɛmɛ e sa kaa o le loko a baptisi mo?

⁶ E he hia we kaa o le nɔ́ tsuaa nɔ́ ngɛ Baiblo ɔ mi loko a baptisi mo. Etiopia sɔmɔlɔ nɔkɔtɔma a le ní komɛ, se e hia yemi kɛ buami konɛ e nu Ngmami ɔ mi ní kpa komɛ hu a sisi. (Bɔfo Ɔmɛ A Ní Tsumi 8:30, 31) Jã kɛ̃ mo hu níhi babauu ngɛ nɛ o maa kase. Ngɛ anɔkuale mi ɔ, Mawu he ní nɛ o maa kase ɔ be nyagbe bae kɔkɔɔkɔ. (Fiɛlɔ 3:11) Se loko a maa baptisi mo ɔ, e sa kaa o le Baiblo sisije tsɔɔmi ɔmɛ nɛ o kplɛɛ a nɔ. (Hebri Bi 5:12) Kaa nɔ hyɛmi nɔ́ ɔ, e sa nɛ o le si fɔfɔɛ mi nɛ gbogboe ɔmɛ ngɛ, se nami nɛ ngɛ Mawu biɛ ɔ, kɛ e Matsɛ Yemi ɔ he nɛ o kplɛɛ nɔ.

7. Kɛ e sa kaa Baiblo ɔ nɛ o ngɛ kasee ɔ nɛ ná o nɔ he wami ha kɛɛ?

⁷ Pi nile pɛ kɛkɛ nɛ e sa kaa o ná, ejakaa “ke nɔ ko be hemi kɛ yemi ɔ, e be nyɛe maa sa Mawu hɛ mi.” (Hebri Bi 11:6) Baiblo ɔ de wɔ kaa benɛ ni komɛ nɛ hi blema Korinto ma a mi ɔ nu sɛ gbi nɛ Kristofo ɔmɛ fiɛɛ ɔ, ‘a he ye, nɛ a baptisi mɛ.’ (Bɔfo Ɔmɛ A Ní Tsumi 18:8) Jã nɔuu e sa kaa Baiblo ɔ nɛ o ngɛ kasee ɔ nɛ ha mo hu o he ye kaa e ji Mawu Munyu nɛ a je mumi mi kɛ ngma. E sa kaa Baiblo ɔ nɛ o ngɛ kasee ɔ nɛ ha nɛ o ná hemi kɛ yemi ngɛ Mawu si womi ɔmɛ a mi, nɛ e ye bua mo konɛ o he ye hu kaa Yesu afɔle sami ɔ ma nyɛ ma he o yi wami.​—Yoshua 23:14; Bɔfo Ɔmɛ A Ní Tsumi 4:12; 2 Timoteo 3:16, 17.

BAIBLO Ɔ MI ANƆKUALE Ɔ NƐ O MAA SƐƐ HA NIHI

8. Mɛni ma ha o maa suɔ wawɛɛ kaa o maa sɛɛ níhi nɛ o kase ɔ ha nihi?

⁸ Benɛ o hemi kɛ yemi ɔ ngɛ wae ɔ, o maa na kaa o be nyɛe ma ma o nya ngɔ to níhi nɛ o kase ɔ nɔ hu. (Yeremia 20:9) O maa suɔ wawɛɛ kaa o sɛɛ Mawu kɛ e yi mi tomi ɔmɛ a he ní ha nihi.​—Kane 2 Korinto Bi 4:13.

9, 10. (a) Mɛnɔmɛ o ma nyɛ ma bɔni Baiblo ɔ mi anɔkuale ɔ sɛɛmi ha? (b) Ke o suɔ kaa o piɛɛ Yehowa Odasefohi a he kɛ ya fiɛɛmi ɔ, mɛni e sa nɛ o pee?

⁹ O ma nyɛ maa gu ga blɔ nɔ nɛ o bɔni Baiblo ɔ mi anɔkuale ɔ sɛɛmi ha o weku li, o huɛmɛ, nihi nɛ o kɛ mɛ tsuɔ ní, kɛ o kpɔ ɔ mi bi. Be ko se ɔ, o maa suɔ kaa o piɛɛ Yehowa Odasefohi a he kɛ ya fiɛɛmi. Ke jã a, o kɛ Odasefo no ɔ nɛ kɛ mo ngɛ Baiblo ɔ kasee ɔ nɛ sɛɛ he ní. Ke o sa fiɛɛmi yami ɔ, asafo mi nikɔtɔma amɛ maa to blɔ nya, nɛ a kpɛti ni enyɔ kɛ mo, kɛ nɔ nɛ ngɛ mo ní ɔ tsɔɔe ɔ maa sɛɛ ní.

¹⁰ Enɛ ɔ ma ha nɛ o maa le Kristofohi asafo ɔ mi nikɔtɔma amɛ nɛ kpakaa Yehowa to ɔmɛ ɔ a ti ni komɛ saminya. (Bɔfo Ɔmɛ A Ní Tsumi 20:28; 1 Petro 5:2, 3) Ke nikɔtɔma amɛ na kaa o nu Baiblo sisije tsɔɔmi ɔmɛ a sisi, nɛ o he ye hulɔ, nɛ o je mi bami kɛ Mawu sisi tomi mlaa amɛ kɔ, nɛ o suɔ niinɛ kaa o maa pee Yehowa Odasefo no ɔ, a ma ha mo lemi kaa o ma nyɛ maa pee sane kpakpa fiɛɛlɔ nɛ a baptisi we lɛ lolo.

11. Mɛni tsakemi komɛ e maa hia kaa ni komɛ nɛ pee loko a sa ha fiɛɛmi yami?

¹¹ Se eko ɔ, nikɔtɔma amɛ maa na kaa e sa nɛ o pee tsakemi komɛ ngɛ o je mi bami kɛ o ní peepee komɛ a mi loko o bɔni fiɛɛmi yami. Eko ɔ, e he maa hia kaa o kpa ní komɛ nɛ o peeɔ ngɛ laami mi. Enɛ ɔ tsɔɔ kaa loko o ma bi kaa o suɔ nɛ o pee fiɛɛlɔ nɛ a baptisi we lɛ lolo ɔ, e sɛ kaa o peeɔ yayamihi nɛ ngɛ hɛdɔ kaa ajuama bɔmi ní peepeehi, dã demi, kɛ tsopa yayahi kɛ ní tsumi.​—Kane 1 Korinto Bi 6:9, 10; Galatabi 5:19-21.

TSUI TSAKEMI KƐ SE KPALEMI

12. Mɛni he je tsui tsakemi he hia?

¹² E sa kaa o pee ní kpa komɛ hu loko a baptisi mo. Bɔfo Petro de ke: “Nyɛ tsake nyɛ tsui, nɛ nyɛɛ kpale nyɛ se kɛ ba Mawu ngɔ, konɛ a ngɔ nyɛ he yayami ɔmɛ kɛ pa nyɛ.” (Bɔfo Ɔmɛ A Ní Tsumi 3:19) Ke a ke o tsake o tsui ɔ, e tsɔɔ o he nɛ o ma pia ngɛ anɔkuale mi ngɛ nɔ́ ko nɛ o pee ɔ he. Tsui tsakemi he hia titli ke nɔ ko ba e je mi basabasa. Se ke nɔ ɔ je mi bami he tsɔ po ɔ, kɛ̃ ɔ, tsui tsakemi he hia lɛ. Mɛni he je? Ejakaa adesahi tsuo ji yayami peeli nɛ a hia Mawu dɛ mi yayami pami. (Roma Bi 3:23; 5:12) Benɛ o kase we Baiblo ɔ lolo ɔ, o li Mawu suɔmi nya ní. Lɔ ɔ he ɔ, kɛ o ma plɛ kɛ hi si bɔ nɛ sa Mawu hɛ mi kɛɛ? Enɛ ɔ he ɔ, tsui tsakemi he hia.

13. Mɛni ji se kpalemi?

¹³ Nɔ́ nɛ nyɛɛɔ tsui tsakemi se ji se kpalemi. Pi o he kɛkɛ nɛ o ma pia. E sa nɛ o kpa o je mi bami momo ɔ, nɛ o fia o pɛɛ si kaa kɛ je amlɔ nɛ ɔ kɛ yaa a, o maa pee nɔ́ nɛ da. Tsui tsakemi kɛ se kpalemi ji níhi nɛ e sa kaa o pee loko a baptisi mo.

O HE NƆ NƐ O MAA JƆƆ

14. Mɛni ji nɔ́ kpa nɛ he hia nɛ sa kaa o pee loko a baptisi mo?

¹⁴ Nɔ́ kpa ko hu ngɛ nɛ he hia kaa o pee loko a baptisi mo. E sa nɛ o jɔɔ o he nɔ ha Yehowa Mawu.

15, 16. Mɛni o he nɔ nɛ o maa jɔɔ ha Mawu ɔ tsɔɔ, nɛ mɛni woɔ nɔ gɛjɛmi nɛ e peeɔ enɛ ɔ?

¹⁵ Ke o jɔɔ o he nɔ ha Yehowa Mawu ngɛ sɔlemi mi ɔ, e tsɔɔ kaa o wo lɛ si kaa lɛ pɛ o ma sɔmɔ kɛ ya neneene. (5 Mose 6:15) Se mɛni he je nɛ nɔ ko maa suɔ kaa e ye nyɔguɛ ha Mawu? Yoo, waa ngɔ lɛ kaa nyumu ko na yo ko nɛ́ e suɔ kaa e ngɔ. Benɛ e ngɛ yo ɔ he hɛ toe nɛ e ngɛ e suhi nɛ ngɛ fɛu ɔ yɔsee ɔ, lɔ ɔ ma ha nɛ e maa suɔ e sane wawɛɛ. E ngɛ heii kaa pee se ɔ, e ma de yo ɔ ke e suɔ nɛ e ngɔ lɛ. Niinɛ, yo ngɔmi ma ha blɔ nya ní tsumi kpahi ma ba fɔ nyumu ɔ nɔ mohu. Se suɔmi maa wo lɛ gɛjɛmi konɛ e pee jã.

¹⁶ Ke o ba le Yehowa nɛ o suɔ lɛ hulɔ ɔ, lɔ ɔ maa wo mo gɛjɛmi nɛ o ma sɔmɔ lɛ kɛ pi si. Nɔ tsuaa nɔ nɛ suɔ kaa e nyɛɛ Mawu Bi Yesu Kristo se ɔ, e sa kaa “e kua e he.” (Marko 8:34) Ke wa ha we nɛ wa tsui nya níhi kɛ níhi nɛ wa suɔ kaa waa di se nɛ tsi wɔ blɔ ngɛ tue bumi nɛ wa maa pee ha Mawu ɔ mi ɔ, lɛɛ wa ngɛ tsɔɔe kaa wa kua wa he. Enɛ ɔ he ɔ, loko a maa baptisi mo ɔ, e sa kaa Yehowa Mawu suɔmi nya ní peemi nɛ pee oti ngɛ o si himi mi.​—Kane 1 Petro 4:2.

HE NƆ JƆƆMI HE GBEYE YEMI NƆ KUNIMI NƐ O MAA YE

17. Mɛni he je ni komɛ tsɛ̃ɛ a he nɔ nɛ a maa jɔɔ ha Mawu ɔ kɛ toɔ?

¹⁷ Ni komɛ tsɛ̃ɛ a he nɔ nɛ a maa jɔɔ ha Yehowa kɛ toɔ, ejakaa a ngɛ nane hiami nɛ ngɛ hɛdɔ nɛ ɔ he gbeye yee. Eko ɔ, a ngɛ gbeye yee kaa a maa bu akɔtaa ha Mawu kaa Kristofohi nɛ jɔɔ a he nɔ. Akɛnɛ a yeɔ gbeye kaa a ma ya tla blɔ, nɛ lɔ ɔ maa hao Yehowa he je ɔ, e peeɔ mɛ kaa e maa hi mohu ke a jɔɔ we a he nɔ kulaa.

18. Mɛni maa wo mo gɛjɛmi konɛ o jɔɔ o he nɔ ha Yehowa?

¹⁸ Ke o ba ná suɔmi ha Yehowa a, lɔ ɔ maa wo mo gɛjɛmi nɛ o maa jɔɔ o he nɔ ha lɛ, nɛ o maa bɔ mɔde kaa o maa nyɛɛ ngɛ nya. (Fiɛlɔ 5:4) Ke o jɔɔ o he nɔ se ɔ, e ngɛ heii kaa o maa suɔ kaa ‘o ba o je mi bɔ nɛ maa sa Yehowa hɛ mi.’ (Kolose Bi 1:10) Akɛnɛ o suɔ Mawu he je ɔ, e he be wae ha mo kaa o maa pee e suɔmi nya ní. Nɔ́ jemi ko be he kaa o kɛ bɔfo Yohane ma kpã gbi. E ngma ke: “Ke wa suɔ Mawu ɔ, wa yeɔ e mlaa amɛ a nɔ. Nɛ e mlaa amɛ a nɔ yemi wɛ kulaa.”​—1 Yohane 5:3.

19. Mɛni he je nɛ e sɛ nɛ o ye gbeye kaa o maa jɔɔ o he nɔ ha Mawu?

¹⁹ E he hia we kaa o ye mluku loko o jɔɔ o he nɔ ha Mawu. Yehowa le o fã tɔmi ɔmɛ nɛ e be bie kaa o pee nɔ́ ko nɛ pã mo kɔkɔɔkɔ. (La 103:14) E suɔ kaa o ye manye, nɛ e ma fĩ o se nɛ e maa ye bua mo. (Kane Yesaya 41:10.) Mo ná nɔ mi mami kaa, ke o ngɔ o he kɛ fɔ Yehowa nɔ kɛ o tsui tsuo ɔ, ‘e ma ha o blɔ ɔmɛ maa da.’​—Abɛ 3:5, 6.

BAPTISIMI NƐ O KƐ MAA PEE O HE NƆ JƆƆMI Ɔ HE OKADI

20. Mɛni he je o he nɔ nɛ o maa jɔɔ ha Yehowa be kɔkɔɔ mi nɔ́ pee daa?

²⁰ Níhi nɛ wa sɛsɛ he ɔmɛ a he nɛ o ma susu ɔ maa ye bua mo, konɛ o jɔɔ o he nɔ ha Yehowa ngɛ sɔlemi mi. E sa kaa nɔ tsuaa nɔ nɛ suɔ Yehowa ngɛ anɔkuale mi ɔ, e ‘kɛ e nya nɛ jaje ngɛ ma hɛ mi kɛ ya yi wami hemi mi.’ (Roma Bi 10:10) Kɛ o ma plɛ kɛ jaje ngɛ ma hɛ mi kɛɛ?

21, 22. Kɛ o ma plɛ ‘kɛ jaje o hemi kɛ yemi ɔ ngɛ ma hɛ mi’ kɛɛ?

²¹ Mo ha nɛ nikɔtɔmahi a kuu ɔ sanehi a he blɔ nya tolɔ ɔ ngɛ nyɛ asafo ɔ mi ɔ nɛ le kaa o suɔ nɛ a baptisi mo. E maa to blɔ nya nɛ asafo ɔ mi nikɔtɔmahi komɛ kɛ mo ma susu Baiblo sisije tsɔɔmi ɔmɛ a he sane bimi komɛ a he. Ke nikɔtɔma amɛ na kaa o sa baptisimi ɔ, a ma de mo kaa a maa baptisi mo ngɛ kpe nɛ a maa ya a.a A ma ha nɔ́ nɛ baptisimi tsɔɔ ɔ he munyu ngɛ kpe ɔ sisi. Lɔ ɔ se ɔ, munyu tulɔ ɔ ma bi nihi nɛ a maa baptisi mɛ ɔ munyu kpitikpiti enyɔ konɛ a ha heto. Enɛ ɔ ji blɔ kake nɔ nɛ a guɔ ‘kɛ jaje ɔ a hemi kɛ yemi ɔ ngɛ ma hɛ mi.’

²² Baptisimi ɔ ji nɔ́ nɛ kadiɔ mo ngɛ ma hɛ mi kaa o jɔɔ o he nɔ ha Mawu, nɛ jehanɛ ɔ, o plɛ pee Yehowa Odasefo ɔmɛ a ti nɔ kake. A muɔ nihi nɛ a maa baptisi mɛ ɔ ngɛ nyu mi kɛ tsɔɔ nihi kaa a jɔɔ a he nɔ ha Yehowa.

NƆ́ NƐ O BAPTISIMI Ɔ TSƆƆ

23. Ke a baptisi nɔ ‘kɛ wo Tsɛ ɔ, kɛ Bi ɔ, kɛ mumi klɔuklɔu ɔ biɛ mi’ ɔ, mɛni e tsɔɔ?

²³ Yesu de ke a maa baptisi e kaseli ɔmɛ ‘kɛ wo Tsɛ ɔ, kɛ Bi ɔ, kɛ mumi klɔuklɔu ɔ biɛ mi.’ (Mateo 28:19) Enɛ ɔ tsɔɔ kaa nɔ nɛ a maa baptisi lɛ ɔ kplɛɛ blɔ nya nɛ Yehowa Mawu kɛ Yesu Kristo ngɛ ɔ nɔ. (La 83:18; Mateo 28:18) Nɛ e kplɛɛ Mawu mumi klɔuklɔu ɔ loo he wami nɛ e kɛ tsuɔ ní ɔ hu nɔ.​—Galatia Bi 5:22, 23; 2 Petro 1:21.

24, 25. (a) Mɛni baptisimi daa si ha? (b) Mɛni sane bimi a ma ha wɔ heto?

²⁴ Se baptisimi pi nɔ he dumi ngɛ nyu mi kɛkɛ. E daa si ha nɔ́ ko nɛ he hia saminya. Ke a ngɔ mo kɛ wo nyu ɔ sisi ɔ, e tsɔɔ kaa o gbo ha o sa si himi ɔ. Nɛ ke a wo o nɔ kɛ je nyu ɔ mi ɔ, e tsɔɔ kaa o ba wami mi ekohu konɛ o ba pee Mawu suɔmi nya ní. Mo kai hu kaa, o jɔɔ o he nɔ ha Yehowa Mawu nitsɛ, se pi kɛ ha ní tsumi, loo adesahi, loo blɔ nya tomi ko. O he nɔ jɔɔmi kɛ baptisimi ɔ ji huɛ bɔmi nɛ mi wa nɛ o kɛ Mawu ma ná a sisije.​—La 25:14.

²⁵ Ke a baptisi mo ɔ, lɔ ɔ tsɔɔ we kaa bɔ tsuaa bɔ nɛ ji ɔ, a ma he o yi wami. Bɔfo Paulo ngma ke: ‘Nyɛɛ kɛ gbeye yemi, kɛ he domi nɛ tsu ní wawɛɛ, konɛ a he nyɛ yi wami.’ (Filipi Bi 2:12) Baptisimi ji kekleekle nane hiami kɛkɛ nɛ kɛ nɔ yaa yi wami hemi mi. Lɔ ɔ he ɔ, sane bimi ɔ ji, mɛni blɔ nɔ o maa gu kɛ hi Mawu suɔmi ɔ mi? Wa nyagbe yi ɔ ma ha wɔ heto.