Matsɛ Yemi Sɛ Gbi 37

Sɛgbi Kɛ Ha Je Kɛ Wɛ Tsuo

Lakpa Jami Nyagbe Su Ta!

▪ Mɛni ji lakpa jami?

▪ Kɛ e nyagbe ma plɛ kɛ ba kɛɛ?

▪ Kɛ e ma kɔ o he kɛɛ?

Mɛni ji lakpa jami?

Anɛ o haoɔ ngɛ ní yayamihi nɛ nihi peeɔ ngɛ Mawu jami biɛ mi ɔ he lo? Anɛ ta hwumi, awi yemi nɛ́ a kɛ tuaa nɔ kɛ ju kɛ fɔ̃ ní peepeehi nɛ nihi nɛ tsɛɛ a he Mawu jali ngɔɔ a he kɛ woɔ mi ɔ haoɔ mo lo? Mɛni heje nɛ e ngɛ kaa nɔ́ nɛ jami nɛ ngɔ haomi babauu kɛ ngɛ bae ɔ?

Lakpa jami ji nɔ́ nɛ ngɔ haomi ɔmɛ kɛ ngɛ bae, se pi jamihi tsuo. Jami hɛ mi nyɛɛlɔ ko nɛ a buu lɛ saminya nɛ ji Yesu Kristo tsɔɔ nya kaa lakpa jami haa nɛ nihi peeɔ nɔ́ yayami, kaa bɔnɛ ‘tso yaya hu woɔ yiblii yayahi ɔ.’ (Mateo 7:15-17) Mɛni yiblii lakpa jami woɔ?

◼ LAKPA JAMI NGƆƆ E HE KƐ WOƆ TA HWUMI KƐ MA KUDƆMI SANEHI A MI: Adafi fiami womi ko nɛ a tsɛɛ lɛ Asiaweek ɔ de ke: “Ngɛ Asia kɛ ma kpahi komɛ a nɔ ɔ, jami hɛ mi nyɛɛli nɛ a ngɛ hlae kaa a he biɛ ɔ ngɛ nihi a juɛmi ngɛ jami he kudɔe konɛ a kɛ ná mɛ nitsɛmɛ a hiami níhi.” Enɛ ɔ he ɔ, womi ɔ bɔ kɔkɔ ke: “E piɛ bɔɔ nɛ je ɔ maa pee bisibasaa.” Jami hɛ mi nyɛɛlɔ ko nɛ he biɛ wawɛɛ ngɛ United States de ke: “Ja a gbe awi yeli ɔmɛ loko nɔ gbemi se maa po.” Mɛni ji tsaba nɛ e kɛ ha? “Nyɛɛ gbe awi yeli ɔmɛ tsuo ngɛ Mawu biɛ mi.” Se enɛ ɔ teɔ si woɔ nɔ́ nɛ Baiblo ɔ de ɔ ke: “Ke nɔ ko ke e suɔ Mawu, se e nyɛɛ e nyɛmi ɔ, lakpatsɛ ji lɛ.” (1 Yohane 4:20) Yesu de po ke: “Nyɛɛ suɔ nyɛ he nyɛli.” (Mateo 5:44) Jamihi enyɛmɛ o le nɛ́ a mi bi kɛ a he wui ta hwumi mi nɛɛ?

◼ LAKPA JAMI TSƆƆ LAKPA TSƆƆMI: Jamihi fuu tsɔɔ kaa klaa aloo mumi ɔ ji nɔmlɔ adesa fã ko nɛ a nɛ́ nɛ hii si ngɛ nɔmlɔtso ɔ gbenɔ se. Jamihi fuu da tsɔɔmi nɛ ɔ nɔ nɛ a kɛ ngɔɔ sika ngɛ a mi bi ɔmɛ a dɛ, kaa a maa sɔle kɛ ha a wekuli nɛ gbo ɔmɛ a klaahi. Se Baiblo ɔ tsɔɔ nɔ́ kpa. E deɔ ke: “Nihi nɛ a hɛ ngɛ ɔ le kaa a ma gbo; ni gbogboe ɔmɛ lɛɛ a li nɔ́ ko nɔ́ ko.” (Fiɛlɔ 9:5) Yesu tsɔɔ kaa a ma tle gbogboehi si, se ke adesa ngɛ klaa nɛ gbo we ɔ, lɛɛ si temi ɔ he hia we hu. (Yohane 11:11-25) Anɛ jami nɛ́ o ngɛ mi ɔ tsɔɔ kaa klaa gbo we lo?

◼ LAKPA JAMI KPLƐƐƆ BƆMI NAMI MI JEMIBA YAYAMI NƆ: Ngɛ mahi komɛ a nɔ ɔ, sɔlemihi komɛ ngmɛɛ nyumu kɛ nyumu, kɛ yo kɛ yo nɛ́ a kɛ a he hwɔɔ si blɔ nɛ a yeɔ osɔfo, nɛ a woɔ amlaalohi he wami konɛ a kplɛɛ nihi nɛ hɛɛ fɔmi su kake a gba si himi nɔ. Nɛ ngɛ jamihi nɛ buɔ bɔmi nami mi jemiba yayami fɔ blɔ fami po ɔ, a maa a hɛ ngɔ fɔɔ jami hɛ mi nyɛɛli nɛ tuaa jokuɛwi abonua a nɔ. Se mɛni Baiblo ɔ tsɔɔ ngɛ bɔmi nami mi jemiba yayami he? Baiblo ɔ de faii ke: ‘Nyɛ ko sisi nyɛ he! Ajuama bɔli, loo amaga jali, loo gba puɛli, loo nyumuhi kɛ yihi sɔuu nɛ kɛ a sibi peeɔ yakayaka ní, . . . nine be Mawu matsɛ yemi ɔ nɔ sue kɔkɔɔkɔ.’ (1 Korintobi 6:9, 10) Anɛ o le jamihi nɛ kplɛɛɔ bɔmi nami mi jemiba yayami nɔ lo?

Mɛni maa ba jamihi nɛ woɔ yiblii yayahi ɔ a nɔ hwɔɔ se? Yesu bɔ kɔkɔ ke: “Tso tsuaa tso nɛ wui yiblii kpakpa a, a hɛɛ, nɛ a sakeɔ kɛ fɔɔ la mi.” (Mateo 7:19) Niinɛ, a maa hɛ lakpa jami kɛ fɔ si nɛ a ma kpata e hɛ mi! Se mɛni be enɛ ɔ maa ba mi nɛ kɛ e ma plɛ kɛ ba mi kɛɛ? Gbami nina ko nɛ a ngma ngɛ Baiblo mi womi nɛ ji Kpojemi yi 17 kɛ 18 haa wɔ heto ɔ.

Kɛ lakpa jami nyagbe ma plɛ kɛ ba kɛɛ?

Moo pee enɛ ɔ he foni nɛ o hyɛ. Yo ajuama ko hii si ngɛ lohwe ko nɛ́ e he ngɛ gbeye nɔ. Lohwe ɔ ngɛ yi kpaago kɛ koli nyɔngma. (Kpojemi 17:1-4) Mɛnɔ yo ajuama a daa si kɛ ha? E yeɔ “zugba a nɔ matsɛmɛ ɔmɛ a nɔ.” E wo tade nɛ hɛɛ alamua su, nɛ e kpa tsopa kɛ e he via, nɛ e ji niatsɛ kpanaa. Kɛ piɛɛ he hu ɔ, e ngɔ e mumihi a tsɛmi ní peepee ɔ kɛ ‘sisi jema amɛ tsuo.’ (Kpojemi 17:18; 18:12, 13, 23, New World Translation) Baiblo ɔ ha nɛ wa na kaa kikɛmɛ a yo ajuama nɛ ɔ daa si kɛ ha jami blɔ nya tomi ngɛ je ɔ mi tsuo. Pi jami kuu kake ko kɛkɛ nɛ e daa si ha, se mohu e daa si kɛ ha jamihi tsuo nɛ woɔ yiblii yayahi ɔ.

Lohwe ɔ nɛ yo ajuama a hii si ngɛ nɔ ɔ, daa si kɛ ha je ɔ ma kudɔmi he wami ɔmɛ.a (Kpojemi 17:10-13) Lakpa jami hii si ngɛ ma kudɔmi blɔ nya tomi lohwe nɛ ɔ nɔ, nɛ e ngɛ mɔde bɔe kaa e maa tsɔɔ lɛ níhi nɛ e sa kaa e pee kɛ bɔnɛ e maa pee mɛ ha.

Se e be kɛe nɛ nyakpɛ nɔ́ ko maa ya nɔ. “Nɛ koli nyɔngma nɛ o na a, kɛ lohwe ɔ, maa nyɛ ajuama a, nɛ a ma kpɔ e níhi kulaa nɛ e ngɛ ɔ, nɛ a ma kpa e he bo, nɛ a maa ye e he lo, nɛ a kɛ la maa sa lɛ.” (Kpojemi 17:16, Somi He Ɔ) Je ɔ mi ma kudɔmi he wami ɔmɛ ma tutua lakpa jami tlukaa, ngɛ blɔ nɛ ngɛ nyakpɛ nɔ nɛ a ma kpata e hɛ mi pɛsɛpɛsɛ! Mɛni ma ha nɛ a maa pee ja? Baiblo ɔ mi womi nɛ ji Kpojemi ha wɔ heto ke: “Mawu kɛ wo a tsui mi konɛ a pee e yi mi tomi ní ɔmɛ.” (Kpojemi 17:17, Somi He Ɔ) Niinɛ, Mawu ma ha lakpa jami maa bu akɔtaa sisiisi ngɛ e ní yayamihi tsuo nɛ e pee ngɛ e biɛ mi ɔ heje. Ngɛ Mawu dami sane yemi ɔ nya a, e maa ngɔ lakpa jami huɛmɛ nɛ ji ma kudɔmi he wami ɔmɛ kɛ tsu ní kaa e dɛ mi dade kɛ kpata e hɛ mi.

Ke o sume nɛ lakpa jami haomi ɔmɛ eko nɛ ba o nɔ ɔ, lɛɛ mɛni e sa kaa o pee? Mawu bɔfo ko wo wɔ he wami ke: “Nyɛɛ je e mi, ye ma.” (Kpojemi 18:4, Somi He Ɔ) Ee, amlɔ nɛ ɔ ji be nɛ e sa kaa o tu fo kɛ je lakpa jami mi! Se jije o maa tu fo kɛ ya? Enɛ ɔ tsɔɔ we kaa o kó he Mawu nɔ nɛ́ o ye hu, ejakaa nihi nɛ be Mawu mi hemi kɛ yemi ɔ be wami nae hwɔɔ se. (2 Tesalonikabi 1:6-9) Wesa he pɛ nɛ ngɛ kɛ ha mo ji anɔkuale jami mi nɛ o ma ya sɛ. Kɛ o ma plɛ kɛ na anɔkuale jami ɔ kɛɛ?

Bɔnɛ o maa pee ha kɛ na anɔkuale jami

Mɛni yiblii kpakpa e sa kaa anɔkuale jami nɛ wo?—Mateo 7:17.

◼ ANƆKUALE JAMI MI BI NGƐ SUƆMI HA A SIBI: Anɔkuale jali “pi je ɔ mi bi,” nɛ ma nɛ nɔ ko je mi loo kusumi hu gba we a mi, nɛ a ‘suɔ a sibi.’ (Yohane 13:35; 17:16; Bɔfo ɔmɛ A Nítsumi 10:34, 35) A suɔ kaa a ma gbo ngɛ a sibi a he mohu pe nɛ a maa gbe a sibi.—1 Yohane 3:16.

◼ ANƆKUALE JAMI MI BI NGƆƆ A HE KƐ FƆƆ MAWU MUNYU Ɔ NƆ: Anɔkuale jami mi bi daa Mawu Munyu nɛ ji Baiblo ɔ nɔ kɛ tsɔɔ ní mohu pe nɛ a maa tsɔɔ ‘blema kɔhi’ kɛ “nimli a kitahi.” (Mateo 15:6-9, Somi He Ɔ) Mɛni heje? Ejakaa “ngmami tsuaa ngmami ɔ, Mawu mumi ɔ lɛ ha nɛ nihi ngma; nɛ e hi kɛ ha ní tsɔɔmi, kɛ ha hɛ mi kami, kɛ ha nɔ dlami, kɛ tsɔsemi nɛ ma ha nɔ nɛ ba e je mi saminya.”—2 Timoteo 3:16.

◼ ANƆKUALE JAMI HAA NƐ WEKUHI PEEƆ KAKE NƐ E FIƆ JEMIBA KPAKPA SE:

Anɔkuale jami tsɔseɔ hunomɛ konɛ a ‘suɔ a yihi kaa mɛ nitsɛmɛ a nɔmlɔtsohi,’ nɛ e yeɔ bua yigbayi hu konɛ a ná ‘bu nɛ mi kuɔ kɛ ha a hunomɛ,’ kɛ bimɛ hu nɛ a ‘bu a fɔli tue.’ (Efesobi 5:28, 33; 6:1) Nɔ́ nɛ piɛɛ he ji kaa, e sa nɛ nihi nɛ a ngɔ blɔ nya nítsumihi kɛ wo a dɛ ɔ hu a ba a je mi saminya.—1 Timoteo 3:1-10.

Anɛ jami ko su tɛ nɛ a po fɔ si nɛ ɔ he lo? Womi nɛ ji Holocaust Politics nɛ a pee ngɛ 2001 mi ɔ de ke: ‘Kaa nihi fuu nyɛɛ níhi nɛ Yehowa Odasefoli ɔmɛ fiɛɛɔ kɛ a ní peepeehi a se ɔ, jinɛ Hɛ mi Kpatami Nguaa nɛ ba ngɛ Germany ɔ ko bɛ, nɛ ta hwumi nɛ a kɛ guu wɛtsohi a sisi ɔ hu be je ɔ mi bae hu.’

Ngɛ anɔkuale mi ɔ, Yehowa Odasefoli nɛ a ngɛ jemahi 235 nɔ ɔ, fiɛɛɔ je mi bami kpakpa nɛ ngɛ Baiblo ɔ mi ɔ nɛ a hii si ngɛ nya hulɔ. Wa ngɛ mo he wami woe kaa o bi Yehowa Odasefoli nɛ a ye bua mo konɛ o kase nɔ́ nɛ Mawu ngɛ hlae ngɛ o dɛ bɔnɛ pee nɛ o ja lɛ ngɛ e suɔmi nya. Amlɔ nɛ ɔ ji be nɛ e sa kaa o pee ja. Ko puɛ be kulaa. Lakpa jami nyagbe su ta!—Zefania 2:2, 3.

Ke o suɔ kaa o le Baiblo mi munyu kpahi nɛ Yehowa Odasefoli fiɛɛɔ ɔ, lɛɛ ngmaa kɛ ya ha mɛ faa kɛ gu adrɛs nɛ ngɛ sisi ɔ nɔ.

□ Nyɛɛ ngɔ Nyɛɛ Ya Nɔ nɛ Nyɛɛ Hwɔɔ! womi ɔ eko kɛ mane mi yaka.

□ I kpa nyɛ pɛɛ nɛ nyɛɛ kɛ mi ba pee we mi Baiblo mi ní kasemi nɛ a he we nɔ́ ko.

[Sisi ningma]

[Bua jɔmi munyu nɛ a ma nɔ mi ngɛ ba fa 3]

Lakpa jami yeɔ “zugba a nɔ matsɛmɛ ɔmɛ a nɔ”

[Bua jɔmi munyu nɛ a ma nɔ mi ngɛ ba fa 3]

“Nyɛɛ je e mi, ye ma”