Yi 2

“Blɔ ɔ, Kɛ Anɔkuale ɔ, Kɛ Wami ɔ”

1, 2. Mɛni heje nɛ wɔ nitsɛmɛ wa be nyɛe maa ya Yehowa ngɔ, nɛ mɛni Yesu Kristo pee ha wɔ ngɛ enɛ ɔ blɔ fa mi?

ANƐ o laa blɔ hyɛ lo? Eko ɔ, o ma kai be ko nɛ o hia blɔ kɛ yaa slaa o huɛ loo o wekuno ko nɛ o laa blɔ. Benɛ o ngɛ blɔ nɛ o gui nɔ hyɛ ɔ nɔ nyɛɛe ɔ, anɛ o da si nɛ o bi nɔ ko nɛ e tsɔɔ mo blɔ lo? Hyɛ bɔnɛ o bua maa jɔ ha ke nɔ ko nɛ e mi mi jɔ tsɔɔ we mo blɔ kɛkɛ, se e de mo ke: “Moo nyɛɛ ye se. I kɛ mo maa ya he nɛ o yaa a.” O bua maa jɔ wawɛɛ!

² Ngɛ blɔ ko nɔ ɔ, Yesu Kristo hu peeɔ nɔ́ ko kaa jã nɔuu kɛ haa wɔ. Wɔ nitsɛmɛ wa be Mawu ngɔ nyɛe maa ya. Akɛnɛ adesahi tsuo ná yayami kɛ fa tɔmi kɛ je fɔmi mi heje ɔ, a laa blɔ, nɛ ‘wami he ɔ nɛ Mawu haa nɔ ɔ, a blɔ nya be mi.’ (Efesobi 4:17, 18) E sa nɛ nɔ ko nɛ tsɔɔ wɔ blɔ. Yesu wa Nɔ Hyɛmi Nɔ́ Peelɔ ɔ pee babauu pe ga womi kɛ blɔ tsɔɔmi kɛkɛ nɛ e kɛ ha wɔ. Kaa bɔnɛ wa na ngɛ Yi 1 mi ɔ, Yesu fɔ wɔ nine ke: “Ba nyɛɛ ye se.” (Marko 10:21) Jehanɛ se hu ɔ, e ha wɔ yi mi tomi kpakpa heje nɛ sa kaa waa kplɛɛ nine fɔmi ɔ nɔ. Be ko ɔ, Yesu de ke: “Imi ji blɔ ɔ, kɛ anɔkuale ɔ, kɛ wami ɔ. Nɔ ko nɔ ko yɛ Tsɛ ɔ ngɔ kaa ja e gu ye nɔ.” (Yohane 14:6) Nyɛ ha nɛ wa susu yi mi tomi komɛ a heje nɛ Bi ɔ nɔ pɛ nɛ wa ma nyɛ maa gu kɛ ya Tsɛ ɔ ngɔ ɔ he nɛ waa hyɛ. Kɛkɛ ɔ, wa maa da yi mi tomi nɛ ɔmɛ a nɔ konɛ wa susu nɔ́ heje nɛ ngɛ anɔkuale mi ɔ, Yesu ji “blɔ ɔ, kɛ anɔkuale ɔ, kɛ wami ɔ” he.

E Blɔ Nya Nítsumi Nɛ He Hia Ngɛ Yehowa Yi Mi Tomi Mi

3. Mɛni heje nɛ Yesu nɔ wa ma nyɛ maa gu kɛ ya Mawu ngɔ?

³ Kekleekle ɔ, Yesu nɔ wa ma nyɛ maa gu kɛ ya Yehowa ngɔ, ejakaa Mawu ha e Bi ɔ blɔ nya nítsumi ko nɛ he hia saminya.a Tsɛ ɔ ngɔ lɛ kɛ pee nɔ titli nɛ ma tsu E yi mi tomihi tsuo a he ní. (2 Korintobi 1:20; Kolosebi 1:18-20) Bɔnɛ pee nɛ waa nu Bi ɔ blɔ nya nítsumi ɔ sisi ɔ, e sa nɛ wa susu nɔ́ nɛ ya nɔ ngɛ Eden abɔɔ ɔ mi benɛ kekleekle nyumu kɛ yo ɔ piɛɛ Satan he kɛ tsɔ Yehowa hɛ mi atua a he.—1 Mose 2:16, 17; 3:1-6.

4. Atua tsɔmi nɛ ba ngɛ Eden ɔ tle mɛni sane si, nɛ mɛni Yehowa to e yi mi kaa e maa pee kɛ tsu sane ɔ he ní?

⁴ Atua tsɔmi nɛ ya nɔ ngɛ Eden ɔ tle sane ko nɛ kɔɔ Mawu bɔ níhi tsuo a he ɔ si: Anɛ Yehowa Mawu yeɔ e bɔ níhi a nɔ ngɛ blɔ kpakpa nɔ lo? Bɔnɛ pee nɛ a na sane nɛ he hia nɛ ɔ nya a, Yehowa to e yi mi kaa e ma ha e mumi mi bi ko nɛ ye mluku nɛ ba zugba a nɔ. Nítsumi nɛ Bi nɛ ɔ ma ba tsu ɔ he hia wawɛɛ—e maa ngɔ e wami kɛ ha nɛ e kɛ bu Yehowa nɔyemi ɔ bemi, konɛ e pee kpɔmi nɔ́ nɛ a maa da nɔ kɛ he adesahi a yi wami. Ke bi nɛ ɔ ye anɔkuale kɛ ya su gbenɔ mi ɔ, e ma ha nɛ a ma tsu haomihi tsuo nɛ Satan atua tsɔmi ɔ ngɔ kɛ ba a he ní. (Hebribi 2:14, 15; 1 Yohane 3:8) Se Yehowa ngɛ mumi mi bihi nɛ a ye mluku ayɔhi abɔ. (Daniel 7:9, 10) A kpɛti mɛnɔ e hla konɛ e ba tsu nítsumi nɛ he hia wawɛɛ nɛ ɔ he ní? Yehowa hla e “bi kake ɔ,” nɔ nɛ pee se ɔ, a ba le lɛ kaa Yesu Kristo ɔ.—Yohane 3:16.

5, 6. Yehowa tsɔɔ kaa e he Bi ɔ ye ngɛ mɛni blɔ nɔ, nɛ mɛni nɔ e hemi kɛ yemi ɔ da?

⁵ Anɛ e sa kaa wa nya nɛ kpɛ wa he ngɛ nɔ nɛ Yehowa hla a he lo? Dɛbi! Tsɛ ɔ he e Bi kake ɔ ye saminya. Jeha lafahi abɔ loko e Bi ɔ ba zugba a nɔ ɔ, Yehowa gba kɛ fɔ si kaa e Bi ɔ maa ye anɔkuale ngɛ amanehlu slɔɔtohi a mi. (Yesaya 53:3-7, 10-12; Bɔfo ɔmɛ A Nítsumi 8:32-35) Mo susu nɔ́ nɛ enɛ ɔ tsɔɔ ɔ he nɛ o hyɛ. Bi ɔ ngɛ he blɔ nɛ e peeɔ nɔ́ nɛ e suɔ kaa bɔnɛ e ji ngɛ bɔfo kpahi kɛ nimli a blɔ fa mi ɔ. Se kɛ̃ ɔ, Yehowa he e Bi ɔ ye saminya nɛ lɔɔ heje ɔ, e gba anɔkuale nɛ e maa ye ɔ he sane kɛ fɔ si. Mɛni nɔ e da nɛ e kɛ he e Bi ɔ ye jã? E da nɔ́ nɛ e le ngɛ e Bi ɔ he ɔ nɔ. Yehowa le e Bi ɔ saminya nɛ e le bɔnɛ e Bi ɔ suɔ kaa e maa sa e hɛ mi ha. (Yohane 8:29; 14:31) Bi ɔ suɔ e Tsɛ ɔ, nɛ Yehowa hu suɔ e Bi ɔ. (Yohane 3:35) Suɔmi nɛ Tsɛ ɔ kɛ Bi ɔ suɔ a he ɔ ha kake peemi ngɛ a kpɛti nɛ a he a sibi ye saminya.—Kolosebi 3:14.

⁶ Ke wa susu blɔ nya nítsumi nɛ he hia nɛ Bi ɔ tsuɔ he ní, hemi kɛ yemi nɛ Tsɛ ɔ ngɛ ngɛ e mi, kɛ suɔmi nɛ pee Tsɛ ɔ kɛ Bi ɔ kake ɔ he ɔ, anɛ e sa nɛ e pee wɔ nyakpɛ kaa Yesu nɔ pɛ nɛ wa ma nyɛ maa gu kɛ ya Mawu ngɔ lo? Se yi mi tomi kpa hu ngɛ nɛ lɔɔ heje nɛ Bi ɔ pɛ ji nɔ nɛ ma nyɛ maa tsɔɔ wɔ blɔ kɛ ya Tsɛ ɔ ngɔ.

Bi ɔ Pɛ Nɛ E Le Tsɛ ɔ Saminya

7, 8. Mɛni heje Yesu nyɛ nɛ e de ngɛ blɔ nɛ da nɔ kaa nɔ ko nɔ ko li Tsɛ ɔ “ja Bi ɔ”?

⁷ Ke huɛ bɔmi kpakpa maa hi waa kɛ Yehowa wa kpɛti ɔ, e sa nɛ wa tsu ní komɛ a he ní. (La 15:1-5) Bi ɔ pɛ lɛ le nɔ́ tutuutu nɛ sa kaa waa pee konɛ waa su níhi nɛ Mawu ngɛ hlae ngɛ wa dɛ ɔ a he nɛ waa sa e hɛ mi. Yesu de ke: “Tsaatsɛ tu níhi tsuo ngɔ wo ye dɛ mi. Nɔ ko nɔ ko li Bi ɔ, ja Tsɛ ɔ pɛ; nɔ ko nɔ ko li Tsɛ ɔ, ja Bi ɔ kɛkɛ, kɛ nihi nɛ Bi ɔ suɔ kaa e maa tsɔɔ mɛ Tsɛ ɔ.” (Mateo 11:27) Nyɛ ha nɛ waa hyɛ nɔ́ heje nɛ Yesu nyɛ nɛ e de ngɛ blɔ nɛ da nɔ, nɛ pi munyu he zã nɛ e ngɛ woe kaa nɔ ko nɔ ko li Tsɛ ɔ saminya, “ja Bi ɔ.”

⁸ Akɛnɛ Bi ɔ ji “nibɔ níhi tsuo a kpɛti tɛte” heje ɔ, huɛ bɔmi nɛ ngɛ e kɛ Yehowa kpɛti ɔ ngɛ slɔɔto kulaa. (Kolosebi 1:15) Mo susu huɛ bɔmi nɛ mi wa nɛ hi Tsɛ ɔ kɛ Bi ɔ a kpɛti jehahi babauu benɛ mɛ ni enyɔ ɔmɛ pɛ lɛ a ngɛ kɛ je adebɔ sisije kɛ ya si a bɔ mumi mi bɔ ní kpahi ɔ he nɛ o hyɛ. (Yohane 1:3; Kolosebi 1:16, 17) Mo susu he blɔ agbo nɛ Bi ɔ ná kɛ hi e Tsɛ ɔ kasa nya nɛ́ e kase bɔnɛ e Tsɛ ɔ susuɔ níhi a he ha, nɔ́ nɛ E suɔ, e mlaahi kɛ e blɔhi a he ní ɔ he nɛ o hyɛ. Ngɛ anɔkuale mi ɔ, ke a de ke Yesu le e Tsɛ ɔ saminya pe bɔnɛ nɔ tsuaa nɔ le lɛ ɔ, pi munyu he zã womi. Atsinyɛ jemi ko be he kaa huɛ bɔmi nɛ mi wa nɛ ɔ lɛ ha nɛ Yesu nyɛ nɛ e tsɔɔ bɔnɛ e Tsɛ ɔ ngɛ ha ngɛ blɔhi nɛ nɔ ko be jã nyɛe maa pee ɔ nɔ ɔ nɛ.

9, 10. (a) Yesu ha nɛ a na bɔnɛ e Tsɛ ɔ ngɛ ha ngɛ mɛni blɔhi a nɔ? (b) Mɛni e sa kaa waa pee konɛ waa sa Yehowa hɛ mi?

⁹ Yesu tsɔɔmi ɔmɛ ha nɛ wa na kaa e le bɔnɛ Yehowa susuɔ níhi a he kɛ bɔnɛ e nuɔ níhi a he ha, kɛ nɔ́ nɛ E ngɛ hlae ngɛ e jali a dɛ.b Yesu tsɔɔ bɔnɛ e Tsɛ ɔ ngɛ ha ngɛ blɔ kpa hu nɔ. Yesu de ke: “Nɔ tsuaa nɔ nɛ na mi ɔ, e na Tsɛ ɔ.” (Yohane 14:9) Yesu kase e Tsɛ ɔ kɛ pi si ngɛ nɔ́ tsuaa nɔ́ nɛ e de kɛ nɔ́ tsuaa nɔ́ nɛ e pee ɔ mi. Lɔɔ he ɔ, ke wa kane Yesu he ní ngɛ Baiblo ɔ mi—munyu ngɔngɔɛ nɛ woɔ nɔ he wami nɛ e kɛ tsɔɔ ní, mi mi sãmi nɛ ha nɛ e tsa nihi, kɛ he numi nɛ ha nɛ e fo ya a—wa ma nyɛ maa po he foni kaa Yehowa ji nɔ nɛ ngɛ munyu nɛ ɔmɛ tue nɛ e ngɛ ní nɛ ɔmɛ pee ɔ nɛ. (Mateo 7:28, 29; Marko 1:40-42; Yohane 11:32-36) Munyuhi nɛ Bi ɔ tu kɛ níhi nɛ e pee ɔ ha nɛ a na Tsɛ ɔ blɔhi kɛ e suɔmi nya ní ngɛ blɔ nɛ ye mluku nɔ. (Yohane 5:19; 8:28; 12:49, 50) Enɛ ɔ he ɔ, loko wa maa sa Yehowa hɛ mi ɔ, ja wa nyɛɛ ngɛ Yesu tsɔɔmi ɔmɛ a nya nɛ wa kase lɛ.—Yohane 14:23.

¹⁰ Akɛnɛ Yesu le Yehowa saminya nɛ e peeɔ e ní pɛpɛɛpɛ kaa lɛ heje ɔ, e be nyakpɛ kaa Yehowa to kaa Bi ɔ ji nɔ nɛ a maa gu e nɔ kɛ ya Tsɛ ɔ ngɔ. Amlɔ nɛ ɔ, wa ba nu sisi kaa Yesu nɔ pɛ nɛ wa ma nyɛ maa gu kɛ ya Yehowa ngɔ. Enɛ ɔ heje ɔ, nyɛ ha nɛ wa susu sisi numi nɛ ngɛ munyu nɛ Yesu tu ɔ mi ɔ he nɛ waa hyɛ. E de ke: “Imi ji blɔ ɔ, kɛ anɔkuale ɔ, kɛ wami ɔ. Nɔ ko nɔ ko yɛ Tsɛ ɔ ngɔ kaa ja e gu ye nɔ.”—Yohane 14:6.

“Imi Ji Blɔ ɔ”

11. (a) Mɛni heje Yesu nɔ pɛ wa ma nyɛ maa gu kɛ su Mawu he? (b) Mɛni blɔ nɔ munyu nɛ a ngma ngɛ Yohane 14:6 ma bɔnɛ Yesu blɔ nya a ngɛ slɔɔto ha a nɔ mi? (Hyɛ sisi ningma.)

¹¹ Wa kase momo kaa Yesu nɔ pɛ nɛ wa ma nyɛ maa gu kɛ ya Mawu ngɔ. Mo susu bɔnɛ enɛ ɔ kɔ wa he ha tutuutu ɔ he nɛ o hyɛ. Yesu ji “blɔ ɔ” kɛ sisi numi kaa e nɔ pɛ nɛ wa ma nyɛ maa gu kɛ hɛ wɔ kɛ su Mawu he. Mɛni heje? Anɔkuale nɛ Yesu ye kɛ ya su gbenɔ mi heje ɔ, e ngɔ e wami kɛ sã afɔle kaa kpɔmi nɔ́. (Mateo 20:28) Ke pi kpɔmi nɔ́ nɛ ɔ he ɔ, jinɛ wa be nyɛe maa su Mawu he. Yayami puɛ adesahi kɛ Mawu a kpɛti, ejakaa Yehowa ngɛ klɔuklɔu nɛ e kplɛɛ we yayami nɔ. (Yesaya 6:3; 59:2) Se Yesu afɔle sami ɔ dla waa kɛ Mawu wa kpɛti; e hà wa yayami ɔmɛ a nɔ, loo e kpata waa kɛ Mawu wa kpɛti. (Hebribi 10:12; 1 Yohane 1:7) Ke wa kplɛɛ blɔ nya nɛ Mawu to kɛ gu Kristo nɔ ɔ nɔ, nɛ wa tsɔɔ kaa wa ngɛ hemi kɛ yemi ngɛ mi ɔ, wa ma ná Yehowa hɛ mi dloomi. Ngɛ anɔkuale mi ɔ, blɔ kpa ko kulaa be nɛ wa maa gu nɔ kɛ “dla waa kɛ Mawu wa kpɛti.”c—Romabi 5:6-11.

12. Yesu ji “blɔ ɔ” ngɛ mɛni sisi numihi a nya?

¹² Yesu ji “blɔ ɔ” ngɛ sɔlemi blɔ fa mi hulɔ. Yesu nɔ pɛ nɛ wa ma nyɛ maa gu kɛ sɔle ha Yehowa nɛ wa ná nɔ mi mami kaa ke wa je wa tsui mi nɛ wa bi lɛ nɔ́ ko ɔ, e maa bu tue. (1 Yohane 5:13, 14) Yesu nitsɛ de ke: “Nɔ́ tsuaa nɔ́ he pɛɛ nɛ nyɛ ma kpa Tsɛ ɔ ngɛ ye biɛ mi ɔ, e maa pee ha nyɛ. . . . Nyɛ bi, nɛ a maa pee ha nyɛ; kɛkɛ ɔ, nyɛ ma ná bua jɔmi babauu.” (Yohane 16:23, 24) Lɔɔ he ɔ, wa ma nyɛ maa ya Yehowa ngɔ ngɛ sɔlemi mi ngɛ Yesu biɛ mi nɛ wa tsɛ Mawu ke “wa Tsɛ” nɛ́ tɔmi ko be he. (Mateo 6:9) Yesu ji “blɔ ɔ” ngɛ sisi numi kpa hu nya—lɔɔ ji nɔ hyɛmi nɔ́ nɛ e pee. Kaa bɔnɛ wa na momo ɔ, Yesu kase e Tsɛ ɔ kɛ pi si. Lɔɔ heje ɔ, nɔ hyɛmi nɔ́ nɛ Yesu pee ɔ tsɔɔ wɔ bɔnɛ e sa kaa waa hi si ha nɛ waa sa Yehowa hɛ mi. Enɛ ɔ heje ɔ, loko wa maa ya Yehowa ngɔ ɔ, ja wa nyɛɛ Yesu nane mami he ɔmɛ a se.—1 Petro 2:21.

“Imi Ji . . . Anɔkuale ɔ”

13, 14. (a) Yesu ye anɔkuale ngɛ e munyu tumi mi ngɛ mɛni blɔ nɔ? (b) Mɛni e sa kaa Yesu nɛ pee konɛ e pee “anɔkuale ɔ,” nɛ mɛni heje?

¹³ Yesu tuɔ anɔkuale nɛ kɔɔ e Tsɛ ɔ gbamihi a he ɔ he munyu be tsuaa be. (Yohane 8:40, 45, 46) Lakpa ko ji e nya hyɛ. (1 Petro 2:22) Nihi nɛ teɔ si kɛ woɔ lɛ ɔ po kplɛɛ nɔ kaa e tsɔɔ ‘Mawu blɔ ɔ ngɛ anɔkuale mi.’ (Marko 12:13, 14) Se, benɛ Yesu de ke “Imi ji . . . anɔkuale ɔ,” pi anɔkuale nɛ e tuɔ, kɛ anɔkuale nɛ e fiɛɛɔ, kɛ anɔkuale nɛ e tsɔɔ nihi ɔ pɛ nɛ e ngɛ tsɔɔe. Anɔkuale ɔ nɛ Yesu ji ɔ tsɔɔ babauu pe jã.

¹⁴ Mo kai kaa Yehowa ha Baiblo ngmali ngma Mesia, loo Kristo ɔ he gbamihi kɛ fɔ si jeha lafahi abɔ kɛ sɛ hlami. Gbami nɛ ɔmɛ tu e si himi, e sɔmɔmi nítsumi ɔ, kɛ e gbenɔ ɔ he munyu fitsofitso. Jehanɛ se hu ɔ, gbamihi ngɛ Mose Mlaa a mi nɛ kɔɔ Mesia a he. (Hebribi 10:1) Anɛ Yesu maa ye anɔkuale kɛ ya su gbenɔ mi konɛ e ha munyuhi tsuo nɛ a gba ngɛ e he ɔ nɛ ba mi lo? Ja e pee jã loko a maa na Yehowa kaa e ji Mawu nɛ ke e gba a, e baa mi pɛpɛɛpɛ. Nítsumi agbo nɛ ɔ fɔɔ si ngɛ Yesu kuɛ nɔ. Bɔnɛ Yesu hi si ha—munyu nɛ e tu, kɛ nɔ́ tsuaa nɔ́ nɛ e pee ɔ—ha gbami munyu ɔmɛ pee anɔkuale. (2 Korintobi 1:20) Enɛ ɔ he ɔ, Yesu ji “anɔkuale ɔ” kɛ sisi numi kaa e ha Yehowa gbami munyu ɔmɛ pee anɔkuale benɛ e ba zugba a nɔ ɔ.—Yohane 1:17; Kolosebi 2:16, 17.

“Imi Ji . . . Wami ɔ”

15. Bi ɔ mi hemi kɛ yemi nɛ wa ma ná a tsɔɔ mɛni, nɛ mɛni maa je enɛ ɔ nɛ wa maa pee ɔ mi kɛ ba?

¹⁵ Yesu ji “wami ɔ” nɛ, ejakaa e nɔ pɛ nɛ wa ma nyɛ maa gu kɛ ná wami, nɛ ji “wami nɛ ngɛ kɛ yaa neneene.” (1 Timoteo 6:19) Baiblo ɔ de ke: “Nɔ nɛ heɔ Bi ɔ yeɔ ɔ, e nine su neneene wami ɔ nɔ; se nɔ tsuaa nɔ nɛ bui Bi ɔ tue ɔ, e be neneene wami nae. Mawu maa gbla e tue mohu.” (Yohane 3:36) Mɛni Mawu Bi ɔ mi hemi kɛ yemi nɛ wa ma ná a tsɔɔ? E tsɔɔ kaa wa ma ná nɔ mi mami kaa Bi ɔ nɔ pɛ nɛ wa ma nyɛ maa gu kɛ ná wami. Jehanɛ se hu ɔ, e tsɔɔ kaa e sa nɛ waa ngɔ nítsumi kɛ piɛɛ wa hemi kɛ yemi ɔ he, nɛ waa ya nɔ nɛ wa ha Yesu nɛ tsɔɔ wɔ ní, nɛ waa bɔ mɔde wawɛɛ nɛ waa nyɛɛ ngɛ e tsɔɔmi ɔmɛ a nya nɛ waa kase lɛ. (Yakobo 2:26) Lɔɔ heje ɔ, Mawu Bi ɔ mi hemi kɛ yemi nɛ wa ma ná a ma ha nɛ wa ma ná neneene wami—Kristofoli nɛ a pɔ mɛ nu nɛ ji “kuu nyafii” ɔ ma ná wami nɛ gbenɔ be mi ngɛ hiɔwe, nɛ “to kpa amɛ,” nɛ ji “nimli asafo” ɔ ma ná wami nɛ ye mluku ngɛ paradeiso mi ngɛ zugba a nɔ.—Luka 12:32; 23:43; Kpojemi 7:9-17; Yohane 10:16.

16, 17. (a) Mɛni blɔ nɔ Yesu ji “wami ɔ” kɛ ha nihi nɛ a gbo ɔ? (b) Mɛni nɔ mi mami wa ma nyɛ ma ná?

¹⁶ Nɛ nihi nɛ a gbo momo ɔ hu nɛɛ? Yesu ji “wami” kɛ ha mɛ hulɔ. Loko Yesu ma tle e huɛ Lazaro si ɔ, e de Lazaro nyɛmiyo Marta ke: “Imi ji si temi ɔ, kɛ wami ɔ nɛ. Nɔ tsuaa nɔ nɛ heɔ mi yeɔ ɔ, ke e gbo tete po, e maa hi hɛ ngmengmle.” (Yohane 11:25) Yehowa ha e Bi ɔ “gbenɔ kɛ gbeje a nya safe,” nɛ ji he wami nɛ e ha lɛ nɛ e kɛ tle ni gbogboehi si. (Kpojemi 1:17, 18) Yesu nɛ a wo e hɛ mi nyami ɔ maa ngɔ safe nɛ ɔmɛ kɛ tsu ní nɛ e kɛ ma bli gbeje sinya amɛ kɛ fɔ si, nɛ e ma ha nɛ nihi nɛ a ngɛ yɔkɔ ɔmɛ a mi ɔ maa je kpo.—Yohane 5:28, 29.

¹⁷ “Imi ji blɔ ɔ, kɛ anɔkuale ɔ, kɛ wami ɔ.” Yesu gu munyu kpiti nɛ ɔ nɔ kɛ tsɔɔ nɔ́ heje nɛ e ba zugba a nɔ nɛ e ba tsu e sɔmɔmi nítsumi ɔ. Se nami ngɛ munyu nɛ ɔmɛ a he kɛ ha wɔ mwɔnɛ ɔ. Mo kai kaa Yesu tsa munyu ɔ nɔ ke: “Nɔ ko nɔ ko yɛ Tsɛ ɔ ngɔ kaa ja e gu ye nɔ.” (Yohane 14:6) Yesu munyu ɔmɛ a nya bi, se nami ngɛ he kɛ ha wɔ mwɔnɛ ɔ hulɔ. Lɔɔ heje ɔ, wa ma nyɛ ma ná nɔ mi mami kaa ke wa nyɛɛ Yesu se ɔ, wa be blɔ lae kɔkɔɔkɔ. Lɛ pɛ ji nɔ nɛ ma nyɛ maa tsɔɔ wɔ blɔ kɛ ya “Tsɛ ɔ ngɔ.”

Kɛ O Maa Pee O Ní Kɛɛ?

18. Mɛni Yesu se nɛ wa maa nyɛɛ ngɛ anɔkuale mi ɔ tsɔɔ?

¹⁸ Akɛnɛ Yesu hɛɛ blɔ nya nítsumi nɛ he hia, nɛ e le e Tsɛ ɔ saminya heje ɔ, wa ngɛ yi mi tomi kpakpa heje nɛ e sa kaa waa nyɛɛ Bi ɔ se. Kaa bɔnɛ wa na ngɛ yi nɛ sɛ hlami ɔ mi ɔ, wa ní peepee nɛ waa kɛ maa tsɔɔ kaa wa ngɛ Yesu se nyɛɛe, se pi wa nya nɛ waa kɛ ma de loo bɔnɛ wa nuɔ he ha kɛkɛ. Kristo se nɛ wa maa nyɛɛ ɔ tsɔɔ kaa e sa nɛ waa nyɛɛ ngɛ e tsɔɔmi ɔmɛ a nya nɛ waa kase lɛ. (Yohane 13:15) Womi nɛ ɔ nɛ o ngɛ kanee ɔ maa ye bua mo nɛ o pee jã.

19, 20. Mɛni ngɛ womi nɛ ɔ mi nɛ maa ye bua mo konɛ o nyɛɛ Kristo se?

¹⁹ Ngɛ yihi nɛ nyɛɛ se ɔ a mi ɔ, wa maa kase Yesu si himi kɛ e sɔmɔmi nítsumi ɔ he ní saminya. A gba yi ɔmɛ a mi kɛ wo fã etɛ mi. Ngɛ kekle fã a mi ɔ, wa maa kase e suhi kɛ bɔnɛ e peeɔ e ní ha a he ní. Ngɛ fã enyɔne ɔ mi ɔ, wa ma susu kã nɛ e kɛ fiɛɛ nɛ e kɛ tsɔɔ ní ɔ he. Nɛ ngɛ fã etɛne ɔ mi hu ɔ, wa maa hyɛ bɔnɛ e je suɔmi kpo ha. Mi nylɔmi daka nɛ yi ji “Mɛni Blɔ Nɔ O Maa Gu Kɛ Nyɛɛ Yesu Se?” ngɛ Yi 3 ɔ kɛ yihi nɛ nyɛɛ se ɔ a mi. A to Ngmami ɔmɛ kɛ sane bimi ɔmɛ a he blɔ nya konɛ a ye bua wɔ nɛ wa susu blɔhi a nɔ nɛ wa maa gu kɛ kase Yesu ngɛ wa munyu tumi kɛ wa ní peepeehi a mi.

²⁰ Ngɛ Yehowa Mawu yemi kɛ buami nya a, yayami nɛ o ná kɛ je fɔmi mi ɔ be nyɛe ma puɛ o kɛ Mawu nyɛ kpɛti nɛ́ o laa blɔ. E ngɛ mi kaa nɔ́ ko agbo ma bɔ Yehowa mohu lɛɛ, se kɛ̃ ɔ, e je suɔmi mi nɛ e tsɔ e Bi ɔ kɛ ba konɛ e ba tsɔɔ wɔ blɔ nɔ nɛ wa maa gu nɛ waa kɛ Mawu kpɛti nɛ pee kpakpa. (1 Yohane 4:9, 10) Moo kplɛɛ nine nɛ Yesu fɔ mo ke: “Nyɛɛ ye se” ɔ nɔ nɛ o tsu nya ní, konɛ o kɛ tsɔɔ kaa o ngɛ hɛsa ha suɔmi agbo nɛ a je kpo kɛ tsɔɔ mo ɔ.—Yohane 1:43.

[Sisi ningmahi]

[Daka ngɛ bafa 23]

Palemi Biɛ Komɛ Nɛ A Kɛ Tsɛɛ Yesu Kristo

Amen (e sisi ji “é ba mi jã”). Lɛ ji Nɔ nɛ ma ha nɛ Mawu si womi ɔmɛ tsuo maa ba mi.—2 Korintobi 1:19, 20.

Neneene Tsɛ. Yehowa ha lɛ he wami kɛ he blɔ konɛ e ha nɛ adesahi nɛ a hi si kɛ ya neneene ngɛ mluku yemi mi ngɛ zugba a nɔ.—Yesaya 9:6.

Osɔfo Nɔkɔtɔma. E ma nyɛ maa tsukɔ wa he kɛ je yayami he, konɛ e je wɔ kɛ je gbenɔ nɛ yayami ngɔ kɛ ba a dɛ mi.—Hebribi 3:1; 9:13, 14, 25, 26.

Matsɛmɛ A Matsɛ. Akɛnɛ Yesu ji Matsɛ nɛ Mawu to ngɛ hiɔwe heje ɔ, e nɔ kuɔ pe nɔ yeli tsuo nɛ a ngɛ zugba nɛ ɔ nɔ.—Kpojemi 17:14.

Ganɔ Nɛ Yinɔ Jɔ. Kaa Mawu Matsɛ Yemi ɔ nya Matsɛ ɔ, Yesu ma ha nɛ tue mi jɔmi nɛ se be poe gblegbleegble maa ba zugba a nɔ tsuo.—Yesaya 9:6.

Nyakpɛ Ga Wolɔ. Yesu ga womi ɔmɛ hi be tsuaa be nɛ a ye mluku. Ke wa ngɔ kɛ tsu ní ɔ, wa ma ná yi wami hemi.—Yesaya 9:6; Yohane 6:68.

Munyu ɔ. Lɛ ji Yehowa Munyu Nya Jelɔ.—Yohane 1:1.

[Foni ngɛ bafa 14]

“Nyɛɛ ye se”