NÍ KASEMI 8
Mɛni He Je Nɛ Mawu Ngmɛ Yayami Kɛ Nɔ́ Nami Blɔ ɔ?
1. Mɛni blɔ nɔ yayami plɛ kɛ je sisi?
Be kɛkɛɛ nɛ Mawu ngmɛ adesahi blɔ nɛ́ a kɛ ye nɔ ɔ ha nɛ e pee heii kaa a be nyɛe ma tsu adesahi a haomihi a he ní
Yayami je sisi ngɛ zugba a nɔ benɛ Satan ye kekleekle lakpa a. Jinɛ Satan ji bɔfo nɛ e ye mluku, se ‘e hí si ngɛ anɔkuale ɔ mi.’ (Yohane 8:44) E suɔ nɛ a ngɔ jami nɛ e sa kaa a kɛ ha Mawu pɛ ɔ kɛ ha lɛ. Satan ye lakpa kɛ tsɔɔ Hawa nɛ ji kekle yo ɔ, nɛ e sisi lɛ, nɛ yo ɔ bu lɛ tue mohu pe Mawu. Adam hu ya piɛɛ Hawa he nɛ a gbo Mawu nɔ tue. Yi mi kpɔ nɛ Adam mwɔ ɔ ha nɛ nɔ́ nami kɛ gbenɔ ba.—Kane 1 Mose 3:1-6, 19.
Benɛ Satan wo Hawa ga kaa e gbo Mawu nɔ tue ɔ, Mawu nɔ yemi ɔ loo he blɔ nɛ Mawu ngɛ kaa Nɔ Yelɔ ɔ he atuã tsɔmi sisi e je ɔ nɛ. Nihi babauu ba piɛɛ Satan he nɛ a kua Mawu kaa a Nɔ Yelɔ. Enɛ ɔ he ɔ, Satan ba pee “nɔ nɛ yeɔ je nɛ ɔ nɔ matsɛ.” —Kane Yohane 14:30; 1 Yohane 5:19.
2. Anɛ níhi nɛ Mawu bɔ ɔmɛ tɔ fã lo?
Mawu nibɔ níhi tsuo hi kɛ pi si. Adesahi kɛ bɔfohi nɛ Mawu bɔ ɔ ma nyɛ maa bu Mawu tue sisiisi. (5 Mose 32:4, 5) Mawu bɔ wɔ nɛ e ha wɔ he blɔ konɛ waa hla kaa wa maa pee nɔ́ kpakpa loo nɔ́ yayami. Enɛ ɔ ji he blɔ nɛ wa ná nɛ waa kɛ maa tsɔɔ kaa wa suɔ Mawu.—Kane Yakobo 1:13-15; 1 Yohane 5:3.
3. Mɛni he je nɛ Mawu ngmɛ nɔ́ nami blɔ kɛ ba si mwɔnɛ ɔ?
Yehowa ngmɛ blɔ nɛ a tsɔ atuã kɛ si e nɔ yemi ɔ be bɔɔ ko. Mɛni he je? Konɛ e kɛ tsɔɔ kaa mɔde nɛ adesahi maa bɔ kaa a maa ye a he nɔ nɛ́ e he be mi ɔ he be se nami bae. (Fiɛlɔ 7:29; 8:9) Jeha 6,000 nɛ́ adesahi kɛ ye a he nɔ ɔ ha nɛ anɔkuale sane nɛ ɔ pee heii. Adesa nɔ yeli nyɛ we nɛ a jé ta hwumi, awi yemi, dami sane nɛ a yi, loo hiɔ kɛ je.—Kane Yeremia 10:23; Roma Bi 9:17.
Mawu nɔ yemi ɔ be kaa adesa nɔ yemi, ejakaa nihi nɛ maa kplɛɛ nɔ ɔ ma ná he se. (Yesaya 48:17, 18) E be kɛe nɛ Yehowa ma kpata adesa nɔ yemi tsuo hɛ mi. Nihi nɛ a suɔ kaa Mawu nɛ ye a nɔ ɔ pɛ ji nihi nɛ maa hi zugba a nɔ.—Yesaya 11:9.—Kane Daniel 2:44.
Hyɛ video nɛ ji Mɛni He Je Nɛ Mawu Ngmɛ Nɔ́ Nami Blɔ ɔ?
4. Mɛni Mawu tsui si tomi ɔ ngmɛɛ wɔ blɔ nɛ waa pee?
Satan de kaa níhi nɛ wa náa ngɛ Yehowa dɛ he je nɛ wa ngɛ lɛ sɔmɔe ɔ nɛ. Anɛ o ma nyɛ ma ha nɛ jamɛ a munyu ɔ nɛ pee lakpa lo? O ma nyɛ maa pee jã! Mawu tsui si tomi ɔ ha nɛ wa ná he blɔ nɛ waa kɛ maa tsɔɔ kaa wa fi Mawu nɔ yemi ɔ se loo wa fi adesa nɔ yemi se. Waa kɛ wa ní peepee lɛ maa tsɔɔ nɔ nɛ wa fiɔ e se.—Kane Hiob 1:8-12; Abɛ 27:11.
5. Mɛni blɔ nɔ wa maa gu kɛ tsɔɔ kaa Mawu ji wa Nɔ Yelɔ?
Yi mi kpɔ nɛ wa maa mwɔ ɔ lɛ maa tsɔɔ kaa wa suɔ Mawu kaa wa Nɔ Yelɔ loo wa sume lɛ
Wa ma nyɛ maa tsɔɔ kaa Mawu ji wa Nɔ Yelɔ ke wa hla jami nɛ Mawu Munyu nɛ ji Baiblo ɔ tsɔɔ kaa e ji anɔkuale ɔ, nɛ́ waa kɛ wa he wo mi. (Yohane 4:23) Wa ma nyɛ ma kua Satan kaa wa nɔ yelɔ kaa bɔ nɛ Yesu pee ɔ ke wa je wa he kɛ je ma kudɔmi sanehi kɛ ta hwumi he.—Kane Yohane 17:14.
Satan kɛ e he wami tsuɔ ní nɛ e kɛ woɔ je mi bami yaya kɛ ní peepee yayamihi a mi he wami. Ní yayami nɛ ɔmɛ nɛ wa ma kua a ma nyɛ ma ha nɛ wa huɛmɛ kɛ wa weku li komɛ maa ye wa he fɛu loo a maa te si kɛ wo wɔ. (1 Petro 4:3, 4) Enɛ ɔ he ɔ, e sa nɛ wɔ nitsɛmɛ waa tsɔɔ nɔ́ nɛ wa maa pee. Anɛ waa kɛ nihi nɛ a suɔ Mawu maa bɔ lo? Anɛ wa maa bu e mlaahi nɛ nile ngɛ mi nɛ tsɔɔ kaa e suɔ wɔ ɔ tue lo? Ke wa pee ja a, waa kɛ maa tsɔɔ kaa Satan ye lakpa benɛ e de kaa adesa ko be anɔkuale yee ha Mawu ngɛ haomi be mi ɔ.—Kane 1 Korinto Bi 6:9, 10; 15:33.
Suɔmi nɛ Mawu ngɛ kɛ ha adesahi ɔ ji nɔ mi mami kaa ní yayami kɛ nɔ́ nami se maa po. Nihi nɛ a heɔ enɛ ɔ yeɔ ɔ maa hi zugba a nɔ kɛ ya neneene.—Kane Yohane 3:16.