Kɛ O Maa Pee Kɛɛ Konɛ Bua Jɔmi Nɛ Hi O Weku ɔ Mi?

1. Mɛni he je nɛ gba si himi haa nɛ weku si himi peeɔ bua jɔmi ɔ?

Sane kpakpa a je Yehowa ngɔ; e ji bua jɔmi Mawu, nɛ e suɔ kaa wekuhi nɛ a ná bua jɔmi. (1 Timoteo 1:11, NW) Lɛ nɛ e to gba si himi sisi. Gba si himi ngɛ mlaa nya a haa nɛ weku si himi peeɔ bua jɔmi, ejakaa e haa nɛ fɔli kɛ jokuɛwi ɔmɛ nuɔ he kaa a ngɛ slɔkee. E sa nɛ Kristofohi nɛ a ye ma a mlaa nɛ kɔɔ gba si himi nɛ a kɛ maa wo mlaa sisi he ɔ nɔ.​—Kane Luka 2:1, 4, 5.

Kɛ Mawu buɔ gba si himi ha kɛɛ? E suɔ nɛ nyumu kɛ e yo ɔ nɛ a pee kake kɛ hi si daa. Yehowa suɔ nɛ hunomɛ kɛ yigbayihi nɛ a ye a sibi anɔkuale. (Hebri Bi 13:4) E sume gba mi pomi. (Malaki 2:16) Se e ngmɛɛ Kristofohi blɔ nɛ a po gba mi nɛ a kɛ nɔ kpa nɛ́ sɛ gba si himi mi ke nɔ kake ya bɔ ajuama.​—Kane Mateo 19:3-6, 9.

2. Kɛ e sa nɛ huno kɛ e yo nɛ a hi si ha kɛɛ?

Yehowa bɔ nyumu kɛ yo konɛ a ye bua a sibi ngɛ gba si himi mi. (1 Mose 2:18) E sa kaa huno ɔ nɛ ji wekuyi ɔ, e ha e weku ɔ a he lo nya hiami níhi, nɛ́ e tsɔɔ mɛ Mawu he ní. E sa nɛ e suɔ e yo ɔ nɛ e kɛ e he nɛ sa afɔle ha lɛ. E sa nɛ hunomɛ kɛ yigbayihi nɛ a suɔ a he nɛ a je bumi kpo kɛ tsɔɔ a sibi. Akɛnɛ hunomɛ kɛ yigbayihi yi mluku he je ɔ, ke a kɛ tɔmi pa a sibi ɔ, e ma ha bua jɔmi maa hi gba si himi ɔ mi.​—Kane Efeso Bi 4:31, 32; 5:22-25, 33; 1 Petro 3:7.

3. Ke bua jɔmi be o gba si himi mi ɔ, anɛ e sa kaa o je o he piɛɛlɔ ɔ he lo?

Ke nyɛɛ kɛ haomihi ngɛ kpee ngɛ nyɛ gba si himi mi ɔ, e sa kaa nyɛ ni enyɔ ɔmɛ tsuo nyɛ je suɔmi kpo kɛ tsɔɔ nyɛ sibi. (1 Korinto Bi 13:4, 5) Mawu Munyu ɔ de we kaa nɔ ko ma nyɛ maa je e he piɛɛlɔ he ke e kɛ haomihi nɛ pɔɔ ba mi ngɛ gba si himi mi ngɛ kpee.​—Kane 1 Korinto Bi 7:10-13.

4. Jokuɛwi, mɛni Mawu suɔ nɛ nyɛ ná?

Yehowa suɔ nɛ nyɛ ná bua jɔmi. E haa nyɛ ga womi kpakpa bɔ nɛ pee nɛ nyɛ ná bua jɔmi ngɛ nyɛ nihe loo nyɛ zangma be mi. E suɔ nɛ nyɛ ná nile kɛ níhi a si kpami nɛ nyɛ fɔli ngɛ ɔ he se. (Kolose Bi 3:20) Yehowa suɔ nɛ nyɛɛ pee nyɛ Bɔlɔ ɔ kɛ e Bi ɔ a suɔmi nya ní konɛ nyɛ ná bua jɔmi.​—Kane Fiɛlɔ 11:9–12:1; Mateo 19:13-15; 21:15, 16.

5. Fɔli, mɛni he hia nyɛ bimɛ ɔmɛ nɛ ma ha nɛ a ná bua jɔmi ngɛ a si himi mi?

E sa nɛ nyɛ tsu ní wawɛɛ nɛ nyɛ ha nyɛ bimɛ ɔmɛ niye ní, hwɔ he, kɛ heha ní. (1 Timoteo 5:8) Se ke nyɛ bimɛ ɔmɛ ma ná bua jɔmi ɔ, e sa kaa nyɛɛ tsɔɔ mɛ nɛ a suɔ Mawu nɛ a kase lɛ. (Efeso Bi 6:4) Suɔmi nɛ nyɛ ma ná kɛ ha Mawu ɔ maa ta nyɛ bimɛ ɔmɛ a tsui he. Ke nyɛɛ kɛ Mawu Munyu ɔ tsɔseɔ nyɛ bimɛ ɔmɛ ɔ, e ma dla a susumi ngɛ blɔ kpakpa nɔ.​—Kane 5 Mose 6:4-7; Abɛ 22:6.

Ke nyɛ woɔ jokuɛwi ɔmɛ he wami nɛ nyɛ jeɔ a yi ɔ, e yeɔ bua mɛ. A hia tue gblami kɛ tsɔsemi hulɔ. Tsɔsemi nɛ ɔ poɔ a he piɛ kɛ jeɔ je mi bami nɛ be hae nɛ a ná bua jɔmi ɔ he. (Abɛ 22:15) Se, e sɛ nɛ nyɛɛ gbla a tue ngɛ yi mi wami loo blɔ nɛ yeɔ nɔ awi nɔ.​—Kane Kolose Bi 3:21.

Yehowa Odasefohi pee womihi babauu nɛ yeɔ bua fɔli kɛ jokuɛwi titli. Baiblo ɔ nɔ a da kɛ ngma womi nɛ ɔmɛ.​—Kane La 19:7, 11.