Mɛni Blɔ Nɔ O Maa Gu Kɛ Hɛ Mo Kɛ Su Mawu He?

1. Anɛ Mawu buɔ sɔlemihi tsuo tue lo?

Mawu ngɛ nimli tsuo nine fɔe nɛ a hɛ mɛ kɛ su e he ngɛ sɔlemi mi. (La 65:2) Se, pi sɔlemihi tsuo nɛ e buɔ tue loo e bua jɔ he. Kaa nɔ hyɛmi nɔ́ ɔ, ke nyumu ko waa e yo yi mi ɔ, Mawu be e sɔlemi tue bue. (1 Petro 3:7) Jehanɛ hu ɔ, benɛ Israel bi ɔmɛ ya nɔ nɛ a pee ní yayami ɔ, Mawu bui a sɔlemi tue. Se, ke nɔ ko pee yayami nɛ ngɛ hɛdɔ po nɛ e tsake e tsui ɔ, Mawu maa bu e sɔlemi tue. E ngɛ heii kaa sɔlemi ji he blɔ ngua ko nɛ wa ná.​—Kane Yesaya 1:15; 55:7.

Hyɛ video nɛ ji Anɛ Mawu Buɔ Sɔlemihi Tsuo Tue Lo?

2. Kɛ e sa nɛ waa sɔle ha kɛɛ?

Sɔlemi piɛɛ wa jami ɔ he, enɛ ɔ he ɔ, e sa nɛ waa sɔle kɛ ha wa Bɔlɔ nɛ ji Yehowa a pɛ. (Mateo 4:10; 6:9) Jehanɛ se hu, akɛnɛ wa yi mluku, nɛ́ Yesu ba gbo ngɛ wa yayamihi a he he je ɔ, e sa nɛ waa sɔle ngɛ e biɛ mi. (Yohane 14:6) Yehowa sume kaa waa kase sɔlemi pɔtɛɛ ko kɛ wo wa yi mi nɛ waa ti mi loo nɛ́ waa kane kɛ je sɔlemi womi ko mi. E suɔ nɛ waa sɔle kɛ je wa tsui mi.​—Kane Mateo 6:7; Filipi Bi 4:6, 7.

Wa Bɔlɔ ɔ ma nyɛ maa nu sɔlemi nɛ wa sɔleɔ ngɛ wa tsui mi ɔ po. (1 Samuel 1:12, 13) E deɔ wɔ nɛ waa sɔle be tsuaa be, kaa benɛ wa te si mɔtu, benɛ wa yaa hwɔ si, benɛ wa yaa ye ní kɛ benɛ waa kɛ haomihi ngɛ kpee.​—Kane La 55:22; Mateo 15:36.

3. Mɛni he je nɛ Kristofohi buaa a he nya?

E be gbɔjɔɔ kaa wa maa hɛ wɔ kɛ su Mawu he ejakaa wa ngɛ nihi nɛ a he we Mawu yi nɛ́ a yeɔ e si womi kaa tue mi jɔmi maa ba zugba a nɔ ɔ he fɛu ɔ a kpɛti. (2 Timoteo 3:1, 4; 2 Petro 3:3, 13) Enɛ ɔ he ɔ, e he hia nɛ waa kɛ wa nyɛmimɛ Kristofohi nɛ bua wa he nya nɛ waa wo wa sibi he wami.​—Kane Hebri Bi 10:24, 25.

Ke waa kɛ nihi nɛ a suɔ Mawu bɔɔ ɔ, e maa ye bua wɔ konɛ waa hɛ wɔ kɛ su Mawu he. Yehowa Odasefohi a kpehi nɛ́ a peeɔ nɛ o maa ya a ji he blɔ nɛ ma ha nɛ o ná ni kpahi a hemi kɛ yemi ɔ he se.​—Kane Roma Bi 1:11, 12.

4. Mɛni blɔ nɔ o maa gu kɛ hɛ kɛ su Mawu he?

Ke o kase Mawu Munyu ɔ nɛ o susu he ɔ, o ma nyɛ maa hɛ kɛ su Yehowa he. Mo susu e ní tsumihi, e ga womihi, kɛ e si womihi a he. Ke wa sɔleɔ nɛ wa susuɔ níhi a he ɔ, e ma ha nɛ wa maa na se nami nɛ ngɛ Mawu suɔmi kɛ e ni lemi ɔ he.​—Kane Yoshua 1:8; La 1:1-3.

Ja o kɛ o hɛ fɔ Mawu nɔ nɛ o ná hemi kɛ yemi ngɛ e mi loko o ma nyɛ maa hɛ kɛ su e he. Se hemi kɛ yemi ngɛ kaa nibɔ ní nɛ wami ngɛ mi nɛ e biɔ nɛ a lɛ lɛ. Enɛ ɔ he ɔ, e sa kaa be tsuaa be ɔ, o susu yi mi tomi he je nɛ o heɔ ní komɛ yeɔ a he konɛ e ha nɛ o hemi kɛ yemi ɔ mi nɛ wa.​—Kane Mateo 4:4; Hebri Bi 11:1, 6.

5. Ke wa hɛ wɔ kɛ su Mawu he ɔ, mɛni se wa ma ná?

Yehowa susuɔ nihi nɛ a suɔ lɛ ɔ a he. E ma nyɛ maa bu a he ngɛ nɔ́ tsuaa nɔ́ nɛ ma puɛ a hemi kɛ yemi kɛ hɛ kɛ nɔ fɔmi nɛ a ngɛ kaa a ma ná neneene wami ɔ he. (La 91:1, 2, 7-10) E bɔɔ wɔ kɔkɔ ngɛ níhi nɛ maa ye wa nɔmlɔ tso ɔ awi nɛ e be hae nɛ wa ná bua jɔmi ɔ a he. Yehowa tsɔɔ wɔ si himi blɔ nɛ hi pe kulaa.​—Kane La 73:27, 28; Yakobo 4:4, 8.