Anɛ Nihi Nɛ A Gbo ɔ Maa Ba Wami Mi Ekohu Niinɛ Lo?

NƆ́ NƐ BAIBLO Ɔ DE

“Gbogboehi a si temi maa ba.”—Bɔfo Ɔmɛ A Nítsumi 24:15, New World Translation.

BƆNƐ O MA NÁ HE SE HA

E maa wo o bua ke o suɔlɔ ko gbo.—2 Korintobi 1:3, 4.

E be hae nɛ o ye gbenɔ gbeye.—Hebribi 2:15.

E ma ha nɛ o ma ná hɛ kɛ nɔ fɔmi nitsɛ kaa o maa na o suɔli nɛ a gbo ɔ ekohu.—Yohane 5:28, 29.

ANƐ WA MA NYƐ MA HE NƆ́ NƐ BAIBLO Ɔ DEƆ MAA YE NIINƐ LO?

Ee, ke e hí kulaa a, ngɛ yi mi tomi etɛ a heje:

• Mawu ji níhi nɛ wami ngɛ a mi ɔ a Bɔlɔ. Baiblo ɔ tsɔɔ kaa Yehowa Mawu mi lɛ “wami tsuo jeɔ kɛ baa.” (La 36:9; Bɔfo Ɔmɛ A Nítsumi 17:24, 25) Ke nɔ ko gbo ɔ, e ngɛ heii kaa nɔ nɛ bɔ níhi tsuo nɛ wami ngɛ a mi ɔ, ngɛ he wami nɛ e kɛ ma tle lɛ si kɛ ba wami mi ekohu.

• Mawu tle nihi si ngɛ blema be ɔ mi. Baiblo ɔ tu nihi kpaanyɔ nɛ a tle mɛ si kɛ ba wami mi ngɛ zugba a nɔ ekohu ɔ a he munyu. Jokuɛwi, nikɔtɔmahi, nyumuhi, kɛ yihi tsuo piɛɛ he. Ngɛ a ti ni komɛ a blɔ fa mi ɔ, nɛ a gbo ɔ, e kɛ we nɛ a tle mɛ si, se nɔ kake lɛɛ e ye ligbi eywiɛ ngɛ yɔkɔ ɔ mi loko a tle lɛ si!—Yohane 11:39-44.

• Mawu suɔ kaa e ma tle gbogboehi a si ekohu. Yehowa sume kulaa kaa nɔ ko nɛ e gbo; e buɔ gbenɔ kaa e ji he nyɛlɔ. (1 Korintobi 15:26) Yehowa ngɛ he “bua jɔmi” kaa e maa ye jamɛ a he nyɛlɔ ɔ nɛ ji gbenɔ ɔ, nɔ kunimi. E maa pee enɛ ɔ kɛ gu gbogboehi a si nɛ e ma tle ɔ nɔ. Yehowa hɛ ji nihi nɛ a gbo ɔ a nɔ. E ngɛ he bua jɔmi kaa e ma tle mɛ si kɛ ba wami mi ngɛ zugba a nɔ ekohu.—Hiob 14:14, 15.