NÍ KASEMI 4
E Ha Nɛ E Papaa Kɛ Yehowa Ná Bua Jɔmi
Mɛni si nɛ Yefta ngɛ Yehowa woe?
E be gbɔjɔɔ, se Yefta biyo ɔ pee nɔ́ nɛ e papaa a wo si ɔ
O na jokuɛ yoyo ɔ ngɛ foni ɔ mi ɔ lo?— Nyumu ko nɛ a tsɛɛ lɛ Yefta a biyo. Baiblo ɔ tsɔɔ we wɔ e biɛ, se wa le kaa e ha nɛ e papaa kɛ Yehowa ná bua jɔmi. Mo ha nɛ waa kase yoyo nɛ ɔ kɛ e papaa nɛ ji Yefta a he ní.
Yefta ji nɔmlɔ kpakpa, nɛ be tsuaa be ɔ, e tsɔɔ e biyo ɔ Yehowa he ní. Yefta ngɛ he wami nɛ e ji hɛ mi nyɛɛlɔ kpakpa hulɔ. Enɛ ɔ he ɔ, Israelbi ɔmɛ de lɛ kaa e nyɛɛ a hɛ mi konɛ a kɛ a he nyɛli nɛ ya hwu ta.
Yefta sɔle ha Mawu nɛ e ye bua lɛ konɛ e ye kunimi. Yefta wo si kaa ke e ye kunimi ɔ, e maa ngɔ nɔ nɛ maa je e we ɔ mi kɛ ba kpee lɛ kekle ɔ kɛ ha Yehowa. Jamɛatsɛ ɔ maa hi Mawu kpe he bo tsu ɔ mi e wami be tsuo nɛ e ma tsu ní ngɛ lejɛ ɔ. Blema a, kpe he bo tsu ɔ ji he nɛ Mawu webi jaa lɛ ngɛ. Yefta ye kunimi ngɛ ta a mi! O le nɔ nɛ je kpo ngɛ Yefta we ɔ mi kekle kɛ ba kpee lɛ benɛ e ba we mi ɔ lo?—
Yefta biyo ɔ! Lɛ pɛ ji e bi, se e sa nɛ Yefta nɛ ngɔ lɛ kɛ ho. Nɔ́ nɛ ɔ hao Yefta wawɛɛ. Se mo kai kaa e wo si. Amlɔ nɔuu nɛ e biyo ɔ de ke: ‘Papaa, o wo Yehowa si, lɔɔ he ɔ, e sa nɛ o ye nɔ.’
Daa jeha a, Yefta biyo ɔ huɛmɛ ɔmɛ ya slaa lɛ
Yefta biyo ɔ hu hao. Ke e ya hi kpe he bo tsu ɔ mi ɔ, e be nyɛe ma ya gba nɛ e be nyɛe ma fɔ bimɛ hulɔ. Se e suɔ nɛ e maa ye e papaa a si womi ɔ nɔ konɛ e ha nɛ Yehowa bua nɛ jɔ. Lɔɔ he hia lɛ saminya pe nɛ e maa gba loo e ma fɔ bimɛ. Enɛ he ɔ, e je we mi nɛ e ya hi kpe he bo tsu ɔ mi e wami be tsuo.
Anɛ o susu kaa nɔ́ nɛ e pee ɔ ha nɛ e papaa kɛ Yehowa ná bua jɔmi lo?— Ee, a ná bua jɔmi! Ke o peeɔ tue bumi kɛ haa Yehowa nɛ o suɔ lɛ ɔ, o ma nyɛ maa pee kaa bɔnɛ Yefta biyo ɔ pee ɔ. Mo hu o ma ha nɛ o fɔli kɛ Yehowa bua maa jɔ saminya.