Timoteo Suɔ Kaa E Maa Ye Bua Nihi

Timoteo ji niheyo nɛ e bua jɔ he kaa e maa ye bua nihi. E hia blɔ kɛ ya hehi fuu konɛ e ya ye bua nihi. Enɛ ɔ he ɔ, e ná bua jɔmi ngɛ e si himi mi wawɛɛ. O suɔ nɛ o maa le bɔnɛ e plɛ kɛ ye bua nihi ha lo?—

Listra ji he nɛ Timoteo hi kɛ wa. Benɛ e ji jokuɛyo ɔ, e nã Loise kɛ e yayo Eunike bɔni lɛ Yehowa he ní tsɔɔmi. Benɛ Timoteo wa a, e suɔ nɛ e maa ye bua nihi nɛ a kase Yehowa he ní.

Benɛ Timoteo ji niheyo ɔ, Paulo bi lɛ kɛji e maa piɛɛ e he kɛ hia blɔ konɛ a ya fiɛɛ ngɛ he komɛ. Timoteo he nɔ ke: ‘Ee!’ E pee klaalo kaa e maa ya konɛ e ya ye bua nihi.

Timoteo kɛ Paulo hia blɔ kɛ ho ma ko ngɛ Makedonia nɛ a tsɛɛ lɛ Tesalonika a nɔ ya. E sa nɛ a nyɛɛ blɔ gagaaga nɛ a sɛ lɛ mi loko a ma ya su lejɛ ɔ. Benɛ a ya su lejɛ ɔ, a ye bua nihi fuu nɛ a kase Yehowa he ní. Se ni komɛ a mi mi fu nɛ a ngɛ hlae kaa a maa ye mɛ awi. Enɛ ɔ he ɔ, Paulo kɛ Timoteo je lejɛ ɔ nɛ a ya fiɛɛ ngɛ he kpahi.

Nyɔhiɔ bɔɔ se ɔ, Paulo tsɔ Timoteo kɛ ho Tesalonika ya konɛ e ya slaa nyɛmimɛ ɔmɛ. E biɔ nɛ e pee kã loko e maa kpale kɛ ya ma nɛ oslaa ngɛ mi nɛ ɔ mi! Se Timoteo kpale kɛ ya ejakaa e ngɛ tsui yee ngɛ nyɛmimɛ nɛ a ngɛ lejɛ ɔ a he. E kɛ amaniɛ bɔmi kpakpa ba ha Paulo. Nyɛmimɛ ɔmɛ nɛ a ngɛ Tesalonika a ngɛ saminya!

Timoteo kɛ Paulo tsu ní jeha fuu. Be ko ɔ, Paulo ngma kaa Timoteo ji nɔ nɛ e sa kaa e maa tsɔ lɛ konɛ e ya ye bua asafo ɔmɛ. Timoteo suɔ Yehowa nɛ e suɔ nihi hulɔ.

Anɛ o ngɛ suɔmi kɛ ha nihi, nɛ o suɔ kaa o maa ye bua mɛ konɛ a kase Yehowa he ní lo?— Ke o pee jã a, o ma ná bua jɔmi ngɛ o si himi mi wawɛɛ, kaa bɔnɛ Timoteo ná bua jɔmi ɔ!