Matsɛ Yemi Nɛ Maa Ye Zugba a Tsuo Nɔ

O ma nyɛ maa tsɔɔ Matsɛ Yemi nɛ wa ngɛ he munyu tue ɔ lo?— Ee, e ji Mawu Matsɛ Yemi ɔ nɛ maa pee zugba a tsuo Paradeiso ɔ. O suɔ kaa o maa kase Matsɛ Yemi nɛ ɔ he ní fuu lo?—

Matsɛ yemihi tsuo ngɛ matsɛ ngɛ a nya. Matsɛ nɛ ɔ yeɔ nihi ngɛ e ma a mi ɔ a nɔ. O le Mawu Matsɛ Yemi ɔ nya Matsɛ lo?— Lɛ ji Yesu Kristo. E ngɛ hiɔwe. E be kɛe nɛ e maa ye nimli tsuo ngɛ zugba a nɔ ɔ a nɔ! O susu kaa wa ma ná bua jɔmi ke Yesu ngɛ zugba a tsuo nɔ Matsɛ yee lo?—

Wa bua maa jɔ saminya! Ngɛ Paradeiso ɔ mi ɔ, nihi be kunɔ nɔe nɛ a be ta hwue hu. Nɔ tsuaa nɔ maa suɔ e sibi. Nɔ ko be hiɔ nue nɛ nɔ ko be gboe. Hɛ yuli maa hyɛ nɔ́, tue kpokutsɛmɛ maa nu nɔ́, nɛ nihi nɛ a nyɛ we nyɛɛmi ɔ maa tu fɔ nɛ a maa tuu. Nɔ tsuaa nɔ ma ná niye ní babauu maa ye. Nɛ lohwehi kɛ a sibi kɛ wɔ maa pee huɛ. Nihi nɛ a gbo ɔmɛ maa te si kɛ ba wami mi ekohu. Nyumuhi kɛ yihi fuu nɛ wa kase a he ní ngɛ womiyo nɛ ɔ mi kaa Rebeka, Rahab, David, kɛ Eliya maa te si kɛ ba wami mi ekohu! Anɛ o suɔ nɛ o maa kpee mɛ be mi nɛ a te si ɔ lo?—

Yehowa suɔ mo nɛ e suɔ nɛ o ná bua jɔmi. Ke o ya nɔ nɛ o kase Yehowa he ní nɛ o pee tue bumi kɛ ha lɛ ɔ, o ma nyɛ maa hi si ngɛ Paradeiso nɛ ngɛ fɛu mi kɛ ya daa! O suɔ jã lo?—