YI 9

Yiblii Nɛ Fiɛɛmi Ní Tsumi ɔ Wo—‘Ngmɔ Ɔmɛ Ba Ní, Nɛ E Kpami Be Su’

OTI NƐ NGƐ YI NƐ Ɔ MI

Yehowa ha nɛ Matsɛ Yemi ɔ he anɔkuale dumi wu ɔmɛ puɛ, nɛ a wa

1, 2. (a) Mɛni he je nɛ kaseli ɔmɛ a nya kpɛ a he ɔ? (b) Ní kpami te nɛɛ nɛ Yesu tu he munyu ɔ?

YESU kaseli ɔmɛ a nya kpɛ a he. Yesu de mɛ ke: “Nyɛɛ hyɛ ngmɔ ɔmɛ a nɔ kɛ kpe, nɛ nyɛ maa na kaa ní ba, nɛ e kpami be su.” A hyɛ he nɛ Yesu kɛ e nine tsɔɔ ɔ, se a nɛ́ ngmɔ nɛ ba ní, mohu ɔ, a na ngma nɛ puɛ. Eko ɔ, a bi a he ke: ‘Mɛni ní kpami he munyu e ngɛ tue ɔ? Ní kpami be sui lolo.’—Yoh. 4:35.

² Pi ní kpami nitsɛnitsɛ he munyu nɛ Yesu ngɛ tue. Mohu ɔ, e ngɛ e kaseli ɔmɛ níhi enyɔ komɛ nɛ a he hia wawɛɛ nɛ kɔɔ mumi mi ní kpami, nɛ ji ní kpami nɛ kɔɔ nimli a he ɔ tsɔɔe. Mɛni ji níhi nɛ e tsɔɔ mɛ ɔ? Bɔ nɛ pee nɛ waa na heto ɔ, nyɛ ha nɛ wa susu munyu ɔ he fitsofitso.

A Wo Mɛ He Wami Nɛ A Tsu Ní, Nɛ A Wo Mɛ Si Kaa A Ma Ná Bua Jɔmi

3. (a) Eko ɔ, mɛni ha Yesu de ke: ‘Ngmɔ ɔmɛ ba ní, nɛ e kpami be su’ ɔ? (b) Kɛ Yesu tsɔɔ e munyu ɔ mi ha kɛɛ?

³ Ngɛ jeha 30 ɔ nyagbe ɔ, Yesu kɛ e kaseli ɔmɛ sɛɛ ní ngɛ Samaria ma ko nɛ a tsɛɛ Sikar a mi. Benɛ e kaseli ɔmɛ ho ma a mi ya a, Yesu ya hi si ngɛ vu ko nya, nɛ e kɛ yo ko tu mumi mi anɔkuale ɔmɛ a he munyu, nɛ amlɔ nɔuu nɛ yo ɔ na bɔ nɛ ní nɛ Yesu tsɔɔ lɛ ɔ he hia ha. Benɛ Yesu kaseli ɔmɛ kpale kɛ ba a, yo ɔ kɛ oya yemi ho Sikar ma a mi ya, nɛ e ya de nihi nɛ a ngɛ e kpɔ ɔ mi ɔ nyakpɛ níhi nɛ e kase ɔ. Nihi babauu a bua jɔ níhi nɛ yo ɔ de mɛ ɔ he wawɛɛ, nɛ a sa fo kɛ ba Yesu ngɔ. Eko ɔ, ngɛ jamɛ a be ɔ mi ɔ,Yesu na kaa ke be ngɛ mi pue ɔ, Samaria bi fuu ma ba kplɛɛ anɔkuale ɔ nɔ, lɔ ɔ he nɛ e de ke: “Nyɛɛ hyɛ ngmɔ ɔmɛ a nɔ kɛ kpe, nɛ nyɛ maa na kaa ní ba, nɛ e kpami be su” ɔ nɛ. Kɛkɛ nɛ Yesu tsɔɔ nɔ́ nɛ e de ɔ mi. E tsɔɔ kaa pi ní kpami nitsɛnitsɛ, se mohu mumi mi ní kpami. E de ke: “Ní kpalɔ ɔ . . . ngɛ ngmɔ ní nya buae kɛ ngɛ wami nɛ ngɛ kɛ yaa neneene ɔ toe.”—Yoh. 4:5-30, 36.

4. (a) Mɛni níhi enyɔ nɛ Yesu tsɔɔ mi kɛ kɔ ní kpami ɔ he? (b) Mɛni sane bimihi a he wa ma susu?

⁴ Mɛni ji níhi enyɔ nɛ a he hia nɛ Yesu tsɔɔ kɛ kɔ mumi mi ní kpami ɔ he? Kekleekle ɔ, ní tsumi ɔ he hia wawɛɛ. Munyu nɛ Yesu tu kaa ‘ngmɔ ɔmɛ ba ní . . . nɛ e kpami be su’ ɔ ji munyu nɛ e kɛ wo e kaseli ɔmɛ he wami. Bɔ nɛ pee nɛ Yesu kaseli ɔmɛ nɛ a na bɔ nɛ ní tsumi ɔ he hia ha a, e de mɛ ke: “Amlɔ nɛ ɔ po ní kpalɔ ɔ ngɛ e hiɔwo nae.” Ngɛ anɔkuale mi ɔ, ní kpami ɔ je sisi momo—e sɛ nɛ a to tsle! Nɔ́ nɛ ji enyɔ ɔ, ní tsuli ɔmɛ a bua jɔ. Yesu de ke, ní duli ɔmɛ, kɛ ní kpali ɔmɛ tsuo “bla kɛ nya.” (Yoh. 4:35b, 36) Kaa bɔ nɛ atsinyɛ jemi ko be he kaa Yesu ná bua jɔmi benɛ e na kaa ‘Samaria bi babauu he lɛ ye’ ɔ, jã nɔuu nɛ e kaseli ɔmɛ hu ná bua jɔmi babauu benɛ a kɛ a he wo ní kpami ní tsumi ɔ mi vii ɔ. (Yoh. 4:39-42) Nɔ́ nɛ ya nɔ ngɛ kaseli ɔmɛ a be ɔ mi nɛ ɔ he hia wɔ wawɛɛ mwɔnɛ ɔ, ejakaa e haa nɛ wa naa nɔ́ nɛ ngɛ nɔ yae mwɔnɛ ɔ, benɛ wa ngɛ mumi mi ní kpami ní tsumi ngua a tsue ɔ. Mɛni be nɛ mwɔnɛ ɔ be mi ní kpami ɔ je sisi? Mɛnɔmɛ nɛ a ngɛ ní ɔ tsue? Mɛni je mi kɛ ba?

Wa Matsɛ ɔ Ngɛ Ní Kpami Nɛ Pe Tsuo ɔ Hɛ Mi Nyɛɛe

5. Mɛnɔmɛ nɛ a nyɛɛ hɛ mi ngɛ je kɛ wɛ ní kpami ɔ mi, nɛ mɛni blɔ nɔ nɛ Yohane nina a tsɔɔ kaa ní tsumi ɔ he hia wawɛɛ ngɛ?

⁵ Ngɛ nina nɛ a je tsɔɔ bɔfo Yohane ɔ mi ɔ, Yehowa tsɔɔ kaa e hla Yesu nɛ e nyɛɛ hɛ mi konɛ a pee nihi kaseli ngɛ je kɛ wɛ. (Kane Kpojemi 14:14-16.) Ngɛ nina a mi ɔ, a tsɔɔ kaa Yesu fi jlasi, nɛ e hɛɛ ngma kpami ha ngɛ e dɛ. ‘Sika tsu jlasi nɛ fi Yesu yi’ ɔ maa nɔ mi kaa e ji Matsɛ nɛ ngɛ nɔ yee. ‘Ngma kpami ha nɛ nya ba nɛ e hɛɛ ngɛ e dɛ mi’ ɔ maa nɔ mi kaa e ji Ní Kpalɔ. Benɛ Yehowa de kɛ gu hiɔwe bɔfo ko nɔ kaa “ní ba saminya ngɛ zugba a nɔ” ɔ, e ngɛ nɔ mi mae kaa ní tsumi ɔ he hia wawɛɛ. Ngɛ anɔkuale mi ɔ, “be su nɛ a ma kpa ní”—Be bé kɛ ha tsle tomi! Benɛ Yesu ngɛ Mawu fami kaa “ngɔɔ o ngma kpami ha a nɛ o kɛ kpa ní” ɔ he ní tsue ɔ, e kpã e nine mi, nɛ e kɛ e ha a kpa ní ngɛ zugba a nɔ—nɛ ji adesahi. Nina nɛ ngɛ bua jɔmi nɛ ɔ kaiɔ wɔ ekohu kaa ‘ngmɔ ɔmɛ ba ní, nɛ e kpami be su.’ Anɛ nina nɛ ɔ ye bua wɔ nɛ wa le be nɛ je kɛ wɛ ní kpami nɛ ɔ je sisi lo? Ee!

6. (a) Mɛni be nɛ “ní kpami be ɔ” je sisi? (b) Mɛni be nɛ ‘zugba a nɔ ní kpami’ ɔ je sisi? Moo tsɔɔ nya.

⁶ Akɛnɛ Yohane nina nɛ ngɛ Kpojemi yi 14 ɔ tsɔɔ kaa Yesu nɛ ji Ní Kpalɔ ɔ fi jlasi (kuku 14) he je ɔ, lɔ ɔ tsɔɔ kaa a wo lɛ Matsɛ momo ngɛ jeha 1914. (Dan. 7:13, 14) Pee se ɔ, a fa Yesu kaa e je ní kpami ɔ sisi (kuku 15). Bɔ nɛ níhi ya nɔ ha a nɔuu ji bɔ nɛ wa na ngɛ Yesu nɔ́ hetomi nɔ́ nɛ kɔɔ ngma a kɛ hu ɔ he ɔ mi ɔ nɛ. Yesu de ke: ‘Ngma kpami be ɔ ji je nɛ ɔ nyagbe be ɔ.’ Lɔ ɔ he ɔ, ngma kpami be ɔ, kɛ je nɛ ɔ nyagbe be ɔ je sisi ngɛ be kake mi—ngɛ jeha 1914. Benɛ ‘ngma kpami be’ ɔ je sisi be bɔɔ se loko a bɔni ngma a kpami nitsɛnitsɛ. (Mat. 13:30, 39) Ke wa susu níhi nɛ ya nɔ ɔ he amlɔ nɛ ɔ, wa naa kaa Yesu bɔni nɔ yemi kaa Matsɛ jeha komɛ a se loko ní kpami be ɔ je sisi. Kekleekle ɔ, kɛ je jeha 1914 kɛ ba si jeha 1919 ɔ sisije ɔ, Yesu tsu e se nyɛɛli nɛ a pɔ mɛ nu ɔ a he. (Mal. 3:1-3; 1 Pet. 4:17) Lɔ ɔ se ngɛ jeha 1919 ɔ mi ɔ, ‘zugba a nɔ ní kpami’ ɔ je sisi. Yesu kɛ oya yemi hla tsɔlɔ anɔkualetsɛ ɔ nɛ e ye bua wa nyɛmimɛ ɔmɛ konɛ a na bɔ nɛ fiɛɛmi ní tsumi ɔ he hia ha. Mo susu nɔ́ nɛ ya nɔ ɔ he nɛ o hyɛ.

7. (a) Mɛni ji nɔ́ nɛ ye bua wa nyɛmimɛ ɔmɛ nɛ a na bɔ nɛ fiɛɛmi ní tumi ɔ he hia ha? (b) Mɛni nɛ a wo wa nyɛmimɛ ɔmɛ he wami kaa a pee?

⁷ Ngɛ July 1920 ɔ mi ɔ, Hwɔɔmi Mɔ ɔ de ke: “Ngmami ɔ nɛ wa kase saminya a ha nɛ e pee heii kaa nihi tsuo nɛ yaa sɔlemi ná he blɔ ngua kaa a maa fiɛɛ sɛ gbi nɛ kɔɔ Matsɛ Yemi ɔ he.” Kaa nɔ hyɛmi nɔ́ ɔ, Yesaya gbami munyu ɔmɛ ye bua nyɛmimɛ ɔmɛ nɛ a na kaa e sa nɛ a fiɛɛ Matsɛ Yemi sɛ gbi ɔ ngɛ je kɛ wɛ. (Yes. 49:6; 52:7; 61:1-3) A li bɔ nɛ a ma plɛ kɛ tsu ní tsumi nɛ ɔ ha, se a kɛ a hɛ fɔ Yehowa nɔ kaa e maa ye bua mɛ. (Kane Yesaya 59:1.) Akɛnɛ a ba nu bɔ nɛ fiɛɛmi ní tsumi ɔ he hia ha a sisi saminya he je ɔ, a wo nyɛmimɛ nyumuhi he wami konɛ a tsu fiɛɛmi ní tsumi ɔ wawɛɛ. Kɛ nyɛmimɛ ɔmɛ pee a ní ngɛ he ha kɛɛ?

8. Ngɛ jeha 1921 ɔ mi ɔ, mɛni ní enyɔ komɛ nɛ kɔɔ fiɛɛmi ní tsumi ɔ he nɛ wa nyɛmimɛ ɔmɛ ba nu sisi?

⁸ Ngɛ December 1921 ɔ mi ɔ, Hwɔɔmi Mɔ ɔ de ke: “Jeha 1921 ji jeha nɛ hi saminya; nihi babauu nu anɔkuale sɛ gbi ɔ he ngɛ jeha nɛ ɔ mi pe jehahi nɛ be ɔ.” Womi ɔ de hu ke: “Loloolo ɔ, ní tsumi fuu ngɛ nɛ wa ma tsu. . . . Nyɛ ha nɛ waa kɛ bua jɔmi nɛ tsu.” Mo kadi bɔ nɛ nyɛmimɛ ɔmɛ na níhi enyɔ nɛ he hia nɛ kɔɔ fiɛɛmi ní tsumi nɛ Yesu fa e kaseli ɔmɛ kaa a tsu ɔ he: Ní tsumi ɔ he hia wawɛɛ, nɛ ní tsuli ɔmɛ ma ná bua jɔmi.

9. (a) Ngɛ jeha 1954 ɔ mi ɔ, mɛni Hwɔɔmi Mɔ ɔ de ngɛ ní kpami ní tsumi ɔ he, nɛ mɛni he je? (b) Mɛni blɔ nɔ nɛ fiɛɛli a yibɔ ya hɛ mi ngɛ jeha 50 nɛ be ɔ mi? (Hyɛ munyu nɛ e yi ji, “Fiɛɛli A Yibɔ Ya Hɛ Mi Ngɛ Je Kɛ Wɛ” ɔ hulɔ.)

⁹ Ngɛ jeha 1930 jeha amɛ a mi benɛ nyɛmimɛ ɔmɛ ba na kaa nimli asafo nɛ ji to kpa amɛ maa bu Matsɛ Yemi ɔ he sɛ gbi ɔ tue ɔ, a wo fiɛɛmi ní tsumi ɔ mi la. (Yes. 55:5; Yoh. 10:16; Kpoj. 7:9) Mɛni je mi kɛ ba? Nihi nɛ a ngɛ Matsɛ Yemi ɔ he sɛ gbi ɔ fiɛɛe ɔ a yibɔ ya hɛ mi kɛ je 41,000 ngɛ jeha 1934 ɔ mi, kɛ ya su 500,000 ngɛ jeha 1953 ɔ mi! December 1, 1954 Hwɔɔmi Mɔ ɔ de ke: “Yehowa mumi ɔ kɛ he wami nɛ ngɛ e Munyu ɔ mi ɔ nɛ ha nɛ a tsu ní kpami ní tsumi ngua nɛ ɔ ngɛ je kɛ wɛ ɔ nɛ.”a—Zak. 4:6.

**FIƐƐLI A YIBƆ YA HƐ MI NGƐ JE KƐ WƐ**
Ma	1962	1987	2013
Australia	15,927	46,170	66,023
Brazil	26,390	216,216	756,455
France	18,452	96,954	124,029
Italy	6,929	149,870	247,251
Japan	2,491	120,722	217,154
Mexico	27,054	222,168	772,628
Nigeria	33,956	133,899	344,342
Philippines	36,829	101,735	181,236
U.S., Amerika	289,135	780,676	1,203,642
Zambia	30,129	67,144	162,370

**BAIBLO KASELI A YIBƆ NGƐ HƐ MI YAE**
1950	234,952
1960	646,108
1970	1,146,378
1980	1,371,584
1990	3,624,091
2000	4,766,631
2010	8,058,359

A Ngɔ Nɔ́ Hetomi Nɔ́ Kɛ Tsɔɔ Nɔ́ Nɛ Maa Je Ní Kpami ɔ Mi Kɛ Ba a Mi Fitsofitso

10, 11. Mɛni ji ní komɛ nɛ kɔɔ bɔ nɛ sinapi wu ɔ puɛ nɛ e wa a he nɛ a ma nɔ mi ngɛ nɔ́ hetomi nɔ́ ɔ mi?

¹⁰ Yesu tsɔɔ nɔ́ nɛ maa je ní kpami ní tsumi ɔ mi kɛ ba a mi fitsofitso ngɛ e Matsɛ Yemi nɔ́ hetomi ní ɔmɛ a mi. Nyɛ ha nɛ wa susu nɔ́ hetomi nɔ́ nɛ kɔɔ sinapi wu kɛ masa a he nɛ waa hyɛ. Wa ma susu bɔ nɛ a ba mi ha ngɛ nyagbe be ɔ mi ɔ he titli.

¹¹ Sinapi wu he nɔ́ hetomi nɔ́ ɔ. Nyumu ko du sinapi wu. Wu ɔ puɛ nɛ e wa, nɛ e ba pee tso ngua, nɛ lohwe pɛlitsɛmɛ ba pee tsu ngɛ e kɔni ɔmɛ a mi. (Kane Mateo 13:31, 32.) Mɛni ji ní komɛ nɛ kɔɔ bɔ nɛ sinapi wu ɔ puɛ nɛ e wa ha a he nɛ a ma nɔ mi ngɛ nɔ́ hetomi nɔ́ nɛ ɔ mi? (1) Bɔ nɛ e puɛ nɛ e wa ha a ngɛ nyakpɛ. “Wu nyafii pe kulaa” a ba pee tso nɛ tsɛ̃ “kɔni nguanguahi.” (Mar. 4:31, 32) (2) Nɔ mi mami ngɛ kaa e maa wa. ‘Ke a du wu ɔ, e puɛɔ nɛ e waa.’ Yesu de we ke, ‘Eko ɔ, e maa wa.’ Mohu ɔ, e de ke: ‘e wa.’ Nɔ́ ko be nyɛe maa tsi e wami nya. (3) E waa, nɛ “lohwe pɛlitsɛmɛ baa nɛ a ba peeɔ tsu ngɛ e kɔni ɔmɛ a mi.” Mɛni blɔ nɔ nɛ níhi etɛ nɛ a tu he munyu nɛ ɔ kɔɔ mumi mi ní kpami nɛ ngɛ nɔ yae mwɔnɛ ɔ he ngɛ?

12. Mɛni blɔ nɔ nɛ sinapi wu ɔ he nɔ́ hetomi nɔ́ ɔ kɔɔ ní kpami nɛ ngɛ nɔ yae mwɔnɛ ɔ he ngɛ? (Hyɛ munyu nɛ e yi ji, “Baiblo Kaseli A Yibɔ Ngɛ Hɛ Mi Yae” ɔ hulɔ.)

¹² (1) Bɔ nɛ e maa wa ha: Nɔ́ hetomi nɔ́ ɔ tsɔɔ kaa Matsɛ Yemi sɛ gbi ɔ, kɛ Kristofohi asafo ɔ maa ya hɛ mi. Kɛ je jeha 1919 ɔ mi kɛ ma nɛ ɔ, a bua ní kpami ní tsuli nɛ a ngɛ kã a nya kɛ wo Kristofohi asafo nɛ a kɛ ma si ekohu ɔ mi. Ngɛ jamɛ a be ɔ mi ɔ, ní tsuli ɔmɛ a he pi, se fiɛɛmi ní tsumi ɔ ya hɛ mi mlamlaamla. Ngɛ anɔkuale mi ɔ, bɔ nɛ wu ɔ puɛ nɛ e wa ngɛ jeha 1900 jeha amɛ a mi kɛ ba si mwɔnɛ ɔ ngɛ nyakpɛ. (Yes. 60:22) (2) Nɔ mi mami ngɛ: Nɔ ko nyɛ we nɛ e tsi Kristofohi asafo ɔ nya. Ngɛ si temi kɛ womi nɛ Mawu he nyɛli kɛ ba dumi wu nyafii ɔ nɔ ɔ tsuo se ɔ, e puɛ, nɛ e wa. (Yes. 54:17) (3) Peeɔ Tsu: “Lohwe pɛlitsɛmɛ” ɔmɛ nɛ a ba peeɔ tsu ngɛ tso ɔ kɔni ɔmɛ a mi ɔ daa si kɛ ha nihi ayɔhi abɔ nɛ a hɛɛ tsui kpakpa nɛ a je mahi maa pee 240 a nɔ ɔ. A ba pee Kristofohi asafo ɔ fã akɛnɛ a kplɛɛ Matsɛ Yemi ɔ he sɛ gbi nɔ ɔ he je. (Ezek. 17:23) A náa mumi mi niye ní, he wami womi, kɛ he piɛ pomi ngɛ asafo ɔ mi.—Yes. 32:1, 2; 54:13.

Lohwe pɛlitsɛmɛ slɔɔtohi nɛ a ngɛ sinapi tso ko mi — Nɔ́ hetomi nɔ́ nɛ kɔɔ sinapi wu ɔ he ɔ tsɔɔ kaa hi he, kɛ he piɛ pomi ngɛ Kristofohi asafo ɔ mi (Hyɛ kuku 11, 12)

13. Mɛni ji ní komɛ nɛ kɔɔ hɛ mi yami he nɛ masa a he nɔ́ hetomi nɔ́ ɔ ma nɔ mi?

¹³ Masa a he nɔ́ hetomi nɔ́ ɔ. Benɛ yo ko ngɔ masa kɛ futu mamu ɔ se ɔ, mamu ɔ tsuo sa. (Kane Mateo 13:33.) Mɛni ji ní komɛ nɛ kɔɔ hɛ mi yami he nɛ a ma nɔ mi ngɛ nɔ́ hetomi nɔ́ nɛ ɔ mi? Nyɛ ha nɛ wa susu ní enyɔ nɛ kɔɔ hɛ mi yami he ɔ he. (1) Hɛ mi yami ɔ kɛ tsakemi ba. Masa a ha nɛ ‘mamu ɔ tsuo sa.’ (2) Hɛ mi yami ɔ gbɛ fia. A kɛ masa futu “mamu lita nyingmi eywiɛ” ɔ tsuo. Mɛni blɔ nɔ nɛ níhi enyɔ nɛ a tu he munyu nɛ ɔ kɔɔ mumi mi ní kpami nɛ ngɛ nɔ yae mwɔnɛ ɔ he ngɛ?

14. Mɛni blɔ nɔ nɛ masa a he nɔ́ hetomi nɔ ɔ kɔɔ ní kpami nɛ ngɛ nɔ yae mwɔnɛ ɔ he ngɛ?

¹⁴ (1) Tsakemi: Masa a daa si kɛ ha Matsɛ Yemi ɔ he sɛ gbi ɔ, nɛ mamu ɔ tsuo daa si kɛ ha adesahi. Kaa bɔ nɛ masa nɛ a kɛ futu mamu ɔ ha nɛ tsakemi ba a, jã nɔuu kɛ̃ nɛ Matsɛ Yemi sɛ gbi ɔ ha nɛ nihi nɛ a kplɛɛ sɛ gbi ɔ nɔ ɔ tsake a tsui. (Rom. 12:⁠2) (2) Gbɛ fia: Bɔ nɛ masa a ha nɛ mamu ɔ tsuo sa a peeɔ bɔ nɛ Matsɛ Yemi sɛ gbi ɔ maa gbɛ fia a he okadi. Masa a futu mamu ɔ tsuo, nɛ lɔ ɔ ha nɛ mamu ɔ tsuo sa. Jã nɔuu kɛ̃ nɛ Matsɛ Yemi sɛ gbi ɔ gbɛ fia ‘kɛ ya su je ɔ nyagbe he tɔɔ.’ (Níts. 1:8) Nɔ́ hetomi nɔ́ nɛ ɔ hu tsɔɔ kaa ngɛ mahi nɛ a tsi wa ní tsumi ɔ nya ngɛ a mi ɔ mi po ɔ, Matsɛ Yemi sɛ gbi ɔ maa ya nɔ maa gbɛ fiã, e ngɛ mi kaa nihi be yɔsee kaa wa ngɛ fiɛɛe ngɛ mahi kaa jã amɛ a nɔ mohu.

15. Mɛni blɔ nɔ nɛ munyu nɛ ngɛ Yesaya 60:5, 22 ɔ ba mi ngɛ? (Hyɛ dakahi nɛ ji, “Yehowa Nɛ Pee” kɛ “Bɔ Nɛ ‘Wɛtso Nyafii Pe Kulaa’ Ba Pee ‘Ma Kpetekpleenyɛ.’ ”)

¹⁵ Maa pee jeha 800 loko Yesu kɛ nɔ́ hetomi nɔ́ nɛ ɔ ma tsu ní ɔ, Yehowa gu gbalɔ Yesaya nɔ kɛ tsɔɔ bɔ nɛ mumi mi ní kpami nɛ ɔ yi ma bli ha ngɛ wa be nɛ ɔ mi, kɛ bua jɔmi nɛ maa je mi kɛ ba a he sane nɛ sa kadimi.b Yehowa tu nihi nɛ “je ma se tsitsaa” kɛ ba e we asafo ɔ mi ɔ he munyu. Benɛ Yehowa kɛ ‘yo’ ɔ nɛ daa si kɛ ha nihi nɛ a pɔ mɛ nu nɛ a piɛ ngɛ zugba a nɔ ɔ ngɛ munyu tue ɔ, e de ke: “O bua maa jɔ; o maa muɔ jɛɛ, nɛ o ma nya saminya; ejakaa je ma amɛ maa ngɔ a juetli, kɛ sika nɛ a na ngɛ wo se ɔ tsuo kɛ ba o ngɔ.” (Yes. 60:1, 4, 5, 9) Hyɛ bɔ nɛ munyu nɛ ɔmɛ ji anɔkuale ha! Mwɔnɛ ɔ, nihi nɛ a kɛ be babauu sɔmɔ Yehowa a ngɛ bua jɔmi, ejakaa jinɛ Matsɛ Yemi fiɛɛli nɛ a ngɛ mahi nɛ a ngɛ mi ɔ mi ɔ a he pi, se amlɔ nɛ ɔ, a he ba hiɛ babauu.

Nɔ́ He Je Nɛ Yehowa We Bi Tsuo Ngɛ Bua Jɔmi

16, 17. Mɛni ji yi tomi kake he je nɛ ‘ní dulɔ ɔ kɛ ní kpalɔ ɔ tsuo ná bua jɔmi ɔ’? (Hyɛ daka nɛ ji, “Bɔ Nɛ Dɛ Womihi Enyɔ Ta Nihi Enyɔ A Tsui He Ha Ngɛ Amazon” ɔ hulɔ.)

¹⁶ O ma kai kaa Yesu de e kaseli ɔmɛ ke: “Ní kpalɔ ɔ ngɛ . . . ngmɔ ní nya buae kɛ ngɛ wami nɛ ngɛ kɛ yaa neneene ɔ toe, konɛ ní dulɔ ɔ, kɛ ní kpalɔ ɔ tsuo nɛ a bla kɛ nya.” (Yoh. 4:36) Mɛni blɔ nɔ nɛ wɔ tsuo wa ‘blaa kɛ nya a’ ngɛ je kɛ wɛ ní kpami ɔ mi? Ngɛ blɔhi fuu a nɔ. Nyɛ ha nɛ wa susu etɛ he.

¹⁷ Kekleekle ɔ, wa bua jɔ blɔ nya ní nɛ Yehowa tsuɔ ngɛ ní tsumi ɔ mi ɔ he. Ke wa fiɛɛ Matsɛ Yemi sɛ gbi ɔ, e tsɔɔ kaa wa du dumi wu. (Mat. 13:18, 19) Ke wa ye bua nɔ ko nɛ e ba pee Yesu kaselɔ ɔ, lɔ ɔ tsɔɔ kaa wa kpa ní. Wɔ tsuo wa bua jɔɔ wawɛɛ be mi nɛ wa ngɛ bɔ nɛ Yehowa ha nɛ Matsɛ Yemi dumi wu ɔ ‘puɛ, nɛ e wa’ a nae ɔ, nɛ e peeɔ wɔ nyakpɛ. (Mar. 4:27, 28) Dumi wu komɛ nɛ wa fia a puɛɔ pee se, nɛ ni kpahi ya kpaa. Eko ɔ, o ná níhi a si kpami nɛ ngɛ kaa nyɛmiyo Joan nɛ ngɛ Britain, nɛ a baptisi lɛ jeha 60 ji nɛ ɔ nɔ́ ɔ. E de ke: “I naa nihi nɛ a deɔ mi ke i du dumi wu ngɛ a tsui mi benɛ i fiɛɛ kɛ ha mɛ jehahi babauu nɛ be ɔ. Odasefohi kpahi kɛ mɛ ya kase Baiblo ɔ nɛ i li, nɛ a ye bua mɛ nɛ a ba pee Yehowa sɔmɔli. Ye bua jɔ kaa dumi wu ɔ nɛ i du ɔ wa, nɛ ni kpahi kpa.”—Kane 1 Korinto Bi 3:6, 7.

YEHOWA NƐ PEE

YESU de ke: “Nɔ́ nɛ adesa nyɛ we peemi ɔ, Mawu lɛɛ e nyɛɔ peeɔ.” (Luka 18:27) Wa kpɛti nihi fuu na bɔ nɛ munyu nɛ ɔ ji anɔkuale ha. Ngɛ mɔde nɛ nihi bɔ kaa a maa tsi fiɛɛmi ní tsumi ɔ nya a tsuo se ɔ, Yehowa ye bua wɔ nɛ wa ngɛ tsue.

Zacharie Elegbe (e ye jeha 66, a baptisi lɛ ngɛ jeha 1963 ɔ mi) tu bɔ nɛ Yehowa Odasefohi a ní tsumi nɛ a tsi nya ngɛ Benin ɔ ye bua nyɛmimɛ ɔmɛ ha a he munyu ke: “Ngɛ jeha 1976 mi ɔ, wa ngɛ fiɛɛli 2,300, nɛ a tsi wa ní tsumi ɔ nya. Amlaalo ɔ ha nɛ a fia wa ní tsumi ɔ nɛ a tsi nya a he adafi ngɛ gbihi nɛ a tuɔ ngɛ ma a mi ɔ tsuo a mi. Enɛ ɔ ji nɔ́ ko nɛ a pee we hiɛ. E ngɛ mi kaa gbihi nɛ hiɛ pe 60 nɛ a tuɔ ngɛ Benin mohu lɛɛ, se jamɛ a be ɔ mi ɔ, a tsuɔ hleedio nɔ ní tsumihi ngɛ gbihi enuɔ pɛ mi. Lɔ ɔ he ɔ, benɛ a fia wa nya tsimi ɔ he adafi ngɛ gbihi nɛ a tuɔ ngɛ Benin ɔ tsuo a mi ɔ ji kekleekle be nɛ nihi akpehi abɔ nɛ a ngɛ hehi nɛ tsɔ a he banee ɔ nu Yehowa Odasefohi a he. E pee mɛ nyakpɛ wawɛɛ, nɛ a bi ke, ‘Mɛnɔmɛ ji Yehowa Odasefohi, nɛ mɛni he je nɛ a tsi a nya a?’ Pee se benɛ waa kɛ anɔkuale ɔ ya lejɛ ɔmɛ ɔ, nihi babauu kplɛɛ nɔ.” Mwɔnɛ ɔ, Odasefohi 11,500 nɛ ngɛ Benin.

Mariya Zinich (e ye jeha 74, a baptisi lɛ ngɛ jeha 1957 ɔ mi) de ke: “Benɛ i ye jeha 12 ɔ, a fie wa weku ɔ kɛ je Ukraine kɛ ya Siberia, ngɛ Russia. Ngɛ mɔde nɛ amlaalo ɔ bɔ kaa e maa tsi wa ní tsumi ɔ nya ngɛ blema Soviet Union ma amɛ a mi ɔ tsuo se ɔ, wa yibɔ ya hɛ mi. Ngɛ si temi kɛ womi nɛ nya wa nɛ ɔ tsuo se ɔ, wa yibɔ nɛ ya hɛ mi ɔ ha nɛ i ná nɔ mi mami kaa ní tsumi nɛ ɔ, Yehowa nɔ́. Nɔ ko be nyɛe maa tsi nya!” Nyɛmiyo ko hu nɛ a tsɛɛ lɛ ke Mariya (e ye jeha 73, a baptisi lɛ ngɛ jeha 1960 mi) de ke: “Wa nyɛmimɛ nɛ amlaalo ɔ fie mɛ kɛ ho Siberia ya a ha nɛ nihi nɛ a ngɛ hehi nɛ tsɔ a he banee ngɛ lejɛ ɔ nu anɔkuale ɔ.”

Jesús Martín (e ye jeha 77, a baptisi lɛ ngɛ jeha 1955 ɔ mi) de ke: “Benɛ i kase anɔkuale ɔ, Odasefohi 300 nɛ ngɛ Spain hiɛ ɔ. Ngɛ jeha 1960 mi ɔ, a wa wɔ yi mi wawɛɛ nitsɛ. Amlaalo ɔ fa polisi ɔmɛ kaa a kpata Yehowa Odasefohi tsuo a hɛ mi. Jamɛ a be ɔ mi ɔ, wa susu bɔ nɛ wa maa pee ha kɛ fiɛɛ sane kpakpa a ngɛ ma a tsuo mi ɔ he. E pee kaa nɔ́ nɛ nɔ́ tsuaa nɔ́ kpa bu wa yi. Se mwɔnɛ ɔ, Odasefohi 111,000 nɛ a ngɛ Spain. Wa he nɛ ba hiɛ ngɛ si temi kɛ womi nɛ waa kɛ kpe ɔ tsuo se ɔ ha nɛ nɔ mi mami nɛ i ngɛ kaa Yehowa piɛɛ wa he, nɛ nɔ́ ko be nɛ e be nyɛe maa pee ɔ mi wa!”

18. Kaa bɔ nɛ 1 Korinto Bi 3:8 ɔ tsɔɔ ɔ, mɛni he je nɛ wa ma nyɛ ma ná bua jɔmi?

¹⁸ Nɔ́ nɛ ji enyɔ ɔ, ke wa ha nɛ e hi wa juɛmi mi kaa Paulo de ke: “Mawu maa wo a ti nɔ tsuaa nɔ hiɔ kpakpa ngɛ ní tsumi nɛ e tsu ɔ he” ɔ, wa maa yaa nɔ maa pee ní tsuli nɛ a ngɛ bua jɔmi. (1 Kor. 3:8) Ní tsumi nɛ nɔ ko tsu ɔ nɔ a daa kɛ woɔ lɛ hiɔ, se pi nɔ́ nɛ maa je ní tsumi ɔ mi kɛ ba a. Hyɛ bɔ nɛ enɛ ɔ woɔ fiɛɛli nɛ a ngɛ fiɛɛe ngɛ zugba kpɔhi nɛ nihi bui munyu ɔ tue ngɛ mi ɔ a bua ha! Ngɛ Mawu hɛ mi ɔ, Odasefo no tsuaa Odasefo no nɛ e jeɔ e tsui tsuo mi kɛ tsuɔ ní dumi ní tsumi ɔ, ngɛ ‘yiblii babauu woe,’ lɔ ɔ he ɔ, e sa nɛ e bua nɛ jɔ.—Yoh. 15:8; Mat. 13:23.

19. (a) Mɛni blɔ nɔ nɛ Yesu gbami nɛ ngɛ Mateo 24:14 ɔ kɔɔ bua jɔmi he ngɛ? (b) Mɛni e sa kaa e hi wa juɛmi mi ke wa nyɛ we nɛ waa pee nihi kaseli po?

¹⁹ Nɔ́ nɛ ji etɛ ɔ, wa bua jɔ kaa wa ní tsumi ɔ ha nɛ gbami ko ba mi. Benɛ Yesu kaseli ɔmɛ ya bi lɛ ke: ‘Mɛni okadi maa tsɔɔ kaa o ba, kɛ okadi nɛ maa tsɔɔ je nɛ ɔ nyagbe be?’ ɔ, mo susu heto nɛ e ha mɛ ɔ he nɛ o hyɛ. E de mɛ ke okadi ɔmɛ a kpɛti kake ji je kɛ wɛ fiɛɛmi ní tsumi ɔ. Anɛ kaselɔ peemi ní tsumi ɔ he munyu Yesu ngɛ tue ɔ lo? Dɛbi. E de ke: ‘Sane kpakpa nɛ ɔ nɛ kɔɔ Matsɛ Yemi ɔ he ɔ, a maa fiɛɛ kɛ kpa je ɔ mi tsuo.’ (Mat. 24:3, 14) Lɔ ɔ he ɔ, Matsɛ Yemi ɔ fiɛɛmi, nɛ ji wu ɔ dumi ɔ ji okadi ɔ eko. Enɛ ɔ he ɔ, benɛ wa ngɛ Matsɛ Yemi ɔ he sane kpakpa a fiɛɛe ɔ, e sa nɛ e hi wa juɛmi mi kaa ke wa nyɛ we nɛ waa pee nihi kaseli po ɔ, wa ye mɛ ‘odase.’c Ngɛ anɔkuale mi ɔ, ke nihi bu tue jio, a bui tue jio, wa ha nɛ Yesu gbami ɔ ba mi, nɛ wa náa he blɔ kɛ sɔmɔɔ kaa “Mawu tsɔli nɛ a pee kake kɛ ngɛ ní tsue.” (1 Kor. 3:9) Nɔ́ he je nɛ e sa kaa wa bua nɛ jɔ ji nɛ ɔ nɛ!

“Kɛ Je Pu Site He, Kɛ Ya Si Pu Sinɔ He”

20, 21. (a) Mɛni blɔ nɔ nɛ munyuhi nɛ ngɛ Malaki 1:11 ɔ ngɛ mi bae ngɛ? (b) Mɛni ji nɔ́ nɛ o fia o pɛɛ si kaa o maa pee ngɛ ní kpami ní tsumi ɔ mi, nɛ mɛni he je?

²⁰ Ngɛ kaseli ɔmɛ a be ɔ mi ɔ, Yesu ye bua mɛ konɛ a na kaa ní kpami ní tsumi ɔ he hia wawɛɛ. Kɛ je jeha 1919 ɔ se ɔ, Yesu ye bua e se nyɛɛli nɛ a ngɛ mwɔnɛ ɔ nɛ a nu jamɛ a anɔkuale ɔ nɔuu sisi. Mawu we bi kɛ a he wo fiɛɛmi ní tsumi ɔ mi wawɛɛ kɛ tsɔɔ kaa a ngɛ Yesu fami ɔ tue bue. Ngɛ anɔkuale mi ɔ, nɔ́ ko nɔ́ ko nyɛ we nɛ e tsi ní kpami ní tsumi ɔ nya. Kaa bɔ nɛ Malaki gba kɛ fɔ si ɔ, mwɔnɛ ɔ, a ngɛ fiɛɛmi ní tsumi ɔ tsue “kɛ je pu site he kɛ ya si pu sinɔ he.” (Mal. 1:11) Ee, kɛ je be nɛ pu maa te si, kɛ ya si be nɛ pu maa nɔ si—he tsuaa he ngɛ zugba a nɔ ɔ—ní duli ɔmɛ kɛ ní kpali ɔmɛ tsuo tsuɔ ní, nɛ a blaa kɛ nyaa. Nɛ kɛ je pu site he kɛ ya si pu sinɔ he—kɛ je mɔtu kɛ ya si gbɔkuɛ, loo ligbi ɔ tsuo mi ɔ—waa kɛ oya yemi tsuɔ fiɛɛmi ní tsumi ɔ.

²¹ Jeha 100 kɛ se ji nɛ ɔ, Mawu we bi nɛ jinɛ a ji kuu nyafii ɔ ba pee “ma kpetekpleenyɛ” amlɔ nɛ ɔ. Ke wa susu nɔ yami nɛ ɔ he ɔ, e haa nɛ wa ‘bua jɔɔ, nɛ wa nyaa.’ (Yes. 60:5, 22) Nyɛ ha nɛ jamɛ a bua jɔmi ɔ kɛ suɔmi kɛ ha Yehowa nɛ e ji, ‘ní kpami Nyɔmtsɛ’ ɔ nɛ wo wa ti nɔ tsuaa nɔ he wami konɛ waa ya nɔ nɛ wa tsu ní kpami ní tsumi nɛ pe kulaa a, nɛ waa gbe nya!—Luka 10:2.

a Ke o ngɛ hlae nɛ o le níhi fuu kɛ kɔ jamɛ a jeha amɛ kɛ jehahi nɛ nyɛɛ se ɔmɛ a he ɔ, wa ngɛ mo he wami woe nɛ o kane womi nɛ ji, Jehovah’s Witnesses—Proclaimers of God’s Kingdom, ba fa 425-520 nɛ tsɔɔ nɔ́ nɛ je ní kpami ní tsumi ɔ mi kɛ ba kɛ je jeha 1919 kɛ ya si jeha 1992.

b Ke o ngɛ hlae nɛ o le gbami nɛ ngɛ bua jɔmi nɛ ɔ mi tsɔɔmi fitsofitso ɔ, hyɛ womi nɛ ji, Isaiah’s Prophecy—Light for All Mankind Kpo enyɔne ɔ ba fa 303-320.

c Baiblo Kaseli ɔmɛ nu anɔkuale nɛ he hia nɛ ɔ sisi momo. November 15, 1895 Blɛfo gbi Hwɔɔmi Mɔ ɔ de ke: “Ke wa nyɛ nɛ wa bua ngma nyafii nya a, lɛɛ ke e hí kulaa a, wa ma nyɛ maa ye anɔkuale ɔ he odase wawɛɛ. . . . Wɔ tsuo wa ma nyɛ maa fiɛɛ sane kpakpa a.”

BƆ NƐ DƐ WOMIHI ENYƆ TA NIHI ENYƆ A TSUI HE HA NGƐ AMAZON

Antônio Simões

ANTÔNIO SIMÕES nɛ e ji asafo mi nɔkɔtɔma nɛ yeɔ anɔkuale, nɛ e ye jeha 91 ɔ kai be nɛ e papaa kɛ e tsɛ ngua na anɔkuale ɔ kɛ gu dɛ womi enyɔ komɛ nɛ Yehowa Odasefohi pee ɔ nɔ ɔ. Antônio bi nibwɔhi nɛ a ba slaa lɛ ɔ ke, “Nyɛ maa suɔ kaa nyɛ maa le lo?” Nibwɔ ɔmɛ he nɔ ke, “Wa maa suɔ.” Antônio muɔ hɛlii, nɛ e hi si, nɛ e bɔni mɛ sane ɔ gbami.

“Jinɛ ye papaa nɛ a tsɛɛ lɛ ke Zeno ɔ ji Baptist osɔfo. Ngɛ jeha 1931 ɔ mi ɔ, e hia blɔ kɛ ya slaa yo ko nɛ e kɛ lɛ yaa sɔlemi. Yo ɔ ngɛ Amazon hue nɛ tsɔ e he banee ɔ mi. Ye papaa na dɛ womihi enyɔ ngɛ yo ɔ we ɔ mi. Yo ɔ na dɛ womi ɔmɛ ngɛ sɔlemi tsu mi, se e li nɔ nɛ je a he ngɛ lejɛ ɔ. Dɛ womi ɔ kake tu hɛl he munyu; kake ɔ hu tu gbogboehi a si temi ɔ he munyu. Ye papaa bua jɔ nɔ́ nɛ e kane ɔ he. Oya nɔuu nɛ e susu munyu ko nɛ e bajɔ nɛ a tsɛɛ lɛ ke Guilherme pɔɔ lɛ demi ɔ he, e deɔ lɛ ke: ‘I he we hɛl la tsɔɔmi ɔ yí. Mawu nɛ ngɛ suɔmi ɔ be nɔ́ ko kaa jã pee.’ Akɛnɛ ye papaa ngɛ hlae nɛ e kɛ dɛ womi ɔ nɛ tsɔɔ Guilherme he je ɔ, e hlui lɛ ngmlɛfia kpaanyɔ kɛ ya he nɛ Guilherme ngɛ, nɛ ji Manaquiri nɛ kɛ Manaus kɛ we ɔ.

Kekleekle asafo ngɛ Brazil Amazon Kpokpa a nɔ

“Ye papaa kɛ ye tsɛ ngua Guilherme kase dɛ womi enyɔ ɔmɛ saminya, nɛ a de ke, ‘Anɔkuale ɔ ji nɛ ɔ nɛ!’ Oya nɔuu nɛ a ngma sɛ womi kɛ ya ha asafo ɔ ní tsumi kɔni nɛ ngɛ Brazil ɔ kaa a ba ha mɛ womihi. Ye papaa kpa osɔfo ɔ yemi, nɛ ye tsɛ ngua a ba bɔni Baiblo ɔ mi sɛ gbi ɔ fiɛɛmi ngɛ he nɛ e ngɛ ɔ. Nihi a bua jɔ munyu ɔ he wawɛɛ, nɛ ngɛ jeha kake mi ɔ, a to asafo sisi ngɛ Manaquiri. E kɛ we nɛ nihi 70 bɔni asafo mi kpehi bami, ngɛ jamɛ a be ɔ mi ɔ, jamɛ a asafo ɔ ji asafo nɛ kle wawɛɛ ngɛ Brazil.” Antônio mlɛ bɔɔ. Kɛkɛ nɛ e bi ke, “Anɛ bɔ nɛ Matsɛ Yemi sɛ gbi ɔ su Amazon ɔ be nyakpɛ lo?” E ngɛ nyakpɛ niinɛ. Wu tsɔwi enyɔ gbɛ fiã—dɛ womihi enyɔ—he si ngɛ Amazon hue ngua a mi, nɛ e wo yiblii kɛ pee asafo nɛ ngɛ hɛ mi yae. Mwɔnɛ ɔ, pi Manaquiri asafo nɛ ye jeha 83 ɔ pɛ ji asafo nɛ ngɛ Brazil Amazon Kpokpa a nɔ, mohu ɔ, asafohi 143 ngɛ lejɛ ɔ!

BƆ NƐ “WƐTSO NYAFII PE KULAA” BA PEE “MA KPETEKPLEENYƐ”

‘WƐTSO nyafii pe kulaa ma ba pee ma kpetekpleenyɛ. Ke be ɔ su ɔ, imi Yehowa, ma ha nɔ́ nɛ ɔ maa ba mi oya.’ (Yes. 60:22) Mɛni blɔ nɔ gbami nɛ ɔ ba mi ngɛ? Kɛ gbami nɛ ɔ mi bami sa Odasefohi nɛ a ngɛ je kɛ wɛ nɛ a kɛ be babauu sɔmɔ ɔ a he ha kɛɛ?

Börje Nilsson (e ye jeha 84, a baptisi lɛ ngɛ jeha 1943 ɔ mi) de ke: “I kai nyɛminyumu ko nɛ a pɔ lɛ nu nɛ e ji colporteur (womi jualɔ) ngɛ jeha 1920 jeha amɛ a mi ɔ. Benɛ a ha lɛ zugba kpɔ nɛ e klemi maa pee Sweden ma a fã kaa e tsu mi ní ɔ, e bu tue, nɛ e ya je fiɛɛmi ɔ sisi—nɛ ní tsumi nɛ e kɛ ni kpahi nɛ a yeɔ anɔkuale ɔ tsu ngɛ lejɛ ɔ wo yiblii wawɛɛ! Mwɔnɛ ɔ, wa ngɛ fiɛɛli nɛ a he hiɛ pe 22,000. E ngɛ mi kaa i wa ngɛ jeha mi mohu lɛɛ, se i suɔ nɛ ma ya nɔ nɛ ma pee tue bumi ngɛ Yehowa sɔmɔmi mi. Mɛnɔ le níhi nɛ Yehowa maa pee ha wɔ hwɔɔ se?”

Etienne Esterhuyse (e ye jeha 83, a baptisi lɛ ngɛ jeha 1942 ɔ mi) de ke: “Ngɛ jeha 1942 ɔ mi ɔ, Yehowa we bi 1,500 nɛ a ngɛ South Afrika. Se mwɔnɛ ɔ, a he hiɛ pe 94,000. Ke i susu bɔ nɛ yibɔ ɔ ya hɛ mi ha a he ɔ, e peeɔ mi nya kpɛɛ wawɛɛ. E ji he wami womi nɔ́ ha mi kaa i piɛɛ asafo nɛ ngɛ hɛ mi yae nɛ ɔ he!”

Keith Gaydon (e ye jeha 82, a baptisi lɛ ngɛ jeha 1948 ɔ mi) de ke: “Bɔ nɛ fiɛɛli nɛ a ngɛ Britain ɔ a yibɔ ya hɛ mi kɛ je 13,700 ngɛ jeha 1948 ɔ mi kɛ ya su 137,000 mwɔnɛ ɔ, ha nɛ i na kaa e ji Yehowa ní tsumi niinɛ. Ke nɔmlɔ he wami nya a, jinɛ wa be nyɛe ma tsu ní tsumi nɛ ɔ, se Yehowa ji nɔ nɛ ngɛ ‘nyakpɛ ní nɛ ɔmɛ pee.’ ”—2 Mose 15:11.

Ulrike Krolop (e ye jeha 77, a baptisi kɛ ngɛ jeha 1952 ɔ mi) de ke: “Ngɛ Je Mi Ta enyɔne ɔ se ɔ, bɔ nɛ Odasefohi komɛ bɔ mɔde nɛ a da Nazi yi mi wami ɔ nya ha a wo asafohi ngɛ Germany ɔ he wami wawɛɛ. E he ba hia nɛ waa wo nihi a bua, nɛ akɛnɛ wɔ Odasefohi waa kɛ wa he wui ta a mi he je ɔ, wa nyɛ nɛ wa wo nihi a bua. Ngɛ jeha 60 nɛ be ɔ mi ɔ, i na bɔ nɛ Mawu mumi ɔ tsɔɔ e webi blɔ ha. Mwɔnɛ ɔ, Odasefohi nɛ a hiɛ pe 164,000 nɛ ngɛ Germany—hyɛ bɔ nɛ e ngɛ bua jɔmi ha!”

Mariya Brinetskaya (e ye jeha 77, a baptisi lɛ ngɛ jeha 1955 ɔ mi) de ke: “Bɔ nɛ pee nɛ a ko nuu wɔ kɛ wo tsu mi ɔ, a baptisi mi nyɔ mi. Pee se ɔ, a ya wo ye huno tsu ngɛ he ko tsitsaa akɛnɛ e ji Odasefo no ɔ he je. I hyɛ ye he nɔ saminya, nɛ i ya nɔ nɛ i fiɛɛ ngɛ ye kɔpe ɔ mi hiɛ ɔ ngɛ Russia, nɛ nihi babauu nɛ i fiɛɛ kɛ haa mɛ ɔ ba na anɔkuale ɔ. Jamɛ a be ɔ mi ɔ, wa he pi. Amlɔ nɛ ɔ, ye bua jɔ kaa Odasefohi nɛ a he hiɛ pe 168,000 ngɛ Russia!”

Kimiko Yamano (e ye jeha 79, a baptisi lɛ ngɛ jeha 1954 ɔ mi) de ke: “Benɛ i ba le kaa fiɛɛli 10,000 nɛ a ngɛ Japan ngɛ jeha 1970 ɔ mi ɔ, ye bua jɔ wawɛɛ, nɛ vo nyu da ye hɛngmɛ nɔ, nɛ i kpale wo Yehowa si ke, ‘I suɔ kaa ma ye mo anɔkuale ye wami be tsuo.’ Mo susu bɔ nɛ ye bua jɔ ha mwɔnɛ ɔ he nɛ o hyɛ, ejakaa wa ngɛ fiɛɛli nɛ a he hiɛ pe 216,000 amlɔ nɛ ɔ!”

Daniel Odogun (e ye jeha 83) de ke: “Benɛ a baptisi mi ngɛ jeha 1950 ɔ mi ɔ, fiɛɛli 8,000 nɛ a ngɛ Nigeria. Mwɔnɛ ɔ, wa he hiɛ pe 351,000! Ke i na bɔ nɛ wa he hiɛ ha ngɛ kpehi a sisi ɔ, e woɔ mi he wami wawɛɛ, nɛ i susuɔ Hagai 2:7 ɔ he. Yehowa ngɛ je ma amɛ mimiɛe niinɛ, nɛ níhi nɛ a he jua wa a ngɛ asafo ɔ mi bae. Loloolo ɔ, i peeɔ bɔ nɛ ma nyɛ ngɛ fiɛɛmi ní tsumi ɔ mi, ejakaa fiɛɛmi nɔ i guu kɛ deɔ Yehowa ke, ‘Mo tsu mi!’ ”

Carlos Silva (e ye jeha 79) de ke: “Benɛ a baptisi mi ngɛ jeha 1952 ɔ mi ɔ, Odasefohi 5,000 nɛ a ngɛ Brazil. Jamɛ a jeha a, wa pee kpe ngɛ São Paulo asa ko nɔ. Lɔle enyɔ pɛ nɛ ngɛ lɔle dami he ɔ. He nɛ wa pee kpe ɔ ngɛ ɔ ngɛ Pacaembu Stadium ɔ kasa nya. Nyɛminyumu ko bi mi ke, ‘Anɛ wa ma hyi Stadium nɛ ɔ ligbi ko lo?’ E ngɛ kaa nɔ́ nɛ e be mi bae jã, se ngɛ jeha 1973 ɔ mi ɔ, nihi 94,586 nɛ a ba kpe nɛ wa pee ngɛ lejɛ ɔ! Mwɔnɛ ɔ, Odasefohi nɛ a he hiɛ pe 767,000 nɛ a ngɛ Brazil—hɛ mi yami nɛ ɔ ngɛ bua jɔmi!”

Carlos Cázares (e ye jeha 73) de ke: “Benɛ a baptisi mi ngɛ jeha 1954 ɔ mi ɔ, fiɛɛli 10,500 nɛ a ngɛ Mexico. Akɛnɛ fiɛɛli babauu a he hia he je ɔ, a hla mi kaa kpɔ mi nɔ hyɛlɔ benɛ i ye jeha 21. Ye bua jɔ kaa i kɛ ye hɛngmɛ na Yesaya 60:22 ɔ mi bami. Amlɔ nɛ ɔ, wa ngɛ fiɛɛli nɛ a he hiɛ pe 806,000, nɛ a kɛ nihi nɛ a he hiɛ pe ayɔ kake kaseɔ Baiblo ɔ! E ngɛ bua jɔmi nitsɛ!”