Moo Kase Bɔ Nɛ Yesu Plɛ Kɛ Da Kahi A Nya Ha a

Benɛ Yohane baptisi Yesu se pɛ ɔ, Mawu mumi ɔ ngɔ Yesu kɛ ho Yudea nga a nɔ ya. E ya lejɛ ɔ konɛ e ya susu níhi fuu a he. Benɛ a baptisi Yesu ɔ, “a bli hiɔwe nya ha lɛ.” (Mateo 3:16) Enɛ ɔ ha nɛ e kai níhi nɛ e kase, kɛ níhi nɛ e pee benɛ e ngɛ hiɔwe ɔ. Ngɛ anɔkuale mi ɔ, níhi fuu ngɛ nɛ e sa nɛ e susu a he!

Yesu hi nga a nɔ nyɔ kɛ pia ligbi 40. Jamɛ a be ɔ mi tsuo ɔ, e wui e nya mi nɔ́ ko nɔ́ ko. Kɛkɛ nɛ benɛ hwɔ bɔni lɛ yemi wawɛɛ ɔ, Satan Abosiami ba e ngɔ konɛ e ba ka lɛ. E de lɛ ke: “Ke Mawu Bi ji mo ɔ, fa tɛ nɛ ɔmɛ nɛ a plɛ abolo.” (Mateo 4:3) Akɛnɛ Yesu le kaa e ji tɔmi kaa e maa ngɔ he wami nɛ Mawu kɛ ha lɛ ɔ kɛ pee e suɔmi nya ní he je ɔ, e kua kaa e maa pee jã.

Se Abosiami kɛ lɛ gbi nya lolo. E gu blɔ kpa nɔ kɛ ka lɛ ekohu. E de Yesu ke e tu kɛ je sɔlemi we ɔ yi mi kɛ ma si. Se Yesu pee we jamɛ a kuɛ tso kumi ní ɔ kɛ hla we hɛ mi nyami. Yesu tsɛ Ngmami ɔ se kɛ tsɔɔ kaa e dɛ kaa e maa ka Mawu ngɛ jamɛ a blɔ ɔ nɔ.

Lɔ ɔ se ɔ, Abosiami ka Yesu si etɛne. E ngɔ “matsɛ yemihi tsuo nɛ ngɛ je ɔ mi, kɛ bɔ nɛ a hɛ mi ngɛ nyami ha” a kɛ tsɔɔ Yesu, nɛ e de lɛ ke: “Ke o kpla si nɛ o ja mi ɔ, ma ngɔ enɛ ɔmɛ tsuo kɛ ha mo.” Ngɛ enɛ ɔ hu mi ɔ, Yesu de lɛ ke: “Satan jee hiɛmɛ nɛ ɔ!” (Mateo 4:8-10) Akɛnɛ e le kaa Yehowa pɛ nɛ e sa nɛ a ja he je ɔ, e ngmɛ́ blɔ nɛ Satan nɛ sisi lɛ. E suɔ nɛ e maa ye Mawu mohu anɔkuale.

Wa ma nyɛ maa kase ní ngɛ ka nɛ Yesu kɛ kpe ɔ, kɛ bɔ nɛ e plɛ kɛ da nya ha a mi. Yesu kɛ ka nɛ ɔ kpe nitsɛnitsɛ. Enɛ ɔ tsɔɔ kaa pi yi wu tso ní nɛ nɔ ko maa pee ɔ ji Abosiami, kaa bɔ nɛ ni komɛ deɔ ɔ. Abosiami ji nɔ ko nɛ e ngɛ nitsɛnitsɛ nɛ a nɛ́ lɛ, ejakaa mumi ji lɛ. Ka etɛne ɔ ha nɛ wa na kaa Abosiami nɔ́ ji matsɛ yemihi tsuo nɛ ngɛ je ɔ mi ɔ, nɛ lɛ nɛ e ngɛ mɛ kudɔe. Ke pi Abosiami nɔ́ ɔ, jinɛ e kɛ ko ka Kristo lo?

Jehanɛ hu ɔ, Abosiami de ke e maa wo Yesu hɛ mi nyami ke e ba e he si nɛ e ja lɛ si kake pɛ. E de Yesu po kaa e kɛ je ɔ mi matsɛ yemi ɔmɛ tsuo ma ha lɛ. Abosiami ma nyɛ maa gu blɔ nɛ ɔmɛ nɔuu a nɔ kɛ ka wɔ. Eko ɔ, e ma nyɛ maa ngɔ sika loo hɛ mi nyami loo he blɔ ngua ko kɛ tsɔ wɔ klama. Ke wa nyɛɛ Yesu nɔ hyɛmi nɔ́ ɔ se nɛ wa ye Mawu anɔkuale ngɛ ka saisaa nɛ Satan kɛ maa ba wa nɔ ɔ mi ɔ, lɔ ɔ maa tsɔɔ kaa wa le ní! Se mo kai kaa ngmami ɔ de ke Abosiami “si lɛ lolo,” nɛ tsɔɔ kaa e kɛ lɛ gbi nya. (Luka 4:13) Jã a kɛ̃ nɛ e ma nyɛ maa ba ngɛ wa blɔ fa mi. Enɛ ɔ he ɔ, e sa nɛ wa hɛ nɛ hi wa he nɔ be tsuaa be.