YI 16
Yesu Kɛ Hɛdɔ Fa Anɔkuale Jami He
YESU FIE NÍ JUALI NGƐ SƆLEMI WE Ɔ, NƐ LEJƐ Ɔ TSƆ
Benɛ a gbe yo kpeemi nɛ ya nɔ ngɛ Kana a nya a, Yesu pue nɔ kɛ ho Kapernaum ya. E nyɛ Maria, kɛ e nyɛmimɛ Yakobo, Yosef, Simon, kɛ Yuda piɛɛ e he.
Se mɛni he je nɛ Yesu yaa Kapernaum ɔ? Ma nɛ ɔ he biɛ, nɛ e kle pe Nazaret kɛ Kana. Yesu se nyɛɛli ehe ɔmɛ a kpɛti nihi fuu je Kapernaum loo lejɛ ɔ ní ɔ mɛ a mi. Lɔ ɔ he ɔ, Yesu ma nyɛ maa tsɔɔ mɛ ní ngɛ lejɛ ɔ.
Benɛ a ya Kapernaum ɔ, Yesu pee nyakpɛ níhi fuu ngɛ lejɛ ɔ. Enɛ ɔ ha nɛ nihi nɛ a ngɛ Kapernaum, kɛ nihi nɛ a ngɛ lejɛ ɔ kpɔ ɔ mi ɔ a kpɛti nihi fuu nu e he. Se jeha 30 Hetsɔmi ɔ hu ngɛ sue. Enɛ ɔ he ɔ, e be kɛe nɛ Yesu kɛ e kaseli nɛ a ji Yuda bi nɛ a kɛ Mawu jami fiɛ we ɔ maa ya Yerusalem konɛ a ya ye Hetsɔmi ɔ.
Benɛ a ngɛ sɔlemi we ɔ ngɛ Yerusalem ɔ, Yesu pee nɔ́ ko nɛ ha nɛ kaseli ɔmɛ a nya kpɛ a he.
Mawu Mlaa a tsɔɔ kaa e sa nɛ Israel bi ɔmɛ nɛ a ngɔ lohwehi kɛ sã afɔle ngɛ sɔlemi we ɔ. Enɛ ɔ he ɔ, nibwɔhi nɛ a baa lejɛ ɔ maa hia niye ní. Mlaa a ngmɛɛ nihi nɛ a je tsitsaa kɛ ba Yerusalem ɔ blɔ kaa a ma nyɛ ma he “na,” jijɔ, loo apletsi, kɛ ní kpahi nɛ maa hia mɛ ɔ ngɛ lejɛ ɔ. (5 Mose 14:24-26) Enɛ ɔ he ɔ, jua yeli juaa lohwehi ngɛ sɔlemi we ɔ. Se ní juali ɔmɛ fuu sisiɔ nihi.
Yesu mi mi fu mɛ wawɛɛ, nɛ e kpa sika tsakeli ɔmɛ a sika amɛ kɛ pue si, nɛ e tsitsɛɛ a we okplɔɔ ɔmɛ ngɔ pue si, nɛ e fie ní juali ɔmɛ kɛ je sɔlemi we ɔ. Kɛkɛ nɛ Yesu de mɛ ke: “Nyɛ je ní nɛ ɔmɛ kɛ je hiɛ ɔ esɔ! Tsaatsɛ we ɔ, nyɛ ko ngɔ kɛ pee jua nɔ!”—Yohane 2:16.
Benɛ Yesu kaseli ɔmɛ na nɔ́ nɛ a Nyɔmtsɛ ɔ pee ɔ, a kai kaa ngmami ɔ de ngɛ Mawu Bi ɔ he ke: “Ye hɛ dɔ wawɛɛ ngɛ o we ɔ he.” Se Yuda bi ɔmɛ bi Yesu ke: “Mɛni okadi o maa to wɔ kɛ ma nɔ́ nɛ o pee nɛ ɔ nɔ mi?” Yesu de mɛ ke: “Nyɛɛ ku sɔlemi we nɛ ɔ, nɛ ligbi etɛ se ɔ, ma ma lɛ ekohu.”—Yohane 2:17-19; La 69:9.
Yuda bi ɔmɛ bu kaa sɔlemi we ɔ nitsɛ he munyu nɛ Yesu ngɛ tue ɔ nɛ. Lɔ ɔ he ɔ, a bi lɛ ke: “Sɔlemi we nɛ ɔ, jeha nyingmi eywiɛ kɛ ekpa loko a nyɛ ma; se moo lɛɛ o de ke ligbi etɛ o kɛ maa ma lɛ; o ma nyɛ?” (Yohane 2:20) Se Yesu nɔmlɔ tso ɔ ji sɔlemi we nɛ e ngɛ he munyu tue ɔ nɛ. Yesu kaseli ɔmɛ kai munyu nɛ ɔ jeha etɛ se benɛ a tle lɛ si ɔ.