Yohane Suɔ Nɛ Yesu Nitsɛ Nɛ E De Lɛ Nɔ Nɛ E Ji

Yohane Nɔ Baptisilɔ ɔ ye maa pee jeha kake ngɛ he nɛ a wo lɛ tsu ngɛ ɔ. Se e ngɛ nue kaa Yesu ngɛ nyakpɛ ní nguanguahi pee. Benɛ Yohane nu kaa yalɔyo ko nɛ e ngɛ Nain binyumu gbo, nɛ Yesu tle lɛ si ɔ, mɛni e susu? Se ngɛ nɔ́ nɛ eko ɔ e susu tsuo se ɔ, e suɔ nɛ e maa nu Yesu nitsɛ nya mi munyu. Enɛ ɔ he ɔ, e tsɔ kɛ ya tsɛ e kaseli enyɔ. Mɛni he nɛ e tsɛ mɛ ngɛ? E tsɔ mɛ ke a ya bi Yesu ke: “Mo lɛ a de ke o ma a, aloo waa hyɛ nɔ kpa blɔ?”​​—Luka 7:19.

E ngɛ kaa nɔ́ nɛ sisi numi be sane bimi nɛ ɔ he. Ejakaa Yohane ji Mawu gbalɔ, nɛ benɛ e ngɛ Yesu baptisie ɔ, e na Mawu mumi ɔ nɛ ba Yesu nɔ. Jehanɛ hu ɔ, e nu Mawu gbi nɛ ma nɔ mi kaa Mawu kplɛɛ Yesu nɔ. Wa be nyɛe ma de ke Yohane hemi kɛ yemi ta. Kaa Yohane hemi kɛ yemi ta a, jinɛ Yesu ko je we e yi. Se ke Yohane yi mi pee we lɛ enyɔɔnyɔ ɔ, lɛɛ mɛni he je nɛ e bi jamɛ a sane ɔ mɔ?

Eko ɔ, Yohane ngɛ hlae nɛ Yesu nitsɛ nɛ ma nɔ mi ha lɛ kaa lɛ ji Mesia a. Enɛ ɔ maa wo Yohane he wami ejakaa e ngɛ nɔ́ nae ngɛ tsu ɔ mi. Wa ma nyɛ maa nu Yohane sane bimi ɔ sisi ngɛ blɔ kpa ko hu nɔ. E le Baiblo gbamihi nɛ tsɔɔ kaa Nɔ Nɛ Mawu Pɔ Lɛ Nu ɔ ma ba ye matsɛ, nɛ e maa kpɔ e ma a. Se kɛ̃ ɔ, Yohane ye nyɔhiɔhi fuu ngɛ tsu mi ngɛ Yesu baptisimi ɔ se. Yohane ngɛ hlae nɛ e maa le ke ji nɔ kpa ko maa ba ngɛ Yesu se nɛ e ma ba tsu Mesia a blɔ nya ní tsumihi nɛ a gba kɛ fɔ si ɔ a he ní.

Yesu gba we mi kpoo nɛ e de Yohane kaseli ɔmɛ ke: ‘Ee, imi ji Nɔ nɛ a wo e he si ɔ,’ mohu ɔ, e tsɔɔ mɛ odase nɛ ma nɔ mi kaa Mawu mumi ɔ ngɛ e nɔ ɔ. E de Yohane kaseli ɔmɛ ke: “Nyɛɛ ya nɛ nyɛ ya de Yohane níhi nɛ nyɛ ngɛ nue, kɛ níhi nɛ nyɛ ngɛ hyɛe nɛ ɔ: Hɛ yuyuili ngɛ nɔ́ hyɛe, glɔtsɛmɛ ngɛ nyɛɛe, nɛ nihi nɛ ngɛ he womi nɔ hiɔ yaya nue ɔ, a he ngɛ tsɔe; amuɛtihi ngɛ nɔ́ nue, gbogboehi ngɛ si tee, nɛ a ngɛ sane kpakpa a fiɛɛe ha ohiatsɛmɛ.”​​—Mateo 11:4, 5.

Sane nɛ Yohane bi Yesu ɔ hu ma nyɛ maa tsɔɔ kaa e ngɛ blɔ hyɛe kaa Yesu maa pee ní nguanguahi pe bɔ nɛ e ngɛ pee ɔ, nɛ eko po ɔ, e maa gu nyakpɛ blɔ nɔ kɛ je lɛ kɛ je tsu ɔ mi. Se Yesu hu ngɛ Yohane dee kaa e ko hyɛ nyakpɛ ní kpahi blɔ pe nɔ́ nɛ e ngɛ pee ɔ.

Benɛ Yohane kaseli ɔmɛ je ɔ, Yesu de nihi nɛ a ngɛ lejɛ ɔ kaa Yohane ji gbalɔ nɛ e nɔ kuɔ saminya. Lɛ ji Yehowa “tsɔlɔ” ɔ nɛ a gba kɛ kɔ e he ngɛ Malaki 3:1 ɔ nɛ. Lɛ nɔuu ji Eliya nɛ a tu e he munyu ngɛ Malaki 4:5, 6 ɔ nɛ. Yesu de mɛ ke: ‘Niinɛ, i ngɛ nyɛ dee ke, Yohane Nɔ Baptisilɔ ɔ, nɔmlɔ adesa ko hí si hyɛ nɛ pe lɛ. Se kɛ̃ ɔ, nɔ nɛ ji nyafii pe kulaa ngɛ hiɔwe Matsɛ Yemi ɔ mi ɔ pe Yohane.’​​—Mateo 11:11.

Benɛ Yesu de ke nɔ nɛ ji nyafii pe kulaa ngɛ hiɔwe Matsɛ Yemi ɔ mi ɔ pe Yohane ɔ, e ngɛ tsɔɔe kaa Yohane piɛɛ we nihi nɛ a maa piɛɛ e he kɛ ye matsɛ ngɛ hiɔwe ɔ a he. E ngɛ mi kaa Yohane lɛ dla blɔ ɔ ngɔ to Yesu mohu lɛɛ, se Yohane gbo se loko Kristo ba bli blɔ kɛ ha nihi nɛ a maa ya hiɔwe ɔ. (Hebri Bi 10:19, 20) Akɛnɛ Yohane ji Mawu gbalɔ anɔkualetsɛ he je ɔ, e maa piɛɛ nihi nɛ a maa pee Mawu Matsɛ Yemi ɔ sisi bimɛ ngɛ zugba a nɔ ɔ a he.