Yesu Ya Ye Ní Ngɛ Farisi No Ko We Mi

Benɛ Yesu ngɛ Yudea a, Farisi no ko tsɛ lɛ ní yemi, nɛ e ya. E maa pee kaa piani a ngmɛ okplɔɔ ɔ nɛ. (Luka 11:37, 38; ngɔɔ kɛ to Luka 14:12 ɔ he.) Ke Farisi bi ɔmɛ maa ye ní ɔ, a fɔɔ a dɛ hluu kɛ ya siɔ a kɔni si. Se Yesu pee we jã. (Mateo 15:1, 2) E ngɛ mi kaa tɔmi ko be he kaa nɔ ko ma fɔ e dɛ kɛ ya pi e kɔni si loko e maa ye ní mohu lɛɛ, se Mawu de we kaa a pee jã doo.

E pee Farisi no ɔ nyakpɛ kaa Yesu pee we jamɛ a kusumi ɔ. Yesu na juɛmi nɛ nyumu ɔ hɛɛ ɔ, nɛ e de lɛ ke: “Hyɛ, nyɛ Farisi bi, nyɛ fɔɔ nyɛ kplu kɛ kã he, se nyɛ mi lɛɛ e hyi tɔ kɛ ojo fiami, kɛ yi wu tso ní peemi. Kuasiahi! Mawu nɛ pee kpo nɔ je ɔ, pi lɛ nɔuu nɛ pee mi mi je ɔ hulɔ ɔ?”​​—Luka 11:39, 40.

Pi nɔ ko dɛ nɛ e ma fɔ loko e maa ye ní ji sane ɔ, mohu ɔ, jami mi osato peemi ji nɔ́ nɛ Mawu sume ɔ nɛ. Be tsuaa be nɛ Farisi bi ɔmɛ kɛ Yuda bi kpahi maa ye ní ɔ, a fɔɔ a dɛ saminya, se a tsui mi hyi tɔ kɛ ní yayahi sɔuu. Lɔ ɔ he ɔ, Yesu wo mɛ ga ke: “Nyɛɛ ngɔ níhi nɛ ngɛ nyɛ kplu ɔmɛ, kɛ kã amɛ a mi ngɔ ha ohiatsɛmɛ, nɛ nɔ́ tsuaa nɔ́ nɛ nyɛ ngɛ ɔ he ma tsɔ ha nyɛ.” (Luka 11:41) Munyu nɛ ɔ ji anɔkuale! Ke wa maa ke nɔ ko nɔ́ ko ɔ, e sa nɛ e je wa tsui mi, se pi kaa wa maa pee níhi kɛ sa nihi a hɛ mi konɛ a bu wɔ kaa dali.

Pi kaa Farisi bi ɔmɛ a ha we nɔ nɔ́. Ejakaa Yesu de ngɛ a he ke: “Nyɛ haa kowɛ, kɛ pui, kɛ ba slɔɔtohi tsuo a mi dlami nyɔngmanyɔngma mi kakaaka, se dami sane yemi, kɛ Mawu suɔmi lɛɛ nyɛ si se. E sa kaa nyɛ peeɔ enɛ ɔmɛ, nɛ ekpa amɛ hu nyɛ ko si se.” (Luka 11:42) Mawu Mlaa a tsɔɔ kaa e sa nɛ a wo mi dlami nyɔngma, nɛ ji ngmɔ níhi a mi dlami nyɔngmanyɔngma mi kakaaka. (5 Mose 14:22) Kowɛ kɛ pui aloo ba kpahi nɛ a kɛ hooɔ ní hu piɛɛ he. Farisi bi ɔmɛ bɔɔ mɔde kaa a maa wo ba nɛ ɔmɛ a he mi dlami nyɔngma be tsuaa be. Se Mlaa a mi níhi nɛ a he hia wawɛɛ kaa dami ní peemi, kɛ he si bami nɛ a kɛ ma sɔmɔ Mawu lɛɛ a ma a hɛ ngɔ fɔ nɔ.​​—Mika 6:8.

Yesu ya nɔ nɛ e de mɛ ke: “Nyɛ Farisi bi, musu tloo nyɛ! Nyɛ suɔ nikɔtɔmahi a sihi hehi ngɛ kpe he ɔmɛ, nɛ nyɛ suɔ hu nɛ nihi nɛ kpla si kɛ nga nyɛ ngɛ jua nɔ. Musu tloo nyɛ! Nyɛ ngɛ kaa yɔkɔhi nɛ a tui a he so, nɛ nihi nyɛɛɔ a nɔ nɛ a li.” (Luka 11:43, 44) Ngɛ anɔkuale mi ɔ, nihi ma nyɛ maa nɔ jamɛ a yɔkɔ ɔmɛ a mi, nɛ lɔ ɔ ma ha nɛ a he be tsɔɔe kaa bɔ nɛ Mlaa a tsɔɔ ɔ. Yesu kɛ jamɛ a nɔ́ hetomi nɔ́ ɔ tsu ní kɛ ma nɔ mi kaa Farisi bi ɔmɛ a he tsɔ we, se mɛ nitsɛmɛ po a li, nɛ ni kpahi hu li.​​—Mateo 23:27.

Nyumu ko nɛ e le Mawu Mlaa a saminya a je Yesu munyu ɔ nya ke: ‘Tsɔɔlɔ, ke o de enɛ ɔ, e tsɔɔ kaa mo hu o jɛ wɔ!’ Loloolo ɔ, mlaa tsɔɔli ɔmɛ nɛ́ kaa a kua a blɔ nya ní tsumi kaa mɛ nɛ e sa nɛ a tsɔɔ ma a ní ɔ. Enɛ ɔ he ɔ, Yesu de mɛ ke: “Nyɛ mlaa tsɔɔli ɔmɛ hu, musu tloo nyɛ! Nyɛ boɔ tlomi nɛ jiɔ ngɔ pueɔ nihi a konɔ. Se nyɛ nitsɛmɛ lɛɛ nyɛ be nyɛ nine nguɛ kake po mi kpae kɛ piɛɛ a he kɛ tloo tlomi ɔ.”​​—Luka 11:45-47.

Bɔ nɛ Farisi bi ɔmɛ kɛ mlaa a fĩɔ ni ɔmɛ, kɛ blema kusumihi nɛ a nyɛɔ ni ɔmɛ a nɔ kaa a ye nɔ ɔ pee tlomi nɛ jiɔ kɛ ha mɛ. Mlaa tsɔɔli ɔmɛ kɛ Farisi bi ɔmɛ ha we nɛ ni ɔmɛ a he mi nɛ jɔ mɛ kulaa. A nyɛɔ Yuda bi ɔmɛ a nɔ kaa doo ɔ, a ye mlaahi nɛ a wo ɔmɛ a nɔ. A nɛmɛ gbe Mawu gbali nɛ a hi si kɛ je Habel yi nɔ ɔ. Farisi bi ɔmɛ kɛ Mlaa tsɔɔli ɔmɛ hu fia yɔkɔ kɛ ha gbali ɔmɛ nɛ a nɛmɛ ɔmɛ gbe ɔ kɛ ngɛ tsɔɔe kaa a buu mɛ. Se anɛ pi a nɛmɛ ɔmɛ a su kɛ a ní peepee ɔ nɔuu nɛ a ngɛ kasee ɔ lo? A ngɛ hlae nɛ a maa gbe gbalɔ nɛ pe kulaa nɛ Mawu tsɔ ɔ po. Yesu de mɛ ke Mawu ma bi a muɔ si ngɛ a dɛ. Jeha 38 se ɔ, nɔ́ nɛ ɔ ba mi ngɛ jeha 70 ɔ mi ngɛ Kristo fɔmi se.

Yesu ya nɔ nɛ e de mɛ ke: “Nyɛ mlaa tsɔɔli, musu tloo nyɛ! Safe nɛ bliɔ sinya nɛ yaa nile we ɔ, nyɛ ngɔ kɛ to; nyɛ nitsɛmɛ nyɛ yɛ lejɛ ɔ, nɛ nihi nɛ hlaa kaa a maa ya hu nyɛ tsiɔ mɛ blɔ!” (Luka 11:52) Jinɛ e sa nɛ a bli Yuda bi ɔmɛ a hɛngmɛ nɛ a nu Mawu Munyu ɔ sisi saminya, se a laa mɛ níhi a nɔ nɛ a ngmɛ́ mɛ blɔ nɛ a le Mawu Munyu ɔ mi anɔkuale ɔmɛ.

Mɛni Farisi bi ɔmɛ kɛ mlaa tsɔɔli ɔmɛ pee ngɛ nɔ́ nɛ Yesu de nɛ ɔ he? Mlaa tsɔɔli ɔmɛ kɛ Farisi bi ɔmɛ a mi mi fu Yesu wawɛɛ. Lɔ ɔ he ɔ, benɛ e maa je lejɛ ɔ, a bi lɛ níhi fuu. Pi nɛ a ngɛ hlae nɛ a maa kase nɔ́ ko ngɛ e ngɔ, mohu ɔ, a bi lɛ sanehi konɛ a kɛ hla e nya mi munyu.