Be Nɛ Yesu Maa Ye E Nyagbe Hetsɔmi ɔ Bɔni Sumi

Benɛ Yesu kɛ e bɔfo ɔmɛ a kpɛti nihi eywiɛ ngɛ Oliv Yo ɔ nɔ ɔ, e bɔ mɔde nɛ e ha a sane bimi ɔmɛ tsuo a heto. E ye bua mɛ nɛ a na okadihi nɛ kɔɔ bami nɛ e maa ba kaa Matsɛ, kɛ je nɛ ɔ nyagbe be ɔ he.

Yesu ná we deka kulaa ngɛ Nisan ligbi 11 ɔ nɔ! E maa pee kaa benɛ a kpale a se kɛ yaa hwɔ Betania a nɛ Yesu de e bɔfo ɔmɛ munyu nɛ nyɛɛ se nɛ ɔ nɛ. E de mɛ ke: “Kaa bɔ nɛ nyɛ le ɔ, e piɛ ligbi enyɔ pɛ nɛ a maa ye Hetsɔmi ɔ, nɛ a maa ngɔ Nɔmlɔ Bi ɔ ngɔ ha nɛ a ya sɛu lɛ.”​​—Mateo 26:2.

E nɔ jena Sɔ ɔ, Yesu kɛ e bɔfo ɔmɛ ya laa a he bɔɔ. Pɛplɛgbi ɔ, Yesu kã jami hɛ mi nyɛɛli ɔmɛ a hɛ mi, nɛ e kpa a he bo ngɛ ma hɛ mi. Enɛ ɔ he ɔ, a to kaa a maa gbe lɛ. Ngɛ Nisan ligbi 12 ɔ nɔ ɔ, Yesu ji kpo kɛ yɛ he ko bɔ nɛ pee nɛ nɔ́ ko kó tsi e kɛ e bɔfo ɔmɛ blɔ konɛ a nyɛ nɛ a ye Hetsɔmi ɔ ngɛ Nisan ligbi 14 ɔ nɔ.

Se loko Hetsɔmi ɔ maa je sisi ɔ, osɔfo nikɔtɔma amɛ kɛ ma nimeli ɔmɛ lɛɛ a jɔɔ we a he kulaa. A ya kpe ngɛ Kayafa, osɔfo nɔkɔtɔma pe kulaa a we ɔ mi. Mɛni a yaa pee? A mi mi fu kaa Yesu kpa a he bo. Lɔ ɔ he ɔ, a so kaa a maa gu ga blɔ nɔ kɛ ‘nu Yesu nɛ a gbe lɛ.’ Mɛni blɔ nɔ a maa gu kɛ nu lɛ, nɛ mɛni be a maa pee jã? A de ke: “Wa be nɔ́ nɛ ɔ pee nyami be ɔ mi, konɛ basabasa kó ba ma a mi.” (Mateo 26:4, 5) A ngɛ gbeye yee ejakaa nihi babauu suɔ Yesu sane.

Se e kɛ we kulaa nɛ jami hɛ mi nyɛɛli ɔmɛ ná nubwɔ ko. E pee mɛ nyakpɛ kaa nubwɔ nɛ a ná a ya pee Yesu bɔfo ɔmɛ a kpɛti nɔ kake, nɛ ji Yuda Iskariot. Satan ngɔ kɛ wo e juɛmi mi kaa e ya tsɔɔ e Nyɔmtsɛ ɔ se blɔ! Yuda ya bi mɛ ke: “Ke i je Yesu ngɔ wo nyɛ dɛ mi ɔ, mɛni nyɛ ma ha mi?” (Mateo 26:15) A bua jɔ saminya, lɔ ɔ he ɔ, “a wo lɛ si kaa a ma ha lɛ sika.” (Luka 22:5) Sika enyɛmɛ a ma ha lɛ? A ma nya si kaa a ma ha lɛ sika hiɔ yi 30. Enɛ ɔ sa kadimi wawɛɛ ejakaa sika hiɔ yi 30 nɛ a kɛ heɔ nyɔguɛ. (2 Mose 21:32) Jã a nɛ a pee ɔ tsɔɔ kaa jami hɛ mi nyɛɛli ɔmɛ bui Yesu kulaa. Kɛ je lɔ ɔ se ɔ, Yuda bɔni “blɔ hlami, konɛ e ngɔ Yesu ngɔ wo a dɛ mi zaa nɛ ma a kó nu he.”​​—Luka 22:6.

Nisan ligbi 13 ɔ je sisi Sɔ gbɔkuɛ benɛ pu nɔ si. Jamɛ a Sɔ ɔ ji ligbi ekpane, kɛ nyagbe be nɛ Yesu hwɔ Betania. E nɔ jena a, e he maa hia nɛ a to blɔ nya kɛ ha Hetsɔmi ɔ yemi. E sa nɛ a ná to bi, konɛ ke Nisan ligbi 14 je sisi pɛ ɔ, a nyɛ nɛ a gbe, nɛ a sã lo mluku ɔ tsuo. Jije a maa ye Hetsɔmi ɔ ngɛ, nɛ mɛnɔ lɛ maa to he blɔ nya kɛ ha mɛ? Yesu tsɔɔ we. Lɔ ɔ he ɔ, Yuda be nyɛɛ nɛ e ya wo osɔfo nikɔtɔma amɛ a tue nɔ.

Maa pee So piani ɔ Yesu tsɔ Petro kɛ Yohane kɛ je Betania kɛ ya Yerusalem. E de mɛ ke: “Nyɛɛ ya nɛ nyɛ ya pee Hetsɔmi niye ní ɔ ngɔ to wɔ nɛ wa ba ye.” A bi Yesu ke: “Jije nɛ o suɔ nɛ wa ya pee niye ní ɔ ngɔ to mo ngɛ?” E he nɔ ke: “Nyɛɛ bu tue! Ke nyɛ sɛ ma a mi ɔ, nyɛɛ kɛ nyumu ko nɛ tloo buɛ kɛ nyu maa kpe. Nyɛɛ nyɛɛ e se kɛ ya we mi he nɛ e yaa sɛ ɔ, nɛ nyɛ ya de wetsɛ ɔ ke, ‘Tsɔɔlɔ ɔ ke wa ba bi mo ke nibwɔhi a tsu ɔ, he nɛ i kɛ ye kaseli ɔmɛ maa ye Hetsɔmi niye ní ɔ ngɛ ɔ, jije e ngɛ?’ E maa tsɔɔ nyɛ hiɔwe asa ngua ko nɛ a dla mi, konɛ nyɛ ya pee niye ní ɔ ngɔ to ngɛ lejɛ ɔ.”​​—Luka 22:8-12.

Atsinyɛ jemi ko be he kaa Yesu kaselɔ ji wetsɛ ɔ. E ma nyɛ maa pee kaa wetsɛ ɔ ngɛ blɔ hyɛe kaa Yesu ma ba ye Hetsɔmi ɔ ngɛ e we ɔ mi. Benɛ bɔfo enyɔ ɔmɛ ya su Yerusalem ɔ, a ya na nɔ́ tsuaa nɔ́ kaa bɔ nɛ Yesu de mɛ ɔ pɛpɛɛpɛ. Lɔ ɔ he ɔ, a ya dla to bi nɛ a kɛ maa ye Hetsɔmi ɔ, kɛ nɔ́ tsuaa nɔ́ nɛ maa hia Yesu kɛ e bɔfo 12 ɔmɛ ngɔ to.