FÃ ENUƆ

Nyɛɛ Kpale Kɛ Ba “Nyɛ Hyɛlɔ, Kɛ Nyɛ He Bulɔ ɔ Ngɔ”

Anɛ o kɛ nyagbahi nɛ a sɛsɛ he ngɛ womiyo nɛ ɔ mi ɔ eko kpe lo? Ke jã a, lɛɛ pi mo pɛ nɛ o ngɛ jamɛ a si fɔfɔɛ ɔ mi. Mawu sɔmɔli anɔkualetsɛmɛ nɛ a tu a he munyu ngɛ Baiblo ɔ mi kɛ ni nɛmɛ nɛ a ngɛ mwɔnɛ ɔ a kpɛti nihi fuu kɛ si fɔfɔɛhi kaa kikɛ nɛ ɔ kpe. Yehowa ye bua mɛ nɛ a nyɛ da haomi ɔmɛ a nya. Mo hu e maa ye bua mo.

Yehowa maa ye bua mo ke o kpale kɛ ba e ngɔ

MO NÁ nɔ mi mami kaa, Yehowa maa ye bua mo ke o kpale kɛ ba e ngɔ. E maa ye bua mo nɛ o be yeyeeye pee, o kɛ nihi a he tɔmihi maa pa mɛ, o ma ná he nile kpakpa, nɛ o tue mi maa jɔ mo. Enɛ ɔ maa wo mo he wami nɛ o maa piɛɛ Yehowa sɔmɔli a he kɛ sɔmɔ lɛ. O si fɔfɔɛ ɔ ma ba pee kaa Kristofohi nɛ a hi si ngɛ kaseli ɔmɛ a be ɔ mi ɔ a ti ni komɛ a si fɔfɔɛ ɔ pɛpɛɛpɛ. Bɔfo Petro ngma ngɛ a he ke: “Jinɛ nyɛ laa blɔ kaa tohi. Se amlɔ nɛ ɔ, nyɛ kpale kɛ ba nyɛ hyɛlɔ, kɛ nyɛ he bulɔ ɔ ngɔ.”—1 Petro 2:25.

Atsinyɛ jemi ko be he kaa nɔ́ nɛ hi pee kulaa nɛ o maa pee ji, nɛ́ o maa kpale o se kɛ ba Yehowa ngɔ. Mɛni he je? Ejakaa ke o pee jã a, Yehowa bua maa jɔ. (Abɛ 27:11) Kaa bɔ nɛ o le ɔ, Yehowa ngɛ he numi, enɛ ɔ he ɔ, ke wa pee nɔ́ yaya a, e haoɔ lɛ, nɛ ke wa pee nɔ́ kpakpa a, e bua jɔɔ. Ngɛ anɔkuale mi ɔ, Yehowa nyɛ we wa nɔ kaa wa sɔmɔ lɛ. (5 Mose 30:19, 20) Baiblo he ní lelɔ ko ngɔ adesa tsui kɛ to sinya he. E ngma ke: “Nɔ ko be nyɛe ma bli ngɛ kpo nɔ. E sa nɛ a bli ngɛ mi blɔ.” Enɛ ɔ he ɔ, ke wa jeɔ suɔmi mi nɛ waa kɛ wa tsui tsuo sɔmɔɔ Yehowa a, wa ma nyɛ ma bli wa tsui nya ha lɛ. Ke wa pee jã a, lɔ ɔ tsɔɔ kaa wa ha Mawu nike ní ko nɛ he jua wa. Lɔ ɔ ji anɔkuale nɛ wa ye lɛ ɔ nɛ. Enɛ ɔ ma ha Mawu ma ná bua jɔmi wawɛɛ nitsɛ. Anɔkuale mi ɔ, nɔ́ ko be nɛ waa kɛ maa to bua jɔmi nɛ wa ma ná ngɛ Yehowa jami mi ɔ he.—Bɔfo Ɔmɛ A Ní Tsumi 20:35; Kpojemi 4:11.

A ngɛ nyɛmiyo ko nɛ e kpa fiɛɛmi yami be kɛkɛɛ ɔ he nyae kɛ ba asafo ɔ mi

Jehanɛ se ɔ, ke o ba bɔni Yehowa jami ekohu kaa Kristofo no ɔ, o nine maa su mumi mi níhi nɛ hia mo ɔ a nɔ. (Mateo 5:3) Ngɛ mɛni blɔ nɔ? Nihi ngɛ je kɛ wɛ biɔ ke, ‘Mɛni he je nɛ wa ba je mi?’ A suɔ nɛ a maa le yi mi tomi he je nɛ wa ngɛ si himi mi ngɛ. E ji hiami nɔ́ ko nɛ Yehowa kɛ wo adesahi a mi. E bɔ wɔ konɛ wa ná bua jɔmi ngɛ e sɔmɔmi mi. Wa tsui maa nɔ wa mi wawɛɛ nitsɛ ke wa le kaa suɔmi mi wa jeɔ kɛ sɔmɔɔ Yehowa.—La 63:1-5.

Wa kpa mo pɛɛ, Yehowa suɔ nɛ o kpale kɛ ba e ngɔ. Mɛni tsɔɔ jã? Mo susu he nɛ o hyɛ: Wa sɔle wawɛɛ loko wa pee womiyo nɛ ɔ nɛ. Eko ɔ, asafo mi nɔkɔtɔma ko, loo o nyɛmi Kristofo no ko lɛ ngɔ womiyo nɛ ɔ kɛ ba ha mo. Enɛ ɔ wo mo he wami nɛ o kane nɛ o kɛ e mi munyu ɔ tsu ní. Enɛ ɔmɛ tsuo tsɔɔ kaa Yehowa hɛ ji o nɔ. Mohu ɔ, e ngɛ mo gblae blɛuu kɛ ba e ngɔ.—Yohane 6:44.

Ke wa le kaa Yehowa hɛ ji e sɔmɔli nɛ a laa a nɔ ɔ, e ma nyɛ maa wo wa bua. Enɛ ɔ ji nɔ́ nɛ nyɛmiyo ko nɛ a tsɛɛ lɛ ke Donna a ba yɔse. E de ke: “Bɔɔbɔɔbɔɔ ɔ, i je anɔkuale ɔ mi, se i pɔɔ munyu nɛ ngɛ La 139:23, 24 ɔ he susumi. A de ngɛ lejɛ ɔ ke: ‘Mawu, hyɛ ye tsui mi nɛ o le mi. Kaa mi nɛ o hyɛ, nɛ o na níhi nɛ ngɛ ye juɛmi mi. Hyɛ kaa yayami ko pa ngɛ ye mi lo, nɛ o ngɔ mi kɛ fɔ blɔ nɛ kɛ nɔ yaa neneene wami mi ɔ nɔ.’ I le kaa pi je ɔ mi nɛ e sa kaa ma hi. Ye he mi jɔɛ mi. I le kaa Yehowa asafo ɔ mi ji he nɛ e sa kaa ma hi. I ba yɔse kaa Yehowa kua we mi; imi lɛ e sa nɛ ma kpale kɛ ba e ngɔ. Nɛ ye bua jɔ wawɛɛ kaa i pee jã!”

“I ba yɔse kaa Yehowa kua we mi; imi lɛ e sa nɛ ma kpale kɛ ba e ngɔ”

Wa je wa tsui mi nɛ wa ngɛ sɔlee kaa mo hu o ma ba ná ‘bua jɔmi nɛ Yehowa haa nɔ’ ɔ ekohu. (Nehemia 8:10) O be o he piae kɔkɔɔkɔ kaa o kpale kɛ ba Yehowa ngɔ.

Sanehi Nɛ Nihi Nɛ A Suɔ Kaa A Maa Kpale Kɛ Ba Yehowa Ngɔ ɔ Biɔ Kɛ A Hetohi

JIJE MA JE SISI NGƐ?

Ke hiɔ nu nɔ ko nɛ e ngɛ he wami náe ɔ, eko ɔ, e he maa hia nɛ e je níhi nɛ e peeɔ sa a, a peemi sisi bɔɔbɔɔbɔɔ. Jã kɛ̃ nɛ ke o bɔɔ mɔde kaa o maa kase Ngmami ɔ bɔɔbɔɔbɔɔ daa ligbi ɔ, o maa pee Kristofo no nɛ ngɛ kã ekohu. Ko susu kaa e sa nɛ o pee nɔ́ tsuaa nɔ́ si kake.Eko ɔ, o kɛ hɛngmɛfia bɔɔ ma nyɛ maa kane Baiblo ɔ, loo o maa fia nɛ o bu tue, loo o maa kane asafo ɔ womi ɔmɛ eko, loo o maa ya jw.org ɔ nɔ, aloo o ma nyɛ maa hyɛ ní peemihi nɛ yaa nɔ ngɛ jw.org ɔ nɔ ɔ eko. Jehanɛ se ɔ, moo bɔ mɔde nɛ o ya asafo mi kpe amlɔ nɔuu. Nɔ́ nɛ pe kulaa a, moo sɔle ha Yehowa nɛ o de lɛ nɛ e ye bua mo. “Nyɛɛ ngɔ nyɛ haomi ɔmɛ tsuo ngɔ fɔ e nɔ; ejakaa lɛ nɛ e hyɛɛ nyɛ nɔ.”—1 Petro 5:7.

“E pee mi zo po kaa ma sɔle be mi nɛ i kpa Yehowa jami ɔ. Benɛ i ná kã nɛ i sɔle se ɔ, asafo ɔ mi nɔkɔtɔma ko ba slaa mi. E ye bua mi nɛ i nu sisi kaa Yehowa hɛ ji ye nɔ. Asafo mi nɔkɔtɔma nɛ ɔ wo mi ga kaa ma bɔni Baiblo ɔ kane mi daa ligbi. Benɛ i pee jã a, i ná kã nɛ i bɔni asafo mi kpehi yami. Pee se ɔ, i je fiɛɛmi yami sisi ekohu. Ye bua jɔ wawɛɛ kaa Yehowa kua we mi.”—Eeva.

ANƐ ASAFO Ɔ MA HE MI HƐMUƆ LO?

Mo ná nɔ mi mami kaa asafo ɔ mi bimɛ ɔmɛ ma nya o he. A be munyu tue kɛ si mo, nɛ a be mo kojoe hulɔ, mohu ɔ, a maa tsɔɔ mo kaa a suɔ mo, nɛ a maa wo mo he wami.—Hebri Bi 10:24, 25.

“E pee mi zo kaa ma kpale kɛ ya Matsɛ Yemi Asa a nɔ. I susuɔ bɔ nɛ nyɛmimɛ ɔmɛ maa pee a ní ngɛ ye he ha a he. Nyɛmimɛ yi nikɔtɔma amɛ a ti nɔ kake nɛ e le mi benɛ i ngɛ asafo ɔ mi jeha 30 nɛ be ɔ de mi ke, ‘Ye Bi, mo hee, o kpale kɛ ba we!’ Munyu nɛ ɔ ta ye tsui he saminya. I kpale kɛ ba we niinɛ.”—Javier.

“I ya Matsɛ Yemi Asa a nɔ nɛ i ya hi si ngɛ se sɛ ɔmɛ eko nɔ bɔ nɛ pee nɛ nɔ ko nɛ kó na mi. Se kɛ̃ ɔ, nihi fuu yo mi. A kai benɛ i ji jokuɛ nɛ i yaa asafo mi kpehi ɔ. A he mi hɛmuɔ, nɛ a fua mi kɛ bua jɔmi, enɛ ɔ ha nɛ ye tsui nɔ ye mi. I nu he kaa i ba we.”—Marco.

MƐNI BLƆ NƆ ASAFO MI NIKƆTƆMA AMƐ MAA GU KƐ YE BUA MI?

Asafo mi nikɔtɔma amɛ ma je mi mi jɔmi kpo kɛ tsɔɔ mo. A ma je o yi kaa o ma ‘suɔmi nɛ o ngɛ sa a’ nɔ wo mi ekohu. (Kpojemi 2:4) A maa je mɔbɔ nami mi kɛ ye bua mo konɛ o dla níhi nɛ tɔ̃tɔ̃ ɔ, nɛ a maa ‘to a tsui si blɛuu kɛ pee nɔ́ nɛ ɔ.’ (Galatia Bi 6:1; Abɛ 28:13) Eko ɔ, asafo mi nikɔtɔma amɛ maa to blɔ nya konɛ nɔ ko kɛ mo nɛ ba kase womihi kaa O Ma Nyɛ Ma Ná Bua Jɔmi Kɛ Ya Neneene! loo Draw Close to Jehovah a kpɛti kake. Mo ná nɔ mi mami kaa asafo mi nikɔtɔma amɛ maa wo o bua, nɛ a maa ye bua mo kɛ ya si benɛ o he maa wa ngɛ Mawu jami mi ekohu.—Yesaya 32:1, 2.

“Asafo mi nikɔtɔma amɛ suu ye he ngɛ jeha kpaanyɔ nɛ i gbɔjɔ ɔ mi. Ligbi ko ɔ, asafo mi nɔkɔtɔma ko tsɔɔ mi foni ko nɛ e po i kɛ ni komɛ. E ha nɛ i kai bua jɔmi nɛ i ná benɛ i ngɛ Yehowa sɔmɔe ɔ, enɛ ɔ ha nɛ i suɔ kaa ma sɔmɔ Yehowa konɛ ma ná bua jɔmi ekohu. Asafo mi nikɔtɔma amɛ je suɔmi mi nɛ a ye bua mi nɛ i ba bɔni Yehowa jami ekohu.”—Victor.

“E Maa Waje Mo”

Lahi fuu ngɛ wa la womi nɛ ji ‘La Wawɛɛ Kɛ Bua Jɔmi’ Ha Yehowa a mi nɛ taa nɔ tsui he, nɛ ma nyɛ maa wo o bua, nɛ maa wo mo he wami konɛ o je Mawu jami ɔ sisi ekohu. Kaa nɔ hyɛmi nɔ́ ɔ, mo susu la 38 mi munyu ɔ he nɛ o hyɛ. A kɛ la nɛ ɔ mi munyu ɔ da 1 Petro 5:10 nɔ, nɛ la a yi ji, “E Maa Waje Mo.”

Nɔ́ ko he je Mawu ha nɛ o ba le lɛ;

O je diblii mi kɛ ba e la he.

Yehowa na ngɛ o tsui mi kaa o suɔ lɛ,

Nɛ o suɔ kaa o maa pee nɔ́ nɛ da.

O wo lɛ si kaa o ma sɔmɔ lɛ;

E maa ya nɔ e maa ye bua mo daa.
Mawu ngɔ e Bi Kristo kɛ ha ngɛ o he;

E suɔ kaa e hi ha mo daa kɛ daa.

Ke e ngɔ e Bi Kristo kɛ ha ngɛ o he,

Ná nɛ o le kaa e maa waje mo.

Yehowa Mawu hɛ be o nɔ jee,

E maa ye bua e we bi daa kɛ daa.

(NƆ HEMI)

Yesu muɔ nɛ he jua wa Yehowa kɛ he mo.

E maa waje mo daa, e maa ye bua mo daa.

Mawu maa bu o he nɛ e maa tsɔɔ mo blɔ daa.

E maa waje mo daa, e maa ye bua mo daa.

Ke o ngɛ hlae nɛ o maa bu la nɛ ɔ kɛ Matsɛ Yemi la kpahi nɛ a kɛ nya la a tue ɔ, yaa jw.org.