Yehowa Ha Samsin He Wami

Israel bi ɔmɛ a kpɛti nihi babauu ya bɔni amagahi jami ekohu, enɛ ɔ he ɔ, Yehowa ngmɛ blɔ nɛ Filisti bi ɔmɛ ye a nɔ. Se Israel bi ɔmɛ a kpɛti ni komɛ suɔ Yehowa. A ti nɔ kake ji Manoa. E kɛ e yo ɔ fɔ we. Ligbi ko ɔ, Yehowa tsɔ bɔfo ko kɛ ya Manoa yo ɔ ngɔ. Bɔfo ɔ de lɛ ke: ‘O ma fɔ binyumu. E ma kpɔ̃ Israel bi ɔmɛ kɛ je Filisti bi ɔmɛ a dɛ mi. E maa hi si kaa Naziri no.’ Anɛ o le nihi nɛ a tsɛɛ mɛ ke Naziri bi lo? A ji Yehowa sɔmɔli nɛ a ngɛ slɔɔto kulaa, nɛ a ngmɛ mɛ blɔ kaa a sã a yi nɔ.

Manoa kɛ e yo ɔ ba fɔ binyumu, nɛ e wo lɛ biɛ ke Samsin. Benɛ Samsin ba wa a, Yehowa ha nɛ e he wa saminya. Samsin ma nyɛ maa ngɔ e nine kɛ gbe jata. Ligbi ko ɔ, lɛ nɔ kake too e gbe Filisti bi 30. Enɛ ɔ he ɔ, Filisti bi ɔmɛ sume e sane kulaa. A pee nɔ́ fɛɛ nɔ́ nɛ a ma nyɛ konɛ a gbe lɛ. Be ko ɔ, Samsin ho Gaza ma a mi ya. Benɛ e hwɔɔ si nyɔ mi ɔ, Filisti bi ɔmɛ ya laa a he ngɛ ma a agbo ɔ nya, konɛ ke je na a, a gbe lɛ. Se Samsin te si nyɔ mi kpɛti nɛ e ho ma a agbo ɔ nya ya, nɛ e hia agbo ɔ kɛ je gbogbo ɔ mi. E ngɔ agbo ɔ kɛ fɔ e konɔ, nɛ e kɛ ho tsitsaa ya ngɛ yoku ko nɔ ngɛ Hebron kasa mi!

Pee se ɔ, Filisti bi ɔmɛ ho Samsin plã ko nɛ a tsɛɛ lɛ ke Delila a ngɔ ya, nɛ a de lɛ ke: ‘Mo hla nɔ́ he je nɛ Samsin ngɛ he wami wawɛɛ ɔ, nɛ o ba de wɔ. Ke o de wɔ ɔ, wa ma ha mo sika hiɔ akpehi abɔ. Wa ngɛ hlae nɛ waa nu lɛ nɛ waa wo lɛ tsu.’ Akɛnɛ Delila suɔ nɛ a ha lɛ sika a he je ɔ, e kplɛɛ nɔ kaa e maa pee jã. Sisije ɔ, Samsin sume kaa e ma de Delila nɔ́ he je nɛ e ngɛ he wami wawɛɛ ɔ. Se Delila doo Samsin nya hluu kɛ ya si benɛ Samsin de lɛ e laami sane ɔ. Samsin de lɛ ke: ‘Akɛnɛ Naziri no ji mi he je ɔ, i sã we ye yi bwɔmi hyɛ. Ke a sã ye yi bwɔmi ɔ, ye he wami ɔ tsuo maa ta.’ Jinɛ e sɛ nɛ Samsin nɛ de Delila laami sane nɛ ɔ. Aloo kɛ o susu kɛɛ?

Amlɔ nɔuu nɛ Delila ya de Filisti bi ɔmɛ ke: ‘E de mi e laami sane ɔ!’ E ha nɛ Samsin hwɔ mahe ngɛ e tɛ nɔ, nɛ e tsɛ nɔ ko nɛ e ba sã e yi bwɔmi ɔ. Kɛkɛ nɛ Delila kpa ngmlaa ke: ‘Samsin, Filisti bi ɔmɛ ma mo numi!’ Se benɛ Samsin te si ɔ, e he wami ɔ ta. Kɛkɛ nɛ Filisti bi ɔmɛ nu lɛ, nɛ a ta e hɛ ngmɛ nɛ a wo lɛ tsu.

Ligbi ko ɔ, Filisti bi babauu ya bua a he nya ngɛ a mawu nɛ ji, Dagon jami he ɔ. A kɛ ngmlaa de ke: ‘Wa mawu ɔ ngɔ Samsin kɛ wo wa dɛ mi! Nyɛ je Samsin kɛ ba nɛ e ba wo wa nya muɔ bɔɔ!’ A kɛ lɛ ba da tsu ɔ titima enyɔ a kpɛti, nɛ a ye e he fɛu. Kɛkɛ nɛ Samsin de ke: ‘Ao Yehowa, i kpa mo pɛɛ nɛ o ha mi ye he wami ɔ si kake nɛ ɔ pɛ.’ Jamɛ a be ɔ mi ɔ, Samsin yi bwɔmi ɔ kpale hɛ. E kɛ e he wami tsuo tsitsɛɛ titima amɛ. Nɛ tsu ɔ hule kɛ pue nihi tsuo nɛ a ngɛ Dagon jami he ɔ nɔ, nɛ a kɛ Samsin tsuo gbo.