Yesu Nyɛɛ Nyu Hɛ Mi

Yesu tle gbogboehi a si nɛ e tsa hiɔtsɛmɛ. Pi ní nɛ ɔmɛ pɛ nɛ e nyɛɔ peeɔ. E ngɛ he wami ngɛ kɔɔhiɔ kɛ hiɔmi nɔ hulɔ. Benɛ Yesu ya sɔle ngɛ yoku ɔ nɔ ta a, e hyɛ Galilea Wo ɔ nɔ nɛ e na kaa kɔɔhiɔ ngua ko ngɛ fiae. E bɔfo ɔmɛ ngɛ a lɛ ɔ mi, nɛ pɔ ngɛ a he tɔe ngɛ lɛ ɔ hluimi mi. Yesu kple si kɛ je yoku ɔ nɔ, nɛ e bɔni nyu ɔ hɛ mi nyɛɛmi kɛ yaa e bɔfo ɔmɛ a lɛ ɔ he. Benɛ bɔfo ɔmɛ na kaa nɔ ko ngɛ nyu ɔ hɛ mi nyɛɛe ɔ, a ye gbeye. Se Yesu de mɛ ke: ‘Imi Yesu. Nyɛ ko ye gbeye.’

Petro de lɛ ke: ‘Nyɔmtsɛ, ke mo niinɛ ɔ, lɛɛ mo fã mi, konɛ ma nyɛɛ nyu ɔ hɛ mi kɛ ba o ngɔ.’ Yesu de Petro ke: ‘Moo ba ye ngɔ.’ Enɛ ɔ he ɔ, benɛ kɔɔhiɔ ɔ ngɛ fiae ɔ, Petro kple si kɛ je lɛ ɔ mi nɛ e bɔni nyu ɔ hɛ mi nyɛɛmi kɛ yaa Yesu ngɔ. Se benɛ e piɛ bɔɔ nɛ e maa su Yesu he ɔ, e hyɛ kɔɔhiɔ nɛ ngɛ fiae ɔ, kɛkɛ nɛ e ye gbeye. Petro na kaa e bɔni mumi, nɛ e kpa ngmlaa nɛ e de ke: ‘Nyɔmtsɛ, mo he ye yi wami!’ Yesu nu e nine nɛ e de lɛ ke: ‘Mɛni he je nɛ o yi mi pee mo enyɔɔnyɔ ɔ? Jije o hemi kɛ yemi ɔ ngɛ?’

Yesu kɛ Petro sɛ lɛ ɔ mi, nɛ amlɔ nɔuu ɔ, kɔɔhiɔ ɔ kpa fiami. Kɛ o susu kaa bɔfo ɔmɛ nu he ha kɛɛ? A de ke: “Mawu Bi ji mo niinɛ.”

Tsa pi enɛ ɔ ji kekleekle be nɛ Yesu tsi kɔɔhiɔ ngua nya. Be ko nɛ Yesu kɛ e bɔfo ɔmɛ ngɛ wo ɔ poe ɔ, e hwɔ si ngɛ lɛ ɔ se. Benɛ e ngɛ mahe mi ɔ, kɔɔhiɔ ko nɛ nya wa bɔni fiami. Oslɔke ɔ ku kɛ pue lɛ ɔ mi, nɛ nyu sɛ lɛ ɔ mi nɛ lɛ ɔ hyi. Bɔfo ɔmɛ kpa ngmlaa kɛ tsɛ Yesu, nɛ a de ke: ‘Tsɔɔlɔ, wa yaa gbo! Mo kpɔ̃ wɔ!’ Kɛkɛ nɛ Yesu te si nɛ e de wo ɔ ke: “Pee dii!” Amlɔ nɔuu ɔ, kɔɔhiɔ ɔ kpa fiami, nɛ wo ɔ nɔ jɔ dii. Yesu bi e bɔfo ɔmɛ ke: ‘Jije nyɛ hemi kɛ yemi ngɛ?’ A de a sibi ke: “Wo kɛ kɔɔhiɔ po buɔ lɛ tue.” Bɔfo ɔmɛ ba na kaa ke a kɛ a hɛ fɔ Yesu nɔ kulaa a, e sɛ nɛ a ye nɔ́ ko gbeye.