Bulɔ Ko Kase Anɔkuale ɔ

Mawayo ko hi Filipi ma a mi nɛ daimonio ngɛ e mi. Daimonio ɔ haa nɛ jokuɛ ɔ deɔ níhi nɛ maa ba hwɔɔ se. Enɛ ɔ ha nɛ e nyɔmtsɛmɛ ɔmɛ ná sika fuu. Benɛ Paulo kɛ Silas ba Filipi ɔ, e nyɛɛ a se ligbi babauu. Daimonio ɔ haa nɛ e kpaa ngmlaa nɛ e deɔ ke: ‘Nyumu nɛ ɔmɛ ji Mawu Ope ɔ sɔmɔli.’ Enɛ ɔ he ɔ, Paulo de daimonio ɔ ke: ‘I ngɛ mo dee ngɛ Yesu biɛ mi ke, jee jokuɛ ɔ mi.’ Kɛkɛ nɛ daimonio ɔ, je yoyo ɔ mi.

Benɛ jokuɛ yoyo ɔ nyɔmtsɛmɛ ɔmɛ na kaa a be sika náe hu ɔ, a mi mi fu wawɛɛ. A gbla Paulo kɛ Silas kɛ ho ma a mi kojoli ɔmɛ a ngɔ ya, nɛ a de ke: ‘Nyumu nɛ ɔmɛ yi mlaa nɔ, nɛ a ngɛ ma a mi bi ɔmɛ a mi mi la woe!’ Kojoli ɔmɛ ha nɛ a kongo Paulo kɛ Silas, nɛ a wo mɛ tsu. Bulɔ nɛ ngɛ a nɔ hyɛe ɔ ngɔ mɛ kɛ ya wo tsu nɛ e mi wo diblii wawɛɛ mi, nɛ e bɔ mɛ pã.

Paulo kɛ Silas la kɛ je Yehowa yi. Benɛ a ngɛ lae ɔ, ni kpahi nɛ a wo mɛ tsu ɔ ngɛ mɛ tue bue. Nyɔ mi kpɛti ɔ, zugba mimiɛ wawɛɛ si kake too, nɛ tsu ɔ hoso. Sinya amɛ tsuo bli, nɛ kɔsɔkɔsɔ ɔmɛ nɛ a wo mɛ ɔ pɛne. Nɔ nɛ hyɛɔ a nɔ ɔ tu fo kɛ ya tsu ɔmɛ a mi. E na kaa sinya amɛ tsuo bli. E susu kaa ni ɔmɛ tsuo tu fo kɛ je. Enɛ ɔ he ɔ, e je e klaate ɔ konɛ e gbe e he.

Kɛkɛ nɛ Paulo de ke: ‘Koo ye o he awi! Wɔ tsuo wa ngɛ hiɛ ɔ!’ Bulɔ ɔ he sɔ kɛ ya Paulo kɛ Silas a ngɔ, nɛ e bi mɛ ke: “Mɛni e sa kaa ma pee konɛ a he ye yi wami?” A de lɛ ke: ‘E sa nɛ o kɛ o we mi bimɛ ɔmɛ tsuo nyɛ ná hemi kɛ yemi ngɛ Yesu mi.’ Paulo kɛ Silas tsɔɔ bulɔ ɔ kɛ e weku ɔ Yehowa munyu ɔ, nɛ a baptisi mɛ tsuo.