NÍ KASEMI 14

Ha Nɛ Oti Ɔmɛ Nɛ A Je Kpo

Hebri Bi 8:1

OTI: Moo ye bua o tue buli ɔmɛ nɛ a nyɛɛ o munyu ɔ se, nɛ o ha nɛ a na bɔ nɛ otihi nɛ o ngɛ a he munyu tue ɔ kɔ o munyuyi ɔ he ha.

Moo le nɔ́ he je nɛ o yaa tu munyu ɔ. Anɛ e sa nɛ o tsɔɔ o tue buli ɔmɛ nɔ́ ehe ko lo, e sa nɛ o ye bua mɛ nɛ a tsake a susumi lo, aloo e sa nɛ o wo mɛ he wami? Moo da munyu otihi nɛ a ngɛ o munyu ɔ mi ɔ nɔ kɛ tsu yi mi tomi ɔ he ní.

Mo bi o he ke: ‘Mɛni sanehi nɛ tue buli ɔmɛ biɔ aloo mɛni susumihi nɛ a hɛɛ ngɛ munyuyi ɔ he? Ke a ma bi sane nɛ ɔmɛ ɔ, te nɛ a ma bi kekle, nɛ te nɛ a ma bi kɛ nyɛɛ se?’ Kɛkɛ ɔ, moo to oti ɔmɛ a nya jã nɔuu nɛ e ko ye ha tue buli ɔmɛ kaa a maa nyɛɛ o munyu ɔ se, konɛ a nu sisi nɛ a kɛ tsu ní.
Moo ma munyu oti ɔ nɔ mi. Ke o ngɛ munyu ɔ tue ɔ, ngɔɔ munyu oti nɛ je kpo ngɛ o munyuyi ɔ mi ɔ kɛ tsu ní, aloo ngɔɔ munyungu kpahi nɛ ma nyɛ maa da si kɛ ha jamɛ a munyu oti ɔ kɛ tsu ní.
Ha nɛ oti ɔmɛ a mi nɛ tɛ̃ nɛ a sisi numi ko ye. Hlaa otihi nɛ a kɔ o munyuyi ɔ he nɛ o ma nyɛ maa tsɔɔ mi saminya ngɛ be nya a kɛ tsu ní. Koo hla otihi fuu. Ke o tu oti kake he munyu ta, nɛ o yaa ekpa nɔ ɔ, moo mlɛ bɔɔ, nɛ o ha nɛ a na tsakpa nɛ ngɛ oti ɔ kɛ oti nɛ nyɛɛ se ɔ a kpɛti.

O ma nyɛ maa tu oti titli ɔmɛ a he munyu ngɛ o munyu ɔ sisije konɛ e ye bua o tue buli ɔmɛ nɛ a nyɛ nɛ a nyɛɛ munyu ɔ se, aloo o ma nyɛ maa wo oti titli ɔmɛ a ta ke o ngɛ o munyu ɔ nya mwɔe konɛ o tue buli ɔmɛ nɛ a nyɛ nɛ a kai.