NÍ KASEMI 51
Kɛ O Ma Plɛ Kɛ Ha Nɛ O Munyu Tumi Nɛ Sa Yehowa Hɛ Mi Ha Kɛɛ?
Benɛ Yehowa bɔ wɔ ɔ, e ha wɔ nike ní ko nɛ se be—lɔ ɔ ji nyɛmi nɛ wa ngɛ nɛ waa kɛ tuɔ munyu. Anɛ bɔ nɛ waa kɛ nike ní nɛ ɔ tsuɔ ní ha a he hia lɛ lo? Ee! (Kane Yakobo 1:26.) Lɛɛ ngɛ mɛni blɔ nɔ nɛ waa kɛ nyɛmi nɛ wa ngɛ nɛ waa kɛ tuɔ munyu ɔ ma tsu ní ngɛ blɔ nɛ sa Yehowa hɛ mi nɔ?
1. Kɛ waa kɛ nike ní nɛ ɔ nɛ Yehowa ha wɔ ɔ ma tsu ní ha kɛɛ?
Baiblo ɔ de ke: “Nyɛɛ ya nɔ nɛ nyɛɛ hi nyɛ sibi he wami woe, nɛ nyɛɛ hi nyɛ sibi fiae kɛ hi si mae.” (1 Tɛsalonika Bi 5:11) Anɛ o le ni komɛ nɛ a hia he wami womi lo? Mɛni o ma nyɛ maa pee kɛ ha nɛ a nɔ gbagba nɛ te? Ha nɛ a le kaa o susuɔ a he. O ma nyɛ ma de mɛ ní komɛ nɛ o bua jɔ he ngɛ a he. Anɛ o ma nyɛ ma kai ngmami ko nɛ maa wo nɔ ko nɛ e hia he wami womi ɔ he wami lo? Ngmamihi fuu ngɛ nɛ o ma nyɛ maa ngɔ eko kɛ wo nɔ ko he wami. Mo kai hu kaa bɔ nɛ o ma de nɔ́ ko ha a ma nyɛ maa wo nɔ ko he wami wawɛɛ. Lɔ ɔ he ɔ, moo bɔ mɔde nɛ o kɛ gbi blɛuu kɛ mi mi jɔmi nɛ tu munyu be fɛɛ be.—Abɛ 15:1.
2. Mɛni munyuhi nɛ e sɛ nɛ e je wa nya?
Baiblo ɔ de ke: “Nyɛ ko ha nɛ munyu sasɛ ko nɛ je kpo ngɛ nyɛ nya.” (Kane Efeso Bi 4:29.) Enɛ ɔ tsɔɔ kaa e sɛ nɛ waa tu munyuhi nɛ sɛ aloo munyu yayahi aloo munyuhi nɛ ke nɔ ko nu ɔ, e maa hao lɛ. Jehanɛ se hu ɔ, e sɛ nɛ waa ye sieku loo waa gbe nihi a he guɛ.—Kane Abɛ 16:28.
3. Mɛni maa ye bua wɔ nɛ waa tu munyuhi nɛ maa wo nɔ he wami?
Behi fuu ɔ, níhi nɛ wa tuɔ a he munyu ɔ haa nɛ nihi naa nɔ́ nɛ ngɛ wa tsui mi aloo nɔ́ nɛ wa ngɛ he susue. (Luka 6:45) Enɛ ɔ he ɔ, e sa nɛ wa tsɔse wa he konɛ waa ngɔ wa juɛmi kɛ ma ní kpakpahi a nɔ. Ní nɛ ɔmɛ ekomɛ ji, níhi nɛ a da, níhi nɛ a he tsɔ, níhi nɛ a suɔ, kɛ níhi nɛ a sa yi jemi. (Filipi Bi 4:8) Bɔ nɛ pee nɛ waa kɛ wa juɛmi nɛ ma ní nɛ ɔmɛ a nɔ ɔ, e sa nɛ waa kɛ nile nɛ hla níhi nɛ waa kɛ ma je wa hɛja, kɛ nihi nɛ waa kɛ mɛ maa pee wa huɛmɛ. (Abɛ 13:20) Jehanɛ hu ɔ, e he hia nɛ wa he be kɛ susu nɔ́ nɛ wa ma de, kɛ bɔ nɛ wa ma de lɛ ha a he. Mo susu bɔ nɛ nɔ́ nɛ o ma de ɔ ma ná ni kpahi a nɔ he wami ha a he. Baiblo ɔ de ke: “Munyu nɛ a tuɔ kɛkɛ nɛ juɛmi be mi ɔ, e yeɔ nɔ awi kaa klaate. Se ní lelɔ nya mi munyu tsaa nɔ.”—Abɛ 12:18.
MOO KASE BABAUU
Moo kase blɔ nɔ nɛ o maa gu kɛ tu munyu nɛ maa sa Yehowa hɛ mi, nɛ e maa wo ni kpahi he wami.
4. Moo hyɛ o munyu tumi saminya
Be komɛ ɔ, wa deɔ níhi nɛ pee se ɔ wa piaa wa he. (Yakobo 3:2) Nyɛɛ kane Galatia Bi 5:22, 23, nɛ́ nyɛ susu sane bimi nɛ ɔ he:
Su nɛ ɔmɛ a kpɛti te nɛɛ lɛ o ma nyɛ maa sɔle ngɛ he konɛ e ye bua mo nɛ o hyɛ bɔ nɛ o tuɔ munyu ha a saminya? Kɛ su nɛ ɔmɛ maa ye bua mo ha kɛɛ?
Nyɛɛ kane 1 Korinto Bi 15:33, nɛ́ nyɛ susu sane bimi nɛ ɔ he:
Kɛ nihi nɛ o kɛ mɛ bɔɔ, kɛ níhi nɛ o kɛ jeɔ o hɛja a ma ná bɔ nɛ o tuɔ munyu ha a nɔ he wami ha kɛɛ?
Mɛni lɛ e ma nyɛ ma ná bɔ nɛ o tuɔ munyu ha a nɔ he wami?
Nyɛɛ kane Fiɛlɔ 3:1, 7, nɛ́ nyɛ susu sane bimi nɛ ɔ he:
Mɛni be nɛ nile ngɛ mi kaa o maa pee dii aloo o maa mlɛ konɛ o tu munyu ngɛ be nɛ sa mi?
5. Moo tu ni kpahi a he munyu kpakpa
Mɛni wa maa pee konɛ wa ko jɛ ni kpahi loo wa ko tu munyu nɛ sɛ? Mo je VIDEO ɔ, nɛ́ nyɛ susu sane bimihi nɛ nyɛɛ se nɛ ɔmɛ a he.
Ngɛ video ɔ mi ɔ, mɛni he je nɛ nyɛminyumu ɔ suɔ nɛ e pee tsakemi ngɛ bɔ nɛ e tuɔ ni kpahi a he munyu ha a he ɔ?
Mɛni e pee nɛ lɔ ɔ ha nɛ e nyɛ nɛ e pee tsakemi?
Nyɛɛ kane Fiɛlɔ 7:16, nɛ́ nyɛ susu sane bimi nɛ ɔ he:
Mɛni e sa nɛ wa kai ke e peeɔ wɔ kaa waa tu munyuhi nɛ sɛ ngɛ nɔ ko he?
Nyɛɛ kane Fiɛlɔ 7:21, 22, nɛ́ nyɛ susu sane bimi nɛ ɔ he:
Kɛ ngmami nɛ ɔ maa ye bua mo ha kɛɛ konɛ o mi mi nɛ ko fu ke nɔ ko tu o he munyu yaya?
6. O kɛ nihi nɛ a ngɛ o weku ɔ mi ɔ nɛ tu munyu ngɛ mi mi jɔmi mi
Yehowa suɔ kaa o kɛ nihi nɛ a ngɛ o weku ɔ mi ɔ nɛ tu munyu ngɛ mi mi jɔmi kɛ suɔmi mi. Mo je VIDEO ɔ, nɛ́ nyɛ susu sane bimi nɛ nyɛɛ se ɔ he.
Mɛni maa ye bua mo konɛ o kɛ nihi nɛ a ngɛ o weku ɔ mi ɔ nɛ tu munyu ngɛ mi mi jɔmi mi?
Nyɛɛ kane Efeso Bi 4:31, 32, nɛ́ nyɛ susu sane bimi nɛ ɔ he:
Mɛni blɔ nɔ wa maa gu nɛ waa kɛ nihi nɛ a ngɛ wa weku ɔ mi ɔ nɛ tu munyu nɛ maa wo mɛ he wami?
Yehowa de bɔ nɛ e bua jɔ e Bi Yesu he ha. Nyɛɛ kane Mateo 17:5, nɛ́ nyɛ susu sane bimi nɛ ɔ he:
Mɛni blɔ nɔ wa maa gu kɛ kase Yehowa ngɛ bɔ nɛ waa kɛ wa weku mi bimɛ tuɔ munyu ha a mi?
Mo hla he blɔhi nɛ o kɛ je ni kpahi a yi
NI KOMƐ DEƆ KE: “Nɔ́ nɛ i susu ɔ, lɔ ɔ i de ɔ nɛ. Ke ni kpahi sume nɔ́ nɛ i de ɔ po ɔ, pi ye kɔmɔ ji lɔ ɔ.”
O kɛ mɛ kpa gbi lo? Mɛni he je nɛ o de jã a?
NYA MWƆMI
Munyuhi nɛ wa tuɔ ɔ ma nyɛ maa ye bua nihi aloo e hao mɛ wawɛɛ. Loko wa maa tu munyu ko ɔ, e he hia nɛ wa susu nɔ́ nɛ wa ma demi ɔ he, be nɛ waa kɛ maa tu munyu ɔ, kɛ bɔ nɛ wa maa tu munyu ɔ ha a hu he saminya.
Mi Nylɔmi
Mɛni blɔ komɛ a nɔ nɛ o ma nyɛ maa ngɔ o munyu tutui kɛ ye bua ni kpahi?
Mɛni munyuhi nɛ e sɛ nɛ waa tu?
Mɛni maa ye bua wɔ nɛ be fɛɛ be ɔ waa tu munyu ngɛ mi mi jɔmi mi, nɛ́ e wo nihi he wami?
NÍ KPAHI NƐ MAA YE BUA MO
Mɛni maa ye kɛ bua wɔ konɛ waa tu munyuhi nɛ maa wo nihi he wami?
Moo hyɛ nɔ́ nɛ maa ye bua mo konɛ o ko tu munyuhi nɛ sɛ.
“Anɛ Tɔmi Ngɛ He Kaa Nɔ Ko Maa Tu Munyuhi Nɛ Sɛ Lo?” (Munyu nɛ ɔ ngɛ Intanɛti ɔ nɔ)
Moo hyɛ nɔ́ nɛ o maa pee konɛ e ko ba lɛ kaa o maa ye nɔ ko he sieku.
Moo hyɛ bɔ nɛ Yehowa ye bua nyumu ko ha nɛ e kpa munyu nɛ sɛ tumi.
“I Bɔni Bɔ Nɛ Ye Si Himi Ma Ji Ha a He Susumi Wawɛɛ” (Hwɔɔmi Mɔ ɔ mi munyu)