Adafi Fiami Kɛ Ha Nihi Nɛ A Ba Kpe ɔ

NIBWƆHI A KPEELI Mɛ ji nihi nɛ a maa ye bua mo. Wa kpa mo pɛɛ nɛ o ngɔ a blɔ tsɔɔmi nɛ kɔɔ he nɛ lɔle maa ma, he nɛ nihi maa gu, kɛ sɛhi nɛ́ a ma si kɛ fɔ si, kɛ blɔ tsɔɔmi nɛ kɔɔ ní kpahi a he ɔ kɛ tsu ní.

BAPTISMI A ma si blɔ ha nihi nɛ a maa baptisi mɛ ɔ ngɛ hɛ mi je, lɛɛ ja a kɛ blɔ tsɔɔmi kpa ha ngɛ lɔ ɔ he. E sa nɛ nihi nɛ a maa baptisi mɛ ɔ nɛ a hi si ngɛ he nɛ a to ha mɛ ɔ loko a je baptisimi munyu nɛ a maa tu Hɔ mɔtu ɔ sisi. Nɔ fɛɛ nɔ nɛ e ngɔ papami kɛ tade nɛ sa nɛ e maa wo kɛ baptisi ɔ kɛ ba.

YEMI KƐ BUAMI A ngɔ sika fuu kɛ to sɛhi, munyu tumi klama, video jemi klama, kɛ ní kpahi a he blɔ nya bɔ nɛ pee nɛ wa he mi nɛ jɔ wɔ ngɛ kpe ɔ sisi, konɛ wa ná bua jɔmi nɛ́ waa hɛ kɛ su Yehowa he. Yemi kɛ buami nɛ o maa je o tsui mi faa nɛ o ma ha a ji nɔ́ nɛ a kɛ maa wo ní nɛ ɔmɛ a he hiɔ, nɛ a kɛ eko ma fĩ je kɛ wɛ ní tsumi ɔ hu se. Dakahi ngɛ gba a sisi he slɔɔtohi kɛ ha nihi nɛ a suɔ kaa a maa pee jã. O ma nyɛ ma ha yemi kɛ buami kɛ gu wa wɛbsaiti ɔ nɔ hulɔ ke o ya donate.jw.org. Wa bua jɔ nyɛ yemi kɛ buami ɔmɛ tsuo a he, nɛ Blɔ Tsɔɔmi Ajla Toli ɔmɛ ngɛ nyɛ si nae ngɛ Matsɛ Yemi ɔ se nɛ nyɛ fĩɔ ɔ he je.

TSOPA NGƆMI HE Wa kpa nyɛ pɛɛ nɛ nyɛ kadi kaa blɔ nya tomi nɛ ɔ ngɛ kɛ ha nihi nɛ hiɔ maa fia mɛ tlukaa aloo kɛ ha oslaa ko nɛ́ maa ba tlukaa ngɛ kpe ɔ sisi ɔ pɛ.

NÍHI NƐ LAA NƐ A NA A TO HE Ke o na nɔ́ ko nɛ laa a, ngɔɔ kɛ ya Lost and Found Department ɔ. Ke o nɔ́ ko laa a, yaa lejɛ ɔ kaa o maa na lo. E sa nɛ a ngɔ bimɛ tsɔwi nɛ a je a fɔli a he nɛ a laa a kɛ ya Department nɛ ɔ. Se bɔ nɛ pee nɛ pɔ ko tɔ nɔ ko he tsɔ ɔ, wa kpa nyɛ pɛɛ, nyɛ hɛngmɛ nɛ hi nyɛ bimɛ ɔmɛ a he, nɛ nyɛ ha nɛ a hi nyɛ kasa nya.

SI HIMI Wa kpa nyɛ pɛɛ nɛ nyɛ susu ni kpahi a he. Nyɛ kai kaa nyɛ weku li, aloo nihi nɛ nyɛɛ kɛ mɛ sɛ lɔle mi kɛ ba kpe ɔ, aloo nihi nɛ nyɛɛ kɛ mɛ je we kake mi, aloo nyɛ Baiblo kaseli pɛ nɛ e sa kaa nyɛɛ nu blɔ ngɛ sɛ ɔmɛ a nɔ ha mɛ. Wa kpa nyɛ pɛɛ nɛ nyɛ ko ngɔ níhi kɛ fɔ sɛhi nɛ́ pi nɛ́ nyɛ ngɛ sie ha kpahi ɔ a nɔ.

KPE Ɔ SISI NÍ TSUMI Ke o suɔ kaa o ngɔ o he kɛ ha konɛ o tsu kpe ɔ sisi ní tsumi ko ɔ, wa kpa mo pɛɛ nɛ o ya Information and Volunteer Service Department ɔ.