BƆ NƐ O MAA PEE NIHI KASELI HA
NÍ KASEMI 12
Moo Pee Kã
Sisi Tomi Mlaa: “Nu kɛ tsopa kɛ e he via haa nɛ nɔ tsui nyaa; Jã kɛ̃ nɛ ga womi nɛ jeɔ tsui mi ɔ haa nɛ huɛ bɔmi ngɔɔ.”—Abɛ 27:9.
Nɔ́ Nɛ Yesu Pee
1. Moo hyɛ VIDEO ɔ, aloo moo kane Maako 10:17-22. Lɔ ɔ se ɔ, mo susu sane bimihi nɛ nyɛɛ se ɔmɛ a he:
Mɛni su kpakpahi nɛ eko ɔ, Yesu na ngɛ niheyo niatsɛ ɔ he?
Mɛni he je nɛ Yesu hia suɔmi kɛ kã bɔ nɛ pee nɛ e nyɛ nɛ e wo nyumu ɔ ga a?
Mɛni Wa Kaseɔ Ngɛ Yesu Nɔ Hyɛmi Nɔ́ Nɛ ɔ Mi?
2. Ke waa kɛ nihi ngɛ Baiblo ɔ kasee ɔ, e sa nɛ wa je suɔmi kpo kɛ tsɔɔ mɛ, nɛ ngɛ jamɛ a be ɔ mi nɔuu, e sɛ nɛ waa laa mɛ nɔ́ ko nɔ́ ko nɔ bɔ nɛ pee nɛ a nyɛ nɛ a hɛ kɛ su Yehowa he.
Moo Kase Yesu
3. Ye bua o Baiblo kaselɔ ɔ nɛ e kɛ otihi nɛ ma e hɛ mi nɛ o ye bua lɛ nɛ e nyɛ nɛ e su a he.
Ngɔɔ “Nɔ́ Nɛ O Ma Tsu He Ní” nɛ ngɛ ní kasemi ɔ eko fɛɛ eko mi ngɛ Ná Bua Jɔmi Kɛ Ya Neneene! womi ɔ mi ɔ kɛ tsu ní.
Ye bua o Baiblo kaselɔ ɔ nɛ e le níhi nɛ e sa kaa e pee konɛ e nyɛ nɛ e su otihi nɛ e ma nyɛ maa su a he mla kɛ ni nɛmɛ nɛ e ma he be loko e maa su a he ɔ he.
Ke o Baiblo kaselɔ ɔ ngɛ e hɛ mi yae ɔ, moo pɔ e yi jemi.
4. E sa nɛ o le níhi nɛ a ngɛ lɛ blɔ tsie loko e nyɛ we nɛ e ya e hɛ mi ɔ, nɛ o ye bua lɛ konɛ e nyɛ nɛ e da jamɛ a ní ɔmɛ a nya.
Bi o he ke:
‘Ke ye Baiblo kaselɔ ɔ nyɛ we nɛ e ya e hɛ mi kɛ su baptisimi he ɔ, lɛɛ mɛni nɛ e ngɛ lɛ blɔ tsie mɔ?’
‘Mɛni ma nyɛ ma pee kɛ ye bua lɛ?’
Mo bi Yehowa nɛ e wo mo kã konɛ o je suɔmi mi nɛ o kɛ lɛ nɛ susu nɔ́ nɛ e sa kaa e pee ɔ he.
5. Ke Baiblo kaselɔ ɔ yɛ e hɛ mi ɔ, o kɛ lɛ nɛ kpa ní ɔ kasemi.
Ke o suɔ nɛ o le kaa o Baiblo kaselɔ ɔ ngɛ e hɛ mi yae ɔ, mo bi o he sane bimihi nɛ nyɛɛ se nɛ ɔmɛ:
‘Anɛ ye Baiblo kaselɔ ɔ kɛ nɔ́ nɛ e ngɛ kasee ɔ ngɛ ní tsue lo?’
‘Anɛ e baa asafo mi kpehi nɛ e kɛ ni kpahi sɛɛɔ anɔkuale ɔ he ní lo?’
‘Ke e ngɛ ní ɔ kasee be kɛkɛɛ ji nɛ ɔ, anɛ e suɔ kaa e maa pee Yehowa Odasefo no lo?’
Ke Baiblo kaselɔ ko yɛ e hɛ mi ɔ:
Moo ye bua lɛ nɛ e susu nɔ́ nɛ eko ɔ, e ngɛ lɛ blɔ tsie nɛ e nyɛ we nɛ e ya e hɛ mi ɔ he.
Moo je mi mi jɔmi mi nɛ o tsɔɔ lɛ nɔ́ he je nɛ nyɛ be ní kasemi ɔ nɔ tsae hu ɔ.
Mo ha nɛ e le níhi nɛ e sa kaa e pee loko nyɛ ma nyɛ ma tsa ní kasemi ɔ nɔ ekohu.