Mɛni Maa Ba Ngɛ Kojomi Ligbi ɔ Nɔ?

1. Mɛni ji Kojomi Ligbi?

Kaa bɔnɛ o na ngɛ foni nɛ ngɛ hiɔ nɔ ɔ mi ɔ, nihi fuu susuɔ kaa ngɛ Kojomi Ligbi ɔ nɔ ɔ, a maa ngɔ susumahi ayɔ akpehi abɔ kɛ ya da Mawu matsɛ sɛ ɔ hɛ mi konɛ e kojo mɛ ngɛ níhi nɛ a pee kɛ be ɔ a he. E ma ha nɛ ni komɛ maa ya hiɔwe nɛ e ma pii ni komɛ hu ngɛ hɛl la mi. Se Baiblo ɔ tsɔɔ kaa yi mi tomi heje nɛ Mawu ma ha nɛ Kojomi Ligbi ɔ maa ba ngɛ ɔ ji, nɛ́ e kɛ ba kpɔ nihi nɛ a ngɛ mɛ níhi nɛ sɛ pee ɔ. (La 96:13) Mawu hla Yesu kaa kojolɔ konɛ e dla níhi kɛ ha adesahi ekohu.—Kane Yesaya 11:1-5; Bɔfo Ɔmɛ A Nítsumi 17:31.

2. Mɛni blɔ nɔ Kojomi Ligbi ɔ ma dla níhi ekohu ngɛ?

Benɛ Adam je blɔ tsɔ Mawu hɛ mi atua a, e ngɔ e bimɛ tsuo kɛ wo yayami, nɔ́ nami, kɛ gbenɔ mi. (Romabi 5:12) Yesu ma tsu sane nɛ ɔ he ní kɛ gu nimli ayɔ akpehi abɔ nɛ a gbo nɛ e ma tle mɛ si ɔ nɔ. Kpojemi womi ɔ ha nɛ wa na kaa enɛ ɔ maa ba ngɛ Kristo Yesu jeha akpe nɔ yemi ɔ mi.—Kane Kpojemi 20:4, 11, 12.

A maa da níhi nɛ nihi nɛ a ma tle mɛ si ɔ maa pee be mi nɛ a je níhi nɛ ngɛ ‘womihi’ nɛ a tu he munyu ngɛ Kpojemi yi 20 ɔ mi ɔ kpo ɔ nɔ kɛ kojo mɛ, se tsa pi níhi nɛ a pee loko a gbo ɔ nɔ nɛ a maa da kɛ kojo mɛ. (Romabi 6:7) Ngɛ nihi nɛ a ma tle mɛ si kɛ ba wami mi ekohu nɛ a ma ná he blɔ kɛ kase Mawu he ní ɔ a blɔ fa mi ɔ, bɔfo Paulo de ke, ‘nihi nɛ da kɛ nihi nɛ dɛ tsuo maa te si.’—Kane Bɔfo Ɔmɛ A Nítsumi 24:15.

3. Mɛni he ní Kojomi Ligbi ɔ ma tsu?

Nihi nɛ a li Yehowa Mawu nɛ a sɔmɔ we lɛ loko a gbo ɔ ma ná he blɔ kɛ tsake nɛ a pee ní kpakpahi. Ke a ba pee nɔ́ kpakpa a, lɛɛ a ‘tle mɛ si kɛ ba wami mi.’ Se ni nɛmɛ nɛ a ma tle mɛ si ɔ, a kpɛti ni komɛ be suɔe kaa a maa kase Yehowa blɔ ɔmɛ. Mɛɛ lɛɛ a si temi ɔ maa pee ‘si temi kɛ ya kojomi mi.’—Kane Yohane 5:28, 29; Yesaya 26:10; 65:20.

Ngɛ jeha akpe Kojomi Ligbi ɔ nyagbe ɔ, Yehowa ma ha nɛ adesahi nɛ a peeɔ tue bumi ɔ maa ye mluku ekohu. (1 Korintobi 15:24-28) Hyɛ si himi kpakpa nɛ nihi tsuo nɛ a peeɔ tue bumi ɔ ma ná hwɔɔ se ha! Ngɛ nyagbe ka a mi ɔ, Mawu ma je Satan Abosiami nɛ a wo lɛ tsu jeha akpe ɔ kɛ je tsu ɔ mi. Satan maa bɔ mɔde ekohu kaa e ma je nihi a juɛmi kɛ je Yehowa he, se nihi nɛ a be Satan tue bue ɔ maa hi si ngɛ bua jɔmi mi ngɛ zugba a nɔ kɛ ya neneene.—Kane Yesaya 25:8; Kpojemi 20:7-9.

4. Mɛni kojomi ligbi kpa ko hu nɛ adesahi ma ná he se?

Baiblo ɔ kɛ munyu nɛ ji ‘kojomi ligbi’ ɔ hu tsu ní kɛ tu je nɛ ɔ nyagbe nɛ ma a he munyu. Kojomi ligbi nɛ ɔ maa ba tlukaa kaa bɔnɛ Noa be ɔ mi Nyu Afua a ba nɛ e ba kpata yayami peeli tsuo a hɛ mi ɔ. Bua jɔmi sane ji kaa ke a kpata ‘nihi nɛ a li Mawu’ ɔ a hɛ mi ɔ, lɔɔ ma ha nɛ je ehe nɛ a “yeɔ dami sane” ngɛ mi ɔ maa ba.—Kane 2 Petro 3:6, 7, 13.