BAIBLO MI SANE BIMIHI NƐ A HA HETO
Anɛ adesahi ma nyɛ ma ná neneene wami lo?
Mɛni ma nyɛ ma kpɔ wɔ kɛ je gbenɔ dɛ mi?
Kekleekle nɔmlɔ nɛ Mawu bɔ nɛ ji Adam ɔ hi si jeha lafahi abɔ. Se nyagbenyagbe ɔ, e bwɔ nɛ e gbo. Kɛ je lɔɔ se ɔ, nihi peeɔ níhi slɔɔtohi konɛ a ko bwɔ. Se kɛ̃ ɔ, nɔ ko be nɛ e nyɛ tu gbenɔ nya fo hyɛ. Mɛni heje? Ejakaa Adam pee we tue bumi kɛ ha Mawu. E pee yayami, enɛ ɔ heje nɛ e bwɔ nɛ e gbo ɔ nɛ. Wa bwɔɔ ejakaa Adam ngɔ yayami kɛ sã wɔ, nɛ yayami hu he hiɔwo ji gbenɔ.—Kane 1 Mose 5:5; Romabi 5:12.
Loko wa ma ná neneene wami ɔ, e he hia nɛ wa ná nɔ ko nɛ e kpɔ wɔ. (Hiob 33:24, 25) Kpɔmi nɔ́ ji hiɔ nɛ a woɔ konɛ a ngmɛɛ nɔ ko he. Ngɛ wa blɔ fa mi ɔ, e he hia nɛ a kpɔ wɔ kɛ je gbenɔ dɛ mi. (2 Mose 21:29, 30) Yesu wo hiɔ nɛ ɔ benɛ e ba gbo kɛ ha wɔ ɔ.—Kane Yohane 3:16.
Mɛni blɔ nɔ wa maa gu kɛ ná neneene wami?
Tsa pi nɔ tsuaa nɔ nɛ a ma kpɔ kɛ je hiɔ kɛ bwɔmi dɛ mi. Ngɛ anɔkuale mi ɔ, nihi nɛ a pee we tue bumi kɛ ha Mawu kaa bɔnɛ Adam pee ɔ, be neneene wami náe. Nihi nɛ a kɛ a he yayamihi pa mɛ pɛ nɛ a maa hi si kɛ ya neneene.—Kane Yesaya 33:24; 35:3-6.
Loko a kɛ wa he yayamihi maa pa wɔ ɔ, e sa nɛ waa pee nɔ́ ko. E he hia nɛ waa le Mawu kɛ gu e Munyu nɛ ji Baiblo ɔ nɛ wa maa kase ɔ nɔ. Baiblo ɔ tsɔɔ wɔ nɔ́ nɛ wa maa pee konɛ wa si himi nɛ pee kpakpa, nɔ́ nɛ wa maa pee konɛ Mawu nɛ kplɛɛ wa nɔ, kɛ nɔ́ nɛ wa maa pee konɛ wa ná neneene wami.—Kane Yohane 17:3; Bɔfo Ɔmɛ A Nítsumi 3:19.