BAIBLO MI SANE BIMIHI NƐ A HA HETO

Anɛ si himi ɔ tsuo ji nɛ ɔ lo?

Anɛ yi mi tomi he je nɛ wa ngɛ je mi ji kaa wa ma tsu ní, wa ma fiɛ, wa maa sɛ gba si himi mi, wa ma fɔ bimɛ, nɛ waa bwɔ lo? (Hiob 14:1, 2) Baiblo ɔ tsɔɔ kaa ní leli po susuɔ sane bimi nɛ ɔ he.​—Kane Fiɛlɔ 2:11.

Mɛni he je nɛ wa ngɛ wami mi? Kekleekle ɔ, e sa nɛ waa le bɔ nɛ wami je sisi ha. Nihi babauu kplɛɛ nɔ kaa Bɔlɔ ko nɛ e le ní wawɛɛ lɛ bɔ wɔ, ejakaa bɔ nɛ e pee wa kalegbɔ ɔ, kɛ wa nɔmlɔ tso ɔ ha a ngɛ nyakpɛ nitsɛ. (Kane La 139:14.) Ke jã a, lɛɛ yi mi tomi ko he je nɛ e bɔ wɔ ngɛ! Ke wa le jamɛ a yi mi tomi ɔ, wa bua maa jɔ ngɛ si himi mi.

Mɛni he je nɛ Mawu bɔ wɔ?

Benɛ Mawu bɔ Adam kɛ Hawa a, e jɔɔ mɛ nɛ e ha mɛ ní tsumi nɛ ngɛ bua jɔmi, kɛ yi mi tomi kaa a fɔ nɛ a hyi zugba a nɔ, nɛ a pee zugba a paradeiso, nɛ a hi si kɛ ya neneene.​—Kane 1 Mose 1:28, 31.

Adesahi te si kɛ wo Mawu nɔ yemi ɔ, nɛ lɔ ɔ hɛ Mawu yi mi tomi ɔ kɛ ya se. Se Mawu kua we e yi mi tomi ɔ, nɛ e kua we wɔ hulɔ. Baiblo ɔ tsɔɔ kaa Mawu ngɛ ní tsue konɛ e kɛ he adesahi nɛ a yeɔ lɛ anɔkuale ɔ a yi wami, bɔ nɛ pee nɛ e yi mi tomi ɔ nɛ ba mi! Lɔ ɔ he ɔ, Mawu suɔ nɛ o ná bua jɔmi ngɛ si himi mi kaa bɔ nɛ e to e yi mi kɛ je sisije ɔ! (Kane La 37:29.) Ke o kase Baiblo ɔ, o maa na bɔ nɛ mo hu o ma ná Mawu yi mi tomi ɔ he se ha.