“E Ji Nike Ní Nɛ Pe Kulaa Nɛ I Ná”

Jã ji bɔ nɛ jokuɛ yoyo ko nɛ e ye jeha 13 ɔ nu he benɛ a ke lɛ gbe bi ko ɔ. Jua yelɔ kpanaa ko tsɔɔ kaa, kɔmpiuta ko nɛ e papaa ha lɛ benɛ e ngɛ nɔ tsami sukuu yae ɔ ji nike ní ko nɛ ye bua lɛ wawɛɛ. Nɛ nyumu ko hu nɛ e ngɔ yo kɛ we ɔ tsɔɔ kaa kaadi ko nɛ e yo ɔ pee kɛ ke lɛ be nɛ a gba si himi ɔ ná jeha kake ɔ ji nike ní nɛ se be nɛ e nine su nɔ.

Daa jeha a, nihi babauu bɔɔ mɔde nɛ a ngɔɔ be fuu kɛ hlaa nike ní nɛ “pe kulaa” nɛ a kɛ ma ha a huɛ ko aloo a weku no ko ngɛ be klɛdɛɛ ko mi. Nɛ a kpɛti nihi fuu maa suɔ kaa nihi nɛ a ke mɛ ní ɔ maa pee a ní kaa bɔ nɛ nihi nɛ wa wo a ta kɛ sɛ hlami ɔ pee ɔ. Nɛ mo nɛɛ? Anɛ o maa suɔ kaa a ke mo nɔ́ ko nɛ o bua maa jɔ he wawɛɛ aloo o maa ke nɔ ko nɔ́ ko nɛ e bua maa jɔ he wawɛɛ lo?

Jã peemi ngɛ bua jɔmi wawɛɛ, ejakaa pi nɔ nɛ a ke lɛ nɔ́ ɔ pɛ nɛ e bua jɔɔ, se mohu ɔ, nɔ nɛ e ke nɔ nɔ́ ɔ hu bua ma nyɛ maa jɔ. E be nyakpɛ, ejakaa Baiblo ɔ de ke: “Gbaami ngɛ nɔ́ hami mi pe nɔ́ hemi.” (Bɔfo Ɔmɛ A Ní Tsumi 20:35) Ngɛ anɔkuale mi ɔ, ke nɔ nɛ a ke lɛ nɔ́ ɔ na nike ní ɔ kaa nɔ́ ko nɛ he jua wa a, lɔ ɔ lɛ haa nɛ nɔ nɛ e ke nɔ ɔ nɔ́ ɔ bua jɔɔ.

Lɛɛ mɛni blɔ nɔ o maa gu konɛ o nike ní ɔ nɛ ha nɛ o kɛ nɔ nɛ o ke lɛ ní ɔ tsuo nyɛ bua nɛ jɔ? Nɛ ke o be nyɛe ma ha nɔ ko nike ní nɛ “se be” ɔ, mɛni o maa pee konɛ nɔ ɔ bua nɛ jɔ nɔ́ nɛ o maa ke lɛ ɔ he wawɛɛ?