Kpɔmi Nɔ́ ɔ ‘Nike Ní Nɛ Hi Kɛ Pi Si’ Nɛ Je Tsɛ ɔ Ngɔ

1. Mɛni jɔɔmihi kpɔmi nɔ́ ɔ ha nɛ wa ná?

YESU KRISTO kpɔmi afɔle sami ɔ ha nɛ wa nine suɔ jɔɔmihi fuu a nɔ. Kpɔmi nɔ́ ɔ bli blɔ kɛ ha Adam bimɛ tsuo nɛ a peeɔ nɔ́ nɛ da a, konɛ nyagbenyagbe ɔ, a ba piɛɛ Mawu weku ɔ he. Jehanɛ hu ɔ, kpɔmi nɔ́ ɔ ha nɛ wa ná he blɔ kaa wa ma nyɛ maa hi si ngɛ bua jɔmi mi kɛ ya neneene. Se pi bua jɔmi si himi nɛ adesahi nɛ a pee tue bumi ɔ ma ná hwɔɔ se ɔ he ní pɛ nɛ Kristo kpɔmi nɔ́ ɔ tsuɔ. Anɔkuale nɛ Yesu ye Yehowa kɛ ya si e gbenɔ mi ɔ tsu sane ko nɛ he hia nɛ kɔɔ je mluku ɔ he ɔ he ní.​—Heb. 1:8, 9.

2. (a) Mɛni sanehi nɛ a he hia nɛ kɔɔ je mluku ɔ he nɛ ngɛ Yesu sɔlemi ɔ mi? (Moo hyɛ foni nɛ ngɛ ní kasemi ɔ sisije ɔ.) (b) Mɛni he wa ma susu ngɛ munyu nɛ ɔ mi?

² Maa pee jeha enyɔ se loko Yesu ma gbo nɛ e kɛ e wami nɛ sã afɔle kaa kpɔmi nɔ́ ɔ, e tsɔɔ e kaseli ɔmɛ kaa a sɔle ke: ‘Wa Tsɛ nɛ ngɛ hiɔwe; O biɛ ɔ he nɛ tsɔ. O Matsɛ Yemi ɔ nɛ ba; a pee nɔ́ nɛ o suɔ ngɛ zugba a nɔ kaa bɔ nɛ a peeɔ ngɛ hiɔwe ɔ.’ (Mat. 6:9, 10) Bɔ nɛ pee nɛ bua jɔmi nɛ wa ngɛ kɛ ha kpɔmi nɔ́ ɔ mi nɛ wa a, nyɛ ha nɛ wa susu bɔ nɛ kpɔmi nɔ́ ɔ kɔɔ Mawu biɛ ɔ he nɛ a ma tsɔ, Mawu Matsɛ Yemi ɔ, kɛ bɔ nɛ Mawu yi mi tomi ma plɛ kɛ ba mi ha a he nɛ waa hyɛ.

“O BIƐ Ɔ HE NƐ TSƆ”

3. Mɛni Yehowa biɛ ɔ tsɔɔ, nɛ mɛni blɔ nɔ nɛ Satan gu kɛ gbe biɛ klɔuklɔu nɛ ɔ he guɛ ngɛ?

³ Ngɛ Yesu sɔlemi he nɔ hyɛmi nɔ́ ɔ mi ɔ, kekleekle nɔ́ nɛ e bi ji kaa a tsɔ Mawu biɛ ɔ he. Yehowa biɛ ɔ tsɔɔ e we agboje, bɔ nɛ e nɔ kuɔ ha, kɛ bɔ nɛ e ngɛ klɔuklɔu ha. Be kpa nɛ Yesu ngɛ sɔlee ɔ, e tsɛ Yehowa ke ‘Tsaatsɛ Klɔuklɔu.’ (Yoh. 17:11) Akɛnɛ Yehowa ngɛ klɔuklɔu he je ɔ, sisi tomi mlaahi kɛ mlaahi nɛ e ha wɔ ɔ tsuo ngɛ klɔuklɔu. Se kɛ̃ ɔ, ngɛ Eden abɔɔ ɔ mi ɔ, Satan gu ga blɔ nɔ kɛ tsɔɔ kaa Mawu be he blɔ kaa e woɔ wɔ mlaahi. Akɛnɛ Satan ye Yehowa he lakpa he je ɔ, e gbe Mawu biɛ klɔuklɔu ɔ he guɛ.​—1 Mose 3:1-5.

4. Ngɛ mɛni blɔ nɔ nɛ Yesu ye bua nɛ a tsɔ Mawu biɛ ɔ he?

⁴ Se Yesu lɛɛ e suɔ Yehowa biɛ ɔ wawɛɛ. (Yoh. 17:25, 26, NW) Yesu ye bua nɛ a tsɔ biɛ klɔuklɔu ɔ he. (Kane La 40:8-10.) Yesu ba hi si ngɛ zugba a nɔ kaa adesa nɛ e ye mluku, nɛ e kɛ tsɔɔ kaa nile ngɛ mi, nɛ e da kaa Yehowa maa wo adesahi kɛ bɔfohi mlaa. Benɛ Satan ha nɛ a wa Yesu yi mi po ɔ, Yesu ya nɔ nɛ e ye e hiɔwe Tsɛ ɔ anɔkuale kɛ ya si gbenɔ mi. Yesu ye anɔkuale nɛ e kɛ tsɔɔ kaa adesa nɛ e ye mluku ma nyɛ maa ye Mawu mlaahi nɛ da a nɔ kɛ pi si.

5. Mɛni wɔ hu wa ma nyɛ maa pee konɛ Mawu biɛ ɔ he nɛ tsɔ?

⁵ Mɛni blɔ nɔ wa maa gu kɛ tsɔɔ kaa wa suɔ Yehowa biɛ ɔ? Kɛ gu wa ní peepee nɔ. Yehowa suɔ kaa waa pee wa he klɔuklɔu. (Kane 1 Petro 1:15, 16.) Enɛ ɔ tsɔɔ kaa wa ma sɔmɔ Yehowa pɛ, nɛ wa maa ye e mlaa amɛ a nɔ kɛ wa tsui tsuo. Ke a ngɛ wɔ yi mi wae po, wa bɔɔ mɔde kaa waa kɛ Yehowa sisi tomi mlaahi kɛ e mlaahi nɛ da a ma tsu ní. Ke wa peeɔ nɔ́ nɛ da a, wa haa nɛ wa la a kpɛɔ, nɛ enɛ ɔ woɔ Yehowa biɛ ɔ hɛ mi nyami. (Mat. 5:14-16) Akɛnɛ wa ngɛ klɔuklɔu he je ɔ, waa kɛ bɔ nɛ wa baa wa je mi ha a maa nɔ mi kaa Yehowa mlaa amɛ hi, nɛ Satan nya pomi ɔ ji lakpa. Wɔ tsuo wa tɔ̃ɔ, enɛ ɔ he ɔ, ke wa pee nɔ́ ko nɛ sɛ́ ɔ, wa piaa wa he kɛ jeɔ wa tsui mi, nɛ wa kpaa ní yayahi nɛ gbeɔ Yehowa he guɛ ɔ peemi.​—La 79:9.

6. E ngɛ mi kaa wa yi mluku mohu lɛɛ, se mɛni he je Yehowa ma nyɛ maa bu wɔ kaa dali?

⁶ Yehowa ngɔɔ nihi nɛ a ngɛ hemi kɛ yemi ngɛ Kristo afɔle sami ɔ mi ɔ a he yayami kɛ paa mɛ. E kplɛɛɔ nihi nɛ a jɔɔ a he nɔ ha lɛ ɔ a nɔ kaa e sɔmɔli. Yehowa buu Kristofohi nɛ a pɔ mɛ nu ɔ kaa e bimɛ nɛ a peeɔ nɔ́ nɛ da, nɛ e buɔ ‘to kpa amɛ’ kaa e huɛmɛ nɛ a peeɔ nɔ́ nɛ da. (Yoh. 10:16; Rom. 5:1, 2; Yak. 2:21-25) Enɛ ɔ he ɔ, amlɔ nɛ ɔ po ɔ, kpɔmi nɔ́ ɔ yeɔ bua nɛ huɛ bɔmi kpakpa hiɔ waa kɛ wa Tsɛ ɔ wa kpɛti, nɛ wa nyɛɔ tsɔɔ e biɛ ɔ he.

“O MATSƐ YEMI Ɔ NƐ BA”

7. Mɛni jɔɔmihi nɛ kpɔmi nɔ́ ɔ ma ha nɛ wa ná ngɛ Matsɛ Yemi ɔ sisi?

⁷ Ngɛ Yesu sɔlemi he nɔ hyɛmi nɔ́ ɔ mi ɔ, nɔ́ enyɔne nɛ e bi Mawu ji: ‘O Matsɛ Yemi ɔ nɛ ba.’ Ngɛ mɛni blɔ nɔ nɛ kpɔmi nɔ́ ɔ kɔɔ Mawu Matsɛ Yemi ɔ he? Kɛ gu kpɔmi nɔ́ ɔ nɔ ɔ, a bua nimli 144,000 a nya konɛ a kɛ Kristo nɛ sɔmɔ kaa matsɛmɛ kɛ osɔfohi ngɛ hiɔwe. (Kpoj. 5:9, 10; 14:1) Yesu kɛ nihi nɛ a piɛɛ e he nɛ e kɛ mɛ maa ye matsɛ ɔ ji nihi nɛ peeɔ Mawu Matsɛ Yemi ɔ nɛ. A maa ye matsɛ jeha akpe, nɛ a ma ha nɛ adesahi nɛ a yeɔ anɔkuale ɔ ma ná kpɔmi nɔ́ ɔ he se. A ma tsake zugba a kɛ pee paradeiso, nɛ adesahi nɛ a yeɔ anɔkuale ɔ maa ye mluku. Mawu weku ɔ nɛ ngɛ hiɔwe ɔ kɛ nɔ́ nɛ ngɛ zugba a nɔ ɔ maa pee kake. (Kpoj. 5:13; 20:6) Yesu maa fia sinɔ ɔ yi nɔ́, nɛ e ma je haomihi tsuo nɛ Satan atua tsɔmi ɔ ngɔ kɛ ba a.​—1 Mose 3:15.

8. (a) Mɛni blɔ nɔ Yesu gu kɛ ye bua e kaseli ɔmɛ konɛ a na se nami nɛ ngɛ Mawu Matsɛ Yemi ɔ he? (b) Mɛni wa peeɔ kɛ tsɔɔ kaa wa fĩɔ Matsɛ Yemi ɔ se?

⁸ Benɛ Yesu ngɛ zugba a nɔ ɔ, e ye bua e kaseli ɔmɛ nɛ a na se nami nɛ ngɛ Mawu Matsɛ Yemi ɔ he. Ngɛ Yesu baptisimi ɔ se pɛ ɔ, e fiɛɛ “Mawu matsɛ yemi ɔ he sane kpakpa a” ngɛ hehi fuu. (Luka 4:43) Loko Yesu maa kpale kɛ ho hiɔwe ya a, e kɛ e kaseli ɔmɛ ye nyagbe sɛ. Yesu fã mɛ kaa a ye e he odase ‘kɛ ya su je ɔ nyagbe he tɔɔ.’ (Níts. 1:6-8) Matsɛ Yemi fiɛɛmi ní tsumi ɔ ma ha nɛ nihi fuu ngɛ je kɛ wɛ ɔ ma ná he blɔ kɛ kase kpɔmi nɔ́ ɔ he ní, konɛ a ba pee Mawu Matsɛ Yemi ɔ sisi bimɛ. Mwɔnɛ ɔ, wa yeɔ bua Kristo nyɛmimɛ ɔmɛ nɛ a ngɛ zugba a nɔ ɔ kɛ fiɛɛɔ sane kpakpa a ngɛ je kɛ wɛ kɛ tsɔɔ kaa wa fĩ Matsɛ Yemi ɔ se.​—Mat. 24:14; 25:40.

“A PEE NƆ́ NƐ O SUƆ NGƐ ZUGBA A NƆ”

9. Mɛni he je wa ma nyɛ ma ná nɔ mi mami kaa Yehowa ma ha nɛ e yi mi tomi kɛ ha adesahi nɛ ba mi ɔ?

⁹ Mɛni Yesu ngɛ tsɔɔe benɛ e de ke: “A pee nɔ́ nɛ o suɔ” ɔ? Yehowa ji Bɔlɔ ɔ. Ke e de nɔ́ ko ɔ, e maa ba mi kokooko. (Yes. 55:11) E be blɔ ngmɛe konɛ Satan atua tsɔmi ɔ nɛ tsi yi mi nɛ e to ha adesahi ɔ nya. Kɛ je sisije ɔ, Yehowa suɔmi nya ní ji kaa Adam kɛ Hawa nɛ a fɔ bimɛ nɛ a ye mluku nɛ a hyi zugba a tsuo nɔ. (1 Mose 1:28) Kaa Adam kɛ Hawa gbo be mi nɛ a fɔ we ɔ, jinɛ Mawu yi mi tomi kaa a bimɛ nɛ a hyi zugba a nɔ tɔ ɔ, ko pee yaka. Enɛ ɔ he ɔ, benɛ Adam kɛ Hawa tɔ̃ se po ɔ, Yehowa ngmɛ blɔ nɛ a fɔ bimɛ. Kɛ gu kpɔmi nɔ́ ɔ nɔ ɔ, Mawu ha nihi nɛ a ngɛ hemi kɛ yemi ɔ tsuo he blɔ kaa a ma nyɛ maa ye mluku nɛ a hi si kɛ ya neneene. Yehowa suɔ adesahi, nɛ e suɔ kaa nihi nɛ a buɔ lɛ tue ɔ nɛ a hi si kɛ ya neneene kaa bɔ nɛ e to e yi mi ɔ.

10. Kɛ adesahi nɛ a gbo ɔ ma ná kpɔmi nɔ́ ɔ he se ha kɛɛ?

¹⁰ Nimli ayɔ akpehi abɔ nɛ a nɛ́ he blɔ konɛ a kase Yehowa he ní nɛ a sɔmɔ lɛ nɛ a gbo ɔ hu nɛɛ? Kpɔmi nɔ́ ɔ he je ɔ, a ma nyɛ ma tle gbogboehi a si. Wa hiɔwe Tsɛ nɛ ngɛ suɔmi ɔ ma tle mɛ si kɛ ba wami mi ekohu, nɛ e ma ha mɛ he blɔ konɛ a kase e yi mi tomi ɔ he ní konɛ a ná neneene wami. (Níts. 24:15) Yehowa sume nɛ adesahi nɛ a gbo. Yehowa lɛ haa nɔ wami, enɛ ɔ he ɔ, e ma ba pee nihi nɛ a ma tle mɛ si ɔ tsuo a Tsɛ. (La 36:9) Enɛ ɔ he ɔ, e da blɔ kaa Yesu tsɔɔ wɔ kaa waa sɔle ke: ‘Wa Tsɛ nɛ ngɛ hiɔwe.’ (Mat. 6:9) Yehowa ha Yesu ní tsumi ko nɛ he hia wawɛɛ ngɛ gbogboehi a si tlemi ɔ mi. (Yoh. 6:40, 44) Ngɛ Paradeiso ɔ mi ɔ, Yesu ma tsu ní tsumi nɛ a kɛ wo e dɛ ɔ, nɛ e maa je kpo heii kaa lɛ “ji si temi ɔ, kɛ wami ɔ nɛ.”​—Yoh. 11:25.

11. Mɛni Mawu suɔ kaa “nimli asafo” ɔ nɛ a ná?

¹¹ Pi nihi bɔɔ pɛ nɛ a ma ná Yehowa dloomi ɔ he se, ejakaa Yesu de ke: ‘Nɔ tsuaa nɔ nɛ peeɔ nɔ́ nɛ Mawu suɔ ɔ, lɛ nɔuu ji ye nyɛminyumu, ye nyɛmiyo, kɛ ye nyɛ.’ (Mar. 3:35) Mawu suɔ kaa “nimli asafo” nɛ a be nyɛe maa kane mɛ nɛ a je ma amɛ tsuo, kɛ wɛtso munomuno, kɛ gbi munomuno a mi ɔ nɛ a ba pee e sɔmɔli. Nihi nɛ a ngɛ hemi kɛ yemi ngɛ Kristo kpɔmi nɔ́ ɔ mi ɔ mi, nɛ a peeɔ nɔ́ nɛ Mawu suɔ ɔ ma kpa ngmlaa wawɛɛ ke: “Wa Mawu ɔ nɛ hii si ngɛ matsɛ sɛ ɔ nɔ ɔ, kɛ To bi ɔ pɛ ji ni nɛmɛ nɛ heɔ nɔ yi wami.”​—Kpoj. 7:9, 10.

12. Ngɛ mɛni blɔ nɔ nɛ sɔlemi he nɔ hyɛmi nɔ́ ɔ haa nɛ wa naa Yehowa yi mi tomi kɛ ha adesahi nɛ a buɔ lɛ tue ɔ?

¹² Wa naa Yehowa yi mi tomi kɛ ha adesahi nɛ a buɔ lɛ tue ɔ ngɛ nɔ́ nɛ Yesu bi ngɛ e sɔlemi he nɔ hyɛmi nɔ́ ɔ mi ɔ mi. Wa suɔ kaa wa maa bɔ wa he mɔde nɛ waa wo Yehowa biɛ ɔ hɛ mi nyami, nɛ wa ha nɛ e pee klɔuklɔu, konɛ e kɛ Yesu sɔlemi ɔ nɛ kpa gbi. (Yes. 8:13) Yesu biɛ ɔ nitsɛ tsɔɔ kaa “Yehowa Ji Yi Wami Helɔ,” nɛ kpɔmi nɔ́ ɔ nɔ nɛ́ a maa da kɛ he wa yi wami ɔ maa ngɔ yi jemi kɛ hɛ mi nyami kɛ ha Yehowa biɛ ɔ. A maa gu Mawu Matsɛ Yemi ɔ nɔ kɛ jɔɔ adesahi nɛ a buɔ lɛ tue ɔ, konɛ a ná kpɔmi nɔ́ ɔ he se. Niinɛ, sɔlemi he nɔ hyɛmi nɔ́ ɔ haa nɛ wa ná nɔ mi mami kaa nɔ́ ko nɔ́ ko be nyɛe maa tsi nɔ́ nɛ Mawu suɔ ɔ nya.​—La 135:6; Yes. 46:9, 10.

O BUA NƐ JƆ KPƆMI NƆ́ Ɔ HE

13. Ke wa ha nɛ a baptisi wɔ ɔ, mɛni lɔ ɔ tsɔɔ?

¹³ Nɔ́ kake nɛ he hia nɛ wa ma nyɛ maa pee kɛ tsɔɔ kaa wa bua jɔ kpɔmi nɔ́ ɔ he ɔ ji kaa wa maa tsɔɔ hemi kɛ yemi ngɛ kpɔmi nɔ́ ɔ mi, nɛ waa jɔɔ wa he nɔ kɛ ha Yehowa konɛ wa ha nɛ a baptisi wɔ. Ke a baptisi wɔ ɔ, lɔ ɔ tsɔɔ kaa ‘Yehowa níhi ji wɔ.’ (Rom. 14:8) E tsɔɔ kaa wa suɔ kaa Mawu nɛ ha wɔ he nile kpakpa. (1 Pet. 3:21) Yehowa ngɔɔ Kristo muɔ nɛ e kɛ sã afɔle ɔ kɛ tsuɔ wa he, konɛ wa ná he nile kpakpa nɛ ɔ. Wa ngɛ nɔ mi mami wawɛɛ kaa e ma ha wɔ níhi tsuo nɛ e wo wɔ he si ɔ.​—Rom. 8:32.

14. Mɛni he je nɛ a fã wɔ kaa waa suɔ wa nyɛmimɛ ɔ?

¹⁴ Mɛni ji nɔ́ kpa nɛ wa ma nyɛ maa pee kɛ tsɔɔ kaa wa bua jɔ kpɔmi nɔ́ ɔ he? Akɛnɛ suɔmi lɛ haa nɛ Yehowa peeɔ nɔ́ tsuaa nɔ́ he je ɔ, e suɔ kaa e sɔmɔli tsuo nɛ a ha nɛ suɔmi nɛ pee a su titli. (1 Yoh. 4:8-11) Ke wa suɔ wa nyɛmi nɔmlɔ ɔ, lɔ ɔ tsɔɔ kaa wa suɔ nɛ waa pee wa “Tsɛ nɛ ngɛ hiɔwe ɔ bimɛ.” (Mat. 5:43-48) Fami nɛ nyɛɛ Yehowa nɛ wa maa suɔ lɛ ɔ se ɔ ji kaa wa maa suɔ wa nyɛmi nɔmlɔ. (Mat. 22:37-40) Blɔ kake nɛ wa guɔ nɔ kɛ tsɔɔ ɔ kaa wa suɔ wa nyɛmi nɔmlɔ ji kaa wa maa fiɛɛ sane kpakpa nɛ kɔɔ Mawu Matsɛ Yemi ɔ he kaa bɔ nɛ a fã wɔ ke waa pee ɔ. Ke wa je suɔmi kpo kɛ tsɔɔ wa nyɛmi nɔmlɔ ɔ, lɔ ɔ tsɔɔ kaa wa ngɛ Mawu hɛ mi nyami ɔ kpo jee. Ngɛ anɔkuale mi ɔ, suɔmi nɛ wa ngɛ kɛ ha Mawu ɔ “mi waa” ke wa bu fami nɛ a fã wɔ kaa waa suɔ nihi, titli ɔ, wa nyɛmimɛ ɔ tue.​—1 Yoh. 4:12, 20.

KPƆMI NƆ́ Ɔ HAA NƐ WA NÁA ‘HE JƆMI’ NƐ JE YEHOWA NGƆ

15. (a) Mɛni jɔɔmihi Yehowa haa nɛ wa náa amlɔ nɛ ɔ? (b) Mɛni jɔɔmihi wa ma ná hwɔɔ se?

¹⁵ Ke wa ná hemi kɛ yemi ngɛ kpɔmi nɔ́ ɔ mi ɔ, lɔ ɔ haa nɛ a kɛ wa he yayami ɔmɛ paa wɔ kulaa. Mawu Munyu ɔ ha nɛ wa le kaa a ma nyɛ maa ngɔ wa he yayami ɔmɛ kɛ “pa” wɔ. (Kane Bɔfo Ɔmɛ A Ní Tsumi 3:19-21.) Kaa bɔ nɛ wa susu he kɛ sɛ hla mi ɔ, kɛ gu kpɔmi nɔ́ ɔ nɔ ɔ, Yehowa ngɔɔ e sɔmɔli nɛ a kɛ mumi ɔ pɔ mɛ nu ɔ kaa e bimɛ. (Rom. 8:15-17) Se wɔ nihi nɛ wa piɛɛ ‘to kpa amɛ’ a he ɔ lɛɛ, e ngɛ kaa nɔ́ nɛ Yehowa pee mlaa nya womi ko nɛ wa biɛ ngɛ nɔ, konɛ e kɛ ngɔ wɔ kaa e bimɛ. Ke wa ye mluku, nɛ wa nyɛ nɛ wa da nyagbe ka a nya a, Yehowa kɛ bua jɔmi maa ngɔ e nine kɛ wo womi ɔ sisi, nɛ e maa ngɔ wɔ kaa e bimɛ nɛ e suɔ nɛ a ngɛ zugba a nɔ. (Rom. 8:20, 21; Kpoj. 20:7-9) Suɔmi nɛ Yehowa ngɛ kɛ ha e bimɛ nɛ a he jua wa a ngɛ kɛ yaa neneene. Wa ma ná kpɔmi nɔ́ ɔ he se kɛ ya neneene. (Heb. 9:12) Kpɔmi nɔ́ ɔ be yaka pee gblee. Adesa ko, aloo he wami ko be nyɛe nɛ e kpɔ̃ kpɔmi nɔ́ ɔ ngɛ wa dɛ.

16. Ngɛ mɛni blɔ nɔ nɛ kpɔmi nɔ́ ɔ ha nɛ wa ná he yemi nitsɛnitsɛ?

¹⁶ Nɔ́ ko be nɛ Abosiami ma nyɛ maa pee kɛ tsi nihi nɛ a piaa a he kɛ jeɔ a tsui mi ɔ a nya konɛ nyagbenyagbe ɔ, a ko ba piɛɛ Yehowa weku ɔ he. Yesu ba zugba a nɔ nɛ e ba gbo “si kake nyɔngloo.” Enɛ ɔ he ɔ, a be kpɔmi nɔ́ ko woe hu. (Heb. 9:24-26) Adam yayami ɔ ha nɛ a bu wɔ tsuo gbenɔ fɔ, se kpɔmi nɔ́ ɔ po fɔ bumi nɛ ɔ se. Wa naa Yehowa si kaa kɛ gu Kristo afɔle sami ɔ nɔ ɔ, a kpɔ wɔ kɛ je Satan je nɛ ɔ nɔ yemi sisi, nɛ wa yi gbenɔ gbeye hu.​—Heb. 2:14, 15.

17. Kɛ o ma ná Yehowa suɔmi ɔ he se ha kɛɛ?

¹⁷ Mawu si womi ɔmɛ maa ba mi kokooko. Kaa bɔ nɛ Yehowa adebɔ he mlaahi tsuɔ ní be tsuaa be ɔ, jã kɛ̃ nɛ e si womi ɔmɛ hu maa ba mi kokooko. E tsakee we. (Mal. 3:6) Yehowa ha wɔ wami, se pi lɔ ɔ kɛkɛ, e suɔ wɔ hulɔ. “Suɔmi nɛ Mawu ngɛ kɛ ha wɔ ɔ, wɔ nitsɛmɛ wa le, nɛ wa ji he nɔ́. Mawu ɔ, suɔmi ji lɛ.” (1 Yoh. 4:16) Zugba a tsuo maa pee paradeiso nɛ bua jɔmi ngɛ mi, nɛ nɔ tsuaa nɔ nɛ ngɛ zugba a nɔ ɔ ma je Mawu suɔmi ɔ kpo. Nyɛ ha nɛ waa kɛ Mawu bɔfohi nɛ a yeɔ anɔkuale ɔ nɛ pee kake kɛ de ke: “Wa Mawu! Wa ngɛ o yi jee; wa ngɛ o hɛ mi nyami woe, nɛ wa ngɛ mo si nae kɛ yaa neneene. Ejakaa o le ní; o kle, nɛ o je agbo! Amen!”​—Kpoj. 7:12.