Anɛ Baiblo ɔ Blɔ Tsɔɔmi He Hia Mwɔnɛ ɔ Lo?
NI KOMƐ DEƆ KE DƐBI. Dɔkita ko tsɔɔ kaa ke nɔ ko suɔ nɛ Baiblo ɔ nɛ tsɔɔ lɛ blɔ ɔ, e ngɛ kaa tsɔɔlɔ ko nɛ e ngɔ je mi si kpami he womi ko nɛ a pee ngɛ 1920 ɔmɛ a mi kɛ ngɛ ní tsɔɔe. Nɔ ko nɛ e be bu kɛ ha Baiblo ɔ po ma nyɛ ma bi ke, mɛnɔ nɛ e maa ngɔ kɔmpiuta momo he blɔ tsɔɔmi womi kɛ tsu kɔmpiuta ehe he ní? Ke wa ma de ɔ, ngɛ ni komɛ a susumi nya a, Baiblo ɔ be be kulaa.
Mɛni he je nɛ nɔ ko maa ngɔ blema womi nɛ ɔ kɛ tsu ní ngɛ mwɔnɛ ɔ je nɛ klama he nile ya hɛ mi ɔ mi? Jehanɛ hu ɔ, Intanɛti ní tsumi hehi fuu woɔ nihi ga ngɛ níhi a he, nɛ a haa mɛ blɔ tsɔɔmi ehehi hulɔ. Womi mi leli nɛ a tuɔ munyu ngɛ TV nɔ, nihi nɛ a he biɛ, kɛ womi ngmali tsɔɔ a juɛmi ngɛ bɔ nɛ e sa nɛ nihi nɛ a ba a je mi haa he. Womi juali hu juaa womihi nɛ yeɔ bua nihi konɛ a nyɛ nɛ a pee ní komɛ ngɛ a dɛ he. Enɛ ɔ ha nɛ nihi nɛ a peeɔ womi nɛ ɔmɛ ngɛ sika náe wawɛɛ.
Akɛnɛ nihi a nine suɔ nɔ́ fɛɛ nɔ́ nɛ a suɔ kaa a maa le ɔ nɔ ngɛ be kpiti mi he je ɔ, a nɛ́ nɔ́ he je nɛ e sa kaa a hla blɔ tsɔɔmi kɛ je Baiblo ɔ nɛ a ngma maa pee jeha 2,000 ji nɛ ɔ mi. Anɛ enɛ ɔ tsɔɔ kaa susumi nɛ nihi nɛ a be bu kɛ ha Baiblo ɔ hɛɛ kaa ke o suɔ nɛ Baiblo ɔ nɛ tsɔɔ mo blɔ ɔ, lɛɛ e ngɛ kaa nɔ́ nɛ o kɛ blema jemi si kpami he womi aloo blema kɔmpiuta he womi ngɛ ní tsue ɔ da lo? Ngɛ anɔkuale mi ɔ, a susumi ɔ dɛ. Je mi si kpami, kɛ klamahi a he nile tsakeɔ mlamlaamla, se anɛ adesa hiami ní titli ɔmɛ tsake lo? Loloolo ɔ, nihi suɔ nɛ a le yi tomi he je nɛ a ngɛ wami mi kɛ bɔ nɛ a maa pee ha kɛ ná bua jɔmi, tue mi jɔmi, weku si himi kpakpa kɛ huɛ bɔmi kpakpa.
E ngɛ mi kaa Baiblo ɔ se kɛ mohu lɛɛ, se e tsuɔ hiami ní nɛ ɔmɛ kɛ ekpa komɛ a he ní. Jehanɛ se hu ɔ, Baiblo ɔ de ke Mawu mumi ɔ lɛ ha nɛ a ngma. E kɛ blɔ tsɔɔmi nɛ a he hia ngɛ si himi haa konɛ wa nyɛ nɛ waa da nyagbahi nɛ wa kɛ kpe ɔmɛ a nya. (2 Timoteo 3:16, 17) Jehanɛ se hu ɔ, ga womihi nɛ ngɛ mi ɔ se be, nɛ e ga womihi a be bi kɔkɔɔkɔ hulɔ. Baiblo ɔ nitsɛ de ke: “Mawu munyu ɔ hɛ ngɛ.”—Hebri Bi 4:12.
Anɛ níhi nɛ wa de ngɛ Baiblo ɔ he piɔ ɔ ngɛ mi niinɛ loo? Anɛ e be be, aloo e ji womi nɛ nɛ e hɛ ngɛ, nɛ ma nyɛ maa tsɔɔ wɔ blɔ kpakpa mwɔnɛ ɔ? Yi mi tomi he je nɛ a pee Hwɔɔmi Mɔ nɛ ɔ ji kaa e ye bua mo konɛ o ná sane bimi nɛ ɔmɛ a heto. Hwɔɔmi Mɔ kpahi nɛ maa ba hwɔɔ se ɔ hu ma tsu sane pɔtɛɛ komɛ a he ní.