Kaimi ɔ Haa Nɛ Mawu We Bi Peeɔ Kake

1, 2. Mɛni he nya buami nɛ ma ha nɛ Mawu we bi maa pee kake ngɛ jeha 2018 ɔ mi pe he nya buami kpahi tsuo, nɛ mɛni he je? (Moo hyɛ foni nɛ ngɛ ní kasemi ɔ sisije ɔ.)

NGƐ March 31, 2018 ɔ nɔ ɔ, Mawu we bi kɛ nihi babauu ma bua a he nya kɛ ha Nyɔmtsɛ ɔ Gbɔkuɛ Niye Ní nɛ a peeɔ daa jeha a. Ke pu nɔ si ɔ, nimli ayɔhi abɔ ma bua a he nya kɛ kai Kristo gbenɔ ɔ. Daa jeha a, he nya buami nɛ ɔ peeɔ Mawu we bi kake ngɛ zugba a nɔ pe he nya buami kpahi tsuo!

² Ke Yehowa kɛ Yesu na bɔ nɛ nimli ayɔhi abɔ ngɛ Kaimi ɔ sisi yae ha ngɛ je ɔ mi tsuo ɔ, a bua maa jɔ wawɛɛ. Baiblo ɔ gba kɛ fɔ si kaa ‘asafo kuu ngua ko nɛ adesa ko [be nyɛe maa] kane, nɛ a je je mahi tsuo kɛ wɛtsohi kɛ nihi kɛ gbihi a mi’ ɔ ma kpa ngmlaa ke: “Wa yi wami hemi ɔ ngɛ wa Mawu ɔ, nɔ nɛ e hii si ngɛ matsɛ sɛ ɔ nɔ ɔ, kɛ e Jijɔ Bi ɔ a dɛ mi.” (Kpoj. 7:9, 10) Hyɛ bɔ nɛ Kaimi ɔ sisi nɛ nimli babauu yaa daa jeha a woɔ Yehowa kɛ Yesu a hɛ mi nyami ha!

3. Mɛni sane bimihi a ma ha heto ngɛ munyu nɛ ɔ mi?

³ Wa maa na sane bimi nɛ nyɛɛ se ɔmɛ a heto ngɛ munyu nɛ ɔ mi. (1) Mɛni wa ti nɔ fɛɛ nɔ ma nyɛ maa pee kɛ dla e he konɛ e ná Kaimi ɔ he se? (2) Mɛni blɔ nɔ nɛ Kaimi ɔ haa nɛ Mawu we bi peeɔ kake? (3) Mɛni wa ti nɔ fɛɛ nɔ maa pee kɛ ye bua konɛ jamɛ a kake peemi ɔ nɛ ya nɔ? (4) Anɛ nyagbe Kaimi ko ngɛ nɛ wa maa yee lo? Ke jã a, lɛɛ mɛni be?

BƆ NƐ WA MA DLA WA HE HA KONƐ WA NÁ KAIMI Ɔ HE SE

4. Mɛni he je nɛ e he hia nɛ waa ya Kaimi ɔ?

⁴ Mo susu se nami nɛ ngɛ Kaimi ɔ nɛ wa maa ya a he. Mo kai kaa asafo mi kpehi nɛ wa yaa a piɛɛ jami nɛ wa jaa Mawu ɔ he. Atsinyɛ jemi ko be he kaa Yehowa kɛ Yesu tsuo toɔ nihi nɛ a bɔɔ mɔde kaa a maa ya kpe nɛ e he hia pe kpehi tsuo ngɛ jeha a mi ɔ he hɛ. Ngɛ anɔkuale mi ɔ, wa suɔ nɛ Yehowa kɛ Yesu nɛ a na kaa wa ya Kaimi ɔ, lɛɛ ja eko ɔ, wa be he wami gbagblaa, aloo nɔ́ ko be nɛ wa ma nyɛ maa pee ngɛ si fɔfɔɛ nɛ wa ngɛ mi ɔ he. Nihi nɛ Yehowa ma ha mɛ neneene wami ɔ, ‘e ngma a biɛ’ ngɛ wami womi ɔ mi. Ke wa ngɔ wa ní peepee kɛ tsɔɔ kaa Kristofohi a kpehi a he hia wɔ ɔ, Yehowa be wa biɛ gbɛe ngɛ “wami womi” ɔ mi.​—Mal. 3:16; Kpoj. 20:15.

5. Ke Kaimi ɔ ngɛ sue ɔ, mɛni wa ma nyɛ maa pee ‘kɛ ka wa he nɛ waa hyɛ kaa wa ngɛ hemi kɛ yemi ɔ mi’ lo?

⁵ Ke Kaimi ligbi ɔ ngɛ sue ɔ, wa ma nyɛ maa sɔle pe bɔ nɛ wa peeɔ daa a, nɛ́ wa susu huɛ bɔmi nɛ ngɛ waa kɛ Yehowa wa kpɛti ɔ he saminya. (Kane 2 Korinto Bi 13:5.) Mɛni blɔ nɔ wa maa gu kɛ pee jã? E sa nɛ ‘waa ka wa he nɛ waa hyɛ kaa wa ngɛ hemi kɛ yemi ɔ mi’ lo. Enɛ ɔ biɔ nɛ wa bi wa he ke: ‘Anɛ i heɔ yeɔ niinɛ kaa i piɛɛ asafo kake pɛ nɛ Yehowa kplɛɛ nɔ, nɛ e kɛ ngɛ ní tsue konɛ e yi mi tomi ɔ nɛ ba mi ɔ he lo? Anɛ i ngɛ Matsɛ Yemi ɔ he sane kpakpa a fiɛɛe saminya lo? Anɛ ye ní peepee tsɔɔ kaa i heɔ yeɔ kaa wa ngɛ nyagbe ligbi ɔmɛ a mi, nɛ e be kɛe nɛ Satan nɔ yemi ɔ maa ba nyagbe lo? Hemi kɛ yemi nɛ i ná ngɛ Yehowa kɛ Yesu mi benɛ i jɔɔ ye wami nɔ kɛ ha Yehowa Mawu ɔ, anɛ jamɛ a hemi kɛ yemi ɔ nɔuu nɛ i ngɛ amlɔ nɛ ɔ lo?’ (Mat. 24:14; 2 Tim. 3:1; Heb. 3:14) Sane bimi nɛ ɔmɛ a heto nɛ wa ma ha a maa ye bua wɔ, nɛ wa maa na nimli nɛ wɔ nitsɛmɛ wa ji.

6. (a) Mɛni ji blɔ kake pɛ nɛ wa ma nyɛ maa gu nɔ kɛ ná neneene wami? (b) Mɛni asafo mi nɔkɔtɔma ko peeɔ kɛ dlaa e he kɛ haa Kaimi ɔ yemi daa jeha, nɛ mɛni blɔ nɔ mo hu o maa gu kɛ pee nɔ́ ko kaa jã?

⁶ Moo kane ngmamihi kɛ munyu kpahi nɛ kɔɔ bɔ nɛ Kaimi ɔ he hia ha a he konɛ o susu he. (Kane Yohane 3:16; 17:3.) E sa nɛ ‘o hi Yehowa lee,’ nɛ o ‘ya nɔ nɛ o ná hemi kɛ yemi’ ngɛ Yesu, nɛ ji e Bi kake too ɔ mi. Enɛ ɔ pɛ ji blɔ nɛ o ma nyɛ maa gu nɔ kɛ ná neneene wami. Bɔ nɛ pee nɛ wa dla wa he kɛ ha Kaimi ɔ, e he maa hia nɛ waa to ní kasemi he blɔ nya konɛ e ye bua wɔ nɛ waa hɛ kɛ su Yehowa kɛ Yesu he. Nɔ́ nɛ nyɛminyumu ko nɛ e kɛ jehahi babauu ngɛ sɔmɔe kaa asafo mi nɔkɔtɔma a peeɔ ji nɛ ɔ nɛ. E kɛ jehahi babauu bua Hwɔɔmi Mɔ komɛ a nya. Hwɔɔmi Mɔ nɛ ɔmɛ tuɔ Kaimi ɔ kɛ suɔmi nɛ Yehowa kɛ Yesu je kpo kɛ tsɔɔ wɔ ɔ he munyu. E kaneɔ munyu nɛ ɔmɛ nɛ e susuɔ a he otsi komɛ loko e suɔ Kaimi ligbi ɔ, nɛ e pueɔ e yi mi tɛ ngɛ nɔ́ he je nɛ wa yeɔ Kaimi ɔ he. Ke e ngɛ mi hluu ɔ, e kɛ Hwɔɔmi Mɔ ehehi nɛ a tu Kaimi ɔ he munyu ɔ piɛɛɔ nɔ́ nɛ e ngɛ momo ɔ he. Jehanɛ se hu ɔ, e kaneɔ Kaimi ɔ he Baiblo kanemi ɔ nɛ e susuɔ he. Enɛ ɔ yeɔ bua lɛ nɛ e kaseɔ ní hehi daa jeha. Enɛ ɔ ha nɛ e nuɔ he kaa suɔmi nɛ e ngɛ ha Yehowa kɛ Yesu ɔ mi ngɛ wae daa jeha. Ke o bɔ mɔde nɛ o to ní kasemi kaa jã he blɔ nya a, lɔ ɔ ma nyɛ maa ye bua mo konɛ suɔmi nɛ o ngɛ ha Yehowa kɛ Yesu ɔ mi nɛ wa, konɛ o ná Kaimi ɔ he se.

KAIMI Ɔ YEƆ BUA WƆ NƐ WA PEEƆ KAKE

7. (a) Mɛni Yesu sɔle kɛ bi benɛ a ye kekleekle Nyɔmtsɛ ɔ Gbɔkuɛ Niye Ní ɔ? (b) Mɛni tsɔɔ kaa Yehowa ha Yesu sɔlemi ɔ heto?

⁷ Ligbi nɛ Yesu kɛ e kaseli ɔmɛ ye kekleekle Nyɔmtsɛ ɔ Gbɔkuɛ Niye Ní ɔ, Yesu sɔle jamɛ a nyɔ ɔ mi kaa e kaseli ɔmɛ nɛ a pee kake kaa bɔ nɛ e kɛ e Tsɛ ɔ pee kake ɔ nɔuu. (Kane Yohane 17:20, 21.) Yehowa ha e Bi ɔ sɔlemi ɔ heto, nɛ mwɔnɛ ɔ, nimli ayɔhi abɔ ba he ye kaa Yehowa lɛ tsɔ e Bi nɛ e suɔ lɛ ɔ. Atsinyɛ jemi ko be he kaa Kaimi ɔ ha nɛ kake peemi ngɛ Yehowa Odasefohi a kpɛti. Kaimi ɔ ngɛ slɔɔto ngɛ kpehi tsuo nɛ Mawu we bi peeɔ ɔ he. Nimli nɛ a je ma slɔɔtohi a nɔ nɛ a tuɔ gbi ekpaekpa kpeɔ ngɛ he slɔɔtohi ngɛ je ɔ mi tsuo. Ngɛ he komɛ ɔ, ke nihi nɛ a je ma kpahi a nɔ bua a he nya jã a, e peeɔ nihi nyakpɛ, nɛ ni komɛ hu tuɔ he munyu yaya. Se Yehowa kɛ Yesu a bua jɔ kake peemi nɛ ɔ he wawɛɛ!

8. Mɛni sɛ gbi Yehowa kɛ ha Ezekiel nɛ kɔɔ kake peemi he?

⁸ Yehowa gba kɛ fɔ si kaa e we bi maa pee kake. Enɛ ɔ he ɔ, e pee we wɔ nyakpɛ kaa kake peemi ngɛ wa kpɛti. Ha nɛ wa susu gbami ko nɛ Yehowa ha nɛ gbalɔ Ezekiel gba a he nɛ waa hyɛ. E gba kɛ fɔ si kaa a ma bla tso enyɔ nɛ kake daa si ‘kɛ ha Yuda’ nɛ kake hu daa si ‘kɛ ha Yosɛf’ ɔ. (Kane Ezekiel 37:15-17.) “Sane Bimihi Nɛ Je Ní Kaneli A Ngɔ” nɛ a ngma ngɛ July 2016 Hwɔɔmi Mɔ ɔ mi ɔ tsɔɔ nya ke: “Yehowa ha Ezekiel sɛ gbi ko nɛ haa nɔ hɛ nɔ kami. Yehowa wo si kaa ke Israel ma a kpale kɛ ya Si Womi Zugba a nɔ ɔ, e ma ha nɛ a pee kake ekohu. Jamɛ a sɛ gbi ɔ hu tsɔɔ kaa ngɛ nyagbe ligbi ɔmɛ a mi ɔ, Mawu we bi maa pee kake.”

9. Ngɛ mɛni blɔ nɔ nɛ Kaimi ɔ nɛ wa yaa daa jeha a haa nɛ Ezekiel gbami ɔ baa mi?

⁹ Kɛ je jeha 1919 kɛ ma a, Yehowa bɔni nihi nɛ a pɔ mɛ nu ɔ dlami bɔɔbɔɔbɔɔ, nɛ e ha nɛ a pee kake ekohu. Nihi nɛ a pɔ mɛ nu ɔ ngɛ kaa tso nɛ daa si ‘kɛ ha Yuda’ a. Nihi babauu nɛ a ngɛ hɛ nɔ kami kaa a maa hi zugba a nɔ ɔ ngɛ kaa tso nɛ daa si ‘kɛ ha Yosɛf’ ɔ. Benɛ mɛ hu a ba piɛɛ nihi nɛ a pɔ mɛ nu ɔ he ɔ, kuu enyɔ ɔmɛ tsuo ba pee “to kuu kake.” (Yoh. 10:16; Zak. 8:23) Yehowa wo si kaa e ma bla tso enyɔ nɛ ɔmɛ nɛ a maa pee tso kake ngɛ e dɛ mi. (Eze. 37:19) Amlɔ nɛ ɔ, kuu enyɔ nɛ ɔmɛ pee kake kɛ ngɛ Mawu jae ngɛ Matsɛ Yesu Kristo nɛ a wo e hɛ mi nyami, nɛ gbali ɔmɛ tu e he munyu kaa lɛ ji Mawu “tsɔlɔ David” ɔ blɔ tsɔɔmi sisi. (Eze. 37:24, 25) Daa jeha a, ke nihi nɛ a pɔ mɛ nu ɔ kɛ ‘jijɔ kpa amɛ’ bua a he nya ngɛ Kristo Gbenɔ Kaimi ɔ sisi ɔ, wa naa kake peemi nɛ ngɛ fɛu nɛ Ezekiel tu he munyu ɔ! Mɛni wa ti nɔ fɛɛ nɔ ma nyɛ maa pee kɛ ye bua konɛ kake peemi nɛ ɔ nɛ hi wa kpɛti?

NÍHI NƐ O MA NYƐ MAA PEE KONƐ KAKE PEEMI NƐ HI WA KPƐTI

10. Mɛni wa ma nyɛ maa pee kɛ ye bua konɛ kake peemi nɛ ngɛ Mawu we bi a kpɛti ɔ nɛ hi si daa?

¹⁰ Nɔ́ kake nɛ wa ma nyɛ maa pee kɛ ye bua konɛ kake peemi nɛ hi Mawu we bi a kpɛti ji kaa wa maa kase he si bami. Benɛ Yesu ngɛ zugba a nɔ ɔ, e tsɔɔ e kaseli ɔmɛ kaa a ba a he si. (Mat. 23:12) Ke wa ngɛ he si bami ɔ, wa be suɔe kaa wa maa kase he nɔ womi su nɛ nihi jeɔ kpo ngɛ je ɔ mi ɔ. Mohu ɔ, he si bami maa ye bua wɔ konɛ waa bu nihi nɛ a ngɛ wa hɛ mi nyɛɛe ngɛ asafo ɔ mi ɔ tue. Jã nɛ wa maa pee ɔ ma ha nɛ kake peemi maa hi asafo ɔ mi. Nɔ́ nɛ pe kulaa a, wa he si nɛ wa maa ba a ma ha nɛ Mawu bua maa jɔ wa he, ejakaa e “teɔ si kɛ woɔ he nɔ woli, se he si bali lɛɛ, e dlooɔ mɛ.”​—1 Pet. 5:5.

11. Ngɛ mɛni blɔ nɔ nɛ abolo ɔ kɛ wai ɔ he nɛ wa ma susu ɔ maa ye bua wɔ konɛ kake peemi nɛ hi Mawu we bi a kpɛti?

¹¹ Mɛni ji blɔ enyɔne nɛ wa maa gu nɔ kɛ ye bua konɛ kake peemi nɛ hi Mawu we bi a kpɛti? E sa nɛ wa susu nɔ́ nɛ abolo ɔ kɛ wai ɔ daa si ha a he saminya. E he hia nɛ waa pee enɛ ɔ loko Kaimi ɔ nɛ su, nɛ jamɛ a gbɔkuɛ ɔ nɛ a maa ye Kaimi ɔ ji be nɛ e sa kaa waa pee jã titli. (1 Kor. 11:23-25) Abolo ɔ daa si kɛ ha Yesu nɔmlɔ tso nɛ yayami ko be he ɔ, nɛ wai ɔ hu daa si kɛ ha e muɔ nɛ pue si ɔ. Se nɔ́ nɛ abolo ɔ kɛ wai ɔ daa si ha nɛ wa maa le ɔ pɛ pi. E he hia nɛ wa kai kaa Kristo kpɔmi afɔle sami ɔ haa nɛ wa naa bɔ nɛ Yehowa kɛ Yesu tsuo suɔ wɔ ha. Yehowa ngɔ e Bi ɔ kɛ ha ngɛ wa he, nɛ Yesu hu je e tsui mi nɛ e ngɔ e wami kɛ sã afɔle ngɛ wa he je. Suɔmi ko be nɛ pe enɛ ɔmɛ. Ke wa susu bɔ nɛ a suɔ wɔ ha a he ɔ, lɔ ɔ maa wo wɔ he wami nɛ wɔ hu wa maa suɔ mɛ wawɛɛ. Suɔmi nɛ waa kɛ wa nyɛmimɛ ɔmɛ ngɛ kɛ ha Yehowa a ngɛ kaa kpã nɛ e fĩ wɔ kɛ bla, nɛ enɛ ɔ haa nɛ wa peeɔ kake.

12. Ngɛ Yesu nɔ́ he tomi nɔ́ nɛ kɔɔ matsɛ ɔ kɛ e tsɔli ɔmɛ a he ɔ mi ɔ, mɛni Yesu de nɛ tsɔɔ kaa Yehowa suɔ nɛ waa ngɔ nihi a tɔmihi kɛ pa mɛ?

¹² Mɛni ji blɔ etɛne nɛ wa maa gu nɔ kɛ ye bua konɛ kake peemi nɛ hi Mawu we bi a kpɛti? E sa nɛ waa ngɔ nihi a tɔmihi kɛ pa mɛ kulaa. Ke wa ngɔ nihi a tɔmihi kɛ pa mɛ ɔ, lɔ ɔ tsɔɔ kaa wa bua jɔ Kristo kpɔmi afɔle sami ɔ nɛ Mawu da nɔ kɛ ngɔ wa yayami ɔmɛ kɛ pa wɔ ɔ he saminya. Ha nɛ wa susu Yesu nɔ́ he tomi nɔ́ ko nɛ ngɛ Mateo 18:23-34 ɔ he nɛ waa hyɛ. Mo bi o he ke: ‘Anɛ ye bua jɔ he kaa i kɛ nɔ́ nɛ Yesu tsɔɔ ɔ ma tsu ní lo? Anɛ i toɔ ye tsui si kɛ haa ye nyɛmimɛ Kristofohi, nɛ i nuɔ mɛ sisi lo? Anɛ i pee klaalo kaa ke nihi tɔ̃ ye nɔ ɔ, i kɛ a tɔmi ɔ maa pa mɛ lo?’ E ji anɔkuale kaa tɔmi komɛ a mi jiɔ pe ekomɛ, nɛ akɛnɛ adesahi yi mluku he je ɔ, e he waa kɛ ha mɛ kaa a kɛ tɔmi komɛ maa pa. Se nɔ́ he tomi nɔ́ nɛ ɔ tsɔɔ wɔ nɔ́ nɛ Yehowa suɔ kaa waa pee. (Kane Mateo 18:35.) Yesu tsɔɔ kaa ke wa nyɛmi ko nɛ e tɔ̃ wa nɔ ɔ pia e he, nɛ wa ngɔɛ wa nyɛmi ɔ tɔmi kɛ pɛ lɛ ɔ, Yehowa hu kɛ wa tɔmi ɔmɛ be wɔ pae. Enɛ ɔ ji nɔ́ ko nɛ e sa nɛ wa susu he saminya. Ke wa ngɔ nihi a tɔmihi kɛ pa mɛ kaa bɔ nɛ Yesu tsɔɔ wɔ kaa waa pee ɔ, lɔ ɔ ma ha nɛ kake peemi nɛ e se be nɛ e ngɛ asafo ɔ mi ɔ maa hi si.

13. Ke wa di tue mi jɔmi se ɔ, ngɛ mɛni blɔ nɔ nɛ lɔ ɔ ma ha nɛ kake peemi maa hi asafo ɔ mi?

¹³ Ke wa ngɔ nihi a tɔmihi kɛ pa mɛ ɔ, lɔ ɔ tsɔɔ kaa wa suɔ tue mi jɔmi. Bɔfo Paulo wo wɔ ga ke waa ‘bɔ mɔde wawɛɛ nɛ waa hɛɛ mumi ɔ kake peemi ɔ mi ngɛ tue mi jɔmi nɛ fĩɔ wɔ kɛ peeɔ kake ɔ mi.’ (Efe. 4:3) Ngɛ Kaimi be ɔ mi ɔ, e sa nɛ o susu bɔ nɛ o kɛ ni kpahi nyɛ kpɛti ngɛ ha a he, titli ɔ, gbɔkuɛ ɔ nɛ a maa ye Kaimi ɔ. Mo bi o he ke: ‘Anɛ i ji nɔ ko nɛ a le mi kaa e kɛ nihi a tɔmihi wui e mi lo? Anɛ nihi le mi kaa nɔ ko nɛ e bɔɔ mɔde kaa e ma hla kake peemi kɛ tue mi jɔmi lo?’ Enɛ ɔmɛ ji sane bimihi nɛ a he hia nɛ e sa kaa wa susu he ngɛ Kaimi be ɔ mi.

14. Mɛni blɔ nɔ wa maa gu kɛ tsɔɔ kaa ‘wa náa wa sibi a he tsui ngɛ suɔmi mi’?

¹⁴ Mɛni ji blɔ eywiɛne nɛ wa maa gu nɔ kɛ ye bua konɛ kake peemi nɛ hi Mawu we bi a kpɛti? E sa nɛ wa je suɔmi kpo kɛ tsɔɔ nihi kaa bɔ nɛ Yehowa, wa Mawu nɛ ngɛ suɔmi ɔ peeɔ ɔ. (1 Yoh. 4:8) E sɛ nɛ wa de ngɛ wa nyɛmimɛ ɔmɛ a he ke, “I le kaa e sa nɛ ma suɔ mɛ, se pi doo kaa i kɛ mɛ nɛ bɔ huɛ”! Ke wa de jã a, lɔ ɔ tsɔɔ kaa wa bui Paulo ga womi ɔ tue. E de ke: “Nyɛ ná nyɛ sibi a he tsui ngɛ suɔmi mi.” (Efe. 4:2) Mo kadi kaa e de we ke, ‘wa ná wa sibi a he tsui’ kɛkɛ, mohu ɔ, e tsɔɔ kaa e sa nɛ waa pee jã “ngɛ suɔmi mi.” Slɔɔto ngɛ munyu enyɔ nɛ ɔmɛ a kpɛti. Yehowa lɛ gbla nimli slɔɔtoslɔɔto ɔmɛ kɛ ba asafo ɔ mi. (Yoh. 6:44) Ke Yehowa suɔ nɔ ko, nɛ e gbla lɛ kɛ ba e ngɔ ɔ, lɛɛ e sa nɛ wa bi wa he ke, ‘Mɛnɔ ji mi nɛ ma de ke e sɛ nɛ ma suɔ lɛ?’ E sa nɛ waa suɔ wa nyɛmimɛ ɔmɛ tsuo kaa bɔ nɛ Yehowa suɔ nɛ waa pee ɔ!​—1 Yoh. 4:20, 21.

MƐNI BE WA MAA YE NYAGBE KAIMI Ɔ?

15. Kɛ wa plɛ kɛ le kaa wa maa ye nyagbe Kaimi ko ha kɛɛ?

¹⁵ Ligbi ko maa ba nɛ Kaimi nɛ wa maa ye ɔ maa pee nyagbe nɔ́. Kɛ wa plɛ kɛ le kɛɛ? Kekleekle womi nɛ Paulo ngma kɛ ya ha Kristofohi nɛ a pɔ mɛ nu nɛ a ngɛ Korinto asafo ɔ mi ɔ tsɔɔ kaa ke a kai Yesu gbenɔ ɔ daa jeha a, lɔ ɔ tsɔɔ kaa a ngɛ “Nyɔmtsɛ ɔ gbenɔ ɔ jajee kɛ yaa si be nɛ e maa ba.” (1 Kor. 11:26) Munyu nɛ ji “ba” a nɔuu nɛ Yesu tu he munyu ngɛ e gbami nɛ kɔɔ nyagbe be ɔ he ɔ nɛ. Benɛ Yesu ngɛ amanehlu ngua nɛ ma ngɛ wa hɛ mi ɔ he munyu tue ɔ, e de ke: “Nɔmlɔ Bi ɔ he okadi ɔ maa je kpo ngɛ hiɔwe, nɛ wɛtsohi nɛ ngɛ zugba a nɔ tsuo ma fo ya boboobo, nɛ a maa na nɔmlɔ Bi ɔ nɛ e ma ngɛ bɔku ɔmɛ a mi kɛ he wami kɛ hɛ mi nyami babauu. Nɛ [Yesu] maa tsɔ e bɔfo ɔmɛ kɛ titimati pɛmi nɛ nya wa, nɛ a ma bua nihi nɛ e hla amɛ a nya kɛ je kɔɔhiɔ eywiɛ ɔmɛ a mi, kɛ maa je hiɔwe nyagbe he kake kɛ yaa su nyagbe he kpa.” (Mat. 24:29-31) ‘Nihi nɛ a hla amɛ a nya buami ɔ’ tsɔɔ be nɛ nihi nɛ a pɔ mɛ nu nɛ a ngɛ zugba a nɔ jamɛ a be ɔ mi ɔ maa ya hiɔwe. Amanehlu ngua a maa je sisi loko enɛ ɔ maa ba, se kɛ̃ ɔ, e maa ba loko Hamagedɔn ta a maa je sisi. Kɛkɛ ɔ, nimli 144,000 ɔmɛ tsuo maa piɛɛ Yesu he kɛ kpata matsɛmɛ nɛ a ngɛ zugba a nɔ tsuo a hɛ mi. (Kpoj. 17:12-14) Nyagbe Kaimi nɛ wa maa ye loko a ma bua nihi nɛ a pɔ nu ɔmɛ a nya kɛ ya hiɔwe ɔ maa pee nyagbe nɔ́, ejakaa jamɛ a be ɔ mi ɔ, kɛkɛ Yesu “ba” momo.

16. Mɛni he je nɛ o fia o pɛɛ si kaa o maa ya jeha nɛ ɔ Kaimi ɔ?

¹⁶ Nyɛ ha nɛ waa bɔ mɔde nɛ waa ya Kaimi ɔ ngɛ March 31, 2018 konɛ wa ná he se. Jehanɛ hu ɔ, e sa nɛ waa sɔle kɛ bi Yehowa yemi kɛ buami, nɛ waa pee wa blɔ fa mi nɔ́ konɛ kake peemi nɛ ngɛ Mawu we bi a kpɛti ɔ nɛ hi si daa! (Kane La 133:1.) Mo kai kaa be ko maa ba nɛ wa maa ye Kaimi ɔ nyagbe nɔ́. Se loko jamɛ a be ɔ maa ba a, nyɛ ha nɛ waa pee nɔ́ fɛɛ nɔ́ nɛ wa ma nyɛ konɛ waa ya Kaimi ɔ, nɛ wa ha nɛ kake peemi nɛ ngɛ fɛu nɛ wa naa ngɛ Kaimi ɔ sisi ɔ he nɛ hia wɔ wawɛɛ.