Hemi Kɛ Yemi—Su Nɛ Woɔ Nɔ He Wami
HEMI KƐ YEMI woɔ wɔ he wami wawɛɛ. Kaa nɔ hyɛmi nɔ́ ɔ, e ngɛ mi kaa Satan ngɛ hlae nɛ e puɛ huɛ bɔmi nɛ ngɛ waa kɛ Yehowa wa kpɛti ɔ mohu lɛɛ, se hemi kɛ yemi haa nɛ wa ‘gbeɔ nɔ yayami ɔ kɛ̃ɛ̃ mi bihi nɛ a ngɛ tsoe ɔ tsuo.’ (Efe. 6:16) Ke wa ngɛ hemi kɛ yemi ɔ, wa ma nyɛ maa da nyagbahi nɛ a kle kaa yokuhi a nya. Yesu de e kaseli ɔmɛ ke: “Ke nyɛ hemi kɛ yemi ɔ klemi ngɛ kaa sinapi wu ɔ, nyɛ ma de yoku nɛ ɔ ke, ‘Hiaa kɛ je hiɛ ɔ kɛ ya hiɛ ɔ,’ nɛ e maa hia.” (Mat. 17:20) Akɛnɛ hemi kɛ yemi ma nyɛ ma ha nɛ huɛ bɔmi nɛ ngɛ waa kɛ Yehowa kpɛti ɔ mi nɛ wa he je ɔ, e he hia nɛ wa bi wa he sane nɛ ɔmɛ: Mɛni ji hemi kɛ yemi? Kɛ bɔ nɛ wa tsui ngɛ ha a ma nyɛ maa sa wa hemi kɛ yemi ɔ he ha kɛɛ? Mɛni wa ma nyɛ maa pee konɛ wa hemi kɛ yemi ɔ mi nɛ wa? Mɛnɔ mi nɛ e sa nɛ wa ná hemi kɛ yemi ngɛ?—Rom. 4:3.
MƐNI JI HEMI KƐ YEMI?
Hemi kɛ yemi biɔ babauu pe nɛ wa ma he ye, aloo wa maa kplɛɛ nɔ kɛkɛ kaa níhi nɛ Baiblo ɔ de ɔ ji anɔkuale, ejakaa “daimonio ɔmɛ hu heɔ yeɔ [kaa Mawu ngɛ], nɛ a he doɔ blibliibli.” (Yak. 2:19) Lɛɛ mɛni ji hemi kɛ yemi mɔ?
Kaa bɔ nɛ wa ngɛ nɔ mi mami kaa je maa jɔ nɛ je maa na daa ligbi ɔ, wa ngɛ nɔ mi mami kaa nɔ́ fɛɛ nɔ́ nɛ Mawu de ɔ maa ba mi
Baiblo ɔ tsɔɔ hemi kɛ yemi sisi ngɛ blɔ enyɔ nɔ. Kekleekle ɔ, “hemi kɛ yemi ji nɔ́ nɛ a ngɔ hɛ kɛ fɔ nɔ nɛ a ngɛ blɔ hyɛe ɔ nɔ mi mami.” (Heb. 11:1a) Ke nɔ ko ngɛ hemi kɛ yemi ɔ, e ma ná nɔ mi mami kaa Yehowa munyuhi tsuo ji anɔkuale, nɛ a maa ba mi. Kaa nɔ hyɛmi nɔ́ ɔ, Yehowa de Israel bi ɔmɛ ke: ‘I kɛ piani kɛ nyɔ so somi, nɛ enɛ ɔ he je ɔ, piani kɛ nyɔ baa ngɛ a be mi pɛpɛɛpɛ daa ligbi. I kɛ ye tsɔlɔ David so somi kaa e nina maa ye matsɛ daa. Kikɛmɛ a somi nɛ ɔmɛ ɔ, nɔ ko nɔ ko be nyɛe maa po a mi.’ (Yer. 33:20, 21) Anɛ e ba o juɛmi mi hyɛ kaa be maa su nɛ pu ɔ be si tee konɛ je nɛ na, aloo pu ɔ be si nɔe konɛ je nɛ jɔ lo? Ke o yi mi pee we mo enyɔɔnyɔ hyɛ ngɛ mlaa nɛ kudɔɔ je ɔ nɛ haa nɛ je naa nɛ je jɔɔ, aloo mlaa nɛ haa nɛ zugba a bɔleɔ pu ɔ he ɔ, lɛɛ ke nɔ nɛ e wo mlaa nɛ ɔmɛ ɔ wo si ko ɔ, anɛ e sa nɛ o yi mi nɛ pee mo enyɔɔnyɔ ngɛ he lo? Dɛbi kulaa!—Yes. 55:10, 11; Mat. 5:18.
Nɔ́ nɛ ji enyɔ ɔ, hemi kɛ yemi ji “níhi nɛ a ngɛ nitsɛnitsɛ nɛ a nɛ ɔmɛ a he odase nɛ ngɛ heii.” Hemi kɛ yemi ji “odase nɛ ngɛ heii” loo “odase nɛ plɛɔ nɔ yi mi” nɛ tsɔɔ kaa nɔ́ ko ngɛ nitsɛnitsɛ, e ngɛ mi kaa wa nɛ nɔ́ ɔ mohu lɛɛ. (Heb. 11:1b; sisi ningma) Kɛ wa ngɛ tsɔɔe kɛɛ? Ngɔɔ lɛ kaa jokuɛ ko bi mo ke, ‘Kɛ o plɛ kɛ le kaa kɔɔhiɔ ngɛ kɛɛ?’ O nɛ kɔɔhiɔ hyɛ, se o ma nyɛ maa ngɔ odasehi nɛ tsɔɔ kaa kɔɔhiɔ ngɛ ɔ kɛ ye bua jokuɛ ɔ. Kaa nɔ hyɛmi nɔ́ ɔ, wa muɔ kɔɔhiɔ, nɛ ke kɔɔhiɔ ngɛ fiae hu wa naa kaa tsohi mimiɛɛɔ. Ke jokuɛ ɔ ba he ye kaa ní nɛ ɔmɛ ngɛ nitsɛnitsɛ ɔ, lɔ ɔ ma ha nɛ e nu sisi kaa ní komɛ ngɛ nɛ wa nɛ́, se wa heɔ yeɔ kaa a ngɛ. Jã kɛ̃ nɛ odase nɛ nɔ ko ngɛ ngɛ nɔ́ ko he ɔ ma ha nɛ e ná hemi kɛ yemi.—Rom. 1:20.
TSUI KPAKPA HE HIA
Nɔ́ ko he odase nɛ nɔ ko maa na a lɛ ma ha nɛ e ná hemi kɛ yemi. Enɛ ɔ he ɔ, loko nɔ ko ma ná hemi kɛ yemi ɔ, ja e ná “anɔkuale ɔ he nile nitsɛnitsɛ ɔ” kekle. (1 Tim. 2:4) Se nile nɛ nɔ ko ma ná kɛkɛ pi. Bɔfo Paulo ngma ke: “Tsui nɛ nɔ kɛ heɔ yeɔ.” (Rom. 10:10) E sa nɛ waa na kaa se nami ngɛ anɔkuale ɔ he, se pi nɛ wa ma he ye kɛkɛ. Ke wa na se nami nɛ ngɛ anɔkuale ɔ he ɔ, lɔ ɔ maa wo wɔ he wami konɛ waa pee Mawu suɔmi nya ní kɛ tsɔɔ kaa wa ngɛ hemi kɛ yemi. (Yak. 2:20) Ke nɔ ko be hɛ sa kɛ ha anɔkuale ɔ, nɛ e ngmɛɛ we e hemi kɛ yemi momo ɔ he, aloo e peeɔ e tsui nya ní ɔ, lɔ ɔ ma nyɛ ma ha nɛ e ma e hɛ ngɔ fɔ odasehi nɛ a ngɛ heii ɔ po a nɔ. (2 Pet. 3:3, 4; Jud 18) Enɛ ɔ he je nɛ blema a, tsa pi nihi tsuo nɛ a na nyakpɛ níhi nɛ ya nɔ ɔ nɛ a ná hemi kɛ yemi ɔ nɛ. (4 Mose 14:11; Yoh. 12:37) Nihi nɛ a suɔ anɔkuale ɔ pɛ nɛ Mawu mumi klɔuklɔu ɔ haa nɛ a náa hemi kɛ yemi.—Gal. 5:22; 2 Tɛs. 2:10, 11.
NƆ́ NƐ HA NƐ DAVID NÁ HEMI KƐ YEMI NƐ MI WA
Nihi nɛ a ná hemi kɛ yemi nɛ mi wa a, a ti nɔ kake ji Matsɛ David. (Heb. 11:32, 33) Se tsa pi David weku li tsuo nɛ a ná hemi kɛ yemi nɛ mi wa. Kaa nɔ hyɛmi nɔ́ ɔ, mo susu David wetsɛ nɔkɔtɔma Eliab he nɛ o hyɛ. Benɛ Goliat ngɛ Israel bi ɔmɛ ahlua bɔe ɔ, e gba David nya, se Eliab lɛɛ, e kã David hɛ mi. Jã nɛ Eliab pee ɔ tsɔɔ kaa e be hemi kɛ yemi ngɛ Yehowa mi. (1 Sam. 17:26-28) A kɛ hemi kɛ yemi fɔ we nɔ ko, nɛ nɔ ko hu be nyɛe ma ná hemi kɛ yemi akɛnɛ e fɔli ngɛ eko ɔ he je. Enɛ ɔ he ɔ, huɛ bɔmi nɛ ngɛ David kɛ Yehowa kpɛti ɔ nɛ ha nɛ e ná hemi kɛ yemi ɔ nɛ.
Ngɛ La 27 ɔ, David tsɔɔ nɔ́ nɛ ha nɛ e ná hemi kɛ yemi nɛ mi wa. (Kk. 1) David pue e yi mi tɛ ngɛ níhi nɛ Yehowa pee ha lɛ, kɛ bɔ nɛ e kɛ e he nyɛli ɔmɛ ye ha a he. (Kk. 2, 3) E bua jɔ blɔ nya nɛ Yehowa to nɛ a kɛ ja lɛ ɔ he wawɛɛ. (Kk. 4) David piɛɛ e nyɛmimɛ Israel bi ɔmɛ a he kɛ ja Mawu ngɛ e bo tsu ɔ mi. (Kk. 6) E je e tsui mi tsuo nɛ e sɔle kɛ ha Yehowa. (Kk. 7, 8) Jehanɛ hu ɔ, David suɔ nɛ Yehowa nɛ e tsɔɔ lɛ nɔ́ nɛ e ngɛ hlae nɛ e pee. (Kk. 11) David na kaa hemi kɛ yemi he hia wawɛɛ, enɛ ɔ he ɔ, e de ke, ‘I heɔ yeɔ kaa ma hi je mi kɛ yaa si ma na Yehowa mi mi himi ɔ ngɛ wami nɛ ɔ mi.’ Enɛ ɔ tsɔɔ kaa David ngɛ hemi kɛ yemi nɛ mi wa.—Kk. 13.
NƆ́ NƐ O MAA PEE KONƐ O HEMI KƐ YEMI Ɔ MI NƐ WA
O ma nyɛ ma ná hemi kɛ yemi kaa David ke mo hu o ná e juɛmi ɔ kɛ e suhi nɛ a wo ta ngɛ La 27 ɔ eko. Akɛnɛ anɔkuale nile nɛ haa nɛ nɔ náa hemi kɛ yemi he je ɔ, ke o kaseɔ Baiblo ɔ kɛ Baiblo kasemi womihi ɔ, lɔ ɔ maa ye bua mo nɛ o maa wo Mawu mumi ɔ yiblii nɛ ɔ. (La 1:2, 3) Ke o ngɛ ní kasee ɔ, mo he be kɛ pue o yi mi tɛ. Ke o pee jã a, lɔ ɔ ma ha nɛ o je hɛ sa kpo ngɛ níhi nɛ Yehowa pee ha mo ɔ he. Ke wa hɛ saa níhi nɛ Yehowa peeɔ ha wɔ ɔ wawɛɛ ɔ, wa maa suɔ nɛ wa je wa hemi kɛ yemi ɔ kpo. Nɛ lɔ ɔ ma ha nɛ waa ya asafo mi kpehi, nɛ wa maa jaje wa hemi kɛ yemi ɔ kɛ tsɔɔ ni kpahi be fɛɛ be. (Heb. 10:23-25) Jehanɛ hu ɔ, ke wa ‘sɔleɔ be fɛɛ be nɛ wa kpa we ɔ,’ lɔ ɔ tsɔɔ kaa wa ngɛ hemi kɛ yemi. (Luka 18:1-8) Enɛ ɔ he ɔ, e sa nɛ waa “sɔle be fɛɛ be” kɛ ha Yehowa, nɛ́ wa ná nɔ mi mami kaa ‘e susuɔ wa he.’ (1 Tɛs. 5:17; 1 Pet. 5:7) Hemi kɛ yemi woɔ wɔ he wami nɛ wa tsuɔ nɔ́ ko he ní, nɛ ke wa tsu nɔ́ ɔ he ní ɔ, e haa nɛ wa hemi kɛ yemi ɔ mi waa.—Yak. 2:22.
MO NÁ HEMI KƐ YEMI NGƐ YESU MI
Gbɔkuɛ nɛ e nɔ jena Yesu ma gbo ɔ, Yesu de e kaseli ɔmɛ ke: “Nyɛ he Mawu nɛ nyɛɛ ye; nyɛ he imi hu nɛ nyɛɛ ye.” (Yoh. 14:1) Enɛ ɔ he ɔ, e he hia nɛ wa ná hemi kɛ yemi ngɛ Yehowa kɛ Yesu tsuo a mi. Kɛ o ma plɛ kɛ ná hemi kɛ yemi ngɛ Yesu mi ha kɛɛ? Nyɛ ha nɛ wa susu blɔ etɛ komɛ nɛ wa ma nyɛ maa gu nɔ kɛ pee jã a he nɛ waa hyɛ.
Mɛni nɛ hemi kɛ yemi nɛ wa ma ná ngɛ Yesu mi ɔ tsɔɔ
Kekleekle ɔ, moo na kpɔmi nɔ́ ɔ kaa nike ní nɛ Yehowa kɛ ha mo. Bɔfo Paulo de ke: “I ngɛ wami ɔ mi kɛ gu hemi kɛ yemi nɛ i ngɛ ngɛ Mawu Bi ɔ mi ɔ nɔ, nɔ nɛ e suɔ mi nɛ e ngɔ e he kɛ ha ngɛ ye he ɔ.” (Gal. 2:20) Ke o ngɛ hemi kɛ yemi ngɛ Yesu mi ɔ, lɔ ɔ tsɔɔ kaa o he ye kaa kpɔmi nɔ́ ɔ ma nyɛ maa ye bua mo, kpɔmi nɔ́ ɔ nɔ a daa nɛ a kɛ o he yayami paa mo, kpɔmi nɔ́ ɔ ha nɛ wa ngɛ hɛ nɔ kami kaa wa ma ná neneene wami, kpɔmi nɔ́ ɔ ji nɔ́ titli nɛ tsɔɔ kaa Yehowa suɔ mo. (Rom. 8:32, 38, 39; Efe. 1:7) Ke o ngɛ hemi kɛ yemi ngɛ kpɔmi nɔ́ ɔ mi ɔ, lɔ ɔ be hae nɛ o he nile nɛ bu mo fɔ tsɔ nɛ o susu kaa o sɛ.—2 Tɛs. 2:16, 17.
Nɔ́ nɛ ji enyɔ ɔ, moo da Yesu afɔle sami ɔ nɔ kɛ hɛ mo kɛ su Yehowa he kɛ gu sɔlemi nɔ. Kpɔmi nɔ́ ɔ nɛ Mawu kɛ ha wɔ he je ɔ, wa ma nyɛ maa sɔle kɛ ha Yehowa nɛ “waa tu munyu faa, bɔ nɛ pee nɛ wa nine nɛ su mɔbɔ nami nɔ konɛ wa ná dloomi nɛ maa ye bua wɔ ngɛ be nɛ sa mi.” (Heb. 4:15, 16; 10:19-22) Sɔlemi haa nɛ wa pɛɛ si nɛ wa fia kaa wa be yayami pee ɔ mi waa.—Luka 22:40.
Nɔ́ nɛ ji etɛ ɔ, moo bu Yesu tue. Bɔfo Yohane ngma ke: “Nɔ nɛ e heɔ Bi ɔ yeɔ ɔ ngɛ neneene wami; nɔ nɛ e bui Bi ɔ tue ɔ be wami nae, mohu ɔ, Mawu we abofu ɔ hiɔ e nɔ.” (Yoh. 3:36) Mo kadi kaa Yohane tsɔɔ slɔɔto nɛ ngɛ hemi kɛ yemi nɛ wa ma je kpo kɛ tue bumi a kpɛti. Enɛ ɔ he ɔ, ke o bu Yesu tue ɔ, lɔ ɔ tsɔɔ kaa o heɔ lɛ yeɔ. Ke waa kɛ “Kristo Mlaa a,” nɛ ji e tsɔɔmi ɔmɛ kɛ e fami ɔmɛ tsu ní ɔ, lɔ ɔ tsɔɔ kaa wa buɔ lɛ tue. (Gal. 6:2) Ke waa kɛ blɔ tsɔɔmi nɛ Yesu kɛ haa kɛ guɔ “tsɔlɔ anɔkualetsɛ kɛ ní lelɔ” ɔ nɔ ɔ tsu ní ɔ, lɔ ɔ hu tsɔɔ kaa wa buɔ Yesu tue. (Mat. 24:45) Ke wa buɔ Yesu tue ɔ, wa ma nyɛ maa da nyagbahi nɛ a nya wa kaa ahumi ɔ nya.—Luka 6:47, 48.
“NYƐƐ FIA NYƐ HE NGƆ MA SI NGƐ NYƐ HEMI KƐ YEMI KLƆUKLƆU Ɔ NƆ”
Be ko ɔ, nyumu ko kpa ngmlaa kɛ de Yesu ke: “I ngɛ hemi kɛ yemi! Moo ye bua mi ngɛ he nɛ i hia hemi kɛ yemi ngɛ ɔ!” (Maak. 9:24) Nyumu nɛ ɔ ngɛ hemi kɛ yemi, se akɛnɛ e baa e he si he je ɔ, e yɔse kaa e hia hemi kɛ yemi fuu. Waa kɛ si fɔfɔɛ ko maa kpe nɛ e ma bi nɛ wa ná hemi kɛ yemi fuu kaa nyumu nɛ ɔ. Wɔ tsuo wa ma nyɛ ma ha nɛ wa hemi kɛ yemi ɔ mi nɛ wa amlɔ nɛ ɔ. Kaa bɔ nɛ wa kase ɔ, Baiblo ɔ nɛ wa maa kane nɛ wa ma pue wa yi mi tɛ ngɛ he ɔ ma ha nɛ wa hemi kɛ yemi ɔ mi nɛ wa, nɛ lɔ ɔ ma ha nɛ wa hɛ maa sa níhi nɛ Yehowa peeɔ kɛ haa wɔ ɔ wawɛɛ. Jehanɛ hu ɔ, ke wa piɛɛ wa nyɛmimɛ Kristofohi a he kɛ ja Yehowa, wa jaje wa hemi kɛ yemi ɔ kɛ tsɔɔ ni kpahi, nɛ wa sɔleɔ daa a, wa hemi kɛ yemi ɔ mi maa wa. Ke wa ha nɛ wa hemi kɛ yemi ɔ mi wa a, wa ma ná jɔɔmi nɛ pe kulaa a. Baiblo ɔ de ke: “Nihi nɛ i suɔ, nyɛɛ fia nyɛ he ngɔ ma si ngɛ nyɛ hemi kɛ yemi klɔuklɔu ɔ nɔ, . . . konɛ nyɛɛ ngɔ nyɛ he kɛ to ngɛ Mawu suɔmi ɔ mi.”—Jud 20, 21.