Mɛni Mawu Matsɛ Yemi ɔ Ma Tsu?

NƆ́ NƐ MAWU MATSƐ YEMI Ɔ TSU MOMO

Ngɛ munyu nɛ sɛ hlami ɔ mi ɔ, wa na níhi nɛ peeɔ okadi nɛ Yesu tu a he munyu ɔ. Okadi ɔ tsɔɔ kaa a to Mawu Matsɛ Yemi ɔ sisi ngɛ hiɔwe, nɛ a hla Yesu Kristo kaa e nya Matsɛ.

Baiblo ɔ tsɔɔ kaa Yesu ngɔ he wami nɛ e ngɛ kaa Matsɛ ɔ kɛ fiee Satan kɛ e daimonio ɔmɛ kɛ je hiɔwe. A be nyɛe maa ya hiɔwe ɔ hu. Amlɔ nɛ ɔ lɛɛ zugba a nɔ pɛ ji a hi he. Enɛ ɔ ji nɔ́ kake he je nɛ kɛ je jeha 1914 ɔ mi kɛ ma nɛ ɔ, níhi puɛ kulaa ngɛ zugba a nɔ ɔ nɛ.​—Kpo Jemi 12:7, 9.

E ngɛ mi kaa je ɔ mi si himi ngɛ puɛe kulaa mohu lɛɛ, se Yesu nɛ ji Mawu Matsɛ Yemi ɔ nya Matsɛ ɔ pee níhi konɛ e kɛ ye bua nihi nɛ a ngɛ zugba a nɔ ɔ. Kɛ gu je kɛ wɛ Baiblo tsɔsemi ní tsumi ɔ nɛ Yesu de kaa a ma tsu ɔ nɔ ɔ, nihi babauu ngɛ Baiblo sisi tomi mlaahi a he ní kasee, nɛ a kɛ ngɛ ní tsue ngɛ a si himi mi. (Yesaya 2:2-4) Enɛ ɔ ye bua nihi ayɔhi abɔ nɛ a ba ná juɛmi nɛ da ngɛ ní tsumi kɛ he lo nya níhi a he, nɛ a ngɔɛ a be kɛ a he wami tsuo kɛ hi he lo nya níhi a se die. Jehanɛ se hu ɔ, a ba na nɔ́ nɛ a maa pee konɛ a weku si himi nɛ pee bua jɔmi. Nimli nɛ ɔmɛ kaseɔ bɔ nɛ a ma plɛ kɛ ná si himi kpakpa ha amlɔ nɛ ɔ, nɛ a kaseɔ bɔ nɛ a ma plɛ kɛ hi si ha kaa Mawu Matsɛ Yemi ɔ sisi bimɛ.

MƐNI MAWU MATSƐ YEMI Ɔ MA TSU HWƆƆ SE?

E ngɛ mi kaa Yesu ngɛ nɔ yee ngɛ hiɔwe mohu lɛɛ, se loloolo ɔ, adesahi ngɛ nɔ yee ngɛ zugba a nɔ. Se kɛ̃ ɔ, Mawu fã Yesu ke: “Ye o he nyɛli ɔmɛ a nɔ.” (La 110:2) E be kɛe nɛ Yesu ma kpata e he nyɛli ɔmɛ tsuo a hɛ mi pɛsɛpɛsɛ, nɛ e ma ha nɛ nihi nɛ a buɔ Mawu tue ɔ ma ná tue mi jɔmi nitsɛnitsɛ.

Ngɛ jamɛ a be ɔ mi ɔ, Mawu Matsɛ Yemi ɔ maa pee níhi nɛ nyɛɛ se nɛ ɔmɛ

• E ma ha nɛ a gu lakpa jami. Jamihi nɛ a tsɔɔ Mawu he lakpa tsɔɔmihi, nɛ a ha nɛ si himi ɔ mi wa ha nihi ɔ be si hie hu. Baiblo ɔ kale lakpa jami kaa e ji yaholɔ, nɛ e hɛ mi kpatami ɔ maa pee nihi fuu nyakpɛ.​—Kpo Jemi 17:15, 16.

• E ma kpata adesa nɔ yemihi a hɛ mi. Mawu Matsɛ Yemi ɔ ma kpata adesa nɔ yemihi tsuo a hɛ mi.​—Kpo Jemi 19:15, 17, 18.

• E ma kpata yiwutsotsɛmɛ a hɛ mi. Nɛ nihi nɛ a fia a pɛɛ si kaa a maa pee ní yayamihi, nɛ́ a sume kaa a maa bu Mawu tue ɔ hu nɛɛ? Ngmami ɔ de ke: “Se yiwutsotsɛmɛ, kɛ yayami peeli lɛɛ Mawu ma kpata a hɛ mi.”​—Abɛ 2:22.

• E ma kpata Satan kɛ e daimonio ɔmɛ a hɛ mi. Satan kɛ e daimonio ɔmɛ be nyɛe maa “sisi je ma amɛ hu.”​—Kpo Jemi 20:3, 10.

Kɛ nihi nɛ a fĩ Mawu Matsɛ Yemi ɔ se ɔ ma ná níhi nɛ e maa pee ɔmɛ a he se ha kɛɛ?

NƆ́ NƐ MAWU MATSƐ YEMI Ɔ MAA PEE HA ADESAHI

Yesu nɛ e ngɛ nɔ yee ngɛ hiɔwe kaa Matsɛ ɔ maa pee níhi fuu nɛ adesa nɔ yelɔ ko be nyɛe maa pee. Nihi 144,000 ɔ, nɛ a hla mɛ kɛ je adesahi a kpɛti ɔ maa piɛɛ Yesu he kɛ ye nɔ. (Kpo Jemi 5:9, 10; 14:1, 3) E ma ha nɛ a pee Mawu suɔmi nya ní ngɛ zugba a nɔ. Mɛni Mawu Matsɛ Yemi ɔ maa pee kɛ ha nihi nɛ a maa hi zugba a nɔ ɔ?

• E ma je hiɔ kɛ gbenɔ kɛ je. “Nihi nɛ ngɛ zugba a nɔ ɔ, a ti nɔ ko nɔ ko be dee hu ke, ‘I be he wami,’” nɛ “gbenɔ be si hie hu.”​—Yesaya 33:24; Kpo Jemi 21:4.

• E maa ngɔ tue mi jɔmi nitsɛnitsɛ kɛ he piɛ pomi kɛ ba. “O ma a mi bi ɔmɛ ma ná tue mi jɔmi babauu” nɛ “nɔ tsuaa nɔ maa hi si ngɛ he jɔmi mi ngɛ e wai tso loo e ngmɔkɔ tso sisi, nɛ nɔ ko be nɔ ko he gbeye woe.”​—Yesaya 54:13, NW; Mika 4:4.

• E ma ha nɛ nihi ma ná ní tsumi kpakpa nɛ a ma tsu. “A ma ná mɛ nitsɛmɛ a nine nya ní tsumi mi ní maa ye, nɛ a bua maa jɔ a he saminya. A be yaka dengme gboe.”​—Yesaya 65:22, 23.

• E ma dla níhi nɛ puɛ ngɛ zugba a nɔ ɔ. “Nga zugba kpataa nɛ gbli ɔ ma na bua jɔmi; zia zugba a ma nya, nɛ mɔmɔhi maa puɛ ngɛ nɔ.”​—Yesaya 35:1.

• E maa tsɔɔ adesahi níhi nɛ a maa pee konɛ a hi si kɛ ya neneene. “Enɛ ɔ ji neneene wami ɔ nɛ, kaa a maa hi mo anɔkuale Mawu kake pɛ ɔ lee, kɛ nɔ nɛ o tsɔ ɔ, Yesu Kristo.”​—Yohane 17:3.

Mawu suɔ kaa o ná jɔɔmi nɛ ɔmɛ. (Yesaya 48:18) Munyu nɛ nyɛɛ se ɔ maa tsɔɔ mo nɔ́ nɛ e sa kaa o pee konɛ o ná jɔɔmihi nɛ maa ba hwɔɔ se ɔ.