Nyɛɛ Ngɔ Wa Womi Ɔmɛ Kɛ Tsu Ní Saminya
1. Mɛni blɔ nɔ wa ma nyɛ maa kase hɛsa nɛ Yesu je kpo ɔ ngɛ níhi nɛ Yehowa haa wɔ ɔ he?
1 Benɛ Yesu gu nyakpɛ blɔ nɔ kɛ ha nimli asafo ko niye ní se ɔ, e ha nɛ a bua niye ní ɔ sisi nɛ piɛ ɔ nya. (Mat. 14:19-21) Hɛsa kpo nɛ Yesu je ngɛ niye ní nɛ je Yehowa ngɔ ɔ he ɔ ji nɔhyɛ nɔ́ kpakpa ha wɔ kaa, e sa nɛ waa ngɔ níhi tsuo nɛ Yehowa haa wɔ kɛ guu “tsɔlɔ anɔkualetsɛ” ɔ nɔ ɔ kɛ tsu ní saminya kɛ tsɔɔ ‘sina nɛ wa ngɛ.’—Kol. 3:15; Luka 12:42; Mat. 24:45-47.
2. Mɛni e sa kaa waa pee konɛ womi tɛtlɛɛ ɔmɛ nɛ a ko ba hiɛ fuu ngɛ wa dɛ?
2 Womi Tɛtlɛɛhi: Ke waa kɛ womi tɛtlɛɛ ɔmɛ ha we ɔ, a ma nyɛ ma ba hiɛ fuu ngɛ wa dɛ. Ke womi tɛtlɛɛ ɔmɛ pɔɔ piɛmi ngɛ wa dɛ ɔ, lɛɛ e sa nɛ wa gbɔ yibɔ nɛ wa ngɔɔ ɔ nɔ. Nɛ womi tɛtlɛɛ momo ɔmɛ hu nɛɛ? Ke a se kɛ po ɔ, a be bi. Ke womi momohi fuu ngɛ wa dɛ ɔ, eko ɔ, sɔmɔmi nítsumi nɔ hyɛlɔ ɔ loo asafo mi nɔkɔtɔma kpa ko ma nyɛ maa tsɔɔ wɔ blɔhi a nɔ nɛ wa maa gu konɛ wa kɛ ha nihi.
3, 4. Mɛni e sa kaa e hi wa juɛmi mi ke wa yaa ngɔ womi ngɛ Matsɛ Yemi Asa a nɔ?
3 Womi Kpahi: Ke a tsake womi nɛ a kɛ ma ha ngɛ fiɛɛmi mi ɔ, kekleekle ɔ, hyɛ kaa o ngɛ eko ngɛ we mi nɛ o kɛ maa ya fiɛɛmi lo, loko o ya ngɔ eko ngɛ Matsɛ Yemi Asa a nɔ. Hyɛ nɛ o ngɔ nɔ́ nɛ o kɛ maa ya fiɛɛmi ngɛ otsi ɔ mi ɔ pɛ, nɛ ke e ta a loko o kpale ya ngɔ ekpa.
4 Womihi nɛ ji nɔ́ nɛ mo nitsɛ o maa kane ɔ, moo sɛ nɔ́ nɛ he hia mo pɛ. Ngmaa o biɛ kɛ asafo nɛ o ngɛ mi ɔ biɛ ngɛ womi ɔ mi he nɛ a si blɔ ngɛ ɔ. Lɔɔ ma ha nɛ ke womi ɔ laa a, nɔ nɛ maa na a maa ngɔ ba ha mo. Ke o ngɛ Watchtower Library nɛ ngɛ CD-ROM nɔ, nɛ o ngɔɔ o womi tɛtlɛɛ ɔmɛ kɛ toɔ ɔ, lɛɛ e he be hiae kaa o sɛ Watchtower kɛ Awake! kpo ɔmɛ.
5. Mɛni e sa kaa e hi wa juɛmi mi ke wa ma ha nɔ ko wa womi ɔmɛ eko, nɛ mɛni blɔ nɔ wa maa gu kɛ wo nɔ́ ko nɛ a ma ha a nɔ ta?
5 Womi Ɔmɛ Kɛ Hami: E sa nɛ waa bɔ mɔde kaa waa kɛ wa womi ɔmɛ ma ha nihi nɛ suɔ kaa a maa kane ɔ pɛ. O hɛ nɛ hi nɔ kaa womi nɛ ɔmɛ nɛ waa kɛ tsuɔ ní ngɛ fiɛɛmi mi ɔ a he hiɔ fɔɔ si ngɛ wa nɔ titli. Ke o ma si womi ha nihi ɔ, mo de mɛ he blɔ nɛ a ngɛ kaa a ma ha nɔ́ ko kɛ fi je kɛ wɛ fiɛɛmi nítsumi ɔ se ɔ. Kaa nɔhyɛ nɔ́ ɔ, o ma nyɛ ma de ke: “Ke o maa kane ɔ, ma suɔ kaa ma si ha mo. Jua be wa womi ɔmɛ a he, se ke o suɔ kaa o ma ha nɔ́ ko kɛ fi wa je kɛ wɛ nítsumi ɔ se ɔ, wa bua maa jɔ he.”
6. Mɛni heje nɛ wa womi ɔmɛ a he jua wa ha wɔ, nɛ mɛni lɔɔ maa wo wɔ he wami konɛ waa pee ngɛ a he?
6 Yesu gu nyakpɛ blɔ nɔ kɛ ha nihi niye ní, se behi fuu ɔ, Mawu Munyu ɔ nɛ e kɛ haa nihi. Yesu de ke: “Pi abolo kɛkɛ nɛ haa nɔmlɔ yi náa wami, se mohu munyu tsuaa munyu nɛ jee Mawu nya a.” (Mat. 4:4) Wa womi ɔmɛ tsɔɔ nɔ Baiblo mi anɔkualehi nɛ ma ha nɔ neneene wami. (Yoh. 17:3) E sɛ nɛ wa ha nɛ a dã, ejakaa a he jua wa!