Anɛ O Ma Nyɛ Ma Bli O Sɔmɔmi ɔ Mi Lo?
1. Mɛni hiami ngɛ wa fiɛɛmi nítsumi ɔ he, nɛ mɛni heje?
1 Benɛ Yesu na kaa nihi babauu a bua jɔ Matsɛ Yemi sane kpakpa a he ɔ, e de e kaseli ɔmɛ ke a ‘kpa Ngmɔtsɛ ɔ pɛɛ, konɛ e wo apaatsɛmɛ blɔ kɛ ba e ní kpami ɔ he.’ (Mat. 9:37, 38) Akɛnɛ wa ngɛ ní kpami be ɔ nyagbe heje ɔ, e he hia kaa waa kɛ esɔ yemi ma tsu ní ɔ pe daa. Enɛ ɔ tsɔɔ kaa e sa nɛ waa kɛ sɔlemi nɛ susu blɔ nɔ nɛ wa maa gu kɛ tsu babauu ngɛ fiɛɛmi nítsumi ɔ mi ɔ he.—Yoh. 14:13, 14.
2. Mɛni blɔ nɔ nihi kplɛɛ nine fɔmi kaa nítsuli nɛ ba ní kpami nítsumi ɔ he ɔ nɔ?
2 Mo Bli O Sɔmɔmi ɔ Mi: Ngɛ Yehowa yemi kɛ buami kɛ blɔ tsɔɔmi nya a, nihi fuu nyɛ ngɔ a he kɛ wo blɔ gbami nítsumi ɔ mi. (La 26:2, 3; Fil. 4:6) Ni komɛ hu bɔɔ mɔde kaa a maa ngɔ nyɔhiɔ kake loo nɔ́ nɛ hiɛ pe jã kɛ sɔmɔ kaa blɔ gbali a wali ngɛ jeha mi. Enɛ ɔ ha nɛ a nyɛ bli a fiɛɛmi nítsumi ɔ mi bɔnɛ sa. Bua jɔmi nɛ a ná benɛ a sɔmɔ kaa blɔ gbali a wali ɔ ha nɛ a kpɛti nihi fuu suɔ kaa a maa pee daa blɔ gbali.—Níts. 20:35.
3. Ke o tsu daa blɔ gbami nítsumi ɔ hyɛ ɔ, mɛni eko ɔ, o maa suɔ kaa o susu he amlɔ nɛ ɔ?
3 Anɛ O Ma Nyɛ Ma Sɔmɔ Kaa Daa Blɔ Gbalɔ Ekohu Lo?: Ke be ko nɛ be ɔ, o sɔmɔ kaa daa blɔ gbalɔ ɔ, e ngɛ faii kaa o kaiɔ bua jɔmi nɛ o ná ngɛ jamɛ a be ɔ mi. Anɛ o susu he wawɛɛ kaa o maa kpale pee daa blɔ gbalɔ lo? Eko ɔ, nɔ́ nɛ ha nɛ o kpa daa blɔ gbami nítsumi ɔ pi blɔ tsimi nɔ́ ha mo hu. Eko ɔ, piɔ nɛ ɔ, o ma nyɛ ma sɔmɔ kaa daa blɔ gbalɔ ekohu.—1 Yoh. 5:14, 15.
4. Mɛni ji he blɔ agbo nɛ bli ha wɔ tsuo?
4 Ní kpami nítsumi ɔ ngɛ nɔ yae wawɛɛ, nɛ e be kɛe nɛ e maa ba nyagbe. (Yoh. 4:35, 36) Nyɛ ha nɛ wɔ tsuo waa hyɛ wa amlɔ nɛ ɔ si fɔfɔɛ kaa wa ma nyɛ maa to wa níhi a he blɔ nya bɔnɛ pee nɛ waa ngɔ be fuu kɛ tsu fiɛɛmi nítsumi ɔ lo. Aloo ke ngɛ anɔkuale mi ɔ, wa be nyɛe ma bli wa sɔmɔmi ɔ mi ɔ, anɛ wa ma nyɛ maa bɔ mɔde kaa wa fiɛɛmi nítsumi ɔ maa nu tso lo? (Mar. 12:41-44) E ji he blɔ agbo kaa Yehowa maa gu nihi nɛ a si himi maa ngmɛ mɛ blɔ ɔ nɔ kɛ tsu blɔ gbami nítsumi ɔ!—La 110:3.