Mo Je Yehowa Yi Daa Ligbi
1. Mɛni Mawu sɔmɔli suɔ kaa a pee, nɛ mɛni heje?
1 Matsɛ David de ke e suɔ nɛ e je Yehowa yi “daa ligbi” kɛ ya neneene. (La 145:2, 7, 21) Wɔ hu wa ngɛ yi mi tomi kpakpa heje nɛ sa kaa wa je Yehowa yi daa ligbi.—La 37:10; 145:14, 18; 2 Pet. 3:13.
2. Mɛni blɔ nɔ wekuhi ma nyɛ ma je Yehowa yi ngɛ daa ligbi?
2 Ngɛ Wa Wehi A Mi: Wa ngɛ womihi nɛ yeɔ bua wɔ konɛ waa sɛɛ Mawu he ní ke wa ngɛ daa ligbi ngmami ɔ mi hyɛe, benɛ wa ngɛ Weku Mawu Jami pee, kɛ benɛ wa ngɛ wa he dlae ha asafo mi kpehi. Wekuhi fuu bɔɔ mɔde kaa ke e hi kulaa a, a ma bla kɛ ye ní kutuu si kake daa ligbi. Enɛ ɔ bliɔ blɔ kɛ haa mɛ nɛ a sɛɛɔ ní kɛ bua jɔmi, nɛ a jeɔ Yehowa yi. Ní nɛ fɔli kɛ a bimɛ sɛɛɔ ngɛ behi kaa kikɛ a mi ɔ, ma nyɛ maa ye bua kɛ ‘tsɔse a bimɛ ɔmɛ nɛ a wo mɛ ga kpakpa nɛ sa Yehowa hɛ mi.’—Efe. 6:4; 5 Mose 6:5-7.
3. Mɛni ji he blɔhi nɛ wa ngɛ nɛ waa kɛ wa nyɛmimɛ blaa kɛ jeɔ Yehowa yi?
3 Waa Kɛ Wa Nyɛmimɛ Nɛ́ Bla Kɛ Je Yehowa Yi: Wa náa he blɔ nɛ waa kɛ wa nyɛmimɛ Kristofoli blaa kɛ jeɔ Yehowa yi ke wa ya fiɛɛmi loo asafo mi kpe. (Abɛ 15:30; Fil. 4:8; Heb. 13:15) Akɛnɛ wɔ tsuo wa suɔ Yehowa heje ɔ, ke wa ngɛ ní sɛɛe ɔ, e sɛ nɛ e ye ha wɔ kaa wa ma je hɛsa kpo ngɛ Yehowa dloomi ɔ he.—La 106:1.
4. Ngɛ fiɛɛmi yami se ɔ, mɛni blɔ kpahi a nɔ o ma nyɛ maa gu kɛ je Yehowa yi?
4 Benɛ Waa Kɛ Nihi Nɛ He We Yi Ngɛ Ní Sɛɛe: E ngɛ mi kaa eko ɔ, wa be nyɛe maa ya fiɛɛmi daa ligbi mohu, se Yehowa kɛ e yi mi tomi ɔmɛ a he ní sɛɛmi kpiti nɛ maa ya nɔ ngɛ waa kɛ wa nítsuli, sukuubi, kɛ nihi nɛ waa kɛ mɛ ngɛ he kake a kpɛti ɔ ma nyɛ ma ha nihi nɛ hɛɛ tsui kpakpa a hɛ nɔ kami. (La 27:14; 1 Pet. 3:15) Benɛ nyɛmiyo ko ngɛ blɔ hiae ngɛ kɔɔhiɔ mi lɛ mi ɔ, e ye blɔ hialɔ kpa ko odase. Nɔ́ nɛ yo ɔ nu ɔ wo e bua nɛ lɔɔ ha nɛ e ha nyɛmiyo ɔ e we adrɛs kɛ tɛlifoo nɔma konɛ a tsa a ní sɛɛmi ɔ nɔ pee se. Benɛ haomihi ngɛ hiɛe babauu ngɛ je ɔ mi nɛ si himi ɔ ngɛ puɛe daa nɛ ɔ, Yehowa webi ngɔ “manye munyu” ɔ kɛ ngɛ nihi nɛ suɔ kaa a bu tue ɔ hae daa. Enɛ ɔ ha nihi ná hɛ nɔ kami nɛ a ba ngɛ Yehowa yi jee.—Yes. 52:7; Rom. 15:11.
5. Mɛni heje wa suɔ kaa wa je Yehowa yi, nɛ mɛni ma nyɛ maa je mi kɛ ba?
5 Yehowa bua maa jɔ saminya kaa e maa nu nɛ e sɔmɔli ngɛ e yi jee daa ligbi! Kaa bɔnɛ Yehowa adebɔ nɛ bɔle wɔ kɛ kpe ɔ jeɔ e yi daa ligbi ɔ, wɔ hu wa ma nyɛ maa pee jã ngɛ wa wehi a mi, asafo ɔ mi, kɛ benɛ waa kɛ nihi nɛ ba je we Yehowa yi lolo ngɛ ní sɛɛe.—La 19:1-4.