Kpe Nɛ A Peeɔ Kɛ Yaa Fiɛɛmi
1. Mɛni heje nɛ e sa nɛ fiɛɛmi nɛ wa maa ya ngɛ blɔ nya tomi nya a he nɛ hia wɔ?
1 Yesu pee bɔnɛ sa kaa a tsu Matsɛ Yemi fiɛɛmi nítsumi ɔ ngɛ blɔ nya tomi nya ha nɛ́ e nu tso ɔ he nɔ hyɛmi nɔ́ kɛ fɔ si. Mwɔnɛ ɔ hu ɔ, nihi nɛ hyɛɛ Matsɛ Yemi Fiɛɛmi nítsumi ɔ nɔ ngɛ je kɛ wɛ ɔ suɔ kaa a hyɛ konɛ nítsumi ɔ nɛ ya nɔ jã kɛ̃. Enɛ ɔ heje ɔ, asafohi nɛ ngɛ je kɛ wɛ ɔ guu fiɛɛmi yami kpe blɔ nya tomi ɔ nɔ nɛ a kɛ buaa Matsɛ Yemi fiɛɛli a nya ngɛ kuuhi a mi konɛ a ya fiɛɛmi.—Mat. 24:45-47; 25:21; Luka 10:1-7.
2. Mɛni e sa kaa a pee ke a ya fiɛɛmi yami kpe?
2 Blɔ Nya Tomi Kpakpa: A peeɔ fiɛɛmi yami kpe ɔ konɛ a kɛ wo nihi nɛ maa ya fiɛɛmi he wami, nɛ́ a ha mɛ blɔ tsɔɔmi ngɛ bɔnɛ a maa fiɛɛ ha he. A ma nyɛ ma susu daa ligbi ngmami ɔ he kpiti ke e kɔ fiɛɛmi nítsumi ɔ he tɛɛ. Be komɛ ɔ, nɔ nɛ maa hyɛ fiɛɛmi yami kpe ɔ nɔ ɔ kɛ nihi nɛ maa ya fiɛɛmi jamɛ a ligbi ɔ ma nyɛ ma susu ga womihi nɛ ngɛ Wa Matsɛ Yemi Sɔmɔmi ɔ, loo Reasoning womi ɔ, loo Ministry School womi ɔ mi ɔ he. A ma nyɛ maa pee womi nɛ a kɛ ma ha a he nɔ hyɛmi nɔ́ kpiti kɛ tsɔɔ. E sa nɛ nɔ tsuaa nɔ nɛ le nɔ nɛ e kɛ lɛ ma tsu ní, kɛ he nɛ a ma tsu ní ngɛ loko a sɔle kɛ kpa kpe ɔ. Kpe ɔ nɛ ko ye pe hɛngmɛfia 15, nɛ ke a kpa a, nɔ tsuaa nɔ nɛ pue zugba kpɔ ɔ mi blɔ nɔuu.
3. Mɛnɔmɛ toɔ fiɛɛmi yami kpe ɔmɛ a he blɔ nya?
3 Kɛ A Toɔ Fiɛɛmi Yami Kuu Ɔmɛ A He Blɔ Nya Kɛɛ? Sɔmɔmi nítsumi nɔ hyɛlɔ ɔ ji nɔ nɛ toɔ fiɛɛmi yami kpe he blɔ nya. E ji kuu nɔ hyɛli loo a wali ɔmɛ a blɔ nya nítsumi kaa a kɛ a kuu ɔmɛ maa ya fiɛɛmi Hɔ kɛ Hɔgba. Kuu nɔ hyɛli loo asafo mi sɔmɔli komɛ ma nyɛ maa piɛɛ fiɛɛmi yami kuuhi a he kɛ ya fiɛɛmi ngɛ otsi ɔ mi. Kuu nɔ hyɛli ɔmɛ kɛ sɔmɔmi nítsumi nɔ hyɛlɔ ɔ peeɔ kake kɛ toɔ blɔ nya bɔnɛ pee nɛ a kuu ɔmɛ nɛ ná zugba kpɔ bɔnɛ sa konɛ a nyɛ nɛ a tsu wehi a mi fiɛɛmi nítsumi ɔ Hɔ kɛ Hɔgba. Sɔmɔmi nítsumi nɔ hyɛlɔ ɔ maa to blɔ nya bɔnɛ pee nɛ ngɛ otsi ɔ mi ɔ, a ná nihi nɛ maa hyɛ kuu ɔmɛ a nɔ kɛ ya fiɛɛmi.
4-6. (a) Mɛni yi mi tomi he ní fiɛɛmi yami kpe nɛ a peeɔ ngɛ asafo zugba kpɔ ɔ mi ɔ tsuɔ? (b) Mɛni sane bimihi a ma nyɛ ma susu he ngɛ fiɛɛmi yami kpe he?
4 Jije A Maa Pee Kpe Nɛ Ɔmɛ Ngɛ Nɛ Mɛni Be E Sa Kaa A Pee? Bɔnɛ pee nɛ a tsu nítsumi ɔ kɛ pi si ɔ, e hi wawɛɛ kaa a maa pee kpe nɛ ɔmɛ ngɛ nihi a wehi a mi, ngɛ asafo ɔ zugba kpɔ ɔ mi he slɔɔtohi nɛ sa, pe nɛ asafo ɔ tsuo maa kpe ngɛ he kake. A ma nyɛ maa kpe ngɛ Matsɛ Yemi Asahi a nɔ hulɔ. Asafohi fuu peeɔ fiɛɛmi yami kpe ngɛ Matsɛ Yemi Asa a nɔ ke a kpa Hɔgba magbɛ nɔ munyu kɛ Watchtower Nikasemi ɔ. Enɛ ɔ he ɔ, e sɛ nɛ zugba kpɔ nɛ a ma tsu ní ngɛ mi ɔ he nɛ kɛ tsɔ. Ke pee ɔ, a ma nyɛ maa hyɛ kaa hehi nɛ kuu ɔmɛ kpeɔ ngɛ ɔ sa, nɛ a ngɛ zugba kpɔ ɔ mi ní tsue saminya lo.
5 Bɔnɛ zugba kpɔ ɔ si fɔfɔɛ ngɛ ha lɛ maa tsɔɔ be nɛ a maa pee kpe ɔmɛ kɛ si abɔ nɛ a maa pee ngɛ otsi ɔ mi. Sane bimihi nɛ nyɛɛ se nɛ ɔ maa ye bua kɛ na hehi kɛ behi nɛ e sa.
6 Zugba kpɔ te nɔ́ nɛ hia kaa a tsu mi ní wawɛɛ nɛɛ? Mɛni be maa hi ha fiɛɛmi ngɛ wehi a mi? Anɛ e sa kaa a to fiɛɛmi ngɛ wehi a mi loo se slami he blɔ nya gbɔkuɛ gbɔkuɛ lo? E sa nɛ a ngɔ fiɛɛmi yami he blɔ nya tomihi tsuo kɛ mɛtɛ he nɛ a ngɔɔ asafo ɔ adafi fiami womihi kɛ mɛtɛɛ ɔ. E ji Matsɛ Yemi fiɛɛli tsuo a suɔmi nya kaa a ma tsu a zugba kpɔ ɔ mi ní kɛ pi si, konɛ a nyɛ nɛ a de nɔ́ nɛ bɔfo Paulo de ɔ ke: “I be zugba kpɔ ko nɛ i tsu we mi ní.”—Rom. 15:23, NW.
7. Mɛni e sa kaa nɔ nɛ maa hyɛ fiɛɛmi yami kpe nɔ ɔ nɛ pee?
7 Fiɛɛmi Yami Kpe Nɔ Hyɛmi: E sa kaa nɔ nɛ a hla lɛ kaa e hyɛ nítsumi nɛ ɔ nɔ ɔ nɛ́ dla e he saminya kɛ tsɔɔ kaa e ngɛ bumi ha teokrase blɔ nya tomi ɔ. E sa nɛ a je kpe ɔ sisi ngɛ be nɔ, nɛ blɔ tsɔɔmi ɔ nɛ pee kpiti, nɛ e ye hɛngmɛfia 10 kɛ ya si 15. E sa kaa nɔ nɛ maa hyɛ kpe ɔ nɔ ɔ nɛ le zugba kpɔ nɛ a ma tsu ní ngɛ mi kɛ fɔ si. E he hia we kaa ke a kpa kpe ɔ, á mlɛ nihi nɛ maa kpɛ se kɛ ba, se kɛ̃ ɔ, e hi kaa a ma si sɛ konɛ a le he nɛ kuu ɔ yaa tsu ní ngɛ. Ke a kpa kpe ɔ, nɔ tsuaa nɔ nɛ pue zugba kpɔ ɔ mi blɔ nɔuu. Ke a to fiɛɛmi yami kpe he blɔ nya saminya, nɛ blɔ tsɔɔmi ɔ mi tɛ ɔ, e maa ye bua nihi nɛ maa ya fiɛɛmi jamɛ a ligbi ɔ konɛ a nyɛ nɛ a tsu ní kɛ pi si.—Abɛ 11:14.
8. Mɛni blɔhi a nɔ nihi nɛ maa ya fiɛɛmi yami kpe ma nyɛ ma fi nɔ nɛ hyɛɛ kpe ɔ nɔ ɔ se ngɛ?
8 Fiɛɛmi Yami Kpe Nɛ Wa Maa Ya: E he hia kaa wa fi blɔ nya tomi nɛ ɔ se. (Heb. 13:17) Ke nɔ nɛ hyɛ fiɛɛmi yami kpe ɔ nɔ ɔ na kaa nɔ ko be nɔ nɛ́ e kɛ maa nyɛɛ ɔ, ke e maa hi ɔ, e hla nɔ ha lɛ nɛ e kɛ lɛ nɛ ya. E hi kaa fiɛɛli nɛ ngɛ níhi a si kpami maa ya kpe ɔ konɛ a ye bua fiɛɛli hehi nɛ a be níhi a si kpami kpakpa ko ɔ. E he baa se nami ke wa suɔ kaa waa kɛ nɔ kpa ma tsu ní be komɛ ngɛ fiɛɛmi mi. (Abɛ 27:17; Rom. 15:1, 2) E sa kaa nɔ tsuaa nɔ nɛ bɔ mɔde nɛ e ba ngɛ be nɔ. Bumi nɛ wa ngɛ ha teokrase blɔ nya tomi nɛ ɔ kɛ wa nyɛmimɛ nítsuli ɔ maa wo wɔ he wami konɛ waa pee tsakemi nɛ he hia ngɛ enɛ ɔ blɔ fa mi.—2 Kor. 6:3, 4; Fil. 2:4.
9. Mɛni blɔhi a nɔ blɔ gbali ma nyɛ ma fi blɔ nya tomi nɛ ɔ se?
9 Blɔ Gbali A Yemi Kɛ Buami He Hia: Ke blɔ gbali fi fiɛɛmi yami kpehi a se ɔ, e woɔ nɔ tsuaa nɔ he wami nɛ a náa he se. E ji anɔkuale kaa blɔ gbali ngɛ blɔ nya nítsumihi fuu. Ngɛ Baiblo mi nikasemi kɛ se slamihi nɛ a peeɔ se ɔ, a ngɛ weku blɔ nya nítsumihi kɛ helo nya nítsumi nɛ a tsuɔ daa ligbi. Enɛ ɔ he ɔ, pi doo kaa blɔ gbali nɛ ya fiɛɛmi yami kpehi tsuo nɛ asafo ɔ to he blɔ nya, titli ke a peeɔ kpe ɔ daa ligbi. Se kɛ̃ ɔ, e hi kaa blɔ gbali maa ya kpe ɔ ekomɛ daa otsi. Ngɛ blɔ ko nɔ ɔ, kpe nɛ a peeɔ kɛ yaa fiɛɛmi tsɔseɔ asafo mi bi ɔmɛ, nɛ Baiblo ɔ mi nile nɛ blɔ gbali ɔmɛ ngɛ kɛ a fiɛɛmi mi níhi a si kpami ɔ yeɔ bua ni kpahi. Akɛnɛ blɔ gbali pɔɔ fiɛɛmi yami heje ɔ, e ha nɛ a ngɛ níhi a si kpami fuu. E sa nɛ a kɛ ye bua ni kpahi. Fiɛɛmi nítsumi ɔ nɛ a tsuɔ kɛ kã, kɛ a he nɛ a kɛ woɔ fiɛɛmi yami kpe ɔ mi ɔ ji nɔ hyɛmi nɔ́ kpakpa nɛ nihi kaseɔ. Nɛ nyɛmimɛ a bua jɔɔ enɛ ɔ he wawɛɛ.
10. Mɛni heje nɛ e sa kaa Matsɛ Yemi fiɛɛli tsuo nɛ je a tsui mi kɛ fi blɔ nya tomi nɛ ɔ se?
10 Kaa bɔnɛ Yesu kɛ e kaseli ɔmɛ pee ɔ, fiɛɛmi ngɛ wehi a mi nɔ titli nɛ wa guu kɛ tsuɔ Matsɛ Yemi fiɛɛmi nítsumi ɔ. Yi mi tomi heje nɛ wa peeɔ fiɛɛmi yami kpe ngɛ ji, konɛ wa kɛ wo wa sibi he wami nɛ wa nítsumi ɔ nɛ nu tso. E sa kaa sane kpakpa a fiɛɛli tsuo nɛ fi teokrase blɔ nya tomi nɛ ɔ se kɛ pi si. (Níts. 5:42; 20:20) Nyɛ ha nɛ wɔ tsuo waa je wa tsui mi kɛ fi fiɛɛmi yami kpe blɔ nya tomi ɔ se. Ke wa pee jã a, wa ma ná Yehowa dɛ mi jɔɔmi, nɛ wa Hɛ Mi Nyɛɛlɔ Yesu Kristo bua maa jɔ kaa wa ngɛ Mawu Matsɛ Yemi ɔ he sane kpakpa a fiɛɛe.—Mat. 25:34-40; 28:19, 20.