Mɛni Be E Sa Kaa Waa Kpale Ya Slaa Nihi Nɛ Bua Jɔ Munyu ɔ He?
1. Mɛni e sa kaa waa pee konɛ waa pee nihi kaseli?
1 Loko wa maa pee nihi kaseli ɔ, ja wa kpale ya slaa nihi nɛ suɔ nɛ a maa kase Yehowa Matsɛ Yemi blɔ nya tomi ɔ he ní ɔ. (Mat. 28:19, 20) Be nɛ e sa kaa waa kpale kɛ ya slaa nihi nɛ a je bua jɔmi kpo ngɛ munyu ɔ he ɔ daa si ngɛ wa be he blɔ nya tomi kɛ mɛ hu a nɔ́ ɔ nɔ. Ke wa ya nɔ ko ngɔ kekleekle ligbi ɔ, mɛni heje nɛ e sa kaa waa kpale wa se mla kɛ ya e ngɔ ekohu?
2, 3. Mɛni heje e sa nɛ waa bɔ mɔde kaa wa maa kpale wa se mla kɛ ya nihi nɛ ngɛ munyu ɔ he bua jɔmi ɔ a ngɔ?
2 Mɛni Heje E Sa Nɛ Waa Kpale Wa Se Nɔuu Kɛ Ya? E be kɛe nɛ ‘matsɛ yemi he sane kpakpa’ a fiɛɛmi nítsumi ɔ maa ba nyagbe, nɛ je nɛ ɔ nyagbe ɔ hu su si ta. (Mat. 24:14; 1 Pet. 4:7) Enɛ ɔ heje ɔ, akɛnɛ be bɔɔ ngɛ nɛ a kɛ ma he nihi nɛ a ngɛ munyu ɔ he bua jɔmi a yi wami heje ɔ, e sa nɛ waa bu ga womi kaa waa ‘fiɛɛ sɛgbi ɔ wawɛɛ’ ɔ tue, nɛ enɛ ɔ biɔ nɛ waa kpale kɛ ya mla nɛ wa ya ye bua nihi nɛ a je bua jɔmi kpo ngɛ munyu ɔ he ɔ.—2 Kor. 6:1, 2; 2 Tim. 4:2.
3 Satan pee klaalo kaa e ma je matsɛ yemi wu nɛ wa ma du ngɛ nɔ ko nɛ ngɛ munyu ɔ he bua jɔmi tsui mi ɔ. (Mar. 4:14, 15) Behi fuu ɔ, wekuli, nítsuli, kɛ ni kpahi yeɔ nihi nɛ ngɛ munyu ɔ he bua jɔmi ɔ a he fɛu. Ke wa kpale wa se mla kɛ ya a ngɔ ɔ, lɔɔ ma ha nɛ waa ye bua mɛ konɛ nihi ko gbe a bua jɔmi nɛ ngɛ tsoe kaa la ngɛ a mi ɔ.
4. Ke wa ya nɔ ko ngɔ kekleekle ɔ, mɛni wa ma nyɛ maa pee konɛ wa nyɛ nɛ wa ya slaa lɛ ekohu?
4 O Kɛ Mɛ Nɛ To Blɔ Nya: Ke o ya slaa nɔ ko kekleekle ɔ, e hi saminya kaa nyɛ maa to be pɔtɛɛ nɛ o maa kpale ba slaa lɛ. Mo tle sane bimi ko nɛ o ma ha heto ke o kpale ya slaa lɛ ɔ si. E he hia kaa o maa ngma níhi nɛ nyɛ susu a he, kɛ be nɛ o maa kpale ya slaa lɛ ɔ pɛpɛɛpɛ kɛ fɔ si. Ke e maa da mo ɔ, o ma nyɛ ma de lɛ kaa o maa kpale kɛ ba e nɔ jena loo lɔɔ se be bɔɔ pɛ. Ke kekleekle ligbi nɛ́ o ya nɔ nɛ ngɛ munyu ɔ he bua jɔmi ɔ ngɔ ɔ ji Hɔ loo Hɔgba, nɛ e yaa nítsumi ngɛ otsi ɔ mi ɔ, eko ɔ, e maa kplɛɛ kaa e we otsi nɛ o kpale ba slaa lɛ. Ke o kɛ nɔ ko to blɔ nya a, bɔɔ mɔde nɛ o ye nɔ.—Mat. 5:37.
5. Mɛni blɔ nɔ wa se nɛ wa maa kpale mla kɛ ya nihi nɛ ngɛ munyu ɔ he bua jɔmi ɔ a ngɔ ɔ, maa ye bua wɔ nɛ wa tsu nítsumi nɛ Yesu ha wɔ kaa waa pee nihi kaseli ɔ?
5 Wa ngɛ yi mi tomi kpakpahi a heje nɛ e sa kaa waa kpale nɔuu kɛ ya nihi nɛ a ngɛ munyu ɔ he bua jɔmi ɔ a ngɔ. Enɛ ɔ heje ɔ, moo to blɔ nya nɛ o kpale kɛ ya mla ejakaa “be ɔ pi hu.” (1 Kor. 7:29) Ke wa kpale kɛ ya nihi nɛ a ngɛ Matsɛ Yemi sɛgbi ɔ he bua jɔmi ɔ a ngɔ mla a, wa mɔde bɔmi ɔ ma nyɛ maa wo yiblii saminya.