Anɛ Ye He Su Kɛ Ha Fiɛɛmi Lo?
1. Mɛni heje nɛ e sɛ kaa wa maa nu he kaa wa he sui kɛ ha fiɛɛmi nítsumi ɔ?
1 Ke o bi sane nɛ ɔ hyɛ ɔ, koo ye tsui! Pi sukuu nɛ nɔ ko ya loo nyɛmi nɛ a kɛ fɔ wɔ ji nɔ́ nɛ haa nɛ wa he suu kaa fiɛɛli. A tu kekleekle kaseli ɔmɛ ekomɛ a he munyu kaa a ji ‘nimli guhi kɛkɛ nɛ a li womi mi.’ Se kɛ̃ ɔ, a fiɛɛ sane kpakpa a kɛ pi si ejakaa a mwɔ a yi mi kpɔ kaa a maa nyɛɛ nɔ hyɛmi nɔ́ nɛ Yesu pee ɔ se.—Níts. 4:13; 1 Pet. 2:21.
2. Kɛ Yesu tsɔɔ ní ha kɛɛ?
2 Bɔnɛ Yesu Tsɔɔ Ní Ha: E ní tsɔɔmi ɔ mi tɛ, nɛ e sisi numi wɛ. Sane bimihi, nɔ́ hetomi níhi, kɛ nya blimi munyuhi nɛ ngɛ tɛɛ nɛ e kɛ tsɔɔ ní ɔ ha nɛ e tue buli ɔmɛ suɔ wawɛɛ kaa a maa bu lɛ tue. (Mat. 6:26) E je bua jɔmi kpo ngɛ nihi a he. (Mat. 14:14) Jehanɛ se hu ɔ, akɛnɛ Yesu le kaa Yehowa tsɔ lɛ nɛ e ha lɛ he wami nɛ e kɛ tsu e nítsumi ɔ heje ɔ, e tu munyu kɛ nɔ mi mami kɛ he wami.—Luka 4:18.
3. Mɛni blɔ nɔ Yehowa guu kɛ yeɔ bua wɔ konɛ wa nyɛ nɛ wa tsu fiɛɛmi nítsumi ɔ?
3 Yehowa Yeɔ Bua Wɔ: Wa Tsɔɔlɔ Ngua a guu e Munyu ɔ kɛ e blɔ nya tomi ɔ nɔ kɛ tsɔseɔ wɔ konɛ waa fiɛɛ sane kpakpa a nɛ e wo yiblii. (Yes. 54:13) Akɛnɛ Yehowa ha nɛ a ngma bɔnɛ Yesu tsɔɔ ní ha a he sane kɛ fɔ si heje ɔ, wa ma nyɛ ma susu he konɛ waa kase blɔhi a nɔ nɛ e gu kɛ tsɔɔ ní ɔ. Yehowa haa wɔ e mumi klɔuklɔu ɔ nɛ e guu asafo mi kpehi a nɔ kɛ tsɔseɔ wɔ. (Yoh. 14:26) Jehanɛ se hu ɔ, e haa nɛ fiɛɛli nɛ a he be yeɔ bua wɔ konɛ wa fiɛɛmi ɔ nɛ nu tso saminya.
4. Mɛni heje nɛ e sa nɛ waa nu he kaa wa he su nɛ wa ma nyɛ maa fiɛɛ sane kpakpa kɛ ha nihi?
4 Akɛnɛ “Mawu ji nɔ nɛ ha nɛ wa he su” heje ɔ, wa ngɛ yi mi tomi kpakpa heje nɛ sa kaa waa nu he kaa wa he su kɛ ha fiɛɛmi ɔ. (2 Kor. 3:5, NW) Ke wa ya nɔ nɛ wa ngɔ wa hɛ kɛ fɔ Yehowa nɔ, nɛ wa ngɔ blɔ nya kpakpahi nɛ e to ha wɔ ɔ kɛ tsu ní ɔ, wa “maa hi kɛ pi si,” nɛ wa he “maa su kɛ tsu ní kpakpa.”—2 Tim. 3:17.