Mo Ha Nɛ O Ní Tsɔɔmi ɔ Nɛ Plɛ Nihi A Yi Mi
1. Behi fuu ɔ, loko wa ma nyɛ maa ngɔ Mawu Munyu ɔ kɛ tsu ní saminya ngɛ sɔmɔmi nítsumi ɔ mi ɔ, mɛni e biɔ nɛ waa pee?
1 Nihi nɛ a he be ngɛ sɔmɔmi nítsumi ɔ mi kaa bɔfo Paulo ɔ le kaa, ‘anɔkuale munyu ɔ mi nɛ a maa tsɔɔ saminya’ a biɔ babauu pe munyuhi a se nɛ a ma tsɛ kɛ je Ngmami Klɔuklɔu ɔ mi kɛkɛ. (2 Tim. 2:15) Ke wa ngɛ ní tsɔɔe ɔ, mɛni blɔ nɔ wa maa gu nɛ waa ngɔ Mawu Munyu ɔ kɛ plɛ nihi a yi mi?—Níts. 28:23.
2. Mɛni blɔ nɔ wa maa gu kɛ ye bua nihi konɛ a ná bumi nɛ mi wa kɛ ha Mawu Munyu ɔ?
2 Mo Ha Nɛ Baiblo ɔ Nɛ Tu Munyu: Kekleekle ɔ, mo ha nɛ tue bulɔ ɔ nɛ nu sisi kaa nile nɛ je Mawu ngɔ lɛ ngɛ Baiblo ɔ mi ɔ nɛ, konɛ e je bumi kpo kɛ ha Baiblo ɔ. Ke wa ngɛ hɛ kɛ nɔ fɔmi ngɛ Mawu Munyu ɔ mi ɔ, lɔɔ maa wo wa tue bulɔ ɔ he wami nɛ ke wa ngɛ ngmami ko kanee ɔ, e maa bu wɔ tue saminya. (Heb. 4:12) Nɔ́ nɛ wa ma nyɛ ma de kɛkɛ ji: “I na kaa se nami ngɛ bɔnɛ Mawu susuɔ ngɛ sane nɛ ɔ he ɔ he. Moo hyɛ nɔ́ nɛ e Munyu ɔ de.” Ke e maa hi ɔ, moo kane kɛ je Mawu Munyu ɔ mi tɛ̃ɛ kɛ tsɔɔ tue bulɔ ɔ.
3. Ke wa kane ngmami ko kɛ tsɔɔ wa tue bulɔ ɔ, mɛni wa ma nyɛ maa pee kɛ ye bua lɛ konɛ e nu sisi?
3 Enyɔne ɔ, moo tsɔɔ ngmami nɛ o kane ɔ mi. Nihi fuu ngɛ nɛ ke a kane ngmami si kake kɛ tsɔɔ mɛ ɔ, a nui sisi. E he hia nɛ waa tsɔɔ mɛ bɔnɛ ngmami ɔ kɔ munyu nɛ waa kɛ mɛ ngɛ he susue ɔ he ha. (Luka 24:26, 27) Moo ma otihi nɛ ngɛ ngmami ɔ mi nɛ kɔɔ nyɛ ní sɛɛmi ɔ he ɔ nɔ mi. Ke o bi tue bulɔ ɔ sane ɔ, lɔɔ ma nyɛ ma ha nɛ́ o na kaa e nu oti ɔ sisi fitsofitso aloo e nui sisi.—Abɛ 20:5; Níts. 8:30.
4. Mɛni ji nyagbe nɔ́ nɛ wa maa pee konɛ wa ní tsɔɔmi ɔ nɛ plɛ nihi a yi mi?
4 O Kɛ Lɛ Nɛ Susu Ngmami ɔ He: Etɛne ɔ, moo bɔ mɔde nɛ o ha nɛ munyu ɔ nɛ sɛ e juɛmi kɛ e tsui mi. Moo ye bua wetsɛ ɔ konɛ e na bɔnɛ ngmami ɔ kɔɔ e he ha. Ke o kɛ lɛ susu Ngmami ɔ he ɔ, lɔɔ ma ha nɛ e maa nu sisi nɛ e ma tsake bɔnɛ e susuɔ níhi a he ha a. (Níts. 17:2-4; 19:8) Kaa nɔ hyɛmi nɔ́ ɔ, ke wa kane La 83:18 ta a, waa kɛ lɛ ma nyɛ ma susu he konɛ e na kaa loko e kɛ nɔ ko ma nyɛ maa pee huɛ ɔ, e he hia kaa e maa le nɔ ɔ biɛ. Lɔɔ se ɔ, o ma nyɛ ma bi lɛ ke, “Anɛ o susu kaa Mawu biɛ ɔ nɛ o maa le ɔ ma ha nɛ o sɔlemi maa pi si lo?” Ke o ha nɛ ngmami ɔ kɔ wetsɛ ɔ he ngɛ blɔ nɛ ɔ nɔ ɔ, lɔɔ ma ha nɛ e maa na bɔnɛ ngmami ɔ he hia ha. Ke wa tsɔɔ Mawu Munyu ɔ mi nɛ e plɛ nihi a yi mi ɔ, lɔɔ maa gbla nihi nɛ a ngɛ anɔkuale ɔ he bua jɔmi ɔ konɛ a ba sɔmɔ Yehowa, nɔ nɛ ji anɔkuale Mawu hɛ kalɔ ɔ.—Yer. 10:10.