“O Ma Nyɛ Ma Tsu Blɔ Gbami Nítsumi ɔ!”
1. Kɛ nyɛmiyo ko bu e blɔ gbami nítsumi ɔ ha kɛɛ?
1 Nyɛmiyo ko nɛ a tsɛɛ lɛ ke Kathe B. Palm de ke: “I nɛ́ nítsumi ko nɛ haa nɛ nɔ tsui nɔɔ nɔ mi nɛ Yehowa jɔɔmi hu ngɛ nɔ pe enɛ ɔ.” E kɛ jeha nyɔngmahi abɔ sɔmɔ kaa blɔ gbalɔ, nɛ e ye odase kɛ kpa Chile ma a mi tsuo ngɛ Amerika Woyi je. Eko ɔ, nɔ ko susu jɔɔmihi nɛ nihi nɛ a ngɛ be tsuo sɔmɔmi nítsumi ɔ mi ɔ ngɛ náe ɔ he, nɛ e de mo ke: “O ma nyɛ ma tsu blɔ gbami nítsumi ɔ!”
2. Moo tsɔɔ nɔ́ heje nɛ ke nɔ ko ngɔ e he kɛ wo Mawu jami mi nítsumihi a mi ɔ, e tsui nɔɔ e mi wawɛɛ ɔ.
2 E Haa Nɛ Wa Náa Bua Jɔmi Ngɛ Si Himi Mi: Yesu, nɔ nɛ pee nɔ hyɛmi nɔ́ kɛ ha wɔ nɛ waa kase ɔ, ná e Tsɛ ɔ suɔmi nya ní peemi he bua jɔmi wawɛɛ. (Yoh. 4:34) Enɛ ɔ heje ɔ, Yesu je e tsui mi nɛ e tsɔɔ e kaseli ɔmɛ kaa ke nɔ ko ngɔ e he kɛ wo Mawu jami mi nítsumihi a mi ɔ, lɔɔ haa nɛ e tsui nɔɔ e mi. Ke waa kɛ wa wami tsuɔ nítsumihi nɛ Yehowa bua jɔɔ he ɔ, wa tsui nɔɔ wa mi. Jehanɛ se hu ɔ, be mi nɛ wa ngɔɔ wa be, kɛ wa he wami, kɛ níhi nɛ wa ngɛ ɔ kɛ yeɔ bua nihi ɔ, wa náa bua jɔmi wawɛɛ.—Níts. 20:31, 35.
3. Ke waa kɛ be fuu tsu sɔmɔmi nítsumi ɔ, mɛni bua jɔmi wa ma nyɛ ma ná?
3 Ke waa kɛ be babauu tsu sɔmɔmi nítsumi ɔ, lɔɔ ma ha nɛ wa ma ná nihi nɛ waa kɛ mɛ maa je Baiblo mi nikasemi sisi, nɛ enɛ ɔ ma ha nɛ wa ma ná bua jɔmi. Ke e peeɔ wɔ kaa nihi babauu nɛ wa fiɛɛɔ kɛ haa mɛ ngɛ wa zugba kpɔ ɔ mi ɔ be munyu ɔ he bua jɔmi po ɔ, níhi a si kpami kɛ ga nɛ wa ma ná ke wa ngɔ wa he kɛ wo blɔ gbami nítsumi ɔ mi ɔ ma ha nɛ wa ma ná nihi nɛ a maa bu wɔ tue. Ke nihi sɔmɔ kaa blɔ gbali maa pee jeha kake nɛ a ya Blɔ Gbali A Tsɔsemi Sukuu ɔ, a ma nyɛ maa ngɔ ní nɛ a ya kase ngɛ sukuu ɔ kɛ tsu ní. (2 Tim. 2:15) Ke wa toɔ wa tsui si ɔ, wa ma nyɛ ma du anɔkuale ɔ he wuhi nɛ́ maa wo yiblii pee se.—Fiɛlɔ 11:6.
4. Mɛni he e sa kaa nihewi kɛ yihewi nɛ a maa ho sukuu nya gbemi ya a nɛ a susu?
4 Nihewi Kɛ Yihewi: Be mi nɛ nyɛ maa ho sisije sukuu nya gbemi ya nɛ ɔ, anɛ nyɛ susu nɔ́ nɛ nyɛ ma tsu hwɔɔ se ɔ he lo? Kɛ ba si amlɔ nɛ ɔ, sukuu nɛ nyɛ ngɛ yae ɔ ngɔ nyɛ be tsuo. Ke nyɛ gbe sukuu nya a, mɛni nyɛ maa ngɔ nyɛ be ɔ kɛ tsu? Mɛni heje nɛ nyɛɛ kɛ sɔlemi susuu we blɔ gbami nítsumi ɔ he mohu pe nyɛ be tsuo nɛ nyɛ ma kɛ tsu helo nya nítsumi? Ke nyɛ ngɔ nyɛ he kɛ wo blɔ gbami nítsumi ɔ mi ɔ, ní nɛ nyɛ maa kase kɛ je nimli slɔɔtoslɔɔtohi nɛ nyɛ maa ye mɛ odase ɔ a ngɔ, kɛ haomihi nɛ nyɛɛ kɛ maa kpe nɛ nyɛ maa da nya, kɛ he nɔ yemi kɛ ní tsɔɔmi su kpakpa nɛ nyɛ ma ná a he maa ba se nami kɛ ha nyɛ ngɛ nyɛ wami be tsuo mi.
5. Mɛni blɔ nɔ fɔli kɛ nyɛmimɛ ɔmɛ ngɛ asafo ɔ mi ɔ ma nyɛ maa gu kɛ wo nihi he wami nɛ́ a ngɔ a he kɛ wo blɔ gbami nítsumi ɔ mi?
5 Fɔli, anɛ nyɛ ngɛ nyɛ bimɛ ye buae konɛ a ngɔ a he kɛ wo be tsuo sɔmɔmi nítsumi ɔ mi lo? Munyuhi nɛ jeɔ nyɛ nya, kɛ nɔ hyɛmi nɔ́ kpakpa nɛ nyɛ maa pee ɔ, ma nyɛ maa ye bua mɛ konɛ a ngɔ Matsɛ Yemi ɔ he níhi kɛ pee nɔ́ titli ngɛ a si himi mi. (Mat. 6:33) Ray nɛ e je blɔ gbami nítsumi ɔ sisi benɛ e gbe nɔ tsami sukuu nya a de ke: “Be tsuaa be ɔ, ye yayo nuɔ he kaa blɔ gbami nítsumi ɔ ji nɔ́ nɛ haa nɛ nɔ tsui nɔɔ nɔ mi wawɛɛ nitsɛ.” Nihi tsuo ngɛ asafo ɔ mi ɔ ma nyɛ maa ye bua nɛ a ngɔ a munyu tumi kɛ wo nihi he wami konɛ a ngɔ a he kɛ wo blɔ gbami nítsumi ɔ mi. Jose nɛ e je Spain ɔ, de ke: “Nyɛmimɛ ɔmɛ ngɛ ye asafo ɔ mi ɔ buu blɔ gbami nítsumi ɔ kaa e ji nítsumi nɛ hi pe kulaa nɛ sa kaa nihewi kɛ yihewi nɛ a tsu. Bɔnɛ a bua jɔɔ blɔ gbami nítsumi ɔ he ha, kɛ munyuhi nɛ a tuɔ kɛ kɔɔ he, kɛ yemi kɛ buami nɛ a kɛ ha mi ɔ, ha nɛ e yi ha mi kulaa kaa ma je blɔ gbami nítsumi ɔ sisi.”
6. Ke blɔ gbami nítsumi ɔ jlo we wɔ amlɔ nɛ ɔ, mɛni wa ma nyɛ maa pee?
6 Bɔnɛ O Ma Plɛ Kɛ Ye Níhi Nɛ Maa Tsi Mo Blɔ ɔ A Nɔ Ha: Se moo ngɔ lɛ kaa o de ke, ‘E jlo we mi kaa ma tsu blɔ gbami nítsumi ɔ.’ Ke jã ji bɔnɛ o susu ngɛ sisije ɔ, lɛɛ moo sɔle ha Yehowa nɛ o de lɛ ke, ‘I li kaa ma nyɛ ma tsu blɔ gbami nítsumi ɔ loo i be nyɛe ma tsu, se i suɔ nɛ ma pee nɔ́ nɛ sa o hɛ mi.’ (La 62:8; Abɛ 23:26) Lɔɔ se ɔ, mo hla Yehowa blɔ tsɔɔmi kɛ je e Munyu ɔ mi kɛ Kristofoli asafo ɔ mi. Daa blɔ gbali fuu je sisi kɛ gu blɔ gbali a wami nítsumi ɔ nɛ a “ka” nɛ a hyɛ ɔ nɔ; bua jɔmi nɛ a ná ngɛ mi ɔ ha nɛ a ngɔ a he kɛ wo be tsuo sɔmɔmi nítsumi ɔ mi.—La 34:8.
7. Ke e peeɔ wɔ kaa wa be nyɛe ma ná ngmlɛfia 70 nɛ a hlaa ngɛ blɔ gbali a dɛ daa nyɔhiɔ ɔ, mɛni wa ma nyɛ maa pee?
7 Nɛ ke e peeɔ mo kaa o be nyɛe ma ná ngmlɛfia 70 nɛ a hlaa ngɛ blɔ gbali a dɛ daa nyɔhiɔ ɔ hu nɛɛ? Mɛni heje mɔ nɛ o kɛ blɔ gbali nɛ a si himi ngɛ kaa o nɔ́ ɔ sɛɛ we ní? (Abɛ 15:22) Lɔɔ se ɔ, moo ngma blɔ slɔɔtohi a nɔ nɛ o ma nyɛ maa gu kɛ ná ngmlɛfia 70 ɔ kɛ fɔ si. Eko ɔ, o ma yɔse kaa mamoo o ma nyɛ ma he be nɛ́ o kɛ peeɔ níhi nɛ se nami be a he ɔ kɛ ha sɔmɔmi nítsumi ɔ.—Efe. 5:15, 16.
8. Mɛni heje nɛ e sa kaa waa pɔ wa si himi mi hyɛmi ɔ?
8 Hyɛ O Si Himi Mi Ekohu: Wa si himi nyɛɔ tsakeɔ. Enɛ ɔ he ɔ, e maa hi kaa wa maa pɔ wa si himi mi hyɛmi. Kaa nɔ hyɛmi nɔ́ ɔ, anɛ e be kɛe nɛ o maa ya he jɔɔmi ngɛ nítsumi mi lo? Randy nɛ e sui be nɛ e sa kaa e ya he jɔɔmi ngɛ nítsumi mi, se e pee jã a de ke: “Juɛmi nɛ ɔ nɛ i pee ɔ ha nɛ i nyɛ nɛ i kɛ ye yo wa je blɔ gbami nítsumi ɔ sisi, nɛ enɛ ɔ ha wɔ he blɔ nɛ wa hia kɛ ya je he nɛ fiɛɛli babauu a he hia ngɛ, nɛ wa ya ngɛ sɔmɔe ngɛ lejɛ ɔ. Juɛmi nɛ ɔ nɛ i pee ɔ ha nɛ i ná jɔɔmi babauu, nɛ nɔ́ nɛ pe kulaa ji, i ngɛ he nile kpakpa.”
9. Mɛni he e sa kaa nihi kɛ a yihi nɛ a susu?
9 Ni komɛ kɛ a yihi hyɛ a si himi mi saminya nɛ a na kaa e sɛ kaa mɛ ni enyɔ ɔmɛ a ngɔɔ a be tsuo kɛ tsuɔ helo nya ní. Ngɛ anɔkuale mi ɔ, enɛ ɔ ma nyɛ ma bi nɛ a pee a si himi kpokploo mohu lɛɛ, se ke a pee jã a, a ma ná he se. John, nɛ e yo kpa helo nya ní nɛ e tsuɔ kɛ e be tsuo bɔnɛ pee nɛ e nyɛ nɛ e pee babauu ngɛ e sɔmɔmi nítsumi ɔ mi ɔ de ke: “Akɛnɛ i le kaa ye yo ɔ ngɔɔ e he kɛ woɔ Mawu jami mi nítsumihi a mi daa ligbi heje ɔ, i náa bua jɔmi wawɛɛ.”
10. Mɛni woɔ Kristofoli he wami nɛ a susuɔ blɔ gbami nítsumi ɔ he?
10 Lɔɔ Tsɔɔ Kaa Wa Ngɛ Suɔmi Kɛ Hemi Kɛ Yemi: Fiɛɛmi nítsumi ɔ ji nítsumi nɛ he hia pe kulaa nɛ́ Yehowa kɛ wo wa dɛ kaa wa tsu. E be kɛe nɛ a ma kpata je momo nɛ ɔ hɛ mi, nɛ nihi nɛ a tsɛɔ Yehowa biɛ ɔ pɛ a yi wami lɛ a ma he. (Rom. 10:13) Ke wa suɔ Yehowa kɛ je wa tsui mi, nɛ wa bua jɔ nɔ́ nɛ e pee kɛ ha wɔ ɔ he ɔ, lɔɔ maa wo wɔ he wami nɛ wa maa bu fami nɛ e Bi ɔ kɛ ha wɔ kaa waa fiɛɛ kɛ kã a tue. (Mat. 28:19, 20; 1 Yoh. 5:3) Jehanɛ se hu ɔ, ke wa he ye niinɛ kaa wa ngɛ nyagbe ligbi ɔmɛ a mi ɔ, lɔɔ maa wo wɔ he wami nɛ waa kɛ wa he tsuo maa wo sɔmɔmi nítsumi ɔ mi be mi nɛ nyagbe ɔ bɛ lolo ɔ, mohu pe nɛ waa kɛ wa he maa wo je ɔ mi vii.—1 Kor. 7:29-31.
11. Ke nɔ ko de wɔ ke wa ma nyɛ ma tsu blɔ gbami nítsumi ɔ, kɛ e sa kaa waa bu nɔ ɔ munyu ɔ ha kɛɛ?
11 Daa blɔ gbami nítsumi ɔ tsɔɔ babauu pe ngmlɛfia fuu nɛ waa kɛ maa ya fiɛɛmi kɛkɛ; e ji sɔmɔmi nɛ waa kɛ ngɛ Mawu hae. Enɛ ɔ heje ɔ, ke nɔ ko de mo ke o ma nyɛ ma tsu blɔ gbami nítsumi ɔ, moo bu nɔ ɔ munyu ɔ kaa e ji he wami womi munyu. O kɛ sɔlemi nɛ susu he konɛ o ba piɛɛ nihi nɛ a ngɛ nítsumi nɛ haa nɛ nɔ tsui nɔɔ nɔ mi nɛ ɔ tsue ɔ a he.
[Bua jɔmi munyu nɛ a ma nɔ mi ngɛ ba fa 4]
Fɔli, anɛ nyɛ ngɛ nyɛ bimɛ ye buae konɛ a ngɔ a he kɛ wo be tsuo sɔmɔmi nítsumi ɔ mi lo?
[Bua jɔmi munyu nɛ a ma nɔ mi ngɛ ba fa 5]
Fiɛɛmi nítsumi ɔ ji nítsumi nɛ he hia pe kulaa nɛ́ Yehowa kɛ wo wa dɛ kaa wa tsu.