Anɛ I Tsuɔ Babauu Lo?
1. Mɛni ji níhi nɛ ma nyɛ maa hao Kristofono anɔkualetsɛ?
1 Anɛ o bi o he sane nɛ ɔ hyɛ lo? Eko ɔ, bwɔmi, hiɔ, loo weku blɔ nya nítsumi ha nɛ o nyɛ we nɛ o tsu babauu ngɛ sɔmɔmi nítsumi ɔ mi kaa sa a, nɛ enɛ ɔ ha nɛ o kɔni mi jɔ. Nyɛmiyo ko nɛ ngɛ bimɛ etɛ ngma ke, be komɛ ɔ, e yi mi kojoɔ lɛ, ejakaa e be kɛ e he wami nɛ e kɛ hyɛɛ e weku ɔ nɔ ɔ ha we nɛ e tsu babauu ngɛ sɔmɔmi nítsumi ɔ mi. Mɛni maa ye bua wɔ konɛ wa susu níhi a he ngɛ blɔ kpakpa nɔ?
2. Mɛni Yehowa ngɛ hlae nɛ waa pee?
2 Nɔ́ Nɛ Yehowa Ngɛ Hlae Nɛ Waa Pee: Atsinyɛ jemi ko be he kaa wɔ tsuo wa suɔ kaa wa tsu babauu ngɛ sɔmɔmi nítsumi ɔ mi. Se behi fuu ɔ, slɔɔto peemi agbo ngɛ nɔ́ nɛ wa suɔ kaa wa ma tsu kɛ nɔ́ tutuutu nɛ wa ma nyɛ ma tsu ɔ a kpɛti. Suɔmi nɛ wa suɔ kaa wa ma tsu babauu ɔ tsɔɔ kaa wa suɔ nɛ waa pee fuu kɛ piɛɛ nɔ́ nɛ wa ngɛ tsue ɔ he. E sa nɛ wa kai kaa Yehowa le nɔ́ nɛ wa ma nyɛ ma tsu ɔ saminya, nɛ e hyɛ we blɔ kaa wa tsu nɔ́ nɛ wa be nyɛe ma tsu. (La 103:13, 14) Mɛni ji nɔ́ nɛ e ngɛ hlae nɛ waa pee? E suɔ nɛ wa sɔmɔ lɛ kɛ wa tsui tsuo.—Kol. 3:23.
3. Mɛni blɔ nɔ wa maa gu kɛ le nɔ́ nɛ wa ma nyɛ ma tsu ngɛ sɔmɔmi nítsumi ɔ mi?
3 Mɛni maa ye bua wɔ konɛ waa le nɔ́ nɛ wa ma nyɛ ma tsu? Wa ma nyɛ ma bi Yehowa nɛ e ye bua wɔ konɛ waa le nɔ́ tutuutu nɛ wa ma nyɛ ma tsu. (La 26:2) Wa ma nyɛ ma bi wa huɛ Kristofono ko nɛ e nane pi si ngɛ Mawu jami mi, nɛ e le wɔ saminya, nɛ wa heɔ lɛ yeɔ, nɛ́ e kɛ kã ma nyɛ ma de wɔ níhi nɛ e sa kaa waa bɔ a he mɔde ɔ hu konɛ e ye bua wɔ. (Abɛ 27:9) E sa nɛ wa kai hu kaa akɛnɛ wa si himi tsakeɔ heje ɔ, e maa hi kaa wa maa pɔ wa si himi he susumi konɛ waa hyɛ kaa wa ma nyɛ ma tsu babauu lo.—Efe. 5:10.
4. Kɛ e sa kaa waa bu ga womihi nɛ a daa Baiblo ɔ nɔ nɛ a kɛ haa wɔ kɛ kɔɔ sɔmɔmi nítsumi ɔ he ɔ ha kɛɛ?
4 Bɔnɛ E Sa Kaa Waa Bu Ga Womihi Ha: Behi fuu ɔ, ke a ngɛ fo kae ɔ, nihi nɛ a ngɛ fo kami ɔ hyɛe ɔ woɔ fo tuli ɔmɛ he wami. A peeɔ jã konɛ fo tuli ɔmɛ nɛ a nyɛ nɛ a ye kunimi ngɛ fo kami ɔ mi, se pi nɛ a kɛ jɔ a kɔni mi. Jã nɔuu nɛ he wami womi munyuhi kɛ ga womihi nɛ a daa Baiblo ɔ nɔ kɛ haa wɔ ngɛ asafo mi kpehi kɛ asafo ɔ womi ɔmɛ a mi kaa waa ‘fiɛɛ sɛgbi ɔ kɛ hɛdɔ’ ɔ, yeɔ bua wɔ konɛ wa tsu babauu ngɛ sɔmɔmi nítsumi ɔ mi, se pi nɛ a kɛ wo wa kɔni mi nyu. (2 Tim. 4:2) Wa ma nyɛ ma ná nɔ mi mami kaa ke wa ya nɔ nɛ waa kɛ wa he wami tsuo tsu sɔmɔmi nítsumi ɔ, Yehowa ma kai ‘ní nɛ wa tsu kɛ suɔmi nɛ wa je kpo’ ɔ, nɛ e maa jɔɔ wɔ.—Heb. 6:10.