‘Koo Ye Gbeye’
1. Mɛni haomihi lɛ Yeremia kɛ kpe nɛ́ wɔ hu waa kɛ ma nyɛ maa kpe?
1 Benɛ Yehowa fã Yeremia kaa e sɔmɔ kaa e gbalɔ ɔ, e susu kaa e be he ní nyɛe ma tsu. Se Yehowa de lɛ ke, ‘koo ye gbeye,’ nɛ Yehowa je mi mi jɔmi mi nɛ e wo lɛ he wami nɛ e nyɛ nɛ e tsu nítsumi nɛ e kɛ wo e dɛ ɔ. (Yer. 1:6-10) Ngɛ wa mwɔnɛ ɔ be ɔ mi hu ɔ, zo gbomi loo gbeye yemi ma nyɛ maa sa bɔnɛ wa tsuɔ fiɛɛmi nítsumi ɔ ha a he. Ke wa yee gbeye kaa eko ɔ, nihi be wa sɛgbi ɔ tue bue aloo a be wa fiɛɛmi nítsumi ɔ bue ɔ, lɔɔ ma ha nɛ wa be odase yee be komɛ. Mɛni ma ha nɛ wa be gbeye yee, nɛ ke wa yi gbeye ɔ, mɛni jɔɔmihi lɛ maa je mi kɛ ba?
2. Mɛni blɔ nɔ lɛ ke wa dla wa he ɔ, lɔɔ be hae nɛ waa ye gbeye tsɔ ke wa ngɛ fiɛɛe?
2 Mo Dla O He Kɛ Sɛ Hlami: Ke wa dla wa he saminya a, lɔɔ maa ye bua wɔ nɛ wa be gbeye yee tsɔ. Kaa nɔ hyɛmi nɔ́ ɔ, ke wa nylɔ munyuhi nɛ wa maa tu kɛ tsɔɔ nihi nɛ a ma nyɛ maa tsi ní sɛɛmi nya a mi ɔ, lɔɔ ma ha nɛ wa ma nyɛ ma ha sanehi nɛ nihi pɔɔ bimi kɛ tsiɔ ní sɛɛmi nya a, a heto. (Abɛ 15:28) Mɛni heje nɛ ke nyɛ ngɛ nyɛ Weku Mawu Jami ɔ pee ɔ, nyɛ ngɔɛ be ɔ eko kɛ susuu we bɔnɛ nyɛ bimɛ ɔmɛ ma plɛ kɛ tsu haomihi nɛ a kɛ kpeɔ ngɛ sukuu kɛ ní nɛmɛ nɛ nyɛɛ kɛ kpeɔ ngɛ nyɛ sɔmɔmi nítsumi ɔ mi ɔ a he ní ɔ he?—1 Pet. 3:15.
3. Mɛni blɔ nɔ lɛ ke wa ngɔ wa hɛ kɛ fɔ Yehowa nɔ ɔ, lɔɔ be hae nɛ waa ye gbeye?
3 Ngɔɔ O Hɛ Kɛ Fɔ Yehowa Nɔ: Loko wa be gbeye yee ɔ, ja wa ngɔ wa hɛ kɛ fɔ Mawu nɔ. Yehowa wo si kaa e maa ye bua wɔ. (Yes. 41:10-13) Ngɛ e se ɔ, anɛ nɔ ko hu pa ngɛ nɛ e ma nyɛ maa ye bua wɔ lo? Yesu hu ha wɔ nɔ mi mami kaa ke waa kɛ si himi ko nɛ wa hyɛ we blɔ kpe ɔ, Mawu mumi klɔuklɔu ɔ maa ye bua wɔ nɛ waa ye odase kɛ pi si. (Mar. 13:11) Enɛ ɔ he ɔ, moo sɔle daa kɛ bi Yehowa konɛ e ha mo e mumi klɔuklɔu ɔ.—Luka 11:13.
4. Ke wa to wa tsui si ngɛ sɔmɔmi nítsumi ɔ mi ngɛ haomihi nɛ waa kɛ maa kpe tsuo se ɔ, mɛni jɔɔmihi nɛ wa ma ná?
4 Jɔɔmihi: Ke wa to wa tsui si ngɛ sɔmɔmi nítsumi ɔ mi ngɛ haomihi nɛ waa kɛ maa kpe tsuo se ɔ, lɔɔ maa wo wɔ he wami nɛ wa ma nyɛ maa da kahi nɛ waa kɛ maa kpe hwɔɔ se ɔ a nya yluduu. Enɛ ɔ haa nɛ wa náa kã, nɛ ji su nɛ nihi nɛ mumi klɔuklɔu ɔ hyi mɛ tɔ ɔ jeɔ kpo ɔ. (Níts. 4:31) Jehanɛ se hu ɔ, ke Yehowa ye bua wɔ nɛ wa yi gbeye hu ɔ, lɔɔ woɔ wa hemi kɛ yemi kɛ hɛ kɛ nɔ fɔmi nɛ wa ngɛ kaa e ma kpɔ wɔ ɔ mi he wami. (Yes. 33:2) Wa náa bua jɔmi nɛ wa tsui hu nɔɔ wa mi akɛnɛ wa le kaa wa hiɔwe Tsɛ ɔ kplɛɛ wa nɔ ɔ heje. (1 Pet. 4:13, 14) Lɛɛ, nyɛ ko ha nɛ waa ye gbeye, se mohu nyɛ ha nɛ waa fiɛɛ Matsɛ Yemi sɛgbi ɔ kɛ kã, ejakaa wa le kaa Yehowa fi wa se!