Sane Bimi He

◼ Ke waa kɛ nɔ ko peeɔ Baiblo mi nikasemi ngɛ sinya nya a, anɛ e sa kaa waa sɔle lo?

Ke wa sɔle kɛ je Baiblo mi nikasemi sisi nɛ wa sɔle hu kɛ gbe nya a, se namihi fuu ngɛ he. Ke wa sɔle ɔ, lɔɔ tsɔɔ kaa wa ngɛ Yehowa bie konɛ e kɛ e mumi klɔuklɔu ɔ nɛ ye bua wɔ ngɛ wa ní sɛɛmi ɔ mi. (Luka 11:13) Sɔlemi nɛ wa sɔleɔ ɔ hu haa nɛ ní kaselɔ ɔ naa hɛdɔ nɛ ngɛ Baiblo ɔ nɛ e ngɛ kasee ɔ he, nɛ lɔɔ hu haa nɛ e kaseɔ bɔnɛ a sɔleɔ ha. (Luka 6:40) Enɛ ɔ he ɔ, e maa hi kaa wa maa sɔle amlɔ nɔuu. Se akɛnɛ e slo si himihi a mi nɛ wa ya naa ni ɔmɛ ngɛ heje ɔ, fiɛɛlɔ ɔ ji nɔ nɛ e sa nɛ e kɔ níhi a se nɛ e hyɛ kaa e sa nɛ e sɔle loo e ko sɔle.

Nɔ́ kake nɛ he hia nɛ e sa kaa wa susu he ji he nɛ wa maa kase ní ɔ ngɛ. Ke o kɛ wetsɛ ɔ pɛ lɛ daa si ngɛ sinya a nya a, lɛɛ nyɛ ma nyɛ maa sɔle kpiti kɛ je nikasemi ɔ sisi nɛ ke nyɛ kase ní ɔ ta hu ɔ, nyɛ ma nyɛ maa sɔle. Se ke jã peemi ma ha nɛ nihi a hɛ maa ba nyɛ nɔ loo e ma gba ní kaselɔ ɔ nya a, lɛɛ e he be hiae kaa nyɛ maa sɔle kɛ ya si benɛ nyɛ maa na he ko nɛ nihi a hɛ be nyɛ nɔ bae nɛ e be ní kaselɔ ɔ hu nya gbae. Ngɛ he saisaa nɛ waa kɛ nɔ ko maa pee Baiblo mi nikasemi ngɛ ɔ, e sa nɛ waa kɛ níhi a se kɔmi nɛ tsu ní nɛ waa le be nɛ sa kaa waa sɔle.—Moo hyɛ March 2005 Our Kingdom Ministry ɔ bafa 8.