Anɛ O Ngɛ Níhi Tsuo Nɛ E Sa Kaa O Kase Kɛ Je Yehowa Ngɔ ɔ Kasee Lo?

1. Kɛ Yehowa buɔ ní tsɔɔmi ha kɛɛ?

¹ Yehowa nɛ ji wa Tsɔɔlɔ Kpanaa a suɔ kaa e maa tsɔɔ wɔ ní. (Yes. 30:20) E je ní tsɔɔmi sisi kɛ je benɛ e bɔ e Bitɛte ɔ. (Yoh. 8:28) Benɛ Adam gbo tue se ɔ, Yehowa jɔɔ we ní tsɔɔmi, mohu ɔ, e je suɔmi mi nɛ e kɛ blɔ tsɔɔmi ha adesahi nɛ a yi mluku ɔ.—Yes. 48:17, 18; 2 Tim. 3:14, 15.

2. Mɛni ní tsɔɔmi ngɛ nɔ yae mwɔnɛ ɔ?

² Mwɔnɛ ɔ, Yehowa ha nɛ a ngɛ nihi ní tsɔɔe ngɛ blɔ nɛ e ko bɛ hyɛ nɔ. Kaa bɔnɛ Yesaya gba kɛ fɔ si ɔ, nimli ayɔhi abɔ nɛ a ngɛ je ɔ mi ɔ ngɛ bue yuu kɛ ngɛ ‘Yehowa we ɔ nɛ maa si ngɛ yo ɔ nɔ’ ɔ mi yae. (Yes. 2:2) Mɛni heje e sa nɛ wa bu yuu kɛ ya lejɛ ɔ? Konɛ Mawu nɛ tsɔɔ wɔ e blɔ ɔmɛ, ngɛ anɔkuale mi ɔ, konɛ Yehowa nɛ tsɔɔ wɔ ní! (Yes. 2:3) Ngɛ sɔmɔmi jeha 2010 mi ɔ, Yehowa Odasefoli kɛ ngmlɛfia nɛ hiɛ pe ayɔ akpe kake kɛ nya ayɔ ekpa ye nihi odase nɛ a tsɔɔ mɛ Baiblo ɔ mi anɔkuale ɔ. Jehanɛ se hu ɔ, daa otsi ɔ, a tsɔɔ nihi Mawu he ní ngɛ asafohi nɛ hiɛ pe 105,000 nɛ a ngɛ je kɛ wɛ ɔ a mi, nɛ tsɔlɔ anɔkualetsɛ kɛ ní lelɔ ɔ peeɔ womihi nɛ a kɛ tsɔɔ nihi Mawu he ní ngɛ gbihi nɛ hiɛ pe 500 mi.

3. Mɛni blɔ nɔ lɛ o ná níhi nɛ Yehowa ngɛ wɔ tsɔɔe ɔ a he se ngɛ?

³ Mo Ná He Se Kɛ Pi Si: Hyɛ bɔnɛ wa ngɛ níhi nɛ Mawu ngɛ wɔ tsɔɔe ɔ a he se náe ha! Wa ba le kaa Mawu ngɛ biɛ nɛ e susuɔ wa he. (La 83:18; 1 Pet. 5:6, 7) Wa ba le sane bimi komɛ hu nɛ a he hia nɛ kɔɔ wa si himi he ɔ, a heto. Sane bimi nɛ ɔ ekomɛ ji, Mɛni heje nihi naa nɔ́ nɛ a gboɔ ɔ? Mɛni blɔ nɔ ma gu kɛ ná bua jɔmi nitsɛnitsɛ? Mɛni heje nɛ wa ngɛ si himi mi? Yehowa tsɔɔ wɔ bɔnɛ waa ba wa je mi ha konɛ waa “ye manye” hulɔ.—Yosh. 1:8.

4. Mɛni sukuu komɛ nɛ Yehowa sɔmɔli kɛ a he ma nyɛ maa wo mi, nɛ mɛni heje nɛ e sa nɛ waa kase níhi tsuo nɛ wa ma nyɛ maa kase kɛ je Yehowa ngɔ ɔ?

⁴ Jehanɛ hu ɔ, Yehowa guu sukuu slɔɔtohi a nɔ kɛ tsɔɔ nihi ní ngɛ blɔ klɛdɛɛ nɔ konɛ a nyɛ nɛ a bli sɔmɔmi nɛ a kɛ haa lɛ ɔ mi. A wo sukuu nɛ ɔ ekomɛ a ta ngɛ bafa 4-6. Ke si himi mi nɛ wa ngɛ ɔ be wɔ blɔ ngmɛe nɛ waa kɛ wa he nɛ wo sukuu nɛ a wo ta a ekomɛ a mi po ɔ, anɛ waa kɛ wa he wo sukuu nɛ wa si himi maa ngmɛ wɔ blɔ kaa waa kɛ wa he nɛ wo mi ɔ mi lo? Anɛ wa ngɛ nihewi kɛ yihewi nɛ behi fuu ɔ, a sukuu tsɔɔli kɛ ni kpahi deɔ mɛ kaa a ya sukuu kɛ ya tsitsaa ngɛ je ɔ mi ɔ he wami woe konɛ a kɛ Mawu jami mi otihi nɛ ma a hɛ mi nɛ a di tsɔsemi nɛ pe kulaa nɛ ji ní nɛ Mawu maa tsɔɔ mɛ ɔ se lo? Ke wa kase níhi tsuo nɛ e sa kaa waa kase kɛ je Yehowa ngɔ ɔ, lɔɔ maa ye bua wɔ nɛ wa ná si himi nɛ ngɛ bua jɔmi amlɔ nɛ ɔ, kɛ neneene wami hu hwɔɔ se.—La 119:105; Yoh. 17:3.

Sukuu Komɛ Nɛ A To He Blɔ Nya Ngɛ Yehowa Asafo ɔ Mi

Ní Kanemi Kɛ Ní Ngmami Sukuu

• Yi Mi Tomi: Konɛ a kɛ tsɔɔ nihi ní kanemi kɛ ní ngmami bɔnɛ pee nɛ a nyɛ nɛ a kase Baiblo ɔ ngɛ a dɛhe nɛ a tsɔɔ nihi anɔkuale ɔ.

• Be Nɛ E Heɔ: E daa si ngɛ sukuuno ɔ nɔ.

• He Nɛ A Peeɔ Ngɛ: Matsɛ Yemi Asa a nɔ.

• Nihi Nɛ A Ma Nyɛ Maa Ya: Fiɛɛli tsuo kɛ nihi nɛ a ngɛ munyu ɔ he bua jɔmi.

• Bɔnɛ O Ma Plɛ Kɛ Ngma O Biɛ Ngɛ Sukuu ɔ Mi: Asafo mi nikɔtɔmahi daa asafo ɔ mi hiami níhi a nɔ nɛ a toɔ ní kanemi kɛ ní ngmami sukuu nɛ ɔ he blɔ nya, nɛ a woɔ nihi tsuo nɛ a li ní kanemi kɛ ní ngmami ɔ he wami nɛ a kɛ a he nɛ wo mi.

Teokrase Sɔmɔmi Sukuu

• Yi Mi Tomi: Konɛ a kɛ tsɔse fiɛɛli bɔnɛ pee nɛ a nyɛ nɛ a fiɛɛ sane kpakpa a kɛ ha nihi kɛ pi si nɛ a tsɔɔ mɛ ní.

• Be Nɛ E Heɔ: A peeɔ daa.

• He Nɛ A Peeɔ Ngɛ: Matsɛ Yemi Asa a nɔ.

• Nihi Nɛ A Ma Nyɛ Maa Ya: Fiɛɛli tsuo. Nihi nɛ a kɛ asafo ɔ ngɛ bɔe nɛ a kplɛɛ Baiblo ɔ mi tsɔɔmi ɔ nɔ, nɛ a baa a je mi ngɛ Kristofoli a sisi tomi mlaahi a nya a hu ma nyɛ maa ngɔ a he kɛ wo mi.

• Bɔnɛ O Ma Plɛ Kɛ Ngma O Biɛ Ngɛ Sukuu ɔ Mi: O kɛ Teokrase Sɔmɔmi Sukuu nɔ hyɛlɔ ɔ nɛ tu munyu.

Ma Se Gbi Kasemi Sukuu

• Yi Mi Tomi: Konɛ a kɛ tsɔɔ fiɛɛli bɔnɛ a ma plɛ kɛ fiɛɛ sane kpakpa a ngɛ gbi kpa mi ha.

• Be Nɛ E Heɔ: Nyɔhiɔ eywiɛ loo enuɔ. Behi fuu ɔ, a peeɔ sukuu nɛ ɔ Hɔ mɔtu, nɛ e heɔ ngmlɛfia kake loo enyɔ.

• He Nɛ A Peeɔ Ngɛ: Behi fuu ɔ, a peeɔ ngɛ Matsɛ Yemi Asa nɛ ngɛ nyɛ kasa nya a nɔ.

• Nihi Nɛ A Ma Nyɛ Maa Ya: Fiɛɛli nɛ a ngɛ si dami kpakpa ngɛ asafo ɔ mi nɛ a suɔ kaa a maa fiɛɛ kɛ ha nihi nɛ a tuɔ gbi kpa.

• Bɔnɛ A Plɛɔ Kɛ Yaa: Asafo ɔ nítsumi he kɔni ɔ lɛ daa hiami níhi a nɔ kɛ toɔ sukuu nɛ ɔ he blɔ nya.

Matsɛ Yemi Asahi A Mami

• Yi Mi Tomi: Konɛ a ma Matsɛ Yemi Asahi nɛ a dla momohi. E ngɛ mi kaa enɛ ɔ pi sukuu mohu lɛɛ, se a yeɔ bua nihi nɛ a kɛ a he ha a nɛ a tsɔɔ mɛ nine nya nítsumi slɔɔtohi konɛ a nyɛ nɛ a ye bua ngɛ tsuhi a mami mi.

• Be Nɛ E Heɔ: Bɔnɛ nɔ ɔ si himi maa ngmɛ lɛ blɔ.

• He Nɛ A Peeɔ Ngɛ: He saisaa nɛ Kpokpa Nɔ Tsuhi A Mami He Ajla Toli ɔmɛ tsuɔ ní ngɛ ɔ. A nyɛɔ nɛ a tsɛɛ nihi nɛ a kɛ a he ha a a ti ni komɛ konɛ a ye bua kɛ ma tsuhi nɛ oslaa ha nɛ a hule ɔ.

• Nɔ́ Nɛ A Hlaa: E sa kaa nyɛmimɛ nyumuhi kɛ yihi nɛ a kɛ a he ma ha a nɛ a pee nihi nɛ a baptisi mɛ nɛ nikɔtɔmahi a kuu ɔ kplɛɛ a nɔ. A ma nyɛ maa pee nihi nɛ a le nine nya nítsumi loo a li eko kulaa.

• Bɔnɛ O Ma Plɛ Kɛ Piɛɛ A He: Moo ngɔ Kingdom Hall Volunteer Worker Questionnaire (S-82) womi ɔ eko ngɛ asafo mi nikɔtɔma amɛ a dɛ nɛ o ngma nɔ ní.

Blɔ Gbali A Tsɔsemi Sukuu

• Yi Mi Tomi: Konɛ a kɛ tsɔse blɔ gbali bɔnɛ pee nɛ a nyɛ nɛ a ‘tsu sɔmɔmi nítsumi ɔ saminya.’—2 Tim. 4:5.

• Be Nɛ E Heɔ: Otsi enyɔ.

• He Nɛ A Peeɔ Ngɛ: Asafo ɔ nítsumi he kɔni ɔ lɛ tsɔɔ he nɛ e sa kaa a pee ngɛ; behi fuu ɔ, a peeɔ ngɛ Matsɛ Yemi Asa nɛ ngɛ nyɛ kasa nya a nɔ.

• Nɔ́ Nɛ A Hlaa: Nihi nɛ ke e hí kulaa a, a tsu blɔ gbami nítsumi ɔ jeha kake.

• Bɔnɛ A Plɛɔ Kɛ Yaa: Blɔ gbali ɔmɛ a kpokpa nɔ hyɛlɔ ɔ lɛ tsɔɔ blɔ gbali ɔmɛ a kpɛti nihi nɛ a he su nɛ a ma nyɛ maa ya sukuu nɛ ɔ.

Betel Ní Tsuli A Tsɔsemi Sukuu

• Yi Mi Tomi: A peeɔ sukuu nɛ ɔ kɛ tsɔseɔ ni hehi nɛ a ya Betel konɛ a nyɛ nɛ a sɔmɔ ngɛ Betel.

• Be Nɛ E Heɔ: A kɛ otsi 16 lɛ peeɔ. A peeɔ lɛ ngmlɛfia kake daa otsi.

• He Nɛ A Peeɔ Ngɛ: Betel.

• Nɔ́ Nɛ A Hlaa: E sa nɛ ni ɔmɛ nɛ a pee Betel weku ɔ mi bi loo nihi nɛ a ngɛ sɔmɔe ngɛ Betel be kpiti (jeha kake loo enyɔ).

• Bɔnɛ A Plɛɔ Kɛ Yaa: A haa nɛ nihi nɛ a he su ɔ yaa.

Matsɛ Yemi Sɔmɔmi Sukuu

• Yi Mi Tomi: Konɛ a kɛ tsɔse asafo mi nikɔtɔmahi kɛ sɔmɔli nɛ a nyɛ nɛ a to níhi a he blɔ nya nɛ a hyɛ asafo ɔ nɔ saminya. (Níts. 20:28) Nɔyemi Kuu ɔ lɛ tsɔɔ be nɛ e sa kaa a pee sukuu nɛ ɔ.

• Be Nɛ E Heɔ: Amlɔ nɛ ɔ, asafo mi nikɔtɔmahi ngɔɔ ligbi kake kɛ fã kɛ yaa sukuu nɛ ɔ, nɛ sɔmɔli kɛ ligbi kake yaa.

• He Nɛ A Peeɔ Ngɛ: A pɔɔ peemi ngɛ Matsɛ Yemi Asa loo Kpe Peemi Asa nɛ ngɛ nyɛ kasa nya a nɔ.

• Nɔ́ Nɛ A Hlaa: E sa nɛ ni ɔmɛ nɛ a pee asafo mi nikɔtɔmahi loo sɔmɔli.

• Bɔnɛ A Plɛɔ Kɛ Yaa: Kpokpa nɔ hyɛlɔ ɔ nɛ e tsɔɔ asafo mi nikɔtɔmahi kɛ sɔmɔli nɛ a he su nɛ a ma nyɛ maa ya.

Asafo Mi Nikɔtɔmahi A Sukuua

• Yi Mi Tomi: Konɛ a kɛ ye bua asafo mi nikɔtɔmahi nɛ a nyɛ nɛ a tsu a blɔ nya nítsumihi ngɛ asafo ɔ mi.

• Be Nɛ E Heɔ: Ligbi enuɔ.

• He Nɛ A Peeɔ Ngɛ: Asafo ɔ nítsumi he kɔni ɔ lɛ tsɔɔ he nɛ e sa kaa a pee ngɛ; a pɔɔ peemi ngɛ Matsɛ Yemi Asa loo Kpe Peemi Asa nɛ ngɛ nyɛ kasa nya a nɔ.

• Nɔ́ Nɛ A Hlaa: E sa nɛ ni ɔmɛ nɛ a pee asafo mi nikɔtɔmahi.

• Bɔnɛ A Plɛɔ Kɛ Yaa: Asafo ɔ nítsumi he kɔni ɔ lɛ tsɔɔ asafo mi nikɔtɔmahi nɛ a he su nɛ a ma nyɛ maa ya.

Kpokpa Kɛ Kpokpa Ngua Nɔ Hyɛli Kɛ A Yihi A Sukuub

• Yi Mi Tomi: Konɛ a kɛ ye bua kpokpa nɔ hyɛli kɛ kpokpa ngua nɔ hyɛli nɛ a nyɛ nɛ a sɔmɔ asafohi, nɛ a ‘bɔ mɔde ngɛ munyu tumi kɛ ní tsɔɔmi mi,’ nɛ a hyɛ nihi nɛ a kɛ wo a dɛ ɔ a nɔ.—1 Tim. 5:17; 1 Pet. 5:2, 3.

• Be Nɛ E Heɔ: Nyɔhiɔ enyɔ.

• He Nɛ A Peeɔ Ngɛ: Asafo ɔ nítsumi he kɔni ɔ lɛ tsɔɔ he nɛ e sa kaa a pee ngɛ.

• Nɔ́ Nɛ A Hlaa: E sa kaa nɔ ɔ nɛ pee kpokpa nɔ hyɛlɔ loo kpokpa ngua nɔ hyɛlɔ.

• Bɔnɛ A Plɛɔ Kɛ Yaa: Asafo ɔ nítsumi he kɔni ɔ lɛ tsɔɔ kpokpa nɔ hyɛli kɛ a yihi nɛ a he su nɛ a ma nyɛ maa ya.

Baiblo Sukuu Kɛ Ha Nyumuhi Nɛ A Sɛ We Gba Si Himi Mic

• Yi Mi Tomi: Konɛ a kɛ ye bua asafo mi nikɔtɔmahi kɛ asafo mi sɔmɔli nɛ a sɛ we gba si himi mi nɛ a nyɛ nɛ a tsu blɔ nya nítsumi kpahi. A ma ha nɛ nihi nɛ a maa gbe sukuu nɛ ɔ nya a, a ti nihi fuu ma ya sɔmɔ ngɛ hehi nɛ fiɛɛli babauu a he hia ngɛ ngɛ a ma amɛ a mi. A ma nyɛ ma ha a kpɛti nihi bɔɔ ko nɛ́ a kɛ a he ma ha a konɛ a ya sɔmɔ ngɛ ma kpahi a nɔ.

• Be Nɛ E Heɔ: Nyɔhiɔ enyɔ.

• He Nɛ A Peeɔ Ngɛ: Asafo ɔ nítsumi he kɔni ɔ lɛ tsɔɔ he nɛ e sa kaa a pee ngɛ; behi fuu ɔ, a peeɔ ngɛ Matsɛ Yemi Asa loo Kpe Peemi Asa nɛ ngɛ nyɛ kasa nya a nɔ.

• Nɔ́ Nɛ A Hlaa: Nyɛmimɛ nyumuhi nɛ a ye kɛ je jeha 23 kɛ ya si 62 nɛ a ngɛ nɔmlɔtso mi he wami kpakpa nɛ a suɔ kaa a ma sɔmɔ a nyɛmimɛ nɛ a ma tsu Matsɛ Yemi ɔ he nítsumi ngɛ he tsuaa he nɛ a kɛ mɛ maa ya. (Mar. 10:29, 30) E sa nɛ a pee nihi nɛ ke e hí kulaa a, a ngɛ sɔmɔe kaa asafo mi nikɔtɔmahi loo asafo mi sɔmɔli jeha enyɔ nɛ a pui mi.

• Bɔnɛ A Plɛɔ Kɛ Yaa: Ke a peeɔ sukuu nɛ ɔ ngɛ nyɛ ma a mi ɔ, a kɛ nihi nɛ a suɔ kaa a maa ya eko ɔ peeɔ kpe ngɛ kpe wayo ɔ sisi. A kɛ blɔ tsɔɔmi kpahi haa ngɛ kpe nɛ ɔ sisi.

Baiblo Sukuu Kɛ Ha Nihi Nɛ A Sɛ Gba Si Himi Mid

• Yi Mi Tomi: Konɛ a kɛ ye bua nihi nɛ a sɛ gba si himi mi ɔ bɔnɛ pee nɛ Yehowa kɛ e we asafo ɔ nɛ kɛ mɛ nɛ tsu ní kɛ pi si. A ma ha nɛ nihi nɛ a maa gbe sukuu nɛ ɔ nya a, a ti nihi fuu ma ya sɔmɔ ngɛ hehi nɛ fiɛɛli babauu a he hia ngɛ ngɛ a ma amɛ a mi. A ma nyɛ ma ha a kpɛti nihi bɔɔ ko nɛ a kɛ a he ma ha a nɛ a ya sɔmɔ ngɛ ma kpahi a nɔ.

• Be Nɛ E Heɔ: Nyɔhiɔ enyɔ.

• He Nɛ A Peeɔ Ngɛ: A ngɛ ní nɛmɛ nɛ sɛ hlami ɔ pee ngɛ Watchtower Educational Center ngɛ Patterson, New York, U.S.A. Lɔɔ se ɔ, a maa pee sukuu nɛ ɔ ngɛ hehi nɛ asafo ɔ nítsumi he kɔni ɔ maa tsɔɔ, eko ɔ, ngɛ Kpe Peemi Asa loo Matsɛ Yemi Asa ko nɔ.

• Nɔ́ Nɛ A Hlaa: Nihi nɛ a sɛ gba si himi mi nɛ a ye kɛ je jeha 25 kɛ ya si 50 nɛ a ngɛ nɔmlɔtso mi he wami kpakpa nɛ a si himi maa ngmɛ mɛ blɔ nɛ a sɔmɔ ngɛ he nɛ fiɛɛli babauu a he hia ngɛ nɛ a ma nyɛ ma de ke, “I ngɛ hiɛ ɔ! Moo tsɔ mi” ɔ. (Yes. 6:8) Jehanɛ se hu ɔ, e sa nɛ a pee nihi nɛ ke e hí kulaa a, a sɛ gba si himi mi jeha enyɔ nɛ a ngɛ blɔ gbami nítsumi ɔ hu tsue, ke e hí kulaa a, jeha enyɔ nɛ a pui mi.

• Bɔnɛ A Plɛɔ Kɛ Yaa: Ke a peeɔ sukuu nɛ ɔ ngɛ nyɛ ma a mi ɔ, a kɛ nihi nɛ a suɔ kaa a maa ya eko ɔ peeɔ kpe ngɛ ligbi kake kpe klɛdɛɛ ɔ sisi. A kɛ blɔ tsɔɔmi kpahi haa ngɛ kpe nɛ ɔ sisi.

Watchtower Gilead Baiblo Sukuu

• Yi Mi Tomi: Konɛ a kɛ tsɔse blɔ gbali kɛ ni kpahi nɛ a ngɛ be tsuo sɔmɔmi nítsumi ɔ mi ɔ nɛ a sɔmɔ kaa ma se sane kpakpa fiɛɛli.

• Be Nɛ E Heɔ: Nyɔhiɔ enuɔ.

• He Nɛ A Peeɔ Ngɛ: A peeɔ ngɛ Watchtower Educational Center ngɛ Patterson, New York, U.S.A.

• Nɔ́ Nɛ A Hlaa: Nihi nɛ a ye kɛ je jeha 21 kɛ ya si 38, nɛ a baptisi mɛ jeha etɛ kɛ yaa, nɛ a sɛ gba si himi mi. E sa nɛ a pee nihi nɛ a tuɔ Blɛfo gbi, nɛ́ ke e hí kulaa a, a sɛ gba si himi mi jeha enyɔ nɛ a ngɛ blɔ gbami nítsumi ɔ hu tsue, ke e hí kulaa a, jeha enyɔ nɛ a pui mi. E sa nɛ a pee nihi nɛ a ngɛ nɔmlɔtso mi he wami kpakpa. Blɔ gbali nɛ a ngɛ sɔmɔe ngɛ ma se (nihi nɛ a ngɛ sɔmɔe kaa ma se sane kpakpa fiɛɛli hu piɛɛ he); kpokpa nɔ hyɛli; nihi nɛ a ngɛ sɔmɔe ngɛ Betel; nihi nɛ a ya Sɔmɔli A Tsɔsemi Sukuu ɔ, loo nihi nɛ a ya Baiblo Sukuu Kɛ Ha Nyumuhi Nɛ A Sɛ We Gba Si Himi Mi ɔ, loo Baiblo Sukuu Kɛ Ha Nihi Nɛ A Sɛ Gba Si Himi Mi ɔ eko kɛ a biɛ ma nyɛ ma ha ke a su níhi nɛ a ngɛ hlae ngɛ a dɛ ɔ he.

• Bɔnɛ A Plɛɔ Kɛ Yaa: Ngɛ mahi nɛ a ha asafo ɔ nítsumi he kɔni ɔ blɔ kaa e ma nyɛ maa hla nihi nɛ a ya sukuu nɛ ɔ eko ɔ mi ɔ, a kɛ nihi nɛ a suɔ kaa a maa ya eko ɔ peeɔ kpe ngɛ kpe ngua a sisi. A kɛ blɔ tsɔɔmi kpahi haa ngɛ kpe nɛ ɔ sisi. Ke a pee we kpe nɛ ɔ eko ngɛ ma nɛ o ngɛ mi ɔ nɔ nɛ o suɔ kaa o maa ya sukuu nɛ ɔ eko ɔ, o ma nyɛ maa ngma kɛ ya nyɛ asafo ɔ nítsumi he kɔni ɔ kɛ hla níhi a mi.

Asafo ɔ Nítsumi He Kɔni Ajla Toli Kɛ A Yihi A Sukuu

• Yi Mi Tomi: Konɛ a kɛ ye bua nihi nɛ a ngɛ sɔmɔe kaa Asafo ɔ Nítsumi He Kɔni Ajla Toli ɔ nɛ a nyɛ nɛ a hyɛ nítsumihi nɛ yaa nɔ ngɛ Betel wehi a mi ɔ a nɔ, nɛ a hyɛ bɔnɛ asafo ɔmɛ a sɔmɔmi nítsumi, kɛ kpokpa nɔ hyɛli kɛ kpokpa ngua nɔ hyɛli a nítsumihi, kɛ womihi a sisi tsɔɔmi, kɛ a fiami, kɛ a manemi, kɛ nítsumi kpahi ngɛ nɔ yae ha a nɔ.—Luka 12:48b.

• Be Nɛ E Heɔ: Nyɔhiɔ enyɔ.

• He Nɛ A Peeɔ Ngɛ: A peeɔ ngɛ Watchtower Educational Center ngɛ Patterson, New York, U.S.A.

• Nɔ́ Nɛ A Hlaa: Asafo ɔ Nítsumi He Kɔni Ajla Toli ɔmɛ a mi bi loo nɔ nɛ a hla lɛ kaa e pee a kpɛti nɔ kake ji nihi nɛ yaa.

• Bɔnɛ A Plɛɔ Kɛ Yaa: Nɔyemi Kuu ɔ lɛ tsɔɔ nyɛmimɛ nyumuhi kɛ a yihi nɛ a he su nɛ a ma nyɛ maa ya sukuu nɛ ɔ eko.

[Sisi ningmahi]