The Wonders of Creation Reveal God’s Glory
Nihi fuu a bua jɔɔ ke a ngɛ adebɔ níhi hyɛe. Se nihi bɔɔ pɛ nɛ a yɔseɔ kaa adebɔ níhi tsɔɔ wɔ wa Bɔlɔ Ngua a susumi ngɛ níhi a he, kɛ bɔnɛ e nuɔ níhi a he ha. (Rom. 1:20) Blema lokoo ɔ, David kase Yehowa he ní kɛ gu Yehowa Munyu ɔ nɔ. Se e gu Mawu nibɔ níhi hu a nɔ kɛ “na” Yehowa, nɛ e hɛ lɛ kɛ su e he. (La 8:3, 4) Video nɛ e yi ji, The Wonders of Creation Reveal God’s Glory (Adebɔ Níhi Nɛ Ngɛ Nyakpɛ ɔ Jeɔ Mawu Hɛ Mi Nyami ɔ Kpo) ɔ maa ye bua wɔ, wa bimɛ, kɛ wa Baiblo kaseli konɛ wa kpa Yehowa nibɔ ní komɛ a si nɛ waa na bɔnɛ wa Bɔlɔ Ngua a e suhi, kɛ e ní peepeehi ngɛ ha konɛ lɔɔ nɛ ha waa hɛ wɔ kɛ su e he. Ke o hyɛ video ɔ ta a, moo hyɛ kaa o ma nyɛ ma ha sane bimihi nɛ nyɛɛ se nɛ ɔ a heto lo.
(1) Mɛni blɔ nɔ bɔnɛ je mluku ɔ klemi ngɛ ha, kɛ bɔnɛ a to níhi a he blɔ nya ngɛ mi pɛpɛɛpɛ ha a, ha nɛ hɛsa nɛ o ngɛ ha Yehowa a mi wa ngɛ? (Yes. 40:26) (2) Ke wa kpa nyu si saminya a, mɛni wa ma nyɛ maa kase ngɛ Nɔ nɛ pee nyu ɔ he? (Kpoj. 14:7) (3) Ngɛ mɛni blɔ nɔ bɔnɛ zugba a klemi ngɛ ha, kɛ blɔ nɛ ngɛ e kɛ pu ɔ a kpɛti ɔ tsɔɔ kaa Yehowa ngɛ nile? (4) Mɛni nyɔhiɔ ɔ tsuɔ? (La 89:37) (5) Mɛni blɔ nɔ Yehowa gu kɛ bɔ adesa konɛ e ná bua jɔmi ngɛ e si himi mi? (6) Mɛni ji DNA? (La 139:16) (7) Ngɛ mɛni blɔ nɔ nɛ e slo adesahi ngɛ níhi tsuo nɛ Yehowa bɔ ngɛ zugba a nɔ ɔ a he? (1 Mose 1:26) (8) Kɛ o susu kaa je ehe ɔ mi maa hi ha kɛɛ?
Ní Kpahi Nɛ Piɛɛ He: (9) Kɛ colour slɔɔtohi plɛ kɛ ba kɛɛ? (10) Mɛni blɔ nɔ nyu guɔ kɛ yeɔ he wami nɛ gblaa nɔ́ kɛ baa zugba nɛ ji gravity ɔ nɔ nɛ e nyɛɔ kuɔɔ kɛ ya suɔ tsohi a yi mi ploplooplo? (11) Mɛni nyu tsuɔ ngɛ nɔmlɔtso ɔ mi? (12) Mo ha nɔ hyɛmi níhi nɛ tsɔɔ kaa kake peemi ngɛ níhi nɛ wami ngɛ a mi ɔ a kpɛti. (13) Mɛni blɔ nɔ adebɔ níhi gu kɛ le kaa e sa nɛ a bla kɛ pee níhi? (14) Mɛni ji “golden angle,” nɛ mɛni blɔ nɔ wa guɔ kɛ naa ngɛ nibɔ níhi a he?
“Nyɛɛ Hyɛ” Yehowa Nine Nya Nítsumi: Yesu wo wɔ he wami kaa ‘waa hyɛ hiɔwe lohwe pɛlitsɛmɛ, kɛ mɔmɔhi.’ (Mat. 6:26, 28) Ke wa peeɔ jã a, lɔɔ ma ha nɛ hemi kɛ yemi, kɛ hɛ kɛ nɔ fɔmi nɛ wa ngɛ ngɛ wa Bɔlɔ ɔ mi ɔ mi maa wa, nɛ enɛ ɔ ma ha nɛ wa maa na kaa wa Bɔlɔ ɔ ngɛ nile, e ngɛ he wami nɛ́ e kɛ maa baa e webi a yi, nɛ e ngɛ suɔmi hulɔ. E sa nɛ wa ná deka nɛ waa bɔ mɔde nɛ wa yɔse nyakpɛ níhi nɛ Yehowa bɔ ɔ, nɛ wa susu níhi nɛ nibɔ ní nɛ ɔmɛ tsɔɔ wɔ ngɛ wa Mawu ɔ he ɔ a he mohu pe nɛ wa ma ha nɛ je nɛ ɔ mi nítsumihi ma je wa juɛmi kɛ je a nɔ.—La 19:1.