Sika Nyafii Pe Kulaa Enyɔ

Blɔ kake nɛ e he hia nɛ wa guɔ nɔ kɛ fiɔ Matsɛ Yemi ɔ he níhi a se ji sika nɛ waa kɛ yeɔ bua je kɛ wɛ fiɛɛmi nítsumi ɔ. Se ke wa be sika tsɔ hu nɛɛ?

Ligbi ko ɔ, Yesu na yalɔyo ohiatsɛ ko nɛ e kɛ sika nɛ a yeɔ ɔ mi nyafii enyɔ ngɛ sɔlemi we ɔ tó tsumi daka a mi woe. Suɔmi nɛ e ngɛ kɛ ha Yehowa a wo lɛ he wami nɛ e kɛ ‘e we ohia a mi ní tsuo ba wo mi.’ (Mar. 12:41-44) Yesu yɔse nɛ e tsɔɔ kaa sika nɛ yalɔyo ɔ kɛ wo tó tsumi daka a mi ɔ kle wawɛɛ ngɛ Mawu hɛ mi. Jã nɔuu kɛ̃ nɛ Kristofoli nɛ a hi si blema a hyɛ we blɔ kaa Kristofoli nɛ a ngɛ sika a pɛ nɛ e sa kaa a ye bua kɛ fi sɔmɔmi nítsumi ɔ se. Bɔfo Paulo de ngɛ nyɛmimɛ nɛ a ngɛ Makedonia a he ke, “nɔ́ ko be a dɛ, se kɛ̃ ɔ, a kɛ hɛdɔ babauu kpa wɔ pɛɛ ke wa ha nɛ mɛ hu a pee a blɔ nya bɔnɛ a ma nyɛ.”—2 Kor. 8:1-4.

Enɛ ɔ heje ɔ, ke “sika nɛ a yeɔ ɔ mi nyafii pe kulaa” pɛ po nɛ waa kɛ ye bua a, e sa nɛ wa kai kaa ke a bua sika nyafii fuu nya a, e peeɔ sika ngua. Ke wa je wa tsui mi kɛ ha nɔ́ ɔ, e saa wa hiɔwe Tsɛ nɛ e haa nɔ nɔ́ faa a hɛ mi, ejakaa “Mawu suɔ nɔ nɛ haa nɔ́ kɛ tsui mi jɔmi.”—2 Kor. 9:7.