O Kɛ Nile Nɛ Tsu Ní Ngɛ Fiɛɛmi Nítsumi ɔ Mi
1. Mɛni heje nɛ e sa kaa waa kɛ nile nɛ tsu ní ngɛ fiɛɛmi nítsumi ɔ mi ɔ?
1 Mawu sɔmɔli ngɛ fiɛɛe ngɛ “yayami peeli, kɛ nihi nɛ a tue wa a a kpɛti” kaa ‘jijɔhi ngɛ ogbeteehi a kpɛti.’ (Mat. 10:16; Filip. 2:15) Wa nuɔ amaniɛ bɔmihi nɛ ngɛ gbeye a he. Nihi buaa a he nya kɛ ya peeɔ basabasa, nɛ nihi hu nuɔ nihi pani nya kɛ jee. Enɛ ɔ tsɔɔ kaa nimli yayamihi ngɛ ‘yayami pee kɛ ngɛ nɔ bee.’ (2 Tim. 3:13) Mɛni Baiblo sisi tomi mlaahi nɛ ke waa kɛ tsu ní ɔ, e maa ye bua wɔ nɛ waa kɛ nile nɛ tsu ní ngɛ fiɛɛmi nítsumi ɔ mi?—Mat. 10:16.
2. Mɛni si himihi ma ha nɛ eko ɔ, wa maa je he nɛ wa ngɛ fiɛɛe ngɛ ɔ kɛ ya he kpa?
2 O Kɛ Nile Nɛ Tsu Ní: Abɛ 22:3 ɔ ma nɔ mi kaa nile ngɛ mi kaa wa maa tu haomi nya fo nɛ ‘waa laa wa he.’ O hɛ nɛ hi o he nɔ! Eko ɔ, tue mi jɔmi si himi nɛ ngɛ kpɔ ko mi ɔ, ma nyɛ ma tsake tlukaa. Eko ɔ, o maa na nɛ polisihi a he bɔni hiɛmi ngɛ lejɛ ɔ, aloo nihi babauu bua a he nya ngɛ gbɛjegbɛ ko he. Be komɛ ɔ, wetsɛ ko nɛ o ngɛ fiɛɛe ha lɛ nɛ e mi mi jɔ ɔ, ma nyɛ maa bɔ mo kɔkɔ kaa o je lejɛ ɔ kɛ ya he kpa. Ke e ba jã a, e sɛ nɛ o lilaa si, mohu ɔ, nile ngɛ mi kaa o maa je amlɔ nɔuu nɛ o ya fiɛɛ ngɛ he kpa.—Abɛ 17:14; Yoh. 8:59; 1 Tes. 4:11.
3. Ngɛ mɛni blɔ nɔ nɛ sisi tomi mlaa nɛ ngɛ Fiɛlɔ 4:9 ɔ kɔɔ wa fiɛɛmi nítsumi ɔ he ngɛ?
3 O Kɛ Nihi Nɛ Ya Fiɛɛmi: Fiɛlɔ 4:9 ɔ tsɔɔ kaa ‘ni enyɔ hi pe nɔ kake.’ Eko ɔ, mo nɔ kake o yaa fiɛɛmi daa nɛ o kɛ haomi ko kpi, se amlɔ nɛ ɔ, anɛ e hi kaa nɔ ko maa pee jã lo? Ngɛ he komɛ ɔ, a ma nyɛ maa pee jã. Se ngɛ he komɛ hu ɔ, oslaa ngɛ he kaa nyɛmiyo ko loo nɔ wayoo ko pɛ maa fiɛɛ ngɛ sinyahi a nya, titli ke diblii wo. Ngɛ mɔde nɛ wa bɔɔ kaa wa maa yu wa he ngɛ oslaahi a he ɔ tsuo se ɔ, níhi a si kpami tsɔɔ kaa ke waa kɛ nɔ ko nɛ e hɛ hii e he nɔ ya fiɛɛmi ɔ, se nami ngɛ he wawɛɛ. (Fiɛlɔ 4:10, 12) O hɛ nɛ hi nihi nɛ o kɛ mɛ ngɛ fiɛɛe ngɛ kpɔ kake mi ɔ a he. Loko o maa je kpɔ ɔ mi ɔ, moo bɔ mɔde nɛ o ha nihi nɛ o kɛ mɛ ngɛ fiɛɛe ngɛ kpɔ ɔ mi ɔ a ti nɔ ko lemi.
4. Mɛni wa ma nyɛ maa pee kɛ po wa nyɛmimɛ nɛ a ngɛ asafo ɔ mi ɔ tsuo a he piɛ?
4 Akɛnɛ asafo mi nikɔtɔma amɛ ji nihi nɛ a ‘hyɛɔ wa nɔ’ heje ɔ, a daa níhi nɛ yaa nɔ ngɛ kpɔ ɔ mi ɔ nɔ nɛ a kɛ blɔ tsɔɔmi nɛ sa haa wɔ. (Heb. 13:17) Ke wa ba wa he si nɛ wa bu mɛ tue ɔ, Yehowa maa jɔɔ wɔ. (Mika 6:8; 1 Kor. 10:12) Nyɛ ha nɛ wɔ tsuo nɛ wa ji Mawu sɔmɔli ɔ waa kɛ nile nɛ ye odase kɛ pi si ngɛ wa zugba kpɔ ɔ mi be tsuaa be.