Mɛni Nɔ O “Daa Kɛ Náa Bua Jɔmi Wawɛɛ”?

1. Mɛni nɔ wa daa kɛ náa bua jɔmi wawɛɛ ngɛ nyɔhiɔ tsuaa nyɔhiɔ nyagbe?

¹ Ngɛ nyɔhiɔ tsuaa nyɔhiɔ nyagbe ɔ, ke a de nɔ tsuaa nɔ kaa e kɛ e fiɛɛmi yami he akɔtaa bumi nɛ ha a, mɛni nɔ o “daa kɛ náa bua jɔmi wawɛɛ”? (Gal. 6:4, NW) Wa ji blɔ gbali klɛdɛɛ nɛ wa haa ngmlɛfia 130 jio, wa ji fiɛɛli nɛ a kplɛɛ wa nɔ kaa wa ha hɛngmɛfia 15 jio, e sa nɛ wɔ tsuo wa bua nɛ jɔ kaa wa nyɛ nɛ waa kɛ wa tsui tsuo ngɛ Yehowa sɔmɔe.—La 100:2.

2. Mɛni heje nɛ e sa kaa waa bɔ mɔde wawɛɛ ngɛ Yehowa sɔmɔmi ɔ mi ɔ?

² Akɛnɛ Yehowa ji je mluku ɔ Matsɛ heje ɔ, e sa nɛ waa kɛ wa níhi nɛ hi pe kulaa nɛ ha lɛ. (Mal. 1:6) Akɛnɛ wa suɔ Yehowa heje ɔ, wa jɔɔ wa he nɔ kɛ ha lɛ kaa wa maa pee e suɔmi nya ní. Enɛ ɔ he ɔ, ke ligbi ɔ loo nyɔhiɔ ɔ ba nyagbe, nɛ wa ná nɔ mi mami kaa waa kɛ wa “niba ní tsuo mi kekleekle nɔ́” nɛ ji wa be, nile nɛ wa ngɛ, kɛ wa he wami tsu ní ngɛ Yehowa sɔmɔmi mi ɔ, lɛɛ wa ti nɔ tsuaa nɔ ngɛ nɔ́ nɛ e maa da nɔ kɛ ná bua jɔmi wawɛɛ. (Abɛ 3:9) Se ke wa he nile de wɔ ke wa ma nyɛ maa pee pe jã a, lɛɛ e sa kaa waa hyɛ bɔnɛ wa ma plɛ kɛ ya wa hɛ mi ha.—Rom. 2:15.

3. Mɛni heje nɛ nile be mi kaa waa kɛ wa he maa to ni kpahi a he ɔ?

³ ‘E Sɛ Nɛ Waa Ngɔ Wa He Ngɔ To Ni Kpahi A He’: Nile be mi kaa waa kɛ wa he maa to ni kpahi a he loo waa kɛ nɔ́ nɛ wa peeɔ amlɔ nɛ ɔ nɛ to nɔ́ nɛ wa pee benɛ wa ngɛ nɔmlɔtso mi he wami ɔ he. Si himi nyɛɔ tsakeɔ. E slo nɔ́ nɛ wa ti nɔ tsuaa nɔ ma nyɛ maa pee. Ke waa kɛ wa he toɔ nihi a he ɔ, nɔ́ nɛ pɔɔ bami ji wa hɛ kɔɔ wa nyɛmimɛ a nɔ, loo wa susuɔ kaa se nami be wa he. (Gal. 5:26; 6:4) Yesu kɛ nihi tui ni kpahi a he. Mohu ɔ, e jeɔ nihi a yi ngɛ níhi nɛ a nyɛ nɛ a pee ɔ nya.—Mar. 14:6-9.

4. Mɛni nɔ́ ko nɛ he hia wa ma nyɛ maa kase ngɛ abɛ nɛ Yesu bu kɛ kɔ sika a he ɔ mi?

⁴ Ngɛ abɛ nɛ Yesu bu kɛ kɔ sika a he ɔ mi ɔ, a ha ní tsulɔ tsuaa ní tsulɔ sika ‘bɔnɛ e ma nyɛ maa hyɛ nɔ.’ (Mat. 25:15) Benɛ nyɔmtsɛ ɔ kpale kɛ ba nɛ e ba hyɛ ní nɛ a tsu ɔ, e je nihi nɛ a nyɛmi kɛ a si fɔfɔɛ ngmɛ mɛ blɔ nɛ a nyɛ nɛ a tsu ní wawɛɛ ɔ a yi, nɛ a kɛ nyɔmtsɛ ɔ ná bua jɔmi. (Mat. 25:21, 23) Ke wɔ hu waa kɛ wa he wo Matsɛ Yemi fiɛɛmi nítsumi ɔ mi ɔ, wa ma nyɛ ma ná nɔ mi mami kaa Yehowa maa kplɛɛ wa nɔ, nɛ wa ma ná nɔ́ ko maa da nɔ kɛ ná bua jɔmi!