Nyɛmimɛ Nyumuwi, Anɛ Nyɛ Ngɛ Mɔde Bɔe Lo?
1. Mɛni be nɛ e sa kaa nyumuyo nɛ ngɔ blɔ tsɔɔmi nɛ ngɛ 1 Timoteo 3:1 ɔ kɛ tsu ní?
1 “Ke nɔ ko suɔ kaa e maa hyɛ Mawu asafo nɔ ɔ, e ná nítsumi kpakpa.” (1 Tim. 3:1) Munyu nɛ ɔ woɔ nyɛmimɛ nyumuhi he wami konɛ a bɔ mɔde nɛ a he nɛ su kɛ ha he blɔhi ngɛ asafo ɔ mi. Anɛ e sa kaa o wa loko o pee jã lo? Ngɛ anɔkuale mi ɔ, amlɔ nɛ ɔ nɛ o wɛ lolo ɔ ji be nɛ e sa kaa o bɔ mɔde ngɛ Mawu jami mi. Ke o pee jã a, o ma ná tsɔsemi, nɛ ke o kɛ tsɔsemi ɔ tsu ní ɔ, a ma nyɛ maa hla mo kaa asafo mi sɔmɔlɔ ngɛ be nɛ sa mi. (1 Tim. 3:10) Ke o ji nyumuyo nɛ a baptisi mo ɔ, mɛni blɔ nɔ o maa gu kɛ bɔ mɔde nɛ o he nɛ su kɛ ha nítsumi ngɛ asafo ɔ mi?
2. Mɛni blɔ nɔ o maa gu kɛ ná he kɛ afɔle sami su, nɛ kɛ o ma plɛ kɛ je su nɛ ɔ kpo ha kɛɛ?
2 He Kɛ Afɔle Sami Su: Mo kai kaa o ngɛ nítsumi kpakpa hlae, se pi biɛ. Enɛ ɔ he ɔ, mo ná he bua jɔmi kaa o maa ye bua nyɛmimɛ Kristofoli. Blɔ kake nɛ o maa gu nɔ kɛ pee enɛ ɔ ji kaa o ma susu nɔ hyɛmi nɔ́ kpakpa nɛ Yesu pee ɔ he. (Mat. 20:28; Yoh. 4:6, 7; 13:4, 5) Moo sɔle kɛ bi Yehowa nɛ e ye bua mo konɛ o ná ni kpahi a he bua jɔmi. (1 Kor. 10:24) Anɛ o ma nyɛ maa ye bua nihi nɛ a ngɛ asafo ɔ mi nɛ a wa aloo a be he wami ɔ lo? Ke a ngɛ nihi hlae nɛ a ya hu aloo a tsu nítsumi kpahi ngɛ Matsɛ Yemi Asa a nɔ ɔ, anɛ o ngɔɔ o he kɛ haa lo? Ke nɔ ko ngɛ Teokrase Sɔmɔmi Sukuu ɔ mi nítsumi nɛ e nyɛ we nɛ e ba a, anɛ o ma nyɛ maa ngɔ o he kɛ ha nɛ o tsu lo? O maa na kaa o he nɛ o kɛ maa sã afɔle kɛ ha ni kpahi ɔ ma ha nɛ o ná bua jɔmi.—Níts. 20:35.
3. Kɛ nɔ ko nane nɛ maa pi si ngɛ Mawu jami mi ɔ he hia ha kɛɛ, nɛ mɛni blɔ nɔ o maa gu kɛ pee jã?
3 O Si Dami Ngɛ Mawu Jami Mi: Ke sɔmɔlɔ nɛ ngɛ asafo ɔ mi ɔ nane pi si ngɛ Mawu jami mi ɔ, lɔɔ he hia wawɛɛ pe nyɛmi klɛdɛɛ ko aloo dloomi nike ní ko nɛ e ngɛ. Nɔ nɛ nane pi si ngɛ Mawu jami mi ɔ naa níhi kaa bɔnɛ Yehowa kɛ Yesu hu naa níhi ɔ. (1 Kor. 2:15, 16) E jeɔ “Mawu mumi ɔ yiblii” ɔ kpo. (Gal. 5:22, 23) E fiɛɛɔ kɛ kã, nɛ e kɛ Matsɛ Yemi ɔ he níhi peeɔ nɔ́ titli ngɛ e si himi mi. (Mat. 6:33) O ma nyɛ ma ná Mawu jami mi su kpakpahi kɛ gu dɛhe nikasemi nɛ o maa pee daa a nɔ. Baiblo ɔ nɛ o maa kase daa ligbi, Hwɔɔmi Mɔ ɔ kɛ Awake! nɛ o maa kane, kɛ o he nɛ o maa dla kɛ ha asafo mi kpehi ɔ hu maa ye bua mo. (La 1:1, 2; Heb. 10:24, 25) Be nɛ bɔfo Paulo ngɛ Timoteo ga woe konɛ e ya e hɛ mi ngɛ Mawu jami mi ɔ, e ngma ke: ‘Hyɛ o ní tsɔɔmi saminya.’ (1 Tim. 4:15, 16) Enɛ ɔ he ɔ, ke o ngɛ nítsumi ngɛ Teokrase Sɔmɔmi Sukuu ɔ mi ɔ, bɔɔ mɔde nɛ o tsu he ní saminya. Moo ya fiɛɛmi daa, nɛ o dla o he saminya loko o ya. Moo ngɔ mumi mi otihi kaa blɔ gbami nítsumi ɔ, Betel sɔmɔmi, aloo Baiblo Sukuu Kɛ Ha Nyumuhi Nɛ A Sɛ We Gba Si Himi Mi nɛ o maa ya a kɛ ma o hɛ mi, nɛ o bɔ mɔde kaa o maa su he. Ke o nane pi si ngɛ Mawu jami mi ɔ, e maa ye bua mo nɛ o maa ‘yu o he kɛ je nihewi a we akɔnɔ yaya a he kulaa.’—2 Tim. 2:22.
4. Mɛni se nami nɛ ngɛ anɔkuale yemi kɛ he kɛ nɔ fɔmi he?
4 He Kɛ Nɔ Fɔ Mi Kɛ Anɔkuale Yemi: Akɛnɛ nyɛmimɛ nyumuhi nɛ a hla konɛ a gba niye ní kɛ ha nihi nɛ a hia yemi kɛ buami ngɛ kaseli ɔmɛ a be ɔ mi ɔ ji nyumuhi nɛ a ngɛ “biɛ kpakpa” heje ɔ, e ngɛ heii kaa a ngɛ he kɛ nɔ fɔmi ngɛ a mi, nɛ a le hu kaa a yeɔ anɔkuale, lɔɔ he ɔ, bɔfo ɔmɛ yi tsui ejakaa a le kaa nyumu nɛ ɔmɛ ma nyɛ ma tsu ní ɔ saminya. Enɛ ɔ ha nɛ bɔfo ɔmɛ ngɔ a juɛmi kɛ ma níhi nɛ a he hia amɛ a nɔ. (Níts. 6:1-4) Lɔɔ he ɔ, ke a ha mo nítsumi ngɛ asafo ɔ mi ɔ, moo ngɔ o he wami tsuo kɛ tsu. Moo kase Noa nɛ e kɛ blɔ tsɔɔmi nɛ a kɛ ha lɛ kaa e kɛ kpɛ daka a tsu ní ɔ. (1 Mose 6:22) Yehowa bua jɔ anɔkuale yemi he wawɛɛ, nɛ anɔkuale yemi tsɔɔ bɔnɛ nɔ ko nane pi si ngɛ Mawu jami mi ha.—1 Kor. 4:2; hyɛ daka nɛ ji, “Se Namihi Nɛ Ngɛ Tsɔsemi He” ɔ.
5. Mɛni heje nɛ e sa kaa nyɛmimɛ nyumuwi nɛ a bɔ mɔde konɛ a he nɛ su kɛ ha nítsumihi ngɛ asafo ɔ mi ɔ?
5 Kaa bɔnɛ a gba kɛ fɔ si ɔ, Yehowa kɛ oya yemi ngɛ nihi a nya buae. (Yes. 60:22) Daa jeha a, a baptisiɔ nihi maa pee 250,000. Akɛnɛ ni hehi fuu ngɛ anɔkuale ɔ mi bae heje ɔ, e he hia nɛ wa ná nyumuhi nɛ a sa, nɛ a nane pi si ngɛ Mawu jami mi konɛ a hyɛ asafo ɔ nɔ. Nítsumi babauu ngɛ nɛ wa ma tsu ngɛ Yehowa sɔmɔmi mi amlɔ nɛ ɔ pe daa. (1 Kor. 15:58) Nyɛmimɛ nyumuwi, anɛ nyɛ ngɛ mɔde bɔe konɛ nyɛ he nɛ su kɛ ha nítsumihi ngɛ asafo ɔ mi lo? Ke jã a, lɛɛ nyɛ ná nítsumi kpakpa niinɛ!
[Bua jɔmi munyu nɛ a ma nɔ mi ngɛ bafa 2]
Akɛnɛ ni hehi fuu ngɛ anɔkuale ɔ mi bae heje ɔ, e he hia nɛ wa ná nyumuhi nɛ a sa, nɛ a nane pi si ngɛ Mawu jami mi konɛ a hyɛ asafo ɔ nɔ
[Daka ngɛ bafa 3]
Se Namihi Nɛ Ngɛ Tsɔsemi He
Ke asafo mi nikɔtɔmahi ngɔ nítsumi kɛ wo nyɛmimɛ nyumuwi nɛ a sa a dɛ, nɛ a tsɔse mɛ ɔ, nyumuwi nɛ ɔmɛ náa he se. Be ko benɛ a kpa asafo mi kpe ɔ, kpokpa nɔ hyɛlɔ ko kɛ fiɛɛlɔ ko hii si ngɛ munyu tumi kpoku ɔ nɔ, nɛ e ngɛ fiɛɛlɔ ɔ he wami woe. E yɔse kaa jokuɛ nyumuyo ko daa si nɛ e ngɛ mɛ mlɛe, lɔɔ he ɔ, kpokpa nɔ hyɛlɔ ɔ bi jokuɛ ɔ kaa e ngɛ hlae nɛ e kɛ lɛ maa tu munyu lo? Jokuɛ nyumuyo ɔ tsɔɔ nya kaa a ngɔ nítsumi kɛ wo e dɛ kaa be tsuaa be nɛ a ma kpa asafo mi kpe ɔ, e dla munyu tumi kpoku ɔ nɔ. E fɔli pee klaalo nɛ a yaa we mi, se e sume nɛ e maa je be mi nɛ e tsu we nítsumi nɛ a kɛ wo e dɛ ɔ. Kpokpa nɔ hyɛlɔ ɔ je kpoku ɔ nɔ ha lɛ. Kpokpa nɔ hyɛlɔ ɔ de ke: “Asafo mi nikɔtɔmahi ngɛ jamɛ a asafo ɔ mi ɔ kɛ nítsumihi pɔɔ nyɛmimɛ nyumuwi a dɛ womi nɛ a kɛ tsɔseɔ mɛ. Enɛ ɔ he ɔ, e be nyakpɛ kaa ke i ya slaa asafo ɔ, a pɔɔ nyɛmimɛ nyumuwi a yi jemi konɛ a sɔmɔ kaa asafo mi sɔmɔli.”